Revelation 8 - Yak'usda Ooghuni

Bulh lhtakꞌantꞌi ꞌudustlꞌus lhudildze-i

¹ ꞋEt ꞌawet ꞌusbaiyaz ndi búlh lhtakꞌantꞌit ꞌudustlꞌus be lhidildze-i yudáhaꞌ dalhchꞌul whe sadzi lhóohoolcho haꞌ hunitꞌo whe ꞌet ꞌuwhuldzo atꞌen, ꞌet yakꞌuz tꞌeoodánel.

² Lhtakꞌantꞌine lizasne Yakꞌusda but núdilhyane ubutísꞌen. ꞋInkꞌez lhtakꞌantꞌi be tsꞌújih-i, ꞌi butlꞌa yánkat.

³ ꞋEt ꞌuyoon lizas kwuntsit be nutꞌa-i, gold be ꞌulya-i naꞌa, whusainya ꞌinkꞌez loodel but usyin. Bet yudutálhkꞌun-i sooltsun-i lhai hitlꞌa indzai. ꞋI ndi Yakꞌusda oochꞌeꞌne butenadudli, ꞌi bulh loodel, gold be ꞌulya-i, ꞌi kꞌut néyoolelh ha. Ndi loodel ꞌi kwꞌutsꞌuzda cho diztiꞌ-i but yuzkai.

⁴ Ndi kwuntsit be nutꞌa-i sooltsun-i oolut ꞌinkꞌez ndunne Yakꞌusda oochꞌeꞌne butenadudli ꞌi bulh, ndun lizas oola kꞌet tsꞌe Yakꞌusda tsꞌun whe dúkat.

⁵ ꞋEt ndun lizas kwuntsit be nutꞌa-i yílhchoot ꞌinkꞌez loodel kꞌut kwun ꞌi be yudilhbun. ꞋInkꞌez yun kꞌéyilhkat. ꞋInkꞌez khuni lhai, ꞌi be taooditni-un, ditni dutni cha, ditni oolhges cha, ꞌinkꞌez yun cha núkhisnai.

⁶ ꞋEt ndunne lhtakꞌantꞌine lizasne, lhtakꞌantꞌi be tsꞌujih nulene, huye tijih wheni lhaháduja.

ꞋUdechoo be tsꞌujih-i yéꞌ dija

⁷ ꞋEt ꞌudechoo lizas be tsꞌujih-i yéꞌ dija, ꞌinkꞌez ꞌindloo tsan ꞌinkꞌez kwun ꞌi ꞌuskaiꞌ bulh ꞌuntꞌoh-i, ꞌi yun kꞌehíyilhkat. ꞋEt ndi yun kꞌut whuduchun ⅓ ꞌi dánkꞌun. ꞋInkꞌez yun whutꞌan niyilh-i tsꞌiyawh cha dánkꞌun.

Be tsꞌujih-i bulh nanki-i yéꞌ dija

⁸ ꞋEt lizas bulh náne-un be tsꞌujih-i be ꞌudija. Dzulh cho ndultꞌoh-i kwun be dizkꞌun-i yatoo kꞌut tahúyalhꞌuz. ꞋEt yatoo ⅓ ꞌi ꞌuskaiꞌ za suliꞌ.

⁹ Yatoo kꞌut khuna-i ⅓ ꞌi yaidla. ꞋInkꞌez tsꞌi cho nukat-i ⅓ ꞌi cha musai suliꞌ.

Bulh tane beꞌ tsꞌujih-i yéꞌ dija

¹⁰ ꞋEt bulh táne lizas be tsꞌujih-i be ꞌudija. ꞋInkꞌez sum cho yakꞌuz tsꞌe haltsꞌut. Be nekwunultꞌa-i kꞌunꞌa dizkꞌun ꞌinkꞌez ꞌukoh ⅓ ꞌet ꞌuwhultsuk-un hukwꞌeílhtsꞌut. ꞋInkꞌez too yun tsꞌu há nusuli-un kꞌut cha.

¹¹ Ndi sum, ꞌi wormwood, ꞌi booziꞌ. Ndi booziꞌ tsꞌulkiꞌ, ꞌi huyúlhni. ꞋInkꞌez too ⅓ ꞌi wormwood, ꞌi suliꞌ. ꞋInkꞌez dune lhane ndi too hikꞌeyaídla, tsꞌiyawh tsꞌulkiꞌ suliꞌ ꞌet huwa.

Bulh dunghi be tsꞌujih-i yéꞌ dija

¹² ꞋEt lizas bulh dinene be tsꞌujih-i be ꞌudija whe dzenis oozaꞌ, ꞌulhdzis oozaꞌ cha, ꞌinkꞌez sum cha tsꞌiyawh ⅓ ꞌi ꞌohwhi ootꞌaꞌaznai. ꞋI tsꞌiyawh dulhgus suliꞌ. ꞋEt huwa dzenis ⅓, ꞌulhdzis cha ⅓ tsahólhgus suliꞌ.

¹³ ꞋEt yatꞌah tsꞌe ꞌilhoghun lizas ꞌoh whúya utꞌo, ꞌet nusꞌen, ꞌinkꞌez soo ꞌultus-un whe njan ndutni, “Nohni ndi yun kꞌut dilhtsꞌine, ꞌukꞌenus hoontsiꞌ-un nohtsꞌu hóokulh, ꞌukꞌenus hoontsiꞌ-un nohtsꞌu hóokulh, ꞌukꞌenus hoontsiꞌ-un nohtsꞌu hóokulh, ndunne tane lizasne be tsꞌujih-i be ꞌawet hiye tíjih ꞌet huwa!”