Revelation 9 - Yak'usda Ooghuni

Bulh kwulaiꞌ be tsꞌujih-i yéꞌ dija

¹ ꞋEt bulh kwulane lizas be tsꞌujih-i be ꞌudija, ꞌinkꞌez sum ndus de yun kꞌéltsꞌut, ꞌet whunusꞌen. ꞋEn ndi tsa kꞌet whucho whutlꞌah hooloh-un whulugli, ꞌen ootlꞌa yíltsꞌut.

² ꞋInkꞌez njan tsa kꞌet whucho whutlꞌah hooloh-un whudáhaꞌ danꞌai. ꞋEt ꞌantsꞌi yoh be oonulwus-i cho kꞌunꞌa lhut nyus de ha níldo. ꞋI be dzenis oozaꞌ cha ꞌinkꞌez yatꞌah ꞌi bulh ndulcho whe tsahólhgus suliꞌ.

³ ꞋEt tulkꞌus cho lhut tahaíndil ꞌinkꞌez yun kꞌeíndil. Ndi tulkꞌus cho ntsꞌenꞌa hukwaꞌ ninzun neꞌtitꞌen-un, ꞌet ooghá whultsꞌut. Ndi scorpion, ndi yun kꞌut ntsꞌenꞌa hukwaꞌ ninzun te neꞌutꞌen ꞌi kꞌunꞌa.

⁴ Ndi tulkꞌus cho ꞌi khuni hitlꞌa dánla yun kꞌut tlꞌo ha núyeh-i, kꞌus ha núyeh-i, duchun te, ꞌohwhi nintaꞌyólhꞌen junih huyúlhni. Mbene dune Yakꞌusda ye ꞌe hóodalhꞌeh-i buninta bukꞌuhoolohne, ꞌenne za ubundólhdah huyúlhni.

⁵ ꞋInkꞌez ubutighan-un oogha lhuhooltsꞌulh. ꞋAntsꞌi kwulaiꞌ sanun ꞌet tube cho dzoh nuboolhdzut. Ndi scorpion huyulhni ubooget-un whuz unꞌa hukwꞌe húduntidaꞌ.

⁶ ꞋOh de dzin whusahóoltsꞌut de, ꞌet dune whe yahitadlah-un hukwaꞌ huntitalh ꞌet hoontsꞌi ꞌaw nahohóꞌalh ꞌaitꞌoh. Yahitadlah-un tube hukwaꞌ huntizilh ꞌet hoontsꞌi ꞌaw yahódlah ꞌaitꞌoh.

⁷ Ndowhi tulkꞌus cho ꞌantsꞌi yeztli dune lhutigan tsꞌe tilhꞌaz duhóotatꞌen. Ootsi kꞌeyuzdla gold doútꞌen-i, ꞌi ootsi kꞌéuzdla. ꞋInkꞌez oonin ꞌi cha dune nin doútꞌen.

⁸ Ootsighaꞌ, ꞌi cha tsꞌekoo tsighaꞌ doútꞌen, ooghoo, ꞌi cha khuna-iti, lion huyulhni, ooghoo ꞌet ndoútꞌen.

⁹ ꞋInkꞌez lhuztih dzoot niꞌdilya-i hiyé dilhtsꞌi. ꞋInkꞌez ootsꞌuntꞌaꞌ ꞌi cha ꞌantsꞌi yeztli lhai ꞌilhgooh-i dune lhugan tsꞌu tilhghaz ꞌet ndutni.

¹⁰ ꞋInkꞌez ooche ꞌantsꞌi scorpion che ndoútꞌen. ꞋInkꞌez ooche be ꞌooget ꞌinkꞌez ookꞌewhúnduda. ꞋEt dune kwulaiꞌ sanun dune ubundoolhda-un, ꞌet ooghá whultsꞌut.

¹¹ ꞋInkꞌez tsa kꞌet whucho whutlꞌah hooloh-un whulizas ꞌen bulerwe unli. ꞋEn Hebrew bukꞌunꞌa Abaddon huyulhni, ꞌinkꞌez Greek bukꞌunꞌa Apollyon be húyoozi.

