Revelation 21 - Yak'usda Ooghuni

Tsꞌiyaitsuk ꞌandidi nasdliꞌ

¹ ꞋEt ꞌawhundidi yatꞌah ꞌinkꞌez yun cha ꞌawhundidi-un, ꞌet whutísꞌen. ꞋUdechoo yatꞌah yakꞌuz ꞌinkꞌez ꞌudechoo yun ꞌet whehónkat ꞌet huwa. ꞋInkꞌez ꞌaw yatoo cha hooloh suliꞌ.

² ꞋEt si, John, njan keyoh whuti whulubeshi hooloh-un, ꞌandit-un Jerusalem huwhútni, ꞌet ndus de yakꞌuz tsꞌe Yakꞌusda tsꞌun ha hóoltsꞌut, ꞌet whutísꞌen. ꞋAntsꞌi tsꞌekeyaz ki titꞌelh-un ooki yutaleh-un ba soo naduja, ꞌet ndó hotꞌen.

³ ꞋEt ndus de yakꞌuz tsꞌe tube cho ꞌuwhutni, njan nduwhútni, “Nilhꞌen ꞌet Yakꞌusda dune bubulh whutitꞌelh, ꞌinkꞌez bubulh dune tileh, ꞌinkꞌez hiduneꞌ tileh. ꞋInkꞌez Yakꞌusda dichꞌoh bubulh ꞌútitꞌelh ꞌinkꞌez buYakꞌusda tileh.

⁴ ꞋInkꞌez Yakꞌusda bunatsul tooꞌ buna kꞌet whunaitilhdoh. Yatsꞌadlah-un cha ꞌetsul ꞌuwhutanelh. Tsꞌodi tsinli-un ꞌinkꞌez tsꞌutso-un cha ꞌetsul ꞌuwhutanelh. ꞋAw ꞌon ꞌun hukwꞌe tsꞌunduda-un cha hootáloh. Whutsꞌo daꞌ ꞌuhoontꞌoh-un tsꞌiyawh gak whuzdliꞌ ꞌet huwa.”

⁵ ꞋEt kwꞌutsꞌuzda cho diztiꞌ-i kusda-un ꞌutni, “Soo zilhtsꞌai tsꞌiyaitsuk ꞌawhundidi ꞌuwhusdleh.” ꞋInkꞌez ꞌusúlhni, “Ndi khuni tsꞌihꞌun ꞌuntꞌoh ꞌinkꞌez ootꞌa niwhunintan whe ꞌuntꞌoh, ꞌet huwa ꞌukꞌeꞌinges.”

⁶ ꞋInkꞌez ꞌusulhni, “ꞋAwet lhaóoduja! Si Alpha ꞌinkꞌez Omega usdli. ꞋUdetso wheꞌ whuditꞌen ꞌinkꞌez lhawhúdulya-un usdli. Mbene taꞌóosdane ha tájilh-un tsꞌukhuna-un whutooꞌ ꞌantsꞌi bugha ítasdzoh.

⁷ Mbene la ꞌutꞌen ntsiꞌ-i chꞌaꞌ ꞌalhdehne tsꞌiyaitsuk bubaꞌ yutátꞌelh. BuYakꞌusda tisdleh ꞌinkꞌez suzkeh hutileh.

⁸ ꞋEt hoontsꞌi mbene la whénuljutne, ooba ꞌalhaꞌ lheꞌhóotꞌohne, hubaꞌ whuninzun tuneꞌ ꞌutꞌenne, neghanne cha, hoontsiꞌ túneꞌ ꞌutꞌenne, duyunne, ꞌukꞌeltsi tsꞌun tenadudline, ꞌinkꞌez whutsꞌitne cha, ꞌenne tsꞌiyawh nyo bunghun dúwhulcho-un kwun sulphur be dizkꞌun-un, ꞌet ꞌuwhutitꞌelh. ꞋEt whúlh nat yatsꞌitádlah-un ꞌuhoontꞌoh.”

