Revelation 19 - Yak'usda Ooghuni

Keyoh whuti Babylon gak whuzdli-un, ꞌet yakꞌuz dilhtsꞌine ꞌet huwun huwhunílhni

¹ ꞋEt njan hukwꞌelhꞌaz whudustsꞌo ndo yakꞌuz tsꞌe tube lhane ꞌuwhultus whe njan duhútni, “Yakꞌusda uzdólhtiꞌ! Be uzdujih-i, ꞌinkꞌez ye diztiꞌ-i, ꞌinkꞌez ye úncha-i, ꞌinkꞌez ye úlhtus-i, ꞌohwhi tsꞌiyawh neMoodihti Yakꞌusda oobaꞌ yintꞌoh.

² Ye nahuyeh-i tsꞌiyawh ꞌalhaꞌ ꞌuntꞌoh ꞌinkꞌez tsꞌihꞌun ꞌuntꞌoh ꞌet huwa. Ndun ꞌukꞌenus ꞌulꞌen-un hoontsiꞌ tuneꞌ ꞌutꞌen-un, ꞌet whe ndi yun kꞌut dune nintaꞌbunílhꞌen, ꞌinkꞌez Yakꞌusda be ꞌulhnane bubuzkaiꞌ whulhtsi, ꞌet hukwꞌelha Yakꞌusda yuba nahizya.”

³ Doo cha za ꞌuhutni, “Yakꞌusda uzdólhtiꞌ! Nyoon tsꞌeke ꞌilhiz ꞌinkꞌez ꞌilhiz wheni oolut ndo whedújoot!”

⁴ ꞋEt ndunne nat whunizyat ꞌon ꞌat dine ꞌutso whudilhdzulhne, ꞌinkꞌez nyowhi dunghi ꞌusjiz-i nacháhunildil ꞌinkꞌez Yakꞌusda dukwꞌutsꞌuzda cho diztiꞌ-i, ꞌi yukꞌusda whe, hibut dugwutsi be nachahunildil ꞌinkꞌez hitsꞌun teniꞌ hunalhdzin whe nduhútni, “ꞋEt ndo honeh! Yakꞌusda ntsꞌidílhtiꞌ!”

⁵ ꞋEt kwꞌutsꞌuzda cho diztiꞌ tsꞌe njan nduwhútni, “Nohni tsꞌiyawh Yakꞌusda be ꞌulhnane ꞌinkꞌez hiye nuljutne cha, ntsoolne ꞌinkꞌez nchane cha, neYakꞌusda dúlhtiꞌ!”

⁶ ꞋEt whudustsꞌo ꞌantsꞌi dune lhane ꞌilhoh yahatilhduk leꞌ hutni. ꞋAntsꞌi natájilh kꞌunꞌa ꞌuwhutni. ꞋInkꞌez tube cho ditni dutni léꞌwhutni, whe njan duhútni, “Yakꞌusda uzdólhtiꞌ! NeMoodihti Yakꞌusda ꞌukꞌenus ulhtus-un, ꞌen tsꞌiyantsuk kꞌuneꞌ whulꞌen ꞌet huwa.

⁷ Tsꞌohótꞌeꞌ ꞌinkꞌez tsꞌonólhni ꞌinkꞌez uzdólhtiꞌ. ꞋUsbaiyaz ꞌat titꞌelh-un huba whusahónzut ꞌinkꞌez ooꞌat yutáleh-un ꞌawet dichꞌoh lhadúja.

⁸ Nyoo naih diztiꞌ-i, lhdítsun ꞌinkꞌez be hóodatꞌen, ꞌi ye tídalh ha ooghá whultsꞌut.” Nyoo naih diztiꞌ-i, ꞌi Yakꞌusda oochꞌeꞌne bube ꞌutꞌen tsꞌihꞌun ꞌuntꞌoh-i, ꞌi ꞌuntꞌoh.

⁹ ꞋEt ndun yalhduk-un, ꞌen ꞌusúlhni, “Njan ꞌukꞌehoonges, ꞌusbaiyaz ꞌat titꞌelh-un naꞌhutitꞌulh-un, mbene ooghu nusjane, ꞌenne ꞌukꞌenus hoonzoo-un bugha whútaltsꞌulh.” ꞋInkꞌez ꞌusulhni, “Ndi ꞌi soo tsꞌihꞌun Yakꞌusda ooghuni ꞌutni.”

¹⁰ ꞋInkꞌez oobut nachánisno ootsꞌun teniꞌ untisdzilh ha. ꞋEt ꞌusúlhni, “ꞋEt ndintꞌen iloh! Nyulh ꞌulhna-un usdli. ꞋInkꞌez nyulhutsinke, ꞌinkꞌez Jesus ooghuni ghu yalhdukne, ꞌenne bubulh ꞌulhna-un usdli whe ꞌustꞌoh. Yakꞌusda ꞌen za ootsꞌun téniꞌ nilhdzun!” súlhni. “Ndi khuni Jesus be ghú yaduk-i, ꞌi mba nus hónꞌen wheꞌ hoontꞌoh.”

Christ yeztli ꞌulhyul-i ꞌet kꞌusda

¹¹ ꞋEt yakꞌuz dáhaꞌ dankez ꞌet whutisꞌen, ꞌinkꞌez yeztli ꞌulhyul-i tísꞌen. Yukusda-un, ꞌen ootꞌa níuznintan-un ꞌinkꞌez tsꞌihꞌun ꞌuntꞌoh-un huyúlhni. ꞋInkꞌez soo tsꞌihꞌun unꞌa dune ba lhugan ꞌinkꞌez whuz unꞌa za buba nahuyeh.

¹² Oona ꞌantsꞌi kwun kꞌunꞌa tizdi doútꞌen. Ootsi kꞌut lerwe butsi kꞌeyúzdla doútꞌen, ꞌi lhai ootsi kꞌusdla. Booziꞌ ookꞌeyusguz, ꞌaw dune tꞌeinúszun, didutchꞌoh za tꞌeinínzun.

¹³ Nayitsꞌuz-i ꞌuskaiꞌ be túnalhchooz, ꞌi be dune unli. ꞋInkꞌez booziꞌ, ꞌi Yakꞌusda Ooghuni tsꞌutni.

¹⁴ ꞋInkꞌez yakꞌuz lhuganne, naih diztiꞌ-i ꞌulhyul ꞌinkꞌez lhdítsun-i be húdilhtsꞌi. Yeztli ꞌulhyul-i kꞌut dilhtsꞌi whe huyunidulh.

¹⁵ ꞋEt saluzti, khundiyin-i oozá ha yiki. Ndi ꞌi be ꞌudun yun kꞌut whutꞌenne ye but tsꞌeꞌ tilhtꞌoh ha. Dichꞌoh lhuztih tuz be kꞌuneꞌ butilꞌen. ꞋInkꞌez Yakꞌusda ꞌukꞌenus ulhtus-un, ꞌen ye huske-i ꞌinkꞌez ye húnilchꞌoh-i, ꞌet tsꞌekoo tooꞌ ꞌulꞌen-un whuzꞌai kꞌunꞌa-i, ꞌi dichꞌoh ꞌi yukꞌunutíyalh.

¹⁶ Nayitsꞌuz-i ꞌinkꞌez oowuz kꞌut ꞌet ooziꞌ ꞌukꞌusguz whe ndutni, Lerwene buLerwe ꞌinkꞌez moodihne buMoodihti, ni.

Khuna-iti ntsiꞌ-i ooluganne tubulh buchꞌaꞌ ninde

¹⁷ ꞋEt doo cha lizas sa niz usyin whe tísꞌen. ꞋInkꞌez soo dultul whe ndai la dutꞌai ndo núdilh-i, ꞌi ꞌuyulhni, “Ndiz ꞌilhoozáhdilh Yakꞌusda ncha-un, ndi tihꞌulh-i nohba lhaídinla.

¹⁸ ꞋEt lerwene buzi, lhuganne bumoodihne buzi cha, dune nchane buzi cha, yeztli ꞌinkꞌez yukꞌudilhtsꞌine, ꞌinkꞌez tsꞌiyanne zi cha ꞌulhnane ꞌinkꞌez oola whuditnine, ntsoolne ꞌinkꞌez nchane cha, buzi tsꞌiyawh tihꞌulh.”

¹⁹ ꞋEt khuna-iti ntsiꞌ-i tisꞌen, ꞌinkꞌez ndi yun kꞌut whulerwene lhuganne tubulh ꞌilhuhozdil ꞌinkꞌez yeztli kusda-un ꞌinkꞌez yuba lhuganne, ꞌenne buchꞌaz nehúdindil bubulh lhahutigan ha.

²⁰ ꞋEt ndi khuna-iti ntsiꞌ-i huyílhchoot. ꞋInkꞌez whutsꞌit whe nus hooꞌen-un, ꞌen cha huyílhchoot. ꞋEn ꞌuntꞌoh khuna-iti ntsiꞌ-i nalh huwa ꞌítꞌen te neꞌústꞌen. ꞋI be mbene khuna-iti ntsiꞌ-i oonutsi be bube hóodatꞌenne ꞌinkꞌez mbene ookꞌeyíltsi tsꞌun teniꞌ nalhdzinne, ꞌenne tsꞌiyawh nabunanꞌa. ꞋEt ndunne nahúltꞌoh hukhuna whe kwun sulphur be dízkꞌun-i bunghun dúwhulcho-un, ꞌet tsúbodano.

²¹ ꞋEt ꞌonghunne khuna-iti ntsiꞌ-i ba lhuganne, ꞌenne nyoon yeztli kusda-un, saluzti oozá ha yiki, ndi saluzti ꞌi be tsꞌiyawh ꞌubanghan. ꞋInkꞌez dutꞌai tsꞌiyawh dune zi húnisdai.