Revelation 22 - Yak'usda Ooghuni

ꞋUkoh bugha tsꞌúkhuna

¹ ꞋInkꞌez ꞌukoh soo too unzoo-i, oogha tsꞌukhuna-i soo unzoo kꞌet teh ndulcho whe hootꞌen, ꞌet whusúnilhtan. Yakꞌusda ꞌinkꞌez ꞌusbaiyaz bukwꞌutsꞌuzda cho díztiꞌ-i, ꞌi ꞌukoh ootsꞌu ha yánli.

² Ti soo whuniz ꞌoh whúya lhusúli. ꞋUkoh lhchꞌaz tsꞌe taba ꞌet duchun oogha tsꞌukhuna-i nánudizꞌa. ꞋI whunizyai ꞌon ꞌat nanki oomaiꞌ yinli. ꞋIlho duchun ꞌi sanun totsuk oomaiꞌ whulhih. ꞋInkꞌez duchun ootꞌan ꞌi lhelhdun yun kꞌut whutꞌenne huye naóojeh ha ꞌuntꞌoh.

³ ꞋAw ndai Yakꞌusda yukꞌehanya-i, ꞌi hootáloh. ꞋEt kꞌus Yakꞌusda ꞌinkꞌez ꞌusbaiyaz bukwꞌutsꞌuzda cho diztiꞌ-i, ꞌet tiꞌalh. ꞋInkꞌez be ꞌulhnane hinat néꞌtitꞌen ꞌinkꞌez hiba neꞌhutitꞌen whe hitsꞌun teniꞌ ꞌuntilhdzun.

⁴ Hinin hiyuntilhꞌelh, ꞌinkꞌez booziꞌ buninta hukwꞌu dutaꞌalh.

⁵ ꞋInkꞌez ꞌulhdzis cha hootáloh. ꞋAw be hootꞌen-i kꞌus sa be hootꞌen-i cha hiyit ꞌutitꞌelh. NeMoodihti Yakꞌusda ootsꞌu ha yánduz-i, ꞌi ooniz ꞌuwhutátꞌelh ꞌet huwa. ꞋInkꞌez ꞌilhiz ꞌinkꞌez ꞌilhiz wheni huyulh dútatiꞌ.

ꞋAwet neba nilhdukw suliꞌ

⁶ ꞋInkꞌez lizas ꞌusúlhni, “Ndi khuni ootꞌa níwhunintan ꞌinkꞌez tsꞌihꞌun ꞌuntꞌoh.” ꞋInkꞌez ndunne buMoodihti Yakꞌusda be nus hooꞌenne, daóotanelh-un, ꞌawet nilhdukw suliꞌ. ꞋInka, dude ꞌulhnane butꞌeoonoolhdzeh ha dulizas butsꞌún whe yalhꞌaꞌ.

⁷ “Soo zilhtsꞌai, nilhdukw whusatísyalh. Ndi ꞌudustlꞌus ꞌi kꞌut khuni be nus hootꞌen-i, mbene huyoontun de, tube ꞌukꞌenus hoonzoo-un bugha whútaltsꞌulh.”

⁸ ꞋInkꞌez si, John, ndo ho hoosꞌen ꞌinkꞌez whudástsꞌo whe lizas whusúnilhtan-un, ꞌet huwa ꞌen oobut nachánisno ootsꞌun teniꞌ untisdzilh ha.

⁹ ꞋEt ꞌusúlhni, “ꞋEt ndintꞌen iloh! Nyulh ꞌulhna-un usdli whe ꞌustꞌoh. ꞋInkꞌez nyulhutsinke nus hooꞌenne, ꞌinkꞌez mbene ndi ꞌudustlꞌus ooghuni óontunne, ꞌenne cha bubulh ꞌulhna usdli whe ꞌustꞌoh. Yakꞌusda, ꞌen za tsꞌun teniꞌ nilhdzun!”

¹⁰ ꞋInkꞌez ꞌusulhni, “Ndi ꞌudustlꞌus nus hooꞌen-i khuni oodánaꞌdolhdzeh junih! ꞋAwet nilhdukw suliꞌ ꞌet huwa.

¹¹ Mbe tsꞌihꞌun lheꞌitꞌoh-un, whute ꞌet za ndótꞌeꞌ. Mbe dutsun-un, whute ꞌet za ndótꞌeꞌ. ꞋInkꞌez mbe tsꞌihꞌun ꞌuntꞌoh-un, ꞌet za ndótꞌeꞌ. Mbe Yakꞌusda ba ꞌudun nelya-un, ꞌet za ndótꞌeꞌ,” ni lizas.