Keyoh whuti Jerusalem ꞌawhundidi nawhusdliꞌ

⁹ ꞋEt nyoonne lhtakꞌantꞌine lizas, lhtakꞌantꞌi oosaꞌ naniztsꞌun-i hiye dzoh nutideh-i, lhtakꞌantꞌi didowh-i, ꞌi be dizbun-i, ꞌen bube ꞌilhoghun lizas sghu ninya ꞌinkꞌez sulh yailhduk. Njan ndúsulhni, “ꞋAnih ndun ꞌusbaiyaz ooꞌat tileh-un búnyuntistun.”

¹⁰ ꞋEt Ndoni be dzulh yoo do haditꞌai-i whuz whe salhti. ꞋInkꞌez keyoh whuti Jerusalem ꞌaw whulubeshi hooloh-un, yakꞌuz tsꞌe Yakꞌusda tsꞌun ndus de hóoltsꞌulh, ꞌet whusúnilhtan.

¹¹ Yakꞌusda ootsꞌu ha yánduz-i, ꞌi bulh ꞌóohoontꞌoh. ꞋInkꞌez be hootꞌen-i ꞌantsꞌi tseyaz duniztiꞌ-i, jasper huyulhni, ꞌi ꞌuyoo tse oonohóotꞌen-i, crystal huyulhni, ꞌohwhi bundúyotꞌen.

¹² Sih dutai ꞌinkꞌez dutsꞌo ꞌinkꞌez yoo do ꞌuntꞌoh. Whunizyai ꞌon ꞌat nanki ꞌet ndati. ꞋInkꞌez whunizyane ꞌon ꞌat nane lizas dati-un nuhúdilhya. ꞋEt whunizyai ꞌon ꞌat nane Israel ootsꞌu haindene didowhne, ꞌenne bubooziꞌ dati ꞌukꞌusguz.

¹³ Tat-un dati-un ndaꞌ whudinla. Tat-un dati-un no whudinla. Tat-un dati-un nyan whudinla. ꞋInkꞌez tat-un dati-un nooꞌ whudinla.

¹⁴ Nyo keyoh whuti sih whunasaꞌa-i, ꞌi whunizyai ꞌon ꞌat nanki tse lhelhdoh didowh-i ookꞌu whuzꞌai. ꞋInkꞌez whunizyane ꞌon ꞌat nane ꞌusbaiyaz ba whelꞌaꞌne bubooziꞌ hukwꞌusguz.

¹⁵ Nyoon sulh yalhduk-un gold tlꞌozilh ꞌutꞌi, keyoh whuti whudati ꞌinkꞌez whusih cha whundunáꞌootalhdzih ha.

¹⁶ Keyoh whuti oosih tsꞌiyawh lhundúwhulcho. Dáwhulhyiz-un, ꞌet za ꞌuwhultel. ꞋInkꞌez keyoh whuti tlꞌozilh be whundunaꞌoolhdzai. Dawhulhyiz-un, dahooltel-un, ꞌinkꞌez dayóodo-un, ndoohoolcho whe whundunaꞌoolhdzai. 12,000 furlongs ꞌuwhulyiz. 12,000 furlongs ꞌuwhultel, ꞌinkꞌez 12,000 furlongs náꞌdaldzah.

¹⁷ ꞋEt sih doo cha whundunaꞌoolhdzai. ꞋI 144 cubits huyulhni. Dune whundunaꞌoolhdzih, whuz unꞌa lizas whundunaꞌoolhdzai.

¹⁸ ꞋInkꞌez sih jasper huyulhni-i, tse ꞌi be ꞌuhoolya. ꞋInkꞌez nyoo keyoh whuti soo dadintꞌaz ookiúntꞌen-i nduntꞌoh-i, soo gold gaih za keyoh whuti beꞌ hoolya-un ꞌuhoontꞌoh.

