Revelation 7 - Yak'usda Ooghuni

Israel tsꞌu haindene 144,000ne, ꞌenne buninta bube hoodatꞌen hutileh

¹ ꞋEt hukwꞌelhꞌaz dine lizas ndi yun kꞌut didun nódilhya whe ubutísꞌen. Ndi nilhtsi dunghi ndi yun kꞌut ꞌinkꞌez yatoo kꞌut, ꞌinkꞌez duchun cha, ꞌohwhi ookꞌut noolhtsꞌi ha, ꞌet whuchꞌa kꞌoh húyoontun.

² ꞋEt ꞌuyoon lizas ndaz de ndo útꞌoh whe tísꞌen. Yakꞌusda khuna-un ye hóodalhꞌeh-i, ꞌi yiꞌalh. ꞋEt ndunne dine lizasne, ꞌultus whe ꞌubulhni ꞌenne yun ꞌinkꞌez yatoo bulh nintaꞌhotálhꞌelh ha bughá whultsꞌut.

³ ꞋEt ꞌubulhni, “Mbene la neYakꞌusda be ꞌulhna unline, ꞌenne ꞌet Yakꞌusda ye ꞌe hóodalhꞌeh-i, ꞌi be buninta bube hóodatꞌen butsꞌu tilhtselh, ꞌet whutso ndi yun, yatoo cha, ꞌinkꞌez duchun cha nintaꞌoolhꞌen junih!” ubúlhni.

⁴ ꞋEt dáltsukne buninta bube hóodatꞌen suliꞌne whudástsꞌo. Israel tsꞌu haíndene bubuzkeh, lhelhdoh didowhne, ꞌenne tsꞌiyawh 144,000ne hinli. ꞋEnne tsꞌiyawh buninta bube hoodatꞌen bubuhulhtsi.

⁵ Judah bulh didowhne tsꞌu haíndene, 12,000ne bube hoodatꞌen bubuhulhtsi. Reuben bulh didowhne tsꞌu haíndene, 12,000ne bube hoodatꞌen bubuhulhtsi. Gad bulh didowhne tsꞌu haindene, 12,000ne bube hoodatꞌen bubuhulhtsi.

⁶ Asher bulh didowhne tsꞌu haindene, 12,000ne bube hoodatꞌen bubuhulhtsi. Naphtali bulh didowhne tsꞌu haindene, 12,000ne bube hoodatꞌen bubuhulhtsi. Manasseh bulh didowhne tsꞌu haindene, 12,000ne bube hoodatꞌen bubuhulhtsi.

⁷ Simeon bulh didowhne tsꞌu haindene, 12,000ne bube hoodatꞌen bubuhulhtsi. Levi bulh didowhne tsꞌu haindene, 12,000ne bube hoodatꞌen bubuhulhtsi. Issachar bulh didowhne tsꞌu haindene, 12,000ne bube hoodatꞌen bubuhulhtsi.

⁸ Zebulun bulh didowhne tsꞌu haindene, 12,000ne bube hoodatꞌen bubuhulhtsi. Joseph bulh didowhne tsꞌu haindene, 12,000ne bube hoodatꞌen bubuhulhtsi. Benjamin bulh didowhne tsꞌu haindene, 12,000ne bube hoodatꞌen bubuhulhtsi.

Ndunne ꞌulhyul-i be dilhtsꞌine

⁹ ꞋEt hukwꞌelhꞌaz whunisꞌen ꞌinkꞌez lhane dune, huldlai kꞌet ꞌaw ꞌubutsꞌolhto ꞌaitꞌoh, ꞌenne ubunusꞌen. Lhelhdun keyoh whutꞌenne, lhelhdoh didowhne. Yinka duneꞌne cha. Tsꞌiyawh lhelhtsꞌun unꞌa yalhdukne ꞌuhintꞌoh. ꞋEnne tsꞌiyawh kwꞌutsꞌuzda cho diztiꞌ-i ꞌinkꞌez ꞌusbaiyaz hibut núdilhya. Tsꞌiyawh ꞌulhyul-i nahuyitsꞌuz-i be dune hinli ꞌinkꞌez ꞌul tlꞌotel, ꞌi nahídule.

¹⁰ ꞋEt ꞌenne tube cho ꞌuhutni “NeYakꞌusda kwꞌutsꞌuzda cho diztiꞌ-i kusda-un ꞌinkꞌez ꞌusbaiyaz cha, be uzdujih-i, ꞌenne butsꞌu ha hóoltsꞌut!”

¹¹ ꞋInkꞌez ꞌutso whudilhdzulhne, ꞌinkꞌez dunghi ꞌusjiz-i cha, ꞌinkꞌez lizasne cha, ꞌenne tsꞌiyawh ndi kwꞌutsꞌuzda cho diztiꞌ-i, ꞌi hinat núdilhya ꞌinkꞌez hibut nacháhunildil ꞌinkꞌez Yakꞌusda hitsꞌu teniꞌ nalhdzin.

¹² ꞋInkꞌez ꞌuhutni, “Ndo honeh! Uzdólhtiꞌ. Ye diztiꞌ-i cha, ꞌinkꞌez be whútnih-i, be tsꞌílhtus ꞌinkꞌez nutꞌi cha, be musi tsꞌutni cha, ꞌinkꞌez be uzdiztiꞌ-i, ꞌohwhi neYakꞌusda oochꞌeꞌ yoleꞌ ꞌilhiz ꞌinkꞌez ꞌilhiz wheni. ꞋEt ndo honeh!”

¹³ ꞋAwet ꞌilhoghun ꞌutso whudilhdzulh-un, ꞌen ꞌusúlhni, “Ndunne ꞌulhyul-i be dilhtsꞌine, mbene wheꞌ hintꞌoh? ꞋInkꞌez ntsꞌez de ha hándil?”

¹⁴ ꞋEt ꞌudúsni, “SMoodih nyun tꞌeoonínzun.” ꞋEt ꞌusúlhni, “ꞋOh de soo ꞌukꞌenus dune dzoh nuhutidoh, whutoh tehudulya. ꞋInkꞌez ꞌusbaiyaz buzkaiꞌ be dunaih tunáhuyuzguz ꞌinkꞌez ꞌulhyul suliꞌ.

¹⁵ ꞋEt huwa Yakꞌusda ookwꞌutsꞌuzda cho diztiꞌ-i hinat núdilhya. ꞋInkꞌez dzin ꞌinkꞌez ꞌulhdzis ibulh hilugliz whucho hiba neꞌutꞌen. ꞋInkꞌez ndun ndi kwꞌutsꞌuzda cho diztiꞌ-i yukꞌut usda-un, ꞌen butoh ꞌuntꞌoh ꞌinkꞌez bughu tileh.

¹⁶ ꞋAw ꞌon ꞌun buyelhéꞌtilhtsꞌul ꞌinkꞌez ꞌaw ꞌon ꞌun taꞌhósda ꞌaitꞌoh. ꞋAw sa zul niz cha ꞌuhootꞌeꞌ bukꞌeidodi ꞌaitꞌoh, ꞌinkꞌez ꞌaw tube cho buba whunoolwus ꞌaitꞌoh.

¹⁷ ꞋEt huwa ꞌubinla, ꞌusbaiyaz kwꞌutsꞌuzda cho diztiꞌ-i butoh ꞌuntꞌoh, ꞌen bughu tileh whe butso tiyalh ꞌinkꞌez ndi too ꞌilhiz wheni ookꞌu tsꞌukhuna-i, ꞌi tsꞌun ꞌúbutilelh. ꞋInkꞌez Yakꞌusda bunatsul tooꞌ tsꞌiyawh buna kꞌet yúnaitilhdoh.”