Revelation 5 - Yak'usda Ooghuni

ꞋUdustlꞌus ookꞌu neꞌúsguz-i, ꞌi Yakꞌusda be ꞌusbaiyaz yílhchoot

¹ ꞋEt whunusꞌen, mbe kwꞌutsꞌuzda cho diztiꞌ-i yukusda-un, ꞌen nailhni tsꞌunkꞌus dula be ꞌudustlꞌus lhchꞌaz tsꞌe ookꞌu neꞌúsguz-i, ꞌinkꞌez ꞌudustlꞌus lhyúnduniduz. ꞋInkꞌez lhtankꞌantꞌit-un, ꞌet buneꞌdilhze.

² ꞋEt ꞌilhoghun lizas soo ulhtus-un tísꞌen. ꞋInkꞌez tube cho njan ndutni, “Mbe soo ꞌuldzooꞌ-un, ꞌen ndi ꞌudustlꞌus yadáhaꞌ dutilhchꞌulh ꞌinkꞌez lhehaíduntidus?”

³ Ndo yakꞌuz, kꞌus yun kꞌut, kꞌus yun tꞌah cha, ꞌaw ꞌilhoghun soo lhéꞌildzooꞌ-un hooloh ndi ꞌudustlꞌus yadáhaꞌ dutilhchꞌulh kꞌus yuntilhꞌelh huba.

⁴ ꞋInkꞌez ꞌaw ꞌilhoghun soo lheꞌildzooꞌ ndi ꞌudustlꞌus yadáhaꞌ dutilhchꞌulh, ꞌinkꞌez yukꞌuyatilhduk kꞌus yuntilhꞌelh. ꞋAw nahuyólhtelh ꞌaitꞌoh, ꞌet huwa tube huwose.

⁵ ꞋEt ꞌilhoghun ꞌutso whudilhdzulh-un, ꞌen ꞌusúlhni, “Intso iloh! Nilhꞌen Judah bulh didowhne bubukhuna-i cho, lion huyúlhni, mbe lerwe David tsꞌu haínzut-un, ꞌen ꞌuja tsꞌiyantsuk whuchꞌaꞌ nilhde. ꞋEn za soo ꞌúldzooꞌ ndi ꞌudustlꞌus yadáhaꞌ dutilhchꞌulh, ꞌinkꞌez ndi lhtakꞌantꞌi be lhúnedilhze-i yadáhaꞌ dutilhchꞌulh.”

⁶ ꞋInkꞌez ndet whutísꞌen tube sba hooncha. Ndi kwꞌutsꞌuzda cho diztiꞌ-i ꞌinkꞌez ndi dunghi hoonliyaz ꞌusjiz-i, ꞌinkꞌez ꞌutso whudilhdzulhne butoh, ꞌet ꞌusbaiyaz ꞌilho hizilhghi-i doútꞌen ꞌet usyin. Oode lhtakꞌantꞌi ꞌinkꞌez lhtakꞌantꞌi oona cha hoonli. ꞋI oona ꞌi ꞌuntꞌoh Yakꞌusda oochꞌeꞌ unli lhtakꞌantꞌi nududeh-i. ꞋI ndi yun kꞌut ndulcho whe whélꞌaꞌ.

⁷ ꞋEt ꞌusbaiyaz mbe kwꞌutsꞌuzda cho diztiꞌ-i kusda-un, ꞌen nailhni tsꞌunkꞌus ꞌudustlꞌus yoontun-i, ꞌi yula kꞌéhayanꞌai.

