Romans 16 - Yak'usda Ooghuni

Paul, Rome dilhtsꞌine hadih ubúlhni

¹ ꞋEt Cenchrea keyoh Jesus Christ gha ꞌilhozdílne butoh ꞌilhoghun tsꞌeke unzoo-un, Phoebe huyúlhni, ꞌen ꞌahoolhyiz wheni neba ꞌutꞌen-un.

² Nohtsꞌóozya de hoonúhtꞌiꞌ whe Jesus Christ booziꞌ gha yoh daóolhtelh. Yakꞌusda oochꞌeꞌne ulhi, whuz unꞌa tsꞌihꞌun unꞌa nohba hoontꞌoh ꞌutihnelh huba. Ndai la ye ndunidzít-i cha be óola oohtꞌen. Lhanne la ꞌitꞌen whe ꞌuntꞌoh. Si cha sla ꞌitꞌen.

³ Priscilla ꞌinkꞌez Aquila sba bózoo budóhniꞌ. Christ Jesus tsꞌutni-un, ꞌenne sulh ꞌúhutꞌen inleꞌ.

⁴ ꞋEnne hiye khúna-i, ꞌi ꞌantsꞌi buba ꞌuntꞌoh whe suhúlhyih inleꞌ. ꞋEt ndahúja huwa, si ꞌinkꞌez ꞌudun yun kꞌut whutꞌenne Jesus Christ ooba ꞌilhozdílne, tsꞌiyawh musi butsꞌútni.

⁵ Mbene la Christ ooba buyoh ꞌilhozdílne, ꞌenne cha tsꞌiyawh sba bózoo budóhniꞌ. Skꞌeke Epaenetus ꞌen cha sba bózoo dóhniꞌ. ꞋEn Achaia yun kꞌut ꞌudechoo Christ ooba ꞌalhaꞌ yintꞌoh suliꞌ-un.

⁶ Mary ꞌen cha sba bózoo dóhniꞌ. ꞋEn cha tube ncha-i be nela ꞌitꞌen ínleꞌ.

⁷ Andronicus ꞌinkꞌez Junias ꞌenne cha sba bózoo budóhniꞌ. Snatneke ꞌuhintꞌoh, sulh ꞌáhudanꞌaꞌ ínleꞌ. Whelꞌaꞌne butoh dune ncháne hinli ꞌinkꞌez stso daꞌ Christ hitsꞌu nálhꞌa inleꞌ.

⁸ Amplias ꞌen cha Jesus Christ uniyalh-un ꞌuntꞌoh. Tube ookꞌesiꞌ, sba bozoo dóhniꞌ.

⁹ Urbanus dune, ꞌen cha nebulh ꞌítꞌen Christ be ꞌutꞌen ꞌutsꞌulhꞌen whe ꞌinkꞌez skꞌeke Stachys ꞌenne cha sba bózoo budóhniꞌ.

¹⁰ Christ uniyálh-un, Apeles, tsꞌiyanne ba unzóo-un, ꞌinkꞌez Aristobulus ꞌet ooyoh dilhtsꞌíne, ꞌenne cha sba bózoo budóhniꞌ.

¹¹ Snadun Herodion ꞌinkꞌez mbene la Narcisus ooyoh dilhtsꞌíne Jesus Christ unidúlhne, ꞌenne cha sba bózoo budóhniꞌ.

¹² Tryphaena ꞌinkꞌez Tryphosa ꞌenne cha Jesus Christ be ꞌutꞌen ꞌuhulhꞌen, ꞌinkꞌez skꞌeke Persis tube ncha-i be Jesus Christ be ꞌutꞌen tube yughaiznaꞌ ínleꞌ, ꞌenne cha sba bózoo budóhniꞌ.

¹³ Rufus ꞌen ꞌukꞌenus soo Jesus Christ ba ꞌutꞌén-un, ooloo cha ꞌantsꞌi sloo leꞌ ꞌúntꞌoh, ꞌenne cha sba bózoo budóhniꞌ.

¹⁴ Asyncritus, Phlegon, Hermas, Patrobas, Hermes, ꞌet ꞌonghohne neulhutsinke bubulh ꞌútꞌenne, ꞌenne cha sba bózoo budóhniꞌ.

¹⁵ Philologus ꞌinkꞌez Julia cha, Nereus ꞌinkꞌez bulhtus cha, ꞌinkꞌez Olympas ꞌinkꞌez mbene la Yakꞌusda oochꞌeꞌne bubulh ꞌútꞌenne, tsꞌiyawh sba bózoo budóhniꞌ.

¹⁶ ꞋEt bózoo lhudáhni de, ꞌet sih lubeshi ooghu hooloh-i be nalhudoohtsꞌoos. ꞋEt mbene la njan Christ gha ꞌilhozdílne, Rome whutꞌenne bózoo nohtsꞌútni.

