Revelation 17 - Yak'usda Ooghuni

Tsꞌeke ꞌulꞌen-un khuna-iti ntsiꞌ-i soo dulkꞌun-i, ꞌi kꞌusda

¹ ꞋAwet ndunne lhtakꞌantꞌi lizasne lhtakꞌantꞌi oosaꞌ naniztsꞌun-i nulene, bubulh ꞌilhoghun sghu ninya ꞌinkꞌez ꞌusulhni, “ꞋAnih ndun ꞌukꞌenus ꞌulꞌen-un, lhat-un too kusda-un, ooba nahisda-un whúnyuntistun.

² Ndi yun kꞌut whulerwene bubulh níntaꞌ ꞌutꞌih. ꞋInkꞌez ndi ye níntaꞌ ꞌutꞌih-i ꞌantsꞌi tsꞌekoo tooꞌ kꞌunꞌa, ꞌi be ndi yun kꞌut whutꞌenne bube inílhnaiꞌ leꞌ ꞌuja.”

³ ꞋEt Ndoni be dune lhuhóotꞌih tsꞌe soolhti. ꞋEt njan whunusꞌen, tsꞌeke khuna-iti ntsiꞌ-i soo dulkꞌun-i, ꞌi kꞌusda. Yakꞌusda hiyulh huyih khuni, ꞌi khuna-i ntsiꞌ-i ooyustꞌe ndulcho whe ookꞌeyusguz. Lhtakꞌantꞌi ootsi unli ꞌinkꞌez whunizyai oode únli.

⁴ Dulkꞌun-i ꞌankwꞌus dulhkꞌus-i ꞌinkꞌez soo dulkꞌun-i, ꞌi ndun tsꞌeke ye usda. ꞋInkꞌez gold ꞌinkꞌez tseyaz duniztiꞌ-i, ꞌinkꞌez kwꞌusul duniztiꞌ-i cha, ꞌohwhi be núdilhtsiꞌ. Lubot gold unli-i, ꞌi nuyúka. Ndai ndi yun kꞌut whutꞌenne tankꞌus whudutsun te bubulh neꞌhústꞌen-un ꞌinkꞌez bube ꞌutꞌen oobaꞌ whuninzun-i, ꞌi be ndi lubot dizbun.

⁵ Ooninta ꞌet ooziꞌ ꞌukꞌusguz, ꞌinkꞌez ndiz unꞌa njan ndutni, Wheꞌ hoontꞌoh hooyoh Babylon uncha-un, ꞌulꞌenne buloo ꞌinkꞌez ndi yun kꞌut ꞌukꞌenus hoontsiꞌ-un cha whuloo, ni.

⁶ ꞋEt ndun tsꞌeke tísꞌen. Jesus ba yaidlane ꞌinkꞌez Yakꞌusda oochꞌeꞌne bubuzkaiꞌ ꞌi be tanísnaiꞌ, ꞌusꞌen whe sba hooncha kꞌet ꞌaw sba ꞌalhaꞌ lheꞌhóotꞌoh.

Tsꞌeke ꞌulꞌen-un ꞌinkꞌez khuna-iti ntsiꞌ-i daja ni whe ꞌutni-un

⁷ ꞋEt lizas ꞌusúlhni, “Di ha mba hooncha? Ndun tsꞌeke, ꞌinkꞌez ndi khuna-iti ntsiꞌ-i lhtakꞌantꞌi ootsi unli ꞌinkꞌez whunizyai oode únli kꞌusda, ꞌet ooghun wheꞌ hoontꞌoh hooyoh-un, ꞌet nyudutásnelh.

⁸ Ndi khuna-iti ntsiꞌ-i nalhꞌen-i, ꞌi ꞌantꞌeꞌ inleꞌ ꞌinkꞌez ꞌandit hooloh, ꞌinkꞌez tsa kꞌet whucho whutlꞌah hooloh-un whuz de ha tílgwulh ꞌinkꞌez ntsꞌe la musai tileh tsꞌun tilgwulh. ꞋInkꞌez ndi yun ꞌudechoo ꞌulya whutsꞌun, ndunne ndi yun kꞌut whutꞌenne, ndi ꞌilhiz tsꞌukhuna-i be ꞌudustlꞌus kꞌut, ꞌi kꞌut ꞌaw bubooziꞌ ꞌukꞌu lhíguzne, ndi khuna-iti ntsiꞌ-i ꞌantꞌeꞌ inleꞌ, ꞌinkꞌez ꞌandit hooloh, ꞌet hoontsꞌi hoonli ꞌuntꞌoh, ꞌenne huyanꞌen de buba hootácha.

