Romans 11 - Yak'usda Ooghuni

Yakꞌusda Israel ooduneꞌne ꞌawhuz bugha téꞌninzun

¹ ꞋEt doo cha za nuhooduskut, Yakꞌusda duduneꞌne ꞌilhiz eh ꞌún ubutilhdil? ꞋAwundooh! Si cha ꞌilhoghun Israel ooduneꞌ ꞌustꞌoh. Abraham be dusya ꞌinkꞌez Benjamin bulh díszulh.

² ꞋAwúndooh, ꞌaw Yakꞌusda duduneꞌne tsꞌiyawh iloh ꞌún ubutilhdil. ꞋEt whutsodaꞌ tꞌebuninzunne. ꞋEt ꞌaw eh whunalhuzulhni Yakꞌusda be ꞌudustlꞌus kꞌut dája ni nus hóoꞌen-un Elijah ꞌen ghun? Ntsꞌenꞌa la Yakꞌusda yutsꞌu tédudli Israel ooduneꞌne, ꞌenne buchꞌa ꞌútni,

³ “SMoodihti nye nus hóoꞌenne cha buba hanghan ꞌinkꞌez nloodel cha nanáhinanyuz. Si za ꞌet nenúztsꞌut. Si cha suhutuzilhghelh ha ska hunuta,” whe yutsꞌu tédudli.

⁴ ꞋEt hoontsꞌi ndet Yakꞌusda yadániꞌ? Njan ꞌet dé yulhni, “ꞋAwhuz 7,000 dunene ꞌet buzúsdla. ꞋEnne ꞌaw ndi ꞌukꞌeltsi Baal ꞌaw ꞌi hitsꞌu téninoolhzin ꞌinkꞌez hitsꞌu ténadoodli ꞌaítꞌoh.”

⁵ ꞋEt hoontsꞌi ꞌandit dzin ꞌawhuz whulohne Israel ooduneꞌne dujihne hoonli. ꞋEnne Yakꞌusda ye únzoo-i be ꞌutahábanlane, ꞌenne ꞌuhintꞌoh.

⁶ ꞋInkꞌez Yakꞌusda ye únzoo-i be uzdijiz, ꞌaw khuni netlꞌa dítꞌai-i ookwꞌúneꞌ tsꞌutꞌen-un ꞌaw ꞌet huwa iloh. ꞋAw ndulhúhootꞌel de, Yakꞌusda ye únzoo-i hootáloh wheꞌ hoontꞌoh. ꞋEt ndi khuni netlꞌa dítꞌai-i ookꞌúneꞌ tsꞌutꞌen huwa uzdujih tsꞌutni de, ꞌinkꞌez ntsꞌenꞌa Yakꞌusda ye únzoo-i be ꞌuzdutijih uzdutínelh? ꞋEt dune howu yahalhduk ntsꞌenꞌa hudutijih, khuni Moses be ꞌudustlꞌus gha netlꞌa díltsꞌut-i ookꞌúneꞌ tsꞌutꞌen hoontsꞌi, ꞌi gha uzdoojih ꞌaítꞌoh, ꞌet ꞌuwhúlhni.

⁷ Khuni njan ndutni whe ꞌutni, Israel ooduneꞌne budzi dutsꞌun, ꞌet huwa hukwa húnuta-un ꞌaw nalhuhuhóoꞌal. ꞋEt hoontsꞌi ꞌutahalyane, ꞌenne nahoohoonꞌai.

⁸ ꞋEt Yakꞌusda be ꞌudustlꞌus kꞌut ꞌukꞌu núwhusguz-un soo whuz unꞌa ꞌuhóoja. “Yakꞌusda dune ꞌantsꞌi stézne dune léꞌbinla. Buna hóoni ꞌet hóontsꞌi ꞌaw hiye lhúhoosꞌen. Budzo cha hoonli ꞌet hoontsꞌi ꞌaw hiye lhéꞌdustsꞌo. ꞋAndit dzin whutsꞌun ꞌet za nduhíntꞌoh,” whe ndutni.

⁹ David ꞌen cha njan bughun ndutni, “Ndai la Yakꞌusda ncha-i bugha íninla-i whute bilh ꞌinkꞌez tsayilh buka néyultsꞌut léꞌuja. Ndai bughá ininla-i, hikayá ooleꞌ buboolhtselh. ꞋEt whuz unꞌa bulubeshi dichꞌoh hikꞌelha whutilhtselh.

¹⁰ Buna whute hiye lhuhoos̱ꞌen Yakꞌusda ye únzoo-i hiye nóolhꞌen whuchꞌa. ꞋInkꞌez hiyé dzoh nudeh-i, ꞌi be yo húnootꞌi dune ndaz-i nuhughe kꞌunꞌa,” ni.

Yakꞌusda Israel ooduneꞌne ꞌaw ꞌilhiz iloh bula ditni

¹¹ ꞋEt doo cha za nohooduskut, Lizwifne ꞌet tse gha huntízghal, ꞌet ꞌilhiz wheni nintá hutiltsꞌulh ha eh nahíltsꞌut? ꞋAw whuz unꞌa ꞌuhótꞌeꞌ ꞌaítꞌoh! Yakꞌusda ooghuni hikalheꞌnízun ꞌet huwa ꞌudun yun kꞌut whutꞌenne ꞌet ꞌandit hiye dújis. ꞋEt whuz unꞌa ꞌuhutinelh Lizwifne ꞌudun yun kꞌut whutꞌenne gheꞌ hootalnih.

¹² ꞋEt tankꞌus unꞌa ꞌuhutꞌen-un ꞌet huwa hutꞌen, ꞌuyoonne Yakꞌusda ye únzoo-i be huhóontꞌiꞌ suliꞌ de, ꞌet de ndet la Yakꞌusda Lizwifne buchꞌa hóontun-un ꞌi be ꞌudun yun kꞌut whutꞌenne tube huhóontꞌiꞌ ꞌubulhtsi. ꞋEt ꞌoh de whusahóoltsꞌut de, Lizwifne, ꞌenne cha Yakꞌusda buzkeh huzdliꞌ de, ꞌet ꞌon nus hoonzoo tileh.

¹³ ꞋAwet nohni ꞌudun yun kꞌut whutꞌenne nohbulh yásduk, Yakꞌusda ꞌutáhasálhti nohni nohba whelꞌaꞌ-un naóosdleꞌ ha. Tube sba tube hooncha.

¹⁴ Njan nohdutásnelh-un, ꞌet whe sulh Lizwifne huweꞌ hoolnih huwa tilah whulohne hudoojih.

¹⁵ Yakꞌusda Lizwifne ꞌún ubutilhdil, ꞌinkꞌez Jesus Christ ꞌen gha nohni ꞌudun yun kꞌut whutꞌenne ꞌaw ꞌon ꞌun nohbulh lhónilchꞌoh. ꞋEt Lizwifne Jesus Christ hitsꞌu nálhya buboolhyih ha de, ꞌet Yakꞌusda nabitálhchulh wheꞌ hintꞌoh. ꞋAntsꞌi dune yaidlane doo cha za dune nahusliꞌ leꞌ hutinelh.

¹⁶ ꞋEt whunóhuntistun ntsꞌenꞌa la ꞌuwhutánelh. Whunulhꞌen, lhes nantílhdo de, ꞌudechoo-i unzoo ꞌúntꞌoh de, ꞌet whuloh cha tsꞌiyawh unzoo tileh. ꞋEt ꞌudun, duchun ooghih unzoo de, ꞌet oozischum cha tsꞌiyawh tizooꞌ.

¹⁷ ꞋEt ndi duchun unzoo-i oolohkhi oozischum kꞌunúdistuk. ꞋEt nohni ꞌudun yun kꞌut whutꞌenne, ꞌet duchun ꞌoh núnilhyeꞌ-i olive duchun huyúlhni, ꞌi leꞌ ꞌahtꞌoh. ꞋEt ndet la oozischum kꞌunúdistuk-un ꞌet nohni hikꞌenánohdanla. ꞋEt huwa ndi duchun ooghih gha ꞌinkꞌez ookꞌunih unzoo-i nohchꞌeꞌ suliꞌ.

¹⁸ Ndi oozischum kꞌunúdistuk-i oochꞌaz dóhtni junih! Whuz unꞌa ꞌududúlhtiꞌ de, ꞌaw tꞌewhunuzúszun ndi ꞌughih ꞌaw oolalheꞌzuhtꞌen kꞌus ꞌughih ꞌi nohla ꞌutꞌen.

¹⁹ Ndi ꞌuzooschum kꞌunúdistuk wheni ookꞌenázdoodilh ha doohtniꞌ la.

²⁰ Sooꞌ dihja. Lizwifne ꞌaw Yakꞌusda ooghuni lhahuyílhchulh ꞌet huwa ꞌuhuja kꞌunódistuk. ꞋEt nohni Yakꞌusda ooghuni úlhchoot ꞌet huwa ꞌáhja Lizwifne bukꞌenánohodanla. ꞋEt wheꞌ dudolhtiꞌ junih, ꞌantsꞌi whenoolhjut.

²¹ Ndi duchun soo oozischum ꞌaw Yakꞌusda yugha télheꞌnizil de, ꞌet de nohni cha tílah nohgha télheꞌnooszin.

²² ꞋEt huwa whudáhtsꞌo-un ꞌet hodulhꞌeꞌ, Yakꞌusda dalcho-i be netsꞌun únzoo ꞌinkꞌez ꞌuyoonne dálcho-i be bubúlh huske. Mbene la Yakꞌusda ooghuni lhahuyílhchulhne, ꞌi be nahíltsꞌut, ꞌenne butsꞌun ooghuni tube dutsꞌun whe ꞌuntꞌoh. ꞋEt nohni ꞌudun yun kꞌut whutꞌenne ooghuni úlhchoot, ꞌet Yakꞌusda ye únzoo-i be whuz unꞌa za ꞌahtꞌoh de, ꞌet huwa ꞌuntꞌoh nohtsꞌun únzoo. ꞋEt Yakꞌusda ookꞌunꞌa ꞌaw hukwa lheꞌnúszun de, nohni cha kꞌúnudútihtuk, ꞌuzooschum kꞌunꞌa.

²³ ꞋInkꞌez Lizwifne Yakꞌusda hitsꞌu nátidulh hukwaꞌ huninzun ꞌinkꞌez highuni hitalhchulh de, ꞌet de ꞌuzooschum kꞌunúdistuk-un ꞌet Yakꞌusda yukꞌenábudutilelh, Yakꞌusda dichꞌoh za ꞌet ndutínelh ꞌet huwa.

²⁴ Nohni ꞌudun yun kꞌut whutꞌenne ndi duchun olive ꞌoh nunulhyeꞌ-i, ꞌi oozischum leꞌ ꞌahtꞌoh. Yugha ꞌóoli whe kꞌunídizsel ꞌinkꞌez olive duchun unzoo-i, ꞌi yughun nenaídinla, ꞌaw whuz unꞌa lheꞌhustꞌen ꞌet hoontsꞌi. ꞋEt Lizwifne ndi duchun dinzoo-i ꞌet duhíntꞌoh. ꞋEt huwa Yakꞌusda ꞌaw ooba howa lhúhoolnaꞌ ndi ꞌowhi ꞌuzooschum kꞌunúdistuk-i duchun unzoo-i ghu nenaídutalelh.

²⁵ Sulhutsinke njan wheꞌ hoontꞌoh ooyoh-un, ꞌet tꞌewhuntihzeh nohba hukwaꞌ nuszun, doo ka la tsꞌiyantsuk tꞌetsꞌonínzun naꞌdudólhꞌeꞌ. Njan ꞌet dúhoontꞌoh, ꞌet whulohne Lizwifne budzi dutsꞌun hutileh, ndet la ꞌudun yun kꞌut whutꞌenne whudizulh-un, ꞌenne buba ꞌetsul ꞌuwhutánelh ꞌet whutsꞌun.

