Romans 13 - Yak'usda Ooghuni

Keyoh whumoodih bukꞌúneꞌ ootꞌen

¹ Jesus Christ ooduneꞌne ndet la keyoh hudilhtsꞌí-un, mbene la keyoh huwunline bukꞌuneꞌ hootꞌen hubaꞌ hoontꞌoh, ꞌet whuz unꞌa Yakꞌusda ꞌuhóonla ꞌet huwa.

² Ndet la keyoh dune hudilhtsꞌí-un, dája hubuhútni la, ꞌet whudulhyoh ꞌuhutꞌen de, ꞌet de Yakꞌusda ꞌuhóonla-un, ꞌet whudulhyoh ꞌuhutꞌen wheꞌ hutꞌen. ꞋEt ndutꞌenne, ꞌenne ndi yun kꞌut buba nahutiyeh.

³ Tsꞌihꞌun unꞌa ndi yun kꞌut dúlhtsꞌi de, ꞌet de nohmoodihne bubé noolhjut ꞌaitꞌoh. ꞋEt tsꞌihꞌun unꞌa nohghu yaooduk. Hoonzoo kꞌunꞌa ꞌuhtꞌen de, ꞌet ndai la khuni nohtlꞌa ídanꞌai-i, ꞌi be noolhjut huba lheꞌhóotꞌoh.

⁴ ꞋEt nohmoodihne, ꞌenne Yakꞌusda ba ꞌutꞌenne léꞌhintꞌoh. ꞋEt tankꞌus neꞌáhtꞌen de, ꞌet de bube noolhjut. Ndai la hiye úlhtus-i butlꞌá yuzꞌai ꞌi be dzoh nunóhotilhdzut ꞌet huwa. ꞋAw ꞌantsꞌi íloh ꞌuhintꞌoh.

⁵ ꞋEt huwa nohmoodih unline bukꞌuneꞌ oohten hubaꞌ hoontꞌoh. Nohbulh huhuntalchꞌoh, ꞌet huwa za iloh, nohyo tsꞌe oogha tꞌetsꞌoninzun-i nohba hoonzoo whutilhtselh de, ꞌet ndi khuni ookꞌúneꞌ oohtꞌen hubaꞌ hoontꞌoh.

⁶ ꞋEt huwa Yakꞌusda ba nohmoodih unlíne, ꞌenne ꞌahoolhyiz ꞌuhutꞌen. Ndi ꞌutꞌen ꞌuhuyulhꞌen-i ꞌet buba ꞌukꞌelha holeꞌ hubaꞌ hoontꞌoh.

⁷ ꞋEt huwa ndet la nohtsꞌú whuzꞌai-un ꞌukꞌelha whulhꞌih. Ndet la nohnichꞌoh ꞌinkꞌez nohyun cha nohtsꞌú whuzꞌai-un, tsꞌiyawh hukwꞌelha whulhꞌi. Nohmoodihne sóo neꞌbulhꞌen ꞌinkꞌez budólhtiꞌ.

Jesus Christ ooduneꞌne ntsꞌenꞌa la dichꞌoh kꞌenahutsiꞌ, whuz unꞌa dudulh dunene bukꞌé hootsiꞌ

⁸ ꞋUyoonne nohtsꞌó holhꞌaꞌ junih, ꞌuyoonne dune kꞌetihtsíꞌ-un ꞌet whe za nohtsꞌú whuzꞌai. ꞋEt nyulh dune kꞌentsꞌiꞌ de, ꞌet Yakꞌusda khuni whutlꞌa ídanꞌai-i, ꞌi tsꞌiyawh ookꞌúneꞌ ꞌintꞌen whe ꞌintꞌoh.

⁹ ꞋEt khuni Yakꞌusda whutlꞌa ídanꞌai-i, ꞌi dune úlhni, “Tsꞌekoo kꞌus dune bulh nintaꞌoohtꞌen junih, dune soolhghelh junih, ꞌundunoohtꞌih junih, ꞌuyoonne ba hoohtsꞌit junih, ꞌuyoonne chꞌeꞌ haꞌ noohzin junih.” Ntsꞌenꞌa la kꞌenatsꞌusiꞌ, whuz unꞌa nohbulh dune bukꞌehtsꞌiꞌ de, ꞌet de ndi Yakꞌusda khuni whutlꞌa ídanꞌai-i ꞌinkꞌez ꞌonghoh-i cha, tsꞌiyawh ookwꞌúneꞌ zuhtꞌen wheꞌ hoontꞌoh.

¹⁰ Mbe la dudulh dune kꞌentsꞌíꞌ-un, ꞌaw yutsꞌun tankꞌus unꞌa ooneh ꞌaítꞌoh. ꞋEt huwa nohbulh dune bukꞌehsiꞌ de, ndai la Yakꞌusda ookꞌoh tsꞌe nohtsꞌu húkwaꞌ ninzun-un tsꞌiyawh lhaoodulhla wheꞌ hoontꞌoh.

¹¹ ꞋEt ndi tꞌewhunáhzun ndet la whudizulh-un ꞌawet neba whula toh tileh. ꞋUdaꞌ Jesus Christ neba ꞌalhaꞌ ꞌuntꞌoh ínleꞌ. ꞋOh daꞌ whézdutijih-un nilhdzaꞌ whuzꞌai ínleꞌ. ꞋEt ꞌandit ꞌon nus nilhdukw hooltsꞌulh, ꞌet huwa tsꞌe tsꞌoodeh hubaꞌ hoontꞌoh.

¹² ꞋAwet yutilhkai, ꞌet huwa ndai la ꞌutꞌen tsalhgus yo ꞌutsꞌulhꞌen-i, ꞌetsul ꞌutsꞌooleh ꞌinkꞌez ndai la ꞌutꞌen ꞌuztilhꞌelh-i dzenis ꞌutsꞌoolhꞌen. ꞋEt ndutsꞌútꞌen whe soo cho netsudule etsꞌudulh leꞌ tsꞌootꞌen. ꞋEt de ꞌaw nechꞌaꞌ oolhdeh ꞌaítꞌoh.

¹³ Ndai la dzenis ꞌulꞌen-i, ꞌi za ꞌutsꞌoolhꞌen. ꞋEt whuz unꞌa za tsꞌihꞌun unꞌa yinka uzdóltsꞌiꞌ. Tátnaine bulheꞌtsꞌoostꞌen, taznutnai-un ꞌet cha ꞌetsul ꞌutsꞌooneh, ꞌinkꞌez tsꞌekoo kꞌus dune bulh lubeshi ꞌutsꞌulhꞌen-un, ꞌet cha ꞌetsul ꞌutsꞌooneh. Lheꞌtsꞌúdulh-un ꞌinkꞌez ꞌutsꞌoolníh-un ꞌet cha ꞌetsul ꞌutsꞌooneh.

¹⁴ ꞋEt hoontsꞌi ꞌutꞌen ntsiꞌ-i, ꞌi ookꞌet neMoodihti Jesus Christ ꞌen za ookꞌúnꞌa ꞌutsꞌootꞌeꞌ, ꞌinkꞌez ꞌaw ꞌon ꞌat neyustꞌe lubeshi tsꞌúlhnoostꞌi.