Revelation 18 - Yak'usda Ooghuni

Njan keyoh whuti Babylon ꞌawet musai whuzdliꞌ

¹ ꞋEt ndo ho hukwꞌelhꞌaz ꞌuyoon lizas yakꞌuz ndus de útꞌo whe tísꞌen. Soo ulhtus whe kꞌúneꞌ ꞌutꞌen doútꞌen. Ootsꞌu há nuyuzduz-i ndi yun kꞌut be hóotꞌen.

² ꞋInkꞌez soo dultul whe njan ndutni, “Njan keyoh whuti Babylon ꞌawet musai whuzdliꞌ, musai whuzdliꞌ. ꞋInkꞌez ntsiꞌ-i nududeh-i lhai bukeyoh whúzdliꞌ. Nududeh-i dutsun-i tsꞌiyawh dilhtsꞌi-un whuzdliꞌ. Ndai dutꞌai dutsun ꞌinkꞌez ootsꞌo dutni-i, cha ꞌet dilhtsꞌi.

³ Soo nintꞌi whe ꞌuyoon dune bulh nintaꞌutꞌih, tsꞌekoo tooꞌ kꞌunꞌa ꞌudun yun kꞌut whutꞌenne, ꞌet whuz unꞌa za bubu yulhnai. Ndi yun kꞌut whulerwene cha huyulh nintaꞌutꞌih inleꞌ. ꞋInkꞌez ndi yun kꞌut ꞌeꞌóoketne, nyoon tsꞌeke whe hoonzoo ꞌuntꞌoh-un ꞌinkꞌez whélhtus-un, ꞌet huwa hoonzoo ꞌuhuja.”

⁴ ꞋEt doo cha ndus de yakꞌuz tsꞌe ꞌuwhutni whudástsꞌo whe njan duwhútni, “Sduneꞌne ootsꞌu ha náhdilh doo ka si ꞌen bulh lubeshi oolhꞌen. ꞋInkꞌez doo ka si ndi dune ye dzoh nudeh-i, ꞌi nohghá doltsꞌit.

⁵ Oolubeshi ndo yatꞌah tsꞌe ꞌudiltai suliꞌ ꞌet huwa. ꞋInkꞌez yé tankꞌus ꞌuntꞌoh-i tsꞌiyawh Yakꞌusda yunalni.

⁶ Danóhinla-un whuz unꞌa za ooba ꞌukꞌelha hoolhtsilh. ꞋInkꞌez be ꞌutꞌen nawh ꞌultsuk ooba ꞌukꞌelha hoolhtsilh. Ndi lubot mbez nohba lhtainílhdzo-i, ꞌi nawh ꞌet ꞌultsuk ꞌi ooba lhtanaoolhdzeh.

⁷ Duba nacha ꞌinkꞌez whudíztiꞌ hukwꞌunꞌa za yinka usda, whuz unꞌa dzoh nuzut ꞌinkꞌez tsꞌodi unli-un oogha óonahꞌaih. Dudzi yo whe njan ndutni, ‘Lerwe tsꞌeke kꞌunꞌa susda. ꞋAw tsándilh lhúsdloh, ꞌinkꞌez tsꞌodi cha lhuzisꞌen.’

⁸ ꞋEt huwa dune ye dzoh nudeh-i, ꞌilhoh dzin za ꞌet ndi tsꞌiyawh oogha whútaltsꞌulh. Bé datsꞌutsah-i, tsꞌodi, ꞌinkꞌez dai cha. ꞋInkꞌez kwun be soo tsꞌiyawh dutakꞌun. NeMoodihti Yakꞌusda yuba nahuyeh-un, ꞌen ulhtus ꞌet huwa.”

Ndun Babylon musai whuzdliꞌ-un hukwꞌe hunudleh

⁹ “Ndi yun kꞌut whulerwene yulh nintaꞌutꞌihne, ꞌenne soo hiyulh hoonzoo ꞌantꞌeꞌne ndi dizkꞌun whe oolut hinilhꞌen de, hikꞌetitso ꞌinkꞌez hikꞌeni untileh.

¹⁰ Ye dzoh nadinzut-i hinilhꞌen ꞌinkꞌez hiye nuljut ꞌinka yoo ꞌun cho nódilhya ꞌinkꞌez ꞌuhutni, ‘Keyoh whuti Babylon ꞌukꞌenus hoontsiꞌ-un huwá whultsꞌut, ꞌukꞌenus hoontsiꞌ-un huwá whultsꞌut. Nyo hoolhtus-un keyoh whuti-un, ꞌilhoh sadzi hukꞌo hunistꞌo-un, ꞌet mba nahisda-un, whusahóoltsꞌut.’

¹¹ ꞋInkꞌez ndi yun kꞌut ꞌeꞌóoketne hikꞌetitso ꞌinkꞌez ꞌenne cha hikꞌentidleh. Ndai hiye ooket-i, ꞌaw dune lhuhuyoosket suliꞌ ꞌet huwa.

¹² Gold, ꞌinkꞌez silver, ꞌinkꞌez tse duniztiꞌ-i, ꞌinkꞌez kwꞌusul duníztiꞌ-i, naih díztiꞌ-i, naih dulkꞌun ꞌankwꞌus dulhkꞌus, luswe soo dulkꞌun-i, khuna-i ncha-i oode, ivory huyúlhni, hoonliyaz hiyilhꞌi-i tsꞌiyai diztiꞌ-i duchun, dulkꞌun tꞌeh, iron, tse marble huyulhni, tsꞌiyai diztiꞌ-i,

¹³ ꞌinkꞌez bulh butaꞌwhutꞌen-i cinnamon huyulhni, ꞌinkꞌez sooltsun-i dizkꞌun-i, khe sooltsun-i, yoo Frankencense huyulhni, tsꞌekoo tooꞌ, ꞌinkꞌez khe olive huyulhni, lhes ꞌinkꞌez lhes ha núyeh-i, ꞌinkꞌez musdoos ꞌinkꞌez ꞌusbai, yeztli ꞌinkꞌez nuyúlhgoo-i tubulh, dune yustꞌe ꞌinkꞌez buzul cha, tsꞌiyawh be ꞌóoket.”

¹⁴ ꞋEt ꞌuhutni, “ꞋInkꞌez mai unzoo-i za kúndunutꞌa, ndi la tube hikaꞌ ninzun-i, ꞌi cha tsꞌiyawh nchꞌa hooloh suliꞌ. Ndai la diztiꞌ-i ꞌinkꞌez sooꞌ otꞌen-i, ꞌohwhi tsꞌiyawh nchꞌa hooloh suliꞌ, ꞌaw naóonlelh ꞌaitꞌoh.”

¹⁵ Mbene ndowhi be óoketne, ꞌenne nyoon tsꞌeke hoonzoo ꞌuntꞌoh ubulhtsine, nyoon tsꞌeke ye dzoh nuzut-i, ꞌi hiyé nuljut ꞌinka yoo ꞌun cho highu núdilhya ꞌinkꞌez tube cho hutso, ꞌinkꞌez hukwꞌe ni nahunudleh.

¹⁶ ꞋInkꞌez cha ꞌuhutni, “ꞋUya! ꞋUya! Nyo keyoh whutꞌi naih dulkꞌun-i ꞌankwꞌus dulhkꞌus, ꞌinkꞌez dulkꞌun-i be húdilhtsꞌi, gold, tseyaz duníztiꞌ-i, ꞌinkꞌez kwꞌusul duniztiꞌ-i be nódilhtsiꞌ.

¹⁷ ꞋIlhoh sadzi haꞌ hunitꞌo-un ndi wheꞌ hoonzooꞌ hoontꞌoh-i cho, gak whuzdliꞌ.” ꞋInkꞌez mbene tsꞌi cho be nukene, ꞌinkꞌez bumoodihne cha, mbene la whuz unꞌa ꞌeꞌ hooket ꞌinkꞌez ꞌoohooketne, ꞌenne tsꞌiyawh yoo ꞌun cho nuhúdilhya.

¹⁸ ꞋInkꞌez nyoo dizkꞌun oolut, ꞌet hinalhꞌen whe tube cho njan duhútni, “ꞋAw ndóohoontꞌoh-un keyoh whuti ꞌaw ꞌudun whuz unꞌa keyoh whuti hooloh!”

¹⁹ ꞋInkꞌez lhez dutsi kꞌehúyidzeh ꞌinkꞌez ꞌahúldzul whe hutso ꞌinkꞌez ꞌuhutni, “ꞋUkꞌenus hoontsiꞌ-un ooghá whultsꞌut! ꞋUkꞌenus hoontsiꞌ ooghá whultsꞌut! Nyo keyoh whuti tsꞌi yatoo kꞌut núkat-i tsꞌiyawh hoonzooꞌ hintꞌoh ꞌubulhtsi. ꞋIlho sadzi haꞌ hunitꞌo-un ꞌet gak whuzdliꞌ.”

²⁰ “Nohni yakꞌuz whutꞌenne ꞌinkꞌez nohni Yakꞌusda oochꞌeꞌne, whelꞌaꞌne cha, ꞌinkꞌez nus hooꞌenne cha ndun tsꞌeke ꞌulꞌen-un bulh dahooja, ꞌet huwa soo cho whunúlhni! Ntsꞌenꞌa nohba nahizya whuz unꞌa Yakꞌusda nohba yukꞌelha whulhtsi ꞌet huwa.”

Keyoh whuti Babylon ꞌawet ꞌilhiz ꞌetsul ꞌuhóoja

²¹ ꞋEt lizas ulhtus-un tse cho ookꞌut lhes dunutsut-i ndoútꞌen-i, ꞌi yílhchoot ꞌinkꞌez yatoo kꞌut taínalhꞌuz. ꞋInkꞌez ꞌutni, “Soo wheóonujut whe keyoh whuti Babylon whuz unꞌa Yakꞌusda nawhúntiyus ꞌinkꞌez ꞌaw ꞌon ꞌat dune nahóꞌalh ꞌaitꞌoh.

²² Nela be tsꞌujun-i, ꞌujune cha, duze whé huyejun-i ꞌinkꞌez be tsꞌújih be hújihne, ꞌaw ꞌon ꞌat dune ubuhudótsꞌo ꞌaitꞌoh. Mbene lhelhdowh didowh ꞌulhꞌenne, ꞌenne cha ꞌilhiz huhooloh tileh. ꞋInkꞌez tse kꞌut lhes hundunutsut-un be dutsꞌo-i ꞌet cha ꞌilhiz ꞌetsul ꞌuwhudutánelh, ꞌaw ꞌon ꞌat dune whudótsꞌo ꞌaitꞌoh.

²³ ꞋAw be hóotꞌen-i cha hootáloh. ꞋAw nyo dune lhghu dilhtsꞌi-un, ꞌet cha ꞌetsul ꞌuwhutanelh. Mbene la mba ꞌeꞌóoketne ndi yun kꞌut dune nchane ꞌuhantꞌeꞌ. Duyun-un kꞌunꞌa ndi yun kꞌut dune lhelhdowh didowhne nyun nabunanꞌa ꞌet huwa.

²⁴ ꞋInkꞌez nus hooꞌenne ꞌinkꞌez Yakꞌusda oochꞌeꞌne bubuzkaiꞌ, ꞌinkꞌez ndi yun kꞌut dune ubanghanne, ꞌenne cha tsꞌiyawh bubuzkaiꞌ ꞌet ꞌuntꞌoh!” ni, lizas ulhtus-un.