Revelation 6 - Yak'usda Ooghuni

ꞋUdechoo ꞌudustlꞌus lhudildze-i

¹ ꞋInkꞌez nyoo ꞌudustlꞌus be lhídildze-i ꞌilho ꞌi ꞌusbaiyaz yutsꞌu ha yálhchꞌul ꞌet whutísꞌen ꞌinkꞌez dunghi ꞌusjiz-i butoh ꞌilhoghi ꞌi duzústsꞌai. Ditni kꞌunꞌa ꞌutni ꞌinkꞌez “ꞋAnih ꞌinkꞌez whunilhꞌen!” ni.

² ꞋEt whunusꞌen ꞌinkꞌez yeztli ꞌulhyul-i tisꞌen. Mbe la yukusda-un kꞌaza nutun. ꞋInkꞌez ndai la netsi kꞌustan-i naniztsꞌun-i, ꞌi ootlꞌa yíltsꞌut. Tsꞌiyanne chꞌaꞌ tilhdoh ꞌinkꞌez whuchꞌa butálhdoh ha, ꞌet whuz whinya.

Bulh nanki ꞌudustlꞌus lhudildze-i

³ ꞋEt bulh nanki ꞌudustlꞌus be lhídildze-i, ꞌi yudáhaꞌ dalhchꞌul. ꞋInkꞌez bulh nanki ꞌusjiz-i, ꞌi ꞌutni dastsꞌo, “ꞋAnih ꞌinkꞌez whunilhꞌen!” ni.

⁴ ꞋInkꞌez ꞌuyoo yeztli, kwun kꞌunꞌa dúlkꞌun-i, whuz whelget. Mbe yukusda-un, ꞌen be tsꞌihꞌun unꞌa lhtsꞌun ꞌutsꞌintꞌoh-un, ndi yun kꞌut whutꞌenne bughu hootálhchulh, ꞌet yutlꞌa honꞌai dune lhoohoogan ha. ꞋInkꞌez saluzti cho ꞌi ootlꞌa yánkez.

Bulh ta-i ꞌudustlꞌus lhudildze-i

⁵ Ndet la bulh ta-i ꞌudustlꞌus be lhídildze-i yudáhaidalhchꞌul. Ndi bulh ta-i ꞌusjiz-i dastsꞌo ꞌinkꞌez ꞌutni, “ꞋAnih, whunilhꞌen!” Whuz yutasꞌen ꞌinkꞌez yeztli dulhkꞌus-i, ꞌi tisꞌen. Mbe yukusda-un, ꞌen bé neꞌuldas-i, ꞌi oola kꞌét yuzdla.

⁶ ꞋInkꞌez nyoo dunghi ꞌusjiz-i ootoh tsꞌe ꞌuwhutni, “Lhes ha núyeh-i oosaꞌ ꞌilho dizbun, ꞌi ꞌilho sooniya denarius huyúlhni-i, ꞌi kꞌelha yutizꞌai. ꞋInkꞌez ta oosaꞌ ndultsuk-i tlꞌo maiꞌ, barley huyúlhni-i, ꞌi ꞌilho sooniya denarius, ꞌi kꞌelha yutizꞌai. ꞋInkꞌez khe be ꞌutꞌes-i ꞌinkꞌez tsꞌekoo tooꞌ cha, ꞌi ꞌohwhi khun te nintaꞌoolhꞌen junih.”

Bulh dunghi-i ꞌudustlꞌus lhudildze-i

⁷ ꞋEt bulh dunghi-i ꞌudustlꞌus be lhídildze-i, ꞌi yudáhaꞌ dalhchꞌul whe bulh dunghi-i ꞌusjiz-i ꞌet ndutni whe dástsꞌo, “ꞋAnih ꞌinkꞌez whunilhꞌen!”

⁸ Whunusꞌen ꞌinkꞌez yeztli ꞌantsꞌi bodande-i doútꞌen-i. ꞋInkꞌez yukusda-un booziꞌ, ꞌi be yátsꞌadlah-i huyúlhni. ꞋEt niz de yaidlane dilhtsꞌi-un, Hades huwhútni-un, ꞌet buwhuniltsꞌulh. Ndi yun kꞌut whutꞌenne hoontsool-unyaz, nedo kꞌoh, ¼ huwhutni-un, ꞌet ꞌuwhulcho-un ubuhutighan, ꞌet bughá whultsꞌut. Saluzti be, ꞌinkꞌez dai, dada nudúzut-i, ꞌi cha, ꞌinkꞌez chuntoh khuna-i, ꞌohwhi be dune yahitádlah.

Bulh kwulaiꞌ ꞌudustlꞌus lhudildze-i

⁹ ꞋEt ndet bulh kwulaiꞌ-i ꞌudustlꞌus be lhídildze-i yudáhaꞌ dalhchꞌul whe mbene la Yakꞌusda ooghuni gha ꞌinkꞌez highuni ghu yalhdukne dune ubanghanne buzul, ꞌenne loodel tꞌah bubutísꞌen.

¹⁰ ꞋEt tube cho njan duhútni, “Nekꞌuneꞌ ꞌulꞌen-un nyun lubeshi nghu hooloh-un, ꞌinkꞌez tsꞌihꞌun ꞌintꞌoh-un cha inli. Ndi yun kꞌut mbene neanghanne dawhuldzoh neuzkaiꞌ gha buba nahutanyeh ꞌinkꞌez neba kꞌutántnelh?”

¹¹ ꞋInkꞌez ꞌilhoghun hinli whe ꞌulhyul-i nahuyitsꞌuz-i butlꞌaꞌ húninla. ꞋInkꞌez ꞌubuhútni, bubulh ꞌulhnane ꞌinkꞌez bubulhutsinke ꞌenne cha tsꞌiyawh ꞌenne bukꞌunꞌa za hubuhutighan, ꞌet lhaoodutanelh whutsꞌun, nahoolyis.

Bulh lhkꞌuta-i ꞌudustlꞌus lhudildze-i

¹² ꞋEt ꞌusbaiyaz ꞌet bulh lhkꞌuta-i ꞌudustlꞌus be lhidildze-i yudáhaꞌ dalhchꞌul whutisꞌen whe khuntsul tube yun núkhisnai, ꞌinkꞌez sa cha dulhkꞌus suliꞌ, naih dulhkꞌus-i doútꞌen. ꞋInkꞌez ꞌulhdzis oozaꞌ cha, ꞌantsꞌi ꞌuskaiꞌ doútꞌen suliꞌ.

¹³ ꞋInkꞌez sum ꞌi cha yun kꞌut nainkat. Ndi duchun, figs, maiꞌ ntitꞌai whutso nilhtsi ulhtus-i be yun nanukuk, ꞌet whuz unꞌa sum yun kꞌut nainkat.

¹⁴ ꞋInkꞌez ntsꞌenꞌa ꞌudustlꞌus lhenahinudus kꞌunꞌa, ꞌet whuz unꞌa yatꞌah lhenawhuniduz ꞌinkꞌez whuz unꞌa gak whuzdliꞌ. Dzulh cha ꞌinkꞌez noo te, tsꞌiyawh whuzdla-un ꞌudun neninkat.

¹⁵ Ndi yun lerwene, dune nchane, dune hoonzoo ꞌuntꞌohne, lhuganne bumoodihne, dune ulhtusne, ꞌulhnane tsꞌiyawh cha, ꞌinkꞌez ꞌulhnane bula naditnine, ꞌenne cha, ꞌenne tsꞌiyawh tseꞌan ꞌinkꞌez dzulh toh tse tꞌah, ꞌoh huntilhꞌi.

¹⁶ ꞋInkꞌez ꞌuhutni, “Tse ꞌinkꞌez dzulh tubulh nekꞌelhúhotꞌalh. ꞋEt de mbe kwꞌutsꞌuzda cho diztiꞌ-i kusda-un, ꞌen oonin ꞌinkꞌez ꞌusbaiyaz ye húnilchꞌe-i, chꞌa neúntoolhꞌi.

¹⁷ ꞋAlhaꞌ ye nebulh hunilchꞌe-i ꞌawet whudzin whusahóoltsꞌut. ꞋAw ꞌilhoghun hoontsꞌi whulh ooyin ꞌaitꞌoh.”