²⁶ ꞋInkꞌez hukwꞌelhꞌaz Israel ooduneꞌne tsꞌiyawh hudutijih. ꞋEt Yakꞌusda be ꞌudustlꞌus kꞌut ꞌukꞌu whusguz ꞌet ndutni, “Neulhyis-un ꞌet keyoh whuti Zion huwhútni tsꞌe whuz de ha tíyalh. ꞋEt Jacob ooduneꞌne ntsꞌenꞌa la tankꞌus ꞌúhutꞌen-un whuchꞌa nabutálelh.

²⁷ ꞋEt bulubeshi buba ꞌún tisdil de, ꞌet ꞌoh de whuz unꞌa butsꞌun khuni lhadúsdla inleꞌ, ꞌet huwa tisnelh.”

Yakꞌusda tsꞌiyanne gha teꞌninzun

²⁸ Ndi khuni unzoo-i be nóhbulh yasduk, ꞌi ꞌaw Lizwifne hiyólhchoot hukwa lheꞌhunízun, Yakꞌusda chꞌaz ditnine hinli. ꞋEt huwa nohni ꞌudun yun kꞌut whutꞌenne duhjih. ꞋEt hoontsꞌi Yakꞌusda butsodaꞌne ꞌutahábanla. ꞋEt ꞌenne bugha Yakꞌusda Lizwifne bukꞌensiꞌ.

²⁹ Mbene la Yakꞌusda dutijih ha bukaꞌ daniꞌne, ꞌinkꞌez ndai la Yakꞌusda bughai únle-i, ꞌaw ꞌutsꞌun unꞌa naꞌootneh ꞌaítꞌoh.

³⁰ ꞋEt nohni ꞌudun yun kꞌut whutꞌenne niz de haóodanzut-un Yakꞌusda ꞌaw ookꞌú nulheꞌzuhtꞌen. ꞋEt hoontsꞌi ꞌandit dzin whutsꞌun ꞌet Lizwifne, ꞌenne Yakꞌusda ꞌaw híkꞌunulhéꞌustꞌen. ꞋEt huwa lubeshi ꞌulhꞌen-un nohba ꞌún whutilhdulh-un nohghá whultsꞌut.

³¹ Ndunne Lizwifne, ꞌaw ꞌukꞌú nulheꞌustꞌenne, ꞌenne bugha Yakꞌusda nohgha teꞌninzun. ꞋEt whuz unꞌa za Yakꞌusda ꞌilhudzin ꞌenne cha bugha téꞌnozeh.

³² Tsꞌiyanne yukꞌú nulheꞌustꞌen ꞌet huwa ꞌadinlane léꞌbinla, didut bugha téꞌnozeh ha.

Yakꞌusda dáldzooꞌ la Lizwifne ꞌinkꞌez ꞌudun yun kꞌut whutꞌenne butilhyis huba

³³ Yakꞌusda ye nétsꞌun unzoo-i, ye whúnih-i ꞌinkꞌez ndet la tsꞌiyantsuk tꞌewhunínzun-un, ꞌet tube hooncha wheꞌ hoontꞌoh. Ntsꞌenꞌa la be ꞌutꞌen kꞌoh ꞌinkꞌez ꞌutáhawhúle-un, ꞌaw dune tꞌehonózinne hooloh ꞌinkꞌez ꞌaw nahóꞌalhne cha hooloh.

³⁴ Yakꞌusda be ꞌudustlꞌus kꞌut ꞌukꞌu núwhusguz-un ꞌet ndutni, “Yakꞌusda dája ninzun, ꞌaw dune tꞌéhonínzun-un hooloh. ꞋInkꞌez ꞌaw yugha dóoniꞌ-un cha hooloh.

³⁵ Yakꞌusda tsꞌiyaitsuk negha ꞌunle, ꞌaw ooba ꞌukꞌelha tsꞌoohoolhtselh ꞌaitꞌoh.”

³⁶ Tsꞌiyaitsuk ꞌinla, ꞌinkꞌez ꞌen oogha tsꞌiyaitsuk ꞌuyínla kꞌunꞌa ꞌuntꞌoh, ꞌinkꞌez ꞌen ba tsꞌiyaitsuk ꞌulya. ꞋEt huwa nohdúsni ꞌilhiz wheni Yakꞌusda ꞌen za uzdólhtiꞌ. ꞋEt ndó honeh.