Romans 10 - Yak'usda Ooghuni

Israel ooduneꞌne, ꞌaw khuni unzoo-i hiyit ꞌoohootꞌeꞌ ꞌaitꞌoh

¹ Sulhutsinke Yakꞌusda ootsꞌu ténadusli khun tilah Israel ooduneꞌne hudoojih. ꞋEt sdzi yo whe hukwaꞌ nuszun.

² ꞋEnne bughun ꞌalhaꞌ dusni wheꞌ dusni. Tube ncha-i be Yakꞌusda ndet la butsꞌu húkwaꞌ ninzun-un hukwꞌú neꞌhutitꞌen hukwaꞌ huninzun ꞌet hoontsꞌi ꞌaw tꞌehonúszun ntsꞌenꞌa ꞌaw soo tsꞌihꞌun unꞌa ꞌuhutitꞌelh.

³ Tsꞌihꞌun unꞌa Yakꞌusda kꞌúneꞌ hutitꞌen-un ꞌet ꞌaw tꞌéhonúszun. ꞋEt ntsꞌenꞌa la dichꞌoh ꞌuhuhóonla whuz unꞌa tsꞌihꞌun unꞌa ꞌuhintꞌoh naꞌhududilꞌi. ꞋInkꞌez ndet la Yakꞌusda butsꞌu húkwaꞌ ninzun-un ꞌaw hukwꞌunꞌa lheꞌhínel.

⁴ Moses be ꞌudustlꞌus netsꞌu húkwaꞌ ninzun-un, tsꞌiyantsuk Christ neba ꞌetsul ꞌuhóonla. Neba ꞌalhaꞌ ꞌuntꞌoh de, ꞌen gha Yakꞌusda nalh tsꞌihꞌun dune tsꞌinli.

⁵ ꞋEt Moses be ꞌudustlꞌus gha tsꞌihꞌun dune hikꞌunꞌa ꞌuhootꞌen hukwa ꞌuhutꞌen de, ꞌet Moses ꞌukꞌu núwhuzguz whe ndutni, “Ndi khuni nohtsꞌu húkwaꞌ ninzun-un, whuz unꞌa oohtꞌeꞌ hubaꞌ hoontꞌoh.”

⁶ ꞋEt be ꞌalha ꞌuhoontꞌoh-i, ꞌi gha Yakꞌusda nalh tsꞌihꞌun unꞌa ꞌutsꞌintꞌoh, njan ꞌukꞌehónguz, “ꞋAw naꞌtsꞌoodudolkut ꞌaítꞌoh, ‘Mbe ꞌutinelh ndo tiyalh Jesus Christ ndus de haítilhtelh?’

⁷ Kꞌus mbe ꞌutinelh, ‘Christ neba whusaítilhtelh, yaidláne tuz tíyalh ꞌet wheni?’”

⁸ ꞋEt Yakꞌusda ooghuni daja ni whe ꞌutni? Njan ꞌet ꞌukꞌehóoguz, “Ndi khuni oogha tsꞌihꞌun unꞌa ꞌuztitꞌelh, ꞌi ne-enghoh dizꞌai whe ꞌuntꞌoh, neze cha ꞌinkꞌez nedzi yo cha dizꞌai.” ꞋI khuni be ꞌalha ꞌuhoontꞌoh-i be nohbulh yátsꞌulhduk, ꞌi ꞌuntꞌoh.

⁹ ꞋEt ꞌuyoonne Jesus Christ ꞌen sMoodihti unli, budíni de, ꞌinkꞌez ndzi yo whe mba ꞌalha ꞌuhoontꞌoh Yakꞌusda Jesus Christ dazsai whe dunaidilhtih, ꞌet de dutanjih wheꞌ hoontꞌoh.

¹⁰ ꞋEt ndzi yo whe mba ꞌalha ꞌuhoontꞌoh de, Yakꞌusda nalh tsꞌihꞌun unꞌa ꞌintꞌoh. ꞋEt ꞌuyoonne dune budíni de, ꞌet de dínjih whe ꞌintꞌoh.

¹¹ Yakꞌusda ooghuni ꞌutni, “Mbe la neMoodihti ooba ꞌalhaꞌ yintꞌoh-un, ꞌaw yooya ulhtisle.”