Jesus ꞌutni, “Tsꞌiyanne bube ꞌutꞌen gha buba ꞌukꞌelha yutiselh-i, ꞌi usdlelh”

¹² “Whunilhꞌen, nilhdukw whusanátisdalh ꞌinkꞌez tsꞌiyanne bube ꞌutꞌen gha whuz unꞌa buba ꞌukꞌelha yutiselh-i, ꞌi nusdle.

¹³ Si ꞌustꞌoh Alpha ꞌinkꞌez Omega usdli. ꞋUdechoo wheꞌ whuditꞌen-un ꞌinkꞌez ꞌetsul ꞌuwhutánelh-un, ꞌen ꞌustꞌoh. ꞋUdetso-un ꞌinkꞌez ꞌudekꞌez-un ꞌustꞌoh.”

¹⁴ Mbene la yughuni kꞌuneꞌ ꞌutꞌenne, ꞌenne ꞌukꞌenus hoonzoo-un bugha whútaltsꞌulh. Ndi duchun oogha khútna-i, ꞌinkꞌez njan keyoh whuti whudati-un dahútidulh-un, ꞌenne za bughá whuntꞌai wheꞌ hoontꞌoh.

¹⁵ ꞋEt hoontsꞌi njan keyoh whuti yoo ꞌaz tsꞌe, ꞌet lhike ndultꞌohne, ꞌinkꞌez duyunne, dune kꞌus tsꞌekoo bulh níntaꞌ ꞌutꞌihne, neghane cha, ꞌinkꞌez ꞌukꞌeltsi tsꞌun tenadudline cha, ꞌinkꞌez mbene hoohóontꞌiꞌ whe huwhutsꞌitne, ꞌenne tsꞌiyawh yoo ꞌaz tsꞌe ꞌuhintꞌoh.

¹⁶ “Si Jesus slizas nohni Yakꞌusda ba ꞌilhunaoodulhne, ꞌen nohtsꞌún whesꞌaꞌ. Ndi khuni Yakꞌusda ba ꞌilhunaoodulhne, ꞌenne ꞌubudóhniꞌ ha David ootsꞌu ha yándene, ꞌenne bube diszut whe ꞌustꞌoh. Bundadaꞌ sum tube be hóodatꞌen, ꞌi le ꞌustꞌoh!” ni Jesus.

¹⁷ ꞋEt Ndoni ꞌinkꞌez Jesus ghu tidalh-un bulh, “ꞋAnih!” hutni. ꞋInkꞌez mbe whuditsꞌo-un, ꞌen cha, “ꞋAnih!” hudooniꞌ. Mbe la taꞌóosda-un cha diz tóoyaꞌ ꞌinkꞌez ndi be tsꞌúkhuna-i whutooꞌ, ndet hukwaꞌ ninzun totsuk, hiyootnaiꞌ.

Tsꞌiyanne bugha ꞌutni

¹⁸ Ndi ꞌudustlꞌus be nus hootꞌen-i, be ꞌudustlꞌus ditsꞌone, huwahli nohdúsni. Mbe dichꞌoh khuni ꞌuyoo cha yulanaidanla-un, ndi dune ye dzoh nuzut-i ndi ꞌudustlꞌus kꞌut ooghun ꞌukꞌu nusguz-i, ꞌi ꞌon ꞌun cha ye dzoh nuzut-i, Yakꞌusda bugha óotaꞌalh.

¹⁹ ꞋInkꞌez ndi ꞌudustlꞌus be nus hootꞌen-i, mbene whuloh khuni ꞌukꞌu naitizguzne, ndi be tsꞌúkhuna-i be ꞌudustlꞌus, njan keyoh whuti whulubeshi ooghu hooloh-un cha, ꞌinkꞌez ndi duchun be tsꞌukhuna-i, ndai la buchꞌeꞌ yutaleh-i, ꞌohwhi tsꞌiyawh Yakꞌusda bughu nahootálhchulh.

Khuntsul whusanátisdalh, ni Jesus

²⁰ Mbe ndowhi nohdániꞌ-un, ꞌen ꞌutni, “ꞋAlhaꞌ ꞌawet nilhdukw whuz de úsyalh!” ꞋEt ndo honeh! NeMoodihti Jesus, whuz unꞌa za dizínyalh!

²¹ NeMoodihti Jesus Christ ye unzoo-i tsꞌiyawh nohbulh óotꞌeꞌ. ꞋEt ndo honeh.