Paul ubúlhni, mbene la Yakꞌusda ooghuni ꞌatsꞌun unꞌa wheyodulhꞌéhne buka tse hólhleꞌ

¹⁷ Sulhutsinke njan huwun nohgha dúsni, nohtoh mbene la whunohodalhꞌeꞌ whuchꞌaz yálhdukne, ꞌenne bugha lhchꞌaz nedutahdulh ꞌinkꞌez nohba hoontsiꞌ tileh. ꞋEt nduntꞌóhne buka huwolhleꞌ ꞌinkꞌez buchꞌaz naóolhꞌah.

¹⁸ ꞋEt duntꞌóhne dune neMoodihti Jesus Christ hikꞌú nulheꞌustꞌenne. Dichꞌoh kꞌunꞌa ꞌuhutꞌen, ꞌinkꞌez ntsꞌenꞌa la dichꞌoh hukwaꞌ huninzun hukwꞌuneꞌ ꞌutꞌenne. Nanuhonaꞌah whe khuni unzoo-i be nohbulh yáhalhduk, ꞌet hukwa tse lhuhoolihne whuz unꞌa nabontiꞌah.

¹⁹ Ntsꞌenꞌa la Jesus Christ be ꞌutꞌen kꞌoh hukwꞌúneꞌ ꞌahtꞌén-un tsꞌiyanne whulh ꞌúdantsꞌo. ꞋEt huwa tube nohba hoonústꞌiꞌ. Whunihne oolhleꞌ nohba hukwaꞌ nuszun ꞌutꞌen unzoo-i ghun, ꞌinkꞌez la lubeshi kꞌúnulheꞌzoohtꞌen.

²⁰ Yakꞌusda ꞌen whudizghel-un negha whuꞌaih-un, ꞌaw lhotuszit whe Satan nohketlꞌah gak yutilhtselh. ꞋEt nohba tenadusli neMoodihti Jesus Christ ye únzoo-i, ꞌi nohbulh ꞌóotꞌeꞌ ha.

²¹ Timotheus, sulh ꞌútꞌen-un, bozoo nohúlhni. ꞋInkꞌez snatneke Lucius, Jason, Sosipater, ꞌenne cha bózoo nohuhútni.

²² Tertius suhútni, si ꞌusja ndi ꞌudustlꞌus Paul ba ꞌukꞌu neízusguz. Si cha bózoo nohdúsni.

²³ Gaius, ꞌen duyoh dásunilhti, ꞌen cha bózoo nohúlhni. ꞋEn ooyoh ꞌet Jesus Christ unidúlhne ꞌilhuhozdil. Erastus, ꞌet keyoh whutꞌi sooniya ghundli-un, ꞌinkꞌez neulhutsin Quartus, ꞌenne cha bózoo nohuhútni.

²⁴ NeMoodihti Jesus Christ ye únzoo-i tsꞌiyawh nohbulh óotꞌeꞌ. ꞋEt ndo honeh.

Paul, ꞌawhuz ꞌilhoghun budutánelh-un whuzꞌai

²⁵ Yakꞌusda uzdólhtiꞌ. ꞋEn ꞌuntꞌoh ye ulhtus-i utꞌi Jesus Christ ooba ulhtusne nohoolhtselh ha. Ntsꞌenꞌa la nohdásniꞌ whuz unꞌa ꞌutihnelh, ndet la whunohdusꞌeh Jesus Christ ooghuni unzoo-i ghun. ꞋUdaꞌ ꞌaw dune ndi khuni unzoo-i highu tꞌehonúszun. ꞋOh daꞌ Yakꞌusda ndi yun kꞌut ꞌuyinla, ꞌet whutsꞌun njan wheꞌ hoontꞌoh hooyoh-un buchꞌa nónutꞌiꞌ inleꞌ.

²⁶ ꞋEt ꞌandit tsꞌiyawh tꞌeoonidzin. ꞋInkꞌez Yakꞌusda ooghuni nus be tꞌeoonudzun-i dune didohne tsꞌiyanne tꞌehinanzin. Yakꞌusda ꞌilhiz wheni khuna-un, ꞌi khuni netlꞌa ídanꞌai, ꞌi ndi yun kꞌut dunene tsꞌiyawh tꞌéhinanzin. ꞋEt tꞌéhonínzun Jesus Christ ooghuni hiyólhchoot whe hikꞌúneꞌ ꞌootꞌen ha.

²⁷ Yakꞌusda ꞌen za whunih whe ꞌuntꞌoh. Jesus Christ ꞌen gha ꞌahoolhyiz uzdólhtiꞌ ꞌilhiz wheni. ꞋEt ndo honeh.