Revelation 15 - Yak'usda Ooghuni

Lhtakꞌantꞌi oosaꞌ naniztsꞌun-i, ꞌi Yakꞌusda ye húnilchꞌoh-i be dizbun

¹ ꞋEt doo cha yatꞌah ꞌudun whe hóodatꞌen-un whutisꞌen. Hooncha ꞌinkꞌez huwa ꞌítꞌen-un. Lhtakꞌantꞌi lizasne, ꞌenne ndi lhtakꞌantꞌi ꞌudekꞌez hiye dzoh nuzut-i be óonujut-i nahúyule. ꞋI be Yakꞌusda ye húnilchꞌe-i lhaóodutanelh.

² ꞋEt doo cha, yatoo whucho dizghel ꞌantsꞌi khe leꞌ ꞌuntꞌoh, kwun ootoh hoonli, ꞌi doútꞌen-i tisꞌen. Mbene la ndi khuna-iti ntsiꞌ-i, ookꞌeyíltsi-i, ꞌinkꞌez be hóodatꞌen, ꞌinkꞌez ndi be ꞌóolto-i booziꞌ chꞌaꞌ nilhdene, ndi bunghun whucho dizghel kꞌut nódilhya. Nela be tsꞌujun-i Yakꞌusda oochꞌeꞌ unli-i, ꞌi nahúyule.

³ Moses ꞌen Yakꞌusda be ꞌulhna-un, ꞌinkꞌez ꞌusbaiyaz bulh buyun ꞌi be hújun. Ndi shun njan ndutni, “NeMoodihti Yakꞌusda ꞌon nus ulhtