Revelation 16 - Yak'usda Ooghuni

¹ ꞋEt whudastsꞌo nyooz de lugliz whucho tsꞌe ꞌuwhutni, tubeꞌ whutni ꞌinkꞌez lhtakꞌantꞌi lizasne bubulh yatilhduk whe njan ndutni, “ꞋAhdulh ꞌinkꞌez ndi oosaꞌ naniztsꞌun-i Yakꞌusda ye húnilchꞌoh-i be dizbun-i ndi yun ookꞌut nadulhkuk!”

ꞋUdechoo oosaꞌ naniztsꞌun-i

² ꞋInka ꞌudechoo lizas ndi oosaꞌ naniztsꞌun-i yun kꞌut naidílhkat. Mbene dune ndi khuna-iti ntsiꞌ-i bé hoodatꞌen-i ꞌutꞌine, ꞌinkꞌez ookꞌeyíltsi-i tsꞌu teniꞌ nilhdzunne, ꞌenne ndai la yun kꞌut naidílhkat, ꞌi be ntsiꞌ-i ꞌinkꞌez oobaꞌ whuninzun-i be ndunne dune buka whehúnilhjut.

Bulh nanki oosaꞌ naniztsꞌun-i

³ ꞋEt bulh nane lizas dude oosaꞌ yatoo kꞌut naidílhkat. ꞋInkꞌez ndi yatoo ꞌantsꞌi dune dazsai-un buzkaiꞌ doútꞌen suliꞌ. ꞋInkꞌez ndi la toot khuna-i tsꞌiyawh yaidla.

Bulh ta-i oosaꞌ naniztsꞌun-i

⁴ ꞋEt bulh tane lizas dude oosaꞌ ꞌukoh tsꞌiyawh ꞌinkꞌez yun tsꞌu ha nusuli-un cha, ꞌohwhi kꞌut naidílhkat. ꞋInkꞌez too tsꞌiyawh ꞌuskaiꞌ suliꞌ.

⁵ ꞋEn lizas za njan nduti whe dustsꞌo, “O neMoodihti tsꞌihꞌun ꞌintꞌoh. Nyun ꞌintꞌoh ꞌinkꞌez nyun ꞌantꞌeꞌ ꞌinkꞌez lubeshi ooghu hooloh-un inli. Whuz unꞌa huba nahizínya ꞌet huwa.

⁶ Ndunne Yakꞌusda oochꞌeꞌne ꞌinkꞌez mbe nus hooꞌenne buba ha nghan. ꞋEt huwa khuna-iti ntsiꞌ-i unidulhne, ꞌenne ꞌuskai hootnaiꞌ ha bubaꞌ yínla. Njan ꞌet whuchꞌa honílhde ꞌet huwa.”

⁷ ꞋInkꞌez loodel tsꞌe ꞌuyoon yatilhduk whudustsꞌo whe ndutni, “Yakꞌusda neMoodihti, tsꞌiyan whanus ꞌultus-un inli. ꞋAlha ꞌuhoontꞌoh! Nyun tsꞌihꞌun unꞌa ꞌinkꞌez ꞌalhaꞌ hukwꞌunꞌa dune ba nahinyeh.”

Bulh dunghi oosaꞌ naniztsꞌun-i

⁸ ꞋEt bulh dine lizas dude oosaꞌ dzenis oozaꞌ kꞌut naidílhkat. ꞋInkꞌez dune kwun be buka nódutilkꞌun ha ooghá whuntꞌai.

⁹ ꞋInkꞌez kwun tube núlwus-i be buka nódizkꞌan. ꞋInkꞌez Yakꞌusda booziꞌ hidulhyoh yalhduk. ꞋEn ye úlhtus-i be ndowhi dune ye dzoh nudeh-i hoonli ꞌet huwa. ꞋInkꞌez ꞌaw lhtꞌanalhonídulh ꞌinkꞌez ꞌaw lhuhidílhtiꞌ.

Bulh kwulaiꞌ oosaꞌ naniztsꞌun-i

¹⁰ ꞋEt bulh kwulane lizas dude oosaꞌ khuna-iti ntsiꞌ-i ookwꞌutsꞌuzda cho diztiꞌ-i yukꞌusda-i kꞌut naidílhkat. ꞋInkꞌez ookeyoh lerwe unli-un ndulcho whe tsahólhgus whuzdliꞌ. ꞋI gha tube hukwꞌe húnduda kꞌet dutsoola hidunaꞌalh.