Yakꞌusda beꞌ ꞌusbaiyaz ꞌaw ꞌen za soo ꞌuldzooꞌ

⁸ ꞋEt ndi ꞌudustlꞌus yílhchoot ibulh, nyoo dunghi ꞌusjiz-i, ꞌinkꞌez nat whúnizyane ꞌon ꞌat dine tso whudilhdzulhne cha, ndi ꞌusbaiyaz hibut nacháhunildil. ꞋIlhoghun hinli whe nela be, be tsꞌujun-i nuhúle, ꞌinkꞌez tsetsꞌai gold unli-i, ꞌi dizkꞌun-i sooltsun-i bet whúdizbun. ꞋI ndi ꞌi ꞌuntꞌoh mbene Yakꞌusda oochꞌeꞌne butenadudli ꞌuntꞌoh.

⁹ ꞋInkꞌez ꞌandidi shun ꞌi hiyé whenijun whe njan duhutni, “Ndi ꞌudustlꞌus itálhchulh ꞌinkꞌez oodáhaꞌ datalhchꞌulh ꞌet huba soo ꞌíldzooꞌ. Dune nyozilhghi ꞌinkꞌez ꞌuyoonne tsꞌiyanne didohne, ꞌinkꞌez lhelhtsꞌun unꞌa yalhdukne, ꞌinkꞌez ꞌuyoonne dune, ꞌinkꞌez lhelhdun keyoh whutꞌenne cha, nyuzkaiꞌ be tsꞌiyawh Yakꞌusda ba naneonket, ꞌet huwa.

¹⁰ ꞋInkꞌez neYakꞌusda ba lerwene ꞌinkꞌez lubretne nezilhtsi. ꞋInkꞌez ndi yun kꞌut kꞌúneꞌ tsꞌotilꞌelh ha uzdutáltsꞌilh.”

¹¹ ꞋEt njan whutísꞌen ꞌinkꞌez whudástsꞌo ndi kwꞌutsꞌuzda cho diztiꞌ-i, ꞌinkꞌez hoonli ꞌusjiz-i cha, ꞌinkꞌez ꞌutso whudilhdzulhne, ꞌenne cha, ꞌenne bunat lhane lizasne, ꞌenne whuz huldlai kꞌet ꞌaw butsꞌolhto ꞌaitꞌoh,

¹² ꞌenne tube cho njan hultus whe duhútni, “Ye ulhtus-i, hiye hoonzoo ꞌuntꞌoh-i, be whútnih-i, ꞌinkꞌez nutꞌi cha, be uzdiztiꞌ-i, ꞌinkꞌez be hóotꞌen-i, ꞌinkꞌez tsꞌuhoontꞌiꞌ te bé neꞌtsꞌulꞌen-i, ꞌusbaiyaz hizilhghi-i, ꞌen ꞌuntꞌoh ndowhi tsꞌiyawh huba soo ꞌúldzooꞌ whe uzdólhtiꞌ.”

¹³ ꞋInkꞌez ndai ꞌusjiz ndo yakꞌuz ꞌuntꞌoh-i, ndi yun kꞌut cha, ꞌinkꞌez ndi yun ootꞌah tsꞌe cha, ꞌinkꞌez dai la yatoo kꞌut hoonli-i, ꞌenne tsꞌiyawh njan nduhútni whe ubudustsꞌo, “Tsꞌuhóontꞌiꞌ te bé neꞌtsꞌulꞌen-i, be uzdiztiꞌ-i, be hóotꞌen-i, ꞌinkꞌez tsꞌiyantsuk ookꞌuneꞌ whutꞌen-i cha, mbe la kwꞌutsꞌuzda cho diztiꞌ-i kusda-un, ꞌinkꞌez ꞌusbaiyaz hizilhghi-i cha, ꞌilhiz ꞌinkꞌez ꞌilhiz wheni buchꞌeꞌ yoleꞌ.”

¹⁴ ꞋEt nyoo dunghi ꞌusjiz-i, ꞌi ꞌutni, “ꞋEt ndo honeh!” ꞋInkꞌez nat whunizyat ꞌon ꞌat dine ꞌutso whudilhdzulhne, hibut nacháhunildil ꞌinkꞌez ndun ꞌilhiz wheni khuna-un hitsꞌu teniꞌ nalhdzin.