¹² ꞋEt ꞌawet ꞌudechoo ꞌukꞌenus hoontsiꞌ-un whe hóoltsꞌut. Soo zúlhtsꞌai, nawh ꞌukꞌenus ꞌon nus hoontsiꞌ-un whuz de hóoltsꞌulh.

Bulh lhkꞌuta be tsꞌujih-i yéꞌ dija

¹³ ꞋAwet bulh lhkꞌutane lizas be tsꞌujih-i be ꞌudija. ꞋInkꞌez loodel gold be ꞌulya-i, Yakꞌusda but ꞌuskai-i, ꞌi loodel dunghi oode yinli-i, ꞌi bez ꞌuwhutni.

¹⁴ Bulh lhkꞌutane lizas be tsꞌujih nutún-un, ꞌen ꞌutsꞌutni, “Ndunne dine lizas ꞌulhghelne ꞌukoh whucho Euphrates huwhútni-un, ꞌenne bula nadontnih.”

¹⁵ ꞋEt ndunne dine lizasne ntsꞌowhuya ꞌuhunitꞌoh, ndet dzin, ndet sanun, ꞌinkꞌez ndet yus kꞌut, ꞌet wheni lhahúdintꞌoh ndi yun kꞌut dune ⅓ ꞌenne uboohooghan ha bula huditni.

¹⁶ Ndunne lhuganne yeztli kꞌudilhtsꞌine, 200,000,000ne hinli, ꞌet ꞌuhultsuk-un whudástsꞌo.

¹⁷ Njan hoosꞌen-un, ꞌet yeztli cha ꞌusꞌen. Mbene la yukꞌudilhtsꞌine, lhuztih dzoot niꞌdinla-i kwun leꞌ ꞌuntꞌoh dulkꞌun, duldzan-i ꞌankwꞌus dulhgus leꞌ ꞌuntꞌoh-i, ꞌinkꞌez sulphur kꞌunꞌa dultlꞌuz ꞌi be húdilhtsꞌi. ꞋInkꞌez yeztli ootsi ꞌantsꞌi khuna-iti, lion tsi dó natꞌen. ꞋInkꞌez ooze tsꞌe kwun, lhut, ꞌinkꞌez sulphur ꞌohwhi oozá ha idukat.

¹⁸ Ndi ta hiye dzoh nutideh-i, ꞌi be ndi yun kꞌut dunene ⅓ne, ꞌenne yahadla. Ndi kwun ꞌinkꞌez lhut, ꞌinkꞌez sulphur ꞌi yeztli oozá haidankat-i, ꞌi hikꞌeyaídla.

¹⁹ ꞋEt yé ulhtus-i ooze cha, ꞌinkꞌez ooche cha, whuz de ha idukat ꞌet huwa. Ooche ꞌantsꞌi tlꞌughus doútꞌen ꞌinkꞌez ꞌutsi oola nduninꞌai. ꞋI be dune hundílhdaih.

²⁰ ꞋOnghohne dunene, ndi hiye dzoh nutideh-i ye kꞌeyálhadlalne, ꞌenne dahútꞌen la ꞌaw lhtꞌanalhonídulh. ꞋEnne ꞌawhuz ntsiꞌ-i nududeh-i hitsꞌu teniꞌ nilhdzun ꞌet huwa. ꞋInkꞌez ꞌukꞌeltsi-i, gold, silver, dulkꞌun tꞌeh, tse, ꞌinkꞌez duchun be ꞌulya-i, nduwhi ꞌukꞌeltsi-i hoos̱ꞌen cha ꞌuntꞌoh, lheꞌdústsꞌo cha ꞌuntꞌoh, ꞌinkꞌez nulhúsyoh cha ꞌuntꞌoh, ꞌohwhi hitsꞌu teniꞌ nilhdzun-un, ꞌetsul lheꞌhinel.

²¹ Dune hughan, ꞌinkꞌez huduyun, kꞌus dune ꞌinkꞌez tsꞌekoo bulh nintaꞌhutꞌih-un, kꞌus ꞌuhundunutꞌih-un, ꞌet tsꞌiyawh whuchꞌa lhtꞌanalhonídulh.