Romans 12 - Yak'usda Ooghuni

Yakꞌusda ooduneꞌne ntsꞌenꞌa la Yakꞌusda hukwaꞌ ninzun, whuz unꞌa ꞌuhootꞌeꞌ hubaꞌ hoontꞌoh, ꞌaw dichꞌoh hukwaꞌhuninzun-un huwa iloh ꞌuhutꞌen

¹ Sulhutsinke Yakꞌusda ye negha teꞌ ninzun-i, ꞌi be nohtsꞌu tédusdlih, lubeshi yit whe be huhna-i ꞌilhiz wheni Yakꞌusda oogha ínahꞌaih. ꞋEt nduhja de, Yakꞌusda hootátꞌeꞌ ꞌinkꞌez whuz unꞌa tsꞌihꞌun unꞌa oobaꞌ tihtꞌelh.

² ꞋInkꞌez dune ꞌandit dzin dahíntꞌoh bubun dóhtꞌeꞌ hukwa oohtꞌen junih. ꞋEt kꞌus ꞌandit noheni ꞌutsꞌun unꞌa naꞌahleh. ꞋEt nduhtꞌen de, ꞌet la tꞌéwhunóhzin ndet la Yakꞌusda nohtsꞌu húkwaꞌ ninzun-un. Yakꞌusda be ꞌutꞌen kꞌoh tsꞌiyawh hoonzoo, tsꞌiyanne ba hoonzoo, ꞌinkꞌez tsꞌihꞌun unꞌa ꞌuhoontꞌoh.

³ Yakꞌusda yé stsꞌun unzoo-i, ꞌi gha nohdúsni, nohni mbe la Jesus Christ kꞌúneꞌ ꞌutꞌenne duba nadóhtiꞌ junih. Yakꞌusda nalh dune nchane ulhi, ꞌet wheꞌ dudolhtiꞌ junih, ꞌet kꞌus noheni ꞌutsꞌun unꞌa ꞌoolhdzin. ꞋUyoonne ghú nuní nuhzut te, whulohne ꞌon nus hoolhtus whe Yakꞌusda buba ꞌalhaꞌ ꞌuntꞌoh.

⁴ Neyustꞌe ꞌilho za unli, ꞌet hoontsꞌi lhai ooghu hoonli. ꞋEt ꞌi tsꞌiyawh neyustꞌe lhelhdun huba ꞌuntꞌoh.

⁵ Christ ooduneꞌne whuz unꞌa za ꞌutsꞌintꞌoh. Wheni tsꞌuldlai hoontsꞌi, tsꞌiyawh Christ ooyustꞌe oochꞌeꞌ tsꞌinli, ꞌet huwa ꞌilho za tsꞌinli.

⁶ ꞋEt hoontsꞌi tsꞌiyawh lhelhtsꞌun unꞌa Yakꞌusda ba ꞌutsꞌutꞌen, ye únzoo-i gha ꞌúja ꞌutꞌen lhelhyoo neghalya ꞌutsꞌoolhꞌen ha. Whulohne Yakꞌusda be nus hooꞌen-un, ꞌet bugha óoninꞌai, dahoolcho la Yakꞌusda bugha óoninꞌai-un, whuz unꞌa za yahoolhduk hubaꞌ hoontꞌoh.

⁷ Whulohne huye ꞌutꞌen ꞌutilhꞌelh ooleꞌ ha bukaꞌ daniꞌ. Whulohne whunih bubulhtsi ꞌuyoonne huhodoolhꞌeh ha.

⁸ Whulohne ꞌuyoonne dune budzi úlhtus ubólhꞌeꞌ ha bughá whuntꞌai, whulohne huyutꞌi-i ꞌuyoonne hiye buláꞌ ootꞌen ha ꞌinkꞌez ꞌaw highu yalhoolhduk. Whulohne mbene la dune tso whudilhdzulhne soo cho huwa hinli whe nduhóotꞌeꞌ. Whulohne cha budzi hóontꞌiꞌ whe ꞌuyoonne gha teꞌhunozeh ha, ꞌet cha bughá whuntꞌai.

⁹ Whuhtsꞌit whe ꞌuyoonne kꞌoohsiꞌ junih. Tankꞌus ꞌúhoontꞌoh-un whutsꞌu doohniꞌ, Tsꞌihꞌun ꞌuhoontꞌoh-un ꞌet hoohtun.

¹⁰ Ntsꞌenꞌa lhulhutsinke lhkꞌehusiꞌ, ꞌet whuz unꞌa soo tsꞌihꞌun unꞌa lhkꞌehsiꞌ. Tsꞌihꞌun unꞌa néꞌlhoolhꞌen nohgha whúltsꞌuk totsuk.

¹¹ Ndai la ꞌutꞌen oogha ítahnalh-i, soo cho ꞌoolhꞌen. Ndoni ye nohla ꞌutꞌen-i, ꞌi be soo hoonáhtꞌiꞌ whe Yakꞌusda ooba ꞌoohtꞌen.

¹² Ndet la Yakꞌusda ootsꞌu húkwa tse hoolhlí-un ꞌet huwa tube hóhtꞌeꞌ. Ndet la Jesus Christ ookꞌúneꞌ ꞌuhtꞌen huwa dune nohezúla de, ꞌetsul ꞌoohneh junih, ꞌahoolhyiz neMoodihti ootsꞌu tenádahdli.

¹³ Mbene la Yakꞌusda oochꞌeꞌne ꞌen dunidzítne, ndai la ꞌuhtꞌí-i whuloh be bula ꞌuhtꞌen. ꞋAhoolhyiz huba nohyoh ꞌudun udólhtan.

¹⁴ Dune nohezúla de, butsꞌun oohzooꞌ ꞌinkꞌez bukꞌehoohyih junih.

¹⁵ Mbene la hóontꞌiꞌne bubulh hóonahtꞌiꞌ, ꞌinkꞌez mbene la utsóne bubulh úhtso.

¹⁶ Tsꞌiyawh lhulh unoolhꞌen. Telꞌenne buba nus dáhtiꞌ noohzin junih. Whuníhne dune naꞌdudólhꞌeꞌ junih.

¹⁷ Dune tankꞌus unꞌa nohtsꞌu neꞌhutꞌen de, nohni cha tankꞌus unꞌa butsꞌun neꞌoohtꞌen junih. ꞋEt kꞌus tsꞌiyanne nalh ꞌahoolhyiz Yakꞌusda ba tsꞌihꞌun unꞌa za neꞌoohtꞌen.

¹⁸ Ndet la soo ꞌon ꞌun oohneh ꞌaítꞌoh whe tsꞌiyanne dune tsꞌihꞌun unꞌa lhtsꞌun oohtꞌeꞌ.

¹⁹ Skꞌekene khun kꞌunabolꞌen junih. Yakꞌusda ꞌen ootlꞌa wháhꞌaih. Yakꞌusda ooghuni ꞌet ꞌutni, “Be kꞌuz nudzun-i, si schꞌeꞌ ꞌuntꞌoh. Si kꞌunaboozen si,” ni.

²⁰ ꞋEt huwa nohchꞌaz ditni-un ooyeꞌíltsꞌul de, oogha óohꞌalh. ꞋEt taꞌóosda de, too oogha óolhdzeh. ꞋEt diz unꞌa nduhtꞌen de, ꞌet de ꞌantsꞌi kwuntsit ootsi la dahdzaih leꞌ tihtꞌelh.

²¹ ꞋUyoonne tankꞌus ꞌúhutꞌen ꞌi be nohchꞌaꞌ hoolhdeh junih kꞌus hoontsiꞌ-un ꞌutꞌen unzoo-i be whuchꞌaꞌ oolhdeh.