Revelation 20 - Yak'usda Ooghuni

Satan 1,000 yus kꞌut ꞌet ꞌulhghel

¹ ꞋEt yakꞌuz ndus de tsꞌe lizas utꞌoh whe tísꞌen. Lhuztih tlꞌoolh cho ꞌinkꞌez nyo tsa kꞌet whucho whutlꞌah hooloh-un whulugli bulh yilelh.

² ꞋEt nyoo tlꞌughus cho khuna-i kꞌunꞌa nulget-i, ꞌudaꞌ whútlꞌughus, ꞌen netsudule huyúlhni ꞌinkꞌez Satan cha huyúlhni. ꞋEn yílhchoot ꞌinkꞌez 1,000 yus kꞌut wheni yulhghel.

³ Tsa kꞌet whucho whutlꞌah hooloh-un, ꞌet ꞌayano ꞌinkꞌez yuchꞌaz dánaꞌ dinꞌai ꞌinkꞌez whudánaꞌdilhdze. ꞋEt whuz unꞌa 1,000 yus kꞌut lhaóodutaneh ꞌet whutsꞌun, ndi yun kꞌut ndulcho whe lhelhdoh didohne dune ꞌaw ꞌon ꞌun nabunooꞌah ꞌaitꞌoh ꞌinka. ꞋEt hoontsꞌi ꞌet hukwꞌelhꞌaz de ꞌatsulyaz hila nadootnih hubaꞌ hoontꞌoh.

Christ oochꞌeꞌne, ꞌenne 1,000 yus kꞌut huyulh lerwe hanleꞌ

⁴ ꞋEt kwꞌutsꞌuzda cho diztiꞌ-i lhai tísꞌen. ꞋInkꞌez yukꞌudilhtsꞌine, ꞌenne dune ba nahutiyeh-un, ꞌet bughá whuntꞌai. ꞋEt ndunne Jesus ooghuni ghu yalhdukne, ꞌinkꞌez Yakꞌusda ooghuni cha, ꞌet huwa ꞌenne ꞌoh daꞌ butsi kꞌunónutselh. ꞋInkꞌez mbene nyoo khuna-iti ntsiꞌ-i kꞌus ookꞌeyíltsi-i tsꞌun tenelheꞌnílhdzilne, ꞌinkꞌez mbene oonutsi be buninta kꞌus bula kꞌut bukꞌulheꞌíguzne, ꞌenne tsꞌiyawh buzul nusꞌen. ꞋEnne nahukhítnaꞌ ꞌinkꞌez 1,000 yus kꞌut ndúwhulyiz whe Christ ꞌen bulh moodih hinli.

⁵ Njan ꞌet ꞌudechoo dunazdutádulh-un ꞌuhoontꞌoh. ꞋEt hoontsꞌi ꞌonghohne yaidlane, ꞌenne 1,000 yus kꞌut lhaóoduja de za dunahudutádulh.

⁶ Mbene la njan ꞌudechoo dune dunadutádulh-un bubulh ꞌuhooja de, ꞌenne ꞌukꞌenus hoonzoo-un bugha whútaltsꞌulh, ꞌinkꞌez lubeshi ooghu hootalohne hutileh. ꞋInkꞌez whulh nat dune yaitádlah-un, ꞌaw ꞌenne buba lheꞌhóotꞌoh. ꞋEt kꞌus Yakꞌusda ꞌinkꞌez Christ bulubret hutileh ꞌinkꞌez 1,000 yus kꞌut huyulh moodih hutileh.

Netsudule ndi kwun, sulphur be dizkꞌun-un bunghun dúwhulcho-un, ꞌet tsꞌu hídano

⁷ ꞋEt 1,000 yus kꞌut lhawhúduja de, Satan tsa kꞌet usda-un hila nadutitnih.

⁸ ꞋInkꞌez ꞌudun yun kꞌut whutꞌenne ndi yun kꞌut ndulcho whe dilhtsꞌine, ꞌenne nabuntiꞌah. Gog ꞌinkꞌez Magog whutꞌenne, ꞌenne lhotigan ha, Satan ꞌilhubootálelh. ꞋEnne yatoo ba sai ꞌet ꞌuhuniltsuk.

⁹ ꞋEt yun kꞌut ndulcho whe whuduneꞌne whusahátidulh ꞌinkꞌez njan keyoh whuti ꞌet Yakꞌusda oochꞌeꞌne huwhutꞌi-un, ꞌet ꞌuhoontꞌoh keyoh whuti Yakꞌusda hukwꞌensiꞌ-un, Jerusalem huwhutni ꞌet whunat ꞌet ꞌilhuhootádulh. ꞋInkꞌez ndo yakꞌuz Yakꞌusda usda-un whuz de kwun ha tíkulh. ꞋI be ntsiꞌne tsꞌiyawh gak hutileh.

¹⁰ ꞋEt ndi kwun, sulphur be dizkꞌun-un bunghun ndúwhulcho-un, ꞌet khuna-iti ntsiꞌ-i ꞌinkꞌez whutsꞌit-i be nus hooꞌen-un ꞌet huzke, ꞌet netsudule, dune nanaꞌah-un, ꞌen cha ꞌet tsu hídano. ꞋEt dzenis ꞌinkꞌez ꞌulhdzis ibulh ꞌilhiz ꞌinkꞌez ꞌilhiz wheni dzoh nuhutideh.

Kwꞌutsꞌuzda cho ꞌulhyul-i, Yakꞌusda ꞌi kꞌut usda whe yukꞌunulheꞌitꞌelne buba nahutiyeh

¹¹ ꞋEt ꞌawet ulhyul-i kwꞌutsꞌuzda ncha-i cho diztiꞌ-i, ꞌinkꞌez mbe yukusda-un tísꞌen. Ndi yun kꞌut ꞌinkꞌez yatꞌah cha Yakꞌusda usda-un, ꞌet oochꞌa whúzkat, ꞌi ꞌinkꞌez tsꞌiyawh gak whuzdliꞌ.

¹² ꞋInkꞌez yaidlane ntsoolne, nchane cha Yakꞌusda but nuhúdilhya hubutísꞌen. ꞋInkꞌez ꞌudustlꞌus lhai ookꞌu neꞌúsguz-i, ꞌi lhkꞌenankat. ꞋInkꞌez ꞌuyoo ꞌudustlꞌus ookꞌu neꞌúsguz-i, ꞌi tsꞌukhuna wheꞌ ꞌudustlꞌus, ꞌi cha lhkꞌenankat. ꞋInkꞌez yaidlane bube ꞌutꞌen kꞌoh huwa ndi ꞌudustlꞌus lhai ꞌukꞌu husguz-un, ꞌi gha buba nahisda.

¹³ ꞋEt yatoo kꞌut yaidlane, ꞌinkꞌez be yatsꞌadlah-i, ꞌi be yaidlane ꞌinkꞌez Hades dilhtsꞌine cha, ꞌenne tsꞌiyawh whutlꞌábahanla buba nahutideh ha. ꞋInkꞌez ꞌilhoghun hinli whe bube ꞌutꞌen gha buba nahisda.

¹⁴ ꞋEt be yátsꞌadlah-i ꞌinkꞌez Hades bulh njan sulphur be dizkꞌun-un bunghun ndúwhulcho-un tsú bodalhdil. Njan ꞌet whulh nat yatsꞌitádlah-un ꞌuhoontꞌoh.

¹⁵ ꞋInkꞌez mbene la tsꞌukhuna-i ꞌudustlꞌus kꞌut bubooziꞌ ꞌukꞌu lhíguzne, ꞌenne tsꞌiyawh ndi kwun bunghun dulcho-i ꞌet tsú buhudalhdil.