⁹ Mbe beni whúnih-un njan huwu nuni noozut. Ndi lhtakꞌantꞌi ꞌutsi, ꞌi lhtakꞌantꞌi shusyaz ꞌuntꞌoh. ꞋI kꞌut tsꞌeke usda.

¹⁰ ꞋInkꞌez lhtakꞌantꞌine lerwene hoonli. Kwulane, ꞌenne huhooloh suliꞌ. ꞋIlhoghun ꞌen ꞌawhuz lerwe unli ꞌinkꞌez ꞌilhoghun ꞌawhuz whusalhúsyai. Whusainya de, ꞌatsulyaz za lerwe tileh.

¹¹ ꞋInkꞌez ndi khuna-iti ntsiꞌ-i ꞌantꞌeꞌ inleꞌ ꞌinkꞌez ꞌaw ꞌandit hooloh, ꞌen lhkꞌudunghi-un unli. ꞋEt hoontsꞌi ndunne lhtakꞌantꞌine, ꞌen bubulh ꞌilhoghun ꞌuntꞌoh ꞌinkꞌez ndet la musai tileh tsꞌu tilgwulh.

¹² Ndi whunizyai ꞌude inꞌén-i, ꞌi whunizyai lerwe, ꞌawhuz lerwe hutileh-un butlꞌa lhúwhuskatne ꞌuhintꞌoh. ꞋEt hoontsꞌi ꞌilho sadzi haꞌ hunitꞌo ꞌuwhuldzoh-un, ꞌet ndi khuna-iti ntsiꞌ-i ꞌen bulh kꞌuneꞌ hutitꞌen-un bugha óotaltsꞌulh.

¹³ ꞋEnne tsꞌiyawh lhgha zaꞌ nuni hunudeh. Hiye ulhtus-i ꞌinkꞌez hiye kꞌuneꞌ ꞌutꞌen-i, ndi khuna-iti ntsiꞌ-i ꞌet higha óotalelh.

¹⁴ Ndunne ꞌusbaiyaz bulh lhotigan. ꞋInkꞌez ꞌusbaiyaz buchꞌaꞌ tilhdoh! ꞋEn ꞌuntꞌoh moodihne buMoodihti unli ꞌinkꞌez lerwene bulerwe cha unli ꞌet huwa. Ndunne yulh ꞌúntꞌohne, ꞌenne ꞌutahálya ꞌinkꞌez ooghu nusjáne, ꞌenne ꞌaw Jesus hilalhditnelne hinli.”

¹⁵ ꞋEt lizas ꞌusúlhni, “Nyo lhat-un too kꞌut ꞌulꞌen-un yukusda-un whunalhꞌen-un, ndi too, ꞌi lhane dune, lhelhdoh didowhne, ꞌinkꞌez lhelhtsꞌun unꞌa yalhdukne hoonli whuz unꞌa ndi too ꞌenne ꞌuhintꞌoh.

¹⁶ Ndi khuna-iti ntsiꞌ-i oode whunizyai inꞌen-i, nyoon ꞌulꞌen-un hitsꞌu dutitni. Ndai la yutꞌi, ꞌi tsꞌiyawh higha ha hitalyelh ꞌinkꞌez ꞌustꞌet gaih tileh. Hiyustꞌe hitiꞌulh ꞌinkꞌez kwun be hidutálhkꞌun.

¹⁷ Yakꞌusda ntsꞌenꞌa daóotanelh-un hukwaꞌ ninzun-un, ꞌet budzi yo danla soo lhkꞌunꞌa za nuni hunoozut ha. ꞋInkꞌez lerwene hiye kꞌuneꞌ ꞌutꞌen-i, ndi khuna-iti ntsiꞌ-i hitlꞌa óotilelh, ndet la Yakꞌusda ooghuni lhawhúdutitneh ꞌet whutsꞌun.

¹⁸ ꞋInkꞌez nyoon tsꞌeke inꞌen-un, ꞌen njan keyoh whuti unli whe ꞌuntꞌoh. Ndi yun kꞌut whulerwene bumoodih unli.”