Romans 14 - Yak'usda Ooghuni

Jesus Christ ooduneꞌne ꞌaw buba natsꞌoohooyeh huba lheꞌhóotꞌoh

¹ Jesus Christ be ꞌutꞌen kꞌoh huwun, mbe la ye be ꞌalha ꞌuhoontꞌoh-i, ꞌi be soo lheꞌiltus de, whute nohbulh tenadoodli, ꞌinkꞌez oodulhyoh ꞌudoohniꞌ junih.

² Whulohne Jesus Christ unidúlhne, hiyé ꞌalhaꞌ ninzun-i tetsun huwa, buba ꞌálhaꞌ hoontꞌoh ꞌaw ꞌutsung lhusꞌal. ꞋEt whulohne tsꞌiyaitsuk ha ꞌalh-un, ꞌet buba ꞌalha ꞌuhoontꞌoh.

³ Mbe la tsꞌiyaitsuk ꞌaꞌálh-un, ndun dune ꞌutsung lhúsꞌal-un, ꞌet hukwa yutsꞌu dootni junih. ꞋInkꞌez mbe la ꞌutsung lhúsꞌal-un, ndun tsꞌiyai ꞌaꞌálh-un, ꞌen cha ꞌaw ooba nahoohyeh junih. Yakꞌusda hóontꞌiꞌ whe tsꞌiyawh hubílhchoot ꞌet huwa.

⁴ Mbe naꞌdunúhdzun Yakꞌusda ba ꞌutꞌen-un ooba nahutihyeh nahzun? Oomoodih ꞌen zaꞌ idutánelh soo ꞌintꞌen kꞌus ꞌaw soo lheꞌzintꞌen. Didutchꞌoh soo tiyin, Yakꞌusda ꞌen yula titꞌelh ꞌet huwa.

⁵ Whulohne dune ꞌuhuninzun whuloh dzin-un ꞌon nus whudíztiꞌ, ꞌet whulohne ꞌuhuninzun dzin totsuk buba lhghazáꞌ ꞌuhoontꞌoh. ꞋEt tsꞌiyanne dája huninzun-un, ꞌet buba ꞌalhaꞌ hotꞌeꞌ la.

⁶ Ndun dune whuloh dzin ꞌon nus whudíztiꞌ ninzún-un, ꞌen ꞌet dzin neMoodihti yudólhtiꞌ ha, ꞌudun neóoninꞌai huwa ꞌútni. Ndun dune dzin ꞌon nus lhodítiꞌ ninzun-un, whuz unꞌa la neMoodihti wheyúdilhtiꞌ. Ndun dune tsꞌiyaitsuk ꞌaꞌálh-un Yakꞌusda musi yúlhni ꞌinkꞌez yunalh ꞌet yuꞌalh. Mbe la ꞌutsung lhúsꞌal-un, ꞌen cha Yakꞌusda musi yudániꞌ.

⁷ Yinka uztidalh ꞌinkꞌez dáztitsah, ꞌaw whenichꞌoh ꞌutáhatsꞌóhooꞌalh ꞌaítꞌoh. ꞋAw whenichꞌoh duba moodih nalhtsꞌídloh ꞌet huwa.

⁸ Yinka uzdilhtsꞌi de, neMoodihti ookwꞌúneꞌ tsꞌootꞌen hubaꞌ hoontꞌoh. ꞋEt dáztitsah de, Jesus Christ yununúdilhne kꞌunꞌa datsꞌóotsah. ꞋEt huwa tsꞌukhuna kꞌus daztitsah de, neMoodihti oochꞌeꞌ tsꞌinli.

⁹ Christ dazsai, dunadija, ꞌinkꞌez doo cha za yinka nadaꞌ. ꞋEt yinka dilhtsꞌíne ꞌinkꞌez yaidláne cha buMoodihti tileh ha ꞌuja.

¹⁰ ꞋEt di ha Jesus Christ be nohulhutsinke unline buba nahahyeh, kꞌus ꞌet di ha ꞌenne buka lheꞌnahzun? Wheni tsꞌiyawh Christ neba nahutiyeh ha oobut núzdutalyalh wheꞌ hoontꞌoh.

¹¹ Njan huwun Yakꞌusda be ꞌudustlꞌus ꞌukꞌehóoguz-un ꞌet ꞌutni, “NeMoodihti njan ndutni, ntsꞌenꞌa la khusna hukwꞌunꞌa, tsꞌiyanne sbut dugwutsi be hóoyin. ꞋInkꞌez tsꞌiyanne ooba ꞌálhaꞌ hotꞌeꞌ Yakꞌusda usli.”

¹² ꞋEt huwa ꞌilhoghun tsꞌinli whe datsꞌitꞌen-un, ꞌet Yakꞌusda uzdutánelh.

¹³ ꞋEt huwa ꞌandit whutsꞌun ꞌaw ꞌuyoonne ba nalhtsꞌuhoosye. Tsꞌiyawh whuz unꞌa za ꞌuznoozin, ꞌaw ꞌon ꞌat neyulhutsinke Jesus Christ hichꞌaz naóolꞌah ha whuz lhubuznoolhtꞌi, kꞌus buba dzoh ꞌuzdooniꞌ junih.

Nyun ngha te nyulhutsin Jesus Christ chꞌaz naóolꞌah junih

¹⁴ Jesus Christ ꞌen gha tꞌewhunúszun ꞌalha ꞌuhoontꞌoh ꞌaw ꞌutꞌalh-i me tsꞌutni-i hooloh. ꞋEt hoontsꞌi whulohne ꞌuhuninzun ꞌi ꞌutꞌalh-i me ꞌúntꞌoh ꞌuninzun de, ꞌet de ꞌen dune ooba me yinli whe ꞌuntꞌoh.

¹⁵ Ndai la uhꞌálh-i, ꞌinkꞌez nohulhutsinke yuchꞌa nijoot ninzun de, ꞌinkꞌez bunalh yahꞌalh de, ꞌet de be nékꞌetsꞌinsiꞌ-i yit yinka dúlhtsꞌih whe ꞌuhtꞌoh. Ndai la ꞌahꞌálh-i, ꞌi gha Christ buba dazsaíne nintaꞌbólhꞌen junih.

¹⁶ ꞋEt huwa ntsꞌenꞌa yinka dúlhtsꞌi-un nohba ꞌalha ꞌuhoontꞌoh de, ꞌet ꞌuyoonne tankꞌus unꞌa howu yahutilhduk de, ꞌantsꞌi whula doohtnih.

¹⁷ Yakꞌusda dune kꞌúneꞌ bulꞌen-un huwun, ꞌaw tsꞌaꞌálh-i kꞌus tsꞌutnai-i, ꞌi ghun íloh ꞌuhoontꞌoh. Ndoni neyudíltsꞌut ꞌet huwa Yakꞌusda nalh tsꞌihꞌun ꞌútsꞌutꞌen, ꞌen gha nedzi dóghel, ꞌinkꞌez tsꞌohótꞌeꞌ.

¹⁸ Mbe la Christ ndiz unꞌa yuba ꞌutꞌen-un Yakꞌusda tube yúlh hoontꞌiꞌ ꞌinkꞌez dune cha buba tsꞌihꞌun ꞌutꞌen.

¹⁹ ꞋEt huwa ndiz unꞌa yinka uzdóltsꞌiꞌ hubaꞌ hoontꞌoh, ꞌahoolhyiz neba whudizghel tsꞌúznootꞌi ꞌinkꞌez lhla tsꞌootꞌen.

²⁰ ꞋUtꞌalh-i gha Yakꞌusda be ꞌutꞌen gak hoolhtselh junih. ꞋEt ꞌalha ꞌuhoontꞌoh ꞌaw hoonliyaz me unli hooloh. ꞋEt hoontsꞌi mbe la yutiꞌulh-i ooba náwh ꞌuhoontꞌoh de, yanꞌal de, ꞌet ooba lubeshi ꞌuhoontꞌoh.

²¹ ꞋUtsung tíhꞌulh, kꞌus tsꞌekoo tooꞌ tihnelh, kꞌus ndai la ꞌilhꞌen-i, ꞌi gha nohulhutsin ooba nawh ꞌuwhutꞌih, kꞌus ooba dzoh cha lhih, kꞌus ye ꞌalhaꞌ ninzun-i cha tetsun lhih de, ꞌet ndahtꞌen de, ꞌaw nohba tsꞌihꞌun lheꞌhóotꞌoh.

²² Ntsꞌoh te ndahtꞌen-un, be ꞌalha ꞌuhoontꞌoh-i, ꞌi be ndahtꞌen de, nohni ꞌinkꞌez Yakꞌusda bulh za nohbaꞌ hoontꞌoh. Mbe ndahútꞌen-un, tankꞌus ꞌúhutꞌen lhonízunne de, ꞌenne hóontꞌiꞌne ꞌuhintꞌoh.

²³ ꞋEt hoontsꞌi dune ꞌutsung úꞌalhne ꞌaw buba ꞌalhaꞌ lheꞌhóotꞌoh ninzunne, ꞌet hiyuꞌalh de, ꞌet dudzi yo whe tꞌehontázin nintaꞌhantꞌen, hiyé ꞌalhaꞌ ninzun-i gha ꞌet ndulhúhinel ꞌet huwa. ꞋInkꞌez ndai la hoonli ꞌutsꞌulhꞌén-i be ꞌalhaꞌ uzninzún-i gha lheꞌtsꞌulhꞌen de, ꞌet neba lubeshi hoonli.