¹² Lizwifne ꞌinkꞌez ꞌudun yun kꞌut whutꞌenne ꞌaw lhelhtsꞌun unꞌa lheꞌhítꞌoh. Yakꞌusda tsꞌiyanne buMoodihti unli. ꞋEt huwa mbene la oolaꞌ whudóneh hitsꞌu húkwa ꞌutnine, ꞌenne butsꞌun tube teꞌninzun whe ꞌuntꞌoh.

¹³ ꞋEt huwa neMoodihti hudoojih hitsꞌu húkwaꞌ ꞌutni de, ꞌet ꞌalha ꞌuhoontꞌoh whe hudutijih.

¹⁴ ꞋEt mbene la Jesus Christ buba ꞌalhaꞌ lheꞌítꞌohne, ꞌet ntsꞌenꞌa ꞌuhudutinelh huboolhyis-un hitsꞌu hukwaꞌ dutinelh? ꞋAw hiyulh éꞌdustsꞌo de, ꞌet ntsꞌenꞌa buba ꞌalhaꞌ yutátꞌelh? ꞋUyoonne dune budániꞌ de za.

¹⁵ Dune butsꞌó whehalhꞌaꞌ ubudutánelh huba, ꞌet de za hiyulh údutatsꞌo. Njan huwun Yakꞌusda be ꞌudustlꞌus kꞌut ndutni, “Dáwhuldzooꞌ wheꞌ hoontꞌoh dune khuni unzoo-i whuneuntilhtun, ntsꞌenꞌa la nedzi yo whudutághel ꞌinkꞌez Yakꞌusda be ꞌutꞌen unzoo-i tsꞌolhchoot huba.”

¹⁶ ꞋEt hoontsꞌi ꞌaw tsꞌiyanne íloh khuni unzoo-i hikꞌúneꞌ ꞌustꞌen. Nus hóoꞌen-un Isaiah ꞌutni, “NeMoodihti ndunne dune daja butsꞌútni-un ꞌaw buba ꞌalhaꞌ lheꞌhóotꞌoh.”

¹⁷ ꞋEt ꞌinka Jesus Christ neba ꞌalhaꞌ títꞌelh de, bulh ꞌúzditsꞌo de za. ꞋEt ndi khuni ꞌi Yakꞌusda ooghuni ꞌuntꞌoh.

¹⁸ ꞋEt hoontsꞌi ꞌet hukwa nohooduskut, Israel ooduneꞌne ꞌaw eh ndi khuni hiyulh lheꞌditsꞌil? A, huyulh ꞌúdantsꞌo. Njan Yakꞌusda be ꞌudustlꞌus kꞌut ꞌet ꞌutni, “Ndunne nughúni nuꞌáne bughuni tsꞌiyanne ndi yun kꞌut hudántsꞌo ꞌet ooghuni dune hiyubodulhꞌeh-i ntsꞌe la dune huwhutꞌí-un tsꞌiyawh hidántsꞌo.”

¹⁹ ꞋEt cha za nohooduskut, ꞌet Israel ooduneꞌne ꞌaw lawk njan whulhéꞌhudustsꞌo? A, huyulh ꞌúdantsꞌo. ꞋUdechoo Moses ndutni, “Mbene la dune ookeyoh hooloh ninzúnne, ꞌenne bugheꞌ ootalhnih nohtíselh. ꞋEt ndunne keyoh whutꞌenne iloh tuneꞌ hutꞌenne, ꞌenne bugha tube huntálhchꞌoh nohtíselh,” ubúlhni.

²⁰ Nus hóoꞌen Isaiah ꞌaw whélhniljut dája dutinelh la, Lizwifne bubulh yaílhduk daꞌ ꞌinkꞌez Yakꞌusda ba yalhduk whe ndutni, “Mbene la ꞌaw ska lheꞌhoodulhkútne, ꞌenne nasilhti. Mbene la ꞌaw skúlhnustꞌohne, ꞌenne la bubunáꞌ duniztan.”

²¹ ꞋEt hoontsꞌi Yakꞌusda Isaiah ꞌen gha Israel ooduneꞌne njan ꞌet ꞌúbulhni, “Dzin dulyiz whe nohkaꞌdúzni khun tilah stsꞌu tóohdilh ha. ꞋEt hoontsꞌi ꞌaw ꞌukꞌú nulheꞌustꞌenne ꞌinkꞌez ꞌutsꞌun ꞌuninzunne hinli. ꞋInkꞌez ꞌaw stsꞌó tooyaꞌ hukwa lheꞌhunízun.”