¹⁹ ꞋInkꞌez keyoh sih whunasaꞌa-i, ꞌi ootꞌah soo tsꞌiyaitsuk tseyaz duniztiꞌ-i, ꞌi be nyoo keyoh whusih whunasaꞌa-i ookꞌu whuzꞌai-i, ꞌi be ookꞌut nodilhtsiꞌ. ꞋUdechoo tse whutlꞌah dizꞌai-i, ꞌi jasper ꞌuntꞌoh. Bulh nanki tse, ꞌi sapphire huyulhni-i, ꞌi ꞌuntꞌoh. Bulh ta-i tse, ꞌi chalcedony huyúlhni. Bulh dunghi tse, ꞌi emerald ꞌuntꞌoh.

²⁰ Bulh kwúlaiꞌ tse, ꞌi sardonyx huyúlhni. Bulh lhkꞌuta tse, ꞌi sardius huyúlhni. Bulh lhtakꞌantꞌi tse, ꞌi chrysolite huyúlhni. Bulh lhkꞌudunghi tse, ꞌi beryl huyúlhni. Bulh ꞌilho hooloh tse, ꞌi topaz huyulhni. Bulh whunizyat tse, ꞌi chrysoprase huyulhni. Bulh whunizyai ꞌon ꞌat ꞌilho tse, ꞌi jacinth huyulhni. ꞋInkꞌez bulh whunizyai ꞌon ꞌat nanki tse, ꞌi amethyst huyúlhni.

²¹ ꞋInkꞌez whunizyai ꞌon ꞌat nanki dati, ꞌi whunizyai ꞌon ꞌat nanki kwꞌusul duníztiꞌ-i ꞌuntꞌoh, pearl huyulhni, ꞌet ꞌilho kwꞌusul duniztiꞌ-i cho, ꞌi ꞌilho dati unli. ꞋInkꞌez ooti keyoh whuti nówhuzꞌa-un, soo dadintꞌaz kꞌunꞌa ookiúntꞌen-i, soo gold gaih za ꞌuhoontꞌoh.

Keyoh Jerusalem ꞌawhundidi-i, ꞌi Yakꞌusda ootsꞌu ha yánduz-i be hootꞌen tileh

²² ꞋEt hoontsꞌi ꞌaw lugliz whucho lhuwhúsꞌel. NeMoodihti Yakꞌusda ꞌukꞌenus ulhtus-un, ꞌinkꞌez ꞌusbaiyaz bulh nyo keyoh whulugliz hinli ꞌet huwa.

²³ ꞋAw ꞌulhdzis oozaꞌ cha ꞌinkꞌez dzenis oozaꞌ cha ꞌaw nyo keyoh ooka lheꞌwhunízun Yakꞌusda ootsꞌu ha yánduz-i, ꞌi be hootꞌen. ꞋInkꞌez ꞌusbaiyaz ꞌen whuniz be hootꞌen.

²⁴ Mbene la ꞌudun yun kꞌut whutꞌenne butoh hudijizne, ꞌenne hiniz nutidulh. ꞋInkꞌez ndi yun kꞌut whulerwene hiyé diztiꞌ-i ꞌinkꞌez hiyé ncha-i, ꞌi dichꞌoh lerwene dahítalelh.

²⁵ Dzin ndúwhulyiz whe whudati ꞌaw dádolaꞌ ꞌaitꞌoh ꞌaw ꞌulhdzis lhotasdle ꞌet huwa.

²⁶ Lhelhdowh didowhne hiyé diztiꞌ-i ꞌinkꞌez hiyé úncha-i, ꞌi dahítalelh.

²⁷ ꞋEt hoontsꞌi hoonliyaz dutsun-i ꞌet daóoltsꞌit ꞌaitꞌoh. Kꞌus mbe la hubaꞌ whuninzun tuneꞌ ꞌutꞌenne, ꞌinkꞌez whutsꞌitne cha, ꞌaw dahóodilh ꞌaitꞌoh. Mbene la ꞌusbaiyaz tsꞌukhuna be ꞌudustlꞌus kꞌut ꞌukꞌusguzne, ꞌenne za bubaꞌ hoontꞌoh ꞌet huwa.