¹¹ ꞋInkꞌez Yakꞌusda yakꞌuz usda-un, ꞌen hidulhyoh yalhduk. Stabe buka whunduda ꞌi be bubulh ꞌúltsꞌulh ꞌet huwa. ꞋInkꞌez dahútꞌen-un ꞌaw whuchꞌa nalhehídulh.

Bulh lhkꞌuta-i oosaꞌ naniztsꞌun-i

¹² ꞋEt bulh lhkꞌutane lizas dude oosaꞌ ꞌukoh whuti-un Euphrates huwhútni-un, ꞌi kꞌut tayálhkat. ꞋInkꞌez too hooloh suliꞌ. ꞋEt whe nyoonne lerwene ndaz de ha tídulhne, ꞌoh whéya lhuhutidulh ꞌet wheni ꞌet buba ꞌuhóonla.

¹³ ꞋInkꞌez tlꞌughus cho khuna-i kꞌunꞌa núlget-i, ꞌinkꞌez khuna-iti ntsiꞌ-i, ꞌinkꞌez whutsꞌit whe nus hóoꞌen-un tane hultꞌoh nudúdeh-i ntsiꞌ-i, dulkwꞌah doútꞌen-i, buzá ha yandil ꞌet whutísꞌen.

¹⁴ Ndowhi netsudule oonudúdeh-i ꞌuntꞌoh, whe huwa ꞌítꞌen tuneꞌ ꞌutꞌen. Yun kꞌut ndulcho whe whulerwene ꞌilhubootálelh. Yakꞌusda whanus ꞌultus-un oodzin, ꞌet dzin, ꞌen bulh lhútigan ꞌet wheni lhadútneh.

¹⁵ “Soo zúlhtsꞌai, ꞌundunutꞌih-un kꞌunꞌa whuz de nízꞌilh. Mbene ꞌahoolhyiz khudline ꞌinkꞌez dunaih lhadilhdzunne, ꞌenne ꞌet nduhútꞌen de, ꞌaw ꞌustꞌet nohooyaꞌ ꞌaitꞌoh ꞌinkꞌez bube ꞌustꞌet óotꞌen ꞌaitꞌoh, ꞌenne ꞌukꞌenus hoonzoo-un bugha whútaltsꞌulh.”

¹⁶ ꞋEt Hebrew bughuni kꞌunꞌa Armageddon huwhútni-un, ꞌet wheni netsudule oonudúdeh-i ndi yun kꞌut whulerwene ꞌilhubohozdla.

Bulh lhtakꞌantꞌi oosaꞌ naniztsꞌun-i

¹⁷ ꞋEt bulh lhtakꞌantꞌitne lizas dude oosaꞌ ndo tazai kꞌuz naidílhkat. ꞋInkꞌez ndo yakꞌuz whulugliz whucho kwꞌutsꞌuzda cho diztiꞌ-i ꞌusꞌai tsꞌe, whuz ꞌuwhultus ꞌuwhútni, “ꞋAwet lhaóoduja!”

¹⁸ ꞋInkꞌez tawhúditni, ditni ꞌinkꞌez ditni cha oolhges, ꞌinkꞌez hooncha whe yun núkhisna. Ndi yun kꞌut dune whúzdliꞌ ꞌet whutsꞌun ꞌaw ndulcho-i be whuz unꞌa yun nulhúkhusnai.

¹⁹ ꞋInkꞌez ndi keyoh whuti tawh lhkꞌehonkat. ꞋInkꞌez ꞌudun keyoh whutꞌenne bukeyoh whuti, ꞌoh cha nawhúnankat. ꞋInkꞌez nyoo keyoh whuti Babylon, ꞌet cha Yakꞌusda whunalni, ꞌinkꞌez Yakꞌusda ye húnilchꞌoh-i, tsꞌekoo tooꞌ kꞌunꞌa ulhtus-i, ꞌi yugha ítalhdzoh ꞌinka.

²⁰ ꞋEt ꞌinkꞌez noo tsꞌiyawh cha hooloh suliꞌ, ꞌinkꞌez dzulh cha hooloh suliꞌ.

²¹ ꞋInkꞌez ndus de yakꞌuz tsꞌe ꞌindloo tsan nincha-i cho, ꞌi dune kꞌut naílhtan. ꞋIlho ꞌindloo tsan 100 lbs ꞌet ꞌuldaz. Ndi ꞌindloo tsan be óonujut kꞌet ꞌi gha dune Yakꞌusda hiyulh huyih.