Romans 15 - Yak'usda Ooghuni

ꞋUyoonne dzi óolhdzooꞌ za hukwaꞌoohtꞌen

¹ Wheni mbene la Jesus Christ ba ulhtúsne, ndunne Jesus Christ ba tetsúnne bubodinꞌai leꞌ hintꞌoh, ꞌenne bula tsꞌootꞌen. ꞋAw whenichꞌoh za nedzi tsꞌilhdzooꞌ hukwa lheꞌtsꞌoostꞌen.

² ꞋIlhone tsꞌinli whe nebulh dunene bula tsꞌootꞌen. ꞋEt de la Jesus Christ ooba ulhtusne hooleꞌ.

³ Christ ꞌen ꞌaw dichꞌoh kꞌúnulheꞌitꞌel. Yakꞌusda be ꞌudustlꞌus kꞌut ꞌukꞌu núsguz whuz unꞌa ꞌitꞌen. ꞋEt ndutni, “Mbe la nchꞌaz yálhdukne ndai la hiye nchꞌaz yálhduk-i, ꞌi tsꞌiyawh si stsꞌeꞌ hutni.”

⁴ Ndet ꞌudaꞌ Yakꞌusda be ꞌudustlꞌus kꞌut ꞌukꞌehóoguz-un oogha whútsꞌo doolꞌeh ha ꞌukꞌéguz. ꞋEt whe ndet la Yakꞌusda netsꞌu hoozi-un ꞌi ooba tsꞌilhꞌi ꞌinkꞌez ooba tsꞌilhꞌi zaꞌ tsꞌintꞌoh.

⁵ Njan ꞌet nohba hukwaꞌ nuszun, Christ Jesus ꞌen ookꞌunꞌa tsꞌihꞌun unꞌa lhulh yínka dólhtsꞌiꞌ. Yakꞌusda nalhtsulyaz neba sulhꞌi, ꞌinkꞌez nedzi ílhdzoo, whuz unꞌa uncha lhtsꞌun ꞌuhtꞌoh.

⁶ Nduhtꞌen de ꞌet sih lhgha zaꞌ uznudzun ꞌinkꞌez lhgha zaꞌ lhulh yátsꞌoolhduk. ꞋEt ꞌilhoh ꞌalhgoh Yakꞌusda Jesus Christ neMoodihti ooBá uzdólhtiꞌ.

⁷ ꞋEt huwa ntsꞌenꞌa la Christ nenilhꞌen, whuz unꞌa za lhunoolhꞌen. ꞋEt ndahtꞌen de, Yakꞌusda dutálhtiꞌ.

⁸ Ndi nohdúsni, Jesus Christ Lizwifne buba neꞌutꞌen-un suliꞌ whunénoolhtun ha ndet la butsodaꞌne Yakꞌusda butsꞌu hoozi-un ꞌet ꞌalha ꞌuhoontꞌoh.

⁹ ꞋInkꞌez ꞌudun yun kꞌut whutꞌenne ꞌenne gha Yakꞌusda ye teꞌ ninzun-i yúbunilhtan, ꞌet huwa hidílhtiꞌ. Yakꞌusda be ꞌudustlꞌus kꞌut njan ndutni, “ꞋEt huwa ꞌudun yun kꞌut whutꞌenne butoh khuni ꞌalhaꞌ ꞌuntꞌoh-i be nyun nghun bubulh yaóosduk, ꞌinkꞌez nyooziꞌ ꞌi la dóstiꞌ.”

¹⁰ ꞋInkꞌez doo cha za ꞌutni, “ꞋUdun yun kꞌut whutꞌenne ꞌinkꞌez ooduneꞌne bulh whunulhni.”

¹¹ Njan cha ꞌet dutni, “ꞋUdun yun kꞌut whutꞌenne tsꞌiyawh Moodihti dúlhtiꞌ ꞌinkꞌez nohni tsꞌiyanne dúlhtiꞌ.”

¹² Isaiah be ꞌudustlꞌus kꞌut doo cha ꞌet dutni, “Jesse ꞌen ye kédinzut tileh. ꞋEn ꞌalha whusatíyalh ꞌinkꞌez ꞌudun yun kꞌut whutꞌenne bumoodih tileh. ꞋInkꞌez ndet la butsꞌu hoozi-un ꞌet huba ꞌutitꞌelh.”

¹³ ꞋEt nohba tenadusli, ndet la Yakꞌusda nohtsꞌu hoozi-un huba sulhꞌi whutoh, ꞌen gha ꞌet ncha nohdzi sóo nedinzut ndet la nohtsꞌun hoozi-un nohba ꞌalha ꞌuhoontꞌoh huwa. ꞋEt whuz unꞌa la ꞌilhiz bulh ꞌóohtꞌeꞌ, ꞌinkꞌez ndet la nohtsꞌu hoozi-un ꞌon nus ulhtus whe la huba oolhꞌeꞌ Ndoni ye úlhtus-i be nohídanꞌai huwa.

Paul ꞌudustlꞌus butsꞌo kꞌeꞌuges-i, ꞌi ghun ꞌaw lhníljut whe butso kꞌeꞌuges

¹⁴ Sulhutsinke ꞌalhaꞌ tꞌéwhunúszun lhat-un hoonzoo-un ꞌuwhulhꞌen, lhat-un cha tꞌéwhunúhzun, ꞌinkꞌez Jesus Christ be ꞌutꞌen kꞌoh dune whúntilhtun-un ꞌet huba cha soo ꞌúlhdzooꞌ.

¹⁵ Ndi ꞌudustlꞌus kꞌut whulohkhi ꞌaw lhnúzjut whe nohtsꞌó kꞌeꞌusgus, whunaoolhnih ha Yakꞌusda ye únzoo ꞌet sghá whuntꞌai-un ꞌi gha ꞌustꞌen.

¹⁶ ꞋEt de la Jesus Christ ooba ꞌustꞌen-un usli, ꞌudun yun kꞌut whutꞌenne Yakꞌusda ooghuni ghun bubulh yaoosduk ha. ꞋEt de la Ndoni Yakꞌusda ba ꞌudun nelyane huzdliꞌ ꞌinkꞌez Yakꞌusda hoontꞌiꞌ whe la ubólhchoot.

¹⁷ ꞋEt huwa ꞌustꞌoh hoonústꞌiꞌ, ndai la Yakꞌusda baꞌ uyusꞌén-i, ꞌi be Jesus Christ dústiꞌ huwa.

¹⁸ ꞋInkꞌez ndet la Christ dája la si sgha ꞌudun yun kꞌut whutꞌenne hikꞌúneꞌ ootꞌen ha, ꞌi be za nohbulh yátisduk. Dája budásniꞌ la ꞌinkꞌez buba dástꞌen la, tsꞌiyawh si sgha Christ buba daja-un, ꞌet huwun ꞌaw lhnúzjut whe nohbulh yátisduk.

¹⁹ Ndoni ye ulhtus-i, ꞌi be hoolhtus ꞌinkꞌez huwa ꞌítꞌen te cha neꞌzustꞌen, ꞌet Jerusalem Ilyricum keyoh dúwhulyiz tsꞌe tsꞌiyanne ꞌet Christ ooghuni unzoo-i tsꞌiyawh budásniꞌ.

²⁰ Ndi khuni unzoo-i mbene la dune lhidústsꞌone Christ ghun ꞌenne tube budutásnelh hukwaꞌ nuszun. ꞋAw ꞌuyoon dune yoh whulhꞌaí-un, ꞌaw ꞌet yoh neóohosꞌalh hukwa lheꞌnúszun.

²¹ ꞋEt hoontsꞌi ndiz unꞌa Yakꞌusda be ꞌudustlꞌus kꞌut ꞌukꞌu núwhusguz, “Mbene la ꞌaw highun lhubudínelne, ꞌenne huwhutíꞌelh, ꞌinkꞌez mbene la hiyulhéꞌditsꞌilne, ꞌenne tꞌehontizeh.”

Paul ꞌubulhni Rome tsꞌe tíyalh hukwaꞌ titꞌelh

²² Lhat nohtsꞌu tísyalh hukwaꞌ nuszun inleꞌ, ꞌet hoontsꞌi Jesus Christ be ꞌutꞌen ꞌusꞌen inleꞌ ꞌet huwa ꞌaw nohtsꞌún lhtuzusyai.

²³ ꞋEt hoontsꞌi ꞌawet Jesus Christ be ꞌutꞌen ꞌusꞌen-i ndoh keyoh ndulcho whe tsꞌiyawh lhadúsdla. ꞋEt lhat yus kꞌut whutsꞌun nohtsꞌun tísyalh hukwaꞌ nuszun.

²⁴ Ndet la Spain yun kꞌut tsꞌu tisya de, ꞌatsul wheni nohtsꞌú nutisyalh. Whuz nusya de, ꞌet hukwaꞌ nuhzun de, ꞌet la ꞌon ꞌun tisyalh huba sla ꞌoohneh.

²⁵ ꞋEt hoontsꞌi ꞌandit ꞌaho Jerusalem tsꞌu tísyalh ꞌet la Yakꞌusda oochꞌeꞌ unline bulaꞌ oosneh ha.

²⁶ Jesus Christ yunidúlhne, ndunne Macedonia ꞌinkꞌez Achaia whutꞌenne huhoontꞌiꞌ whe sooniya be ndunne tehulꞌen Yakꞌusda oochꞌeꞌne Jerusalem dilhtsꞌíne bulaꞌ hutinelh, ꞌet huwa whuz tisyalh.

²⁷ Tube huhóontꞌiꞌ whe sooniya bugha húninꞌaih. Ndunne Jerusalem whutꞌenne butsꞌo húwhulhꞌai leꞌ hintꞌoh ꞌet huwa. Lizwifne, ꞌenne gha ꞌudun yun kꞌut whutꞌenne Yakꞌusda ooba ꞌutꞌen-i be hoonzooꞌ huja de, ꞌet de ꞌudun yun kꞌut whutꞌenne Lizwifne hiye ndunidzit-i be bulaꞌ hooneh ꞌinka.

²⁸ Ndi ꞌutꞌen lhadúsdla de, ꞌinkꞌez ndai la bugha íyulya-i tsꞌiyawh butlꞌa yísla de, ꞌet de Spain tsꞌe tisyalh. ꞋEt nohkꞌosyaꞌ.

²⁹ ꞋEt nohghu nusya de, Christ ooghuni unzoo-i tsꞌiyawh ꞌi bulh la oosneh. ꞋEt tꞌewhunóhzin ndi khuni unzoo-i dáldzooꞌ la.

³⁰ Sulhutsinke neMoodihti Jesus Christ ꞌen be Ndoni gha lhkꞌetsꞌusiꞌ, ꞌet huwa nohooduskut Yakꞌusda tube cho súlh ootsꞌu tenadoohdli.

³¹ ꞋEt ndunne Judea whutꞌenne ꞌaw ooba ꞌalhaꞌ lheꞌhóotꞌohne dasúlhuhoosle, ꞌinkꞌez seꞌ ꞌutꞌen Jerusalem Yakꞌusda oochꞌeꞌne bube ꞌutꞌén-i, ꞌi la hiyólhchoot.

³² ꞋInkꞌez Yakꞌusda hukwaꞌ ninzun de, hoonústꞌiꞌ whula nohtsꞌun tóosyaꞌ. ꞋEt la ꞌilhoh ꞌutsꞌootꞌeꞌ nohtsꞌóozusya de.

³³ ꞋInkꞌez ndi be whúdizghel-i, Yakꞌusda huwa yúꞌaih-i, tsꞌiyawh uncha nohbulh ꞌúntꞌoh. ꞋEt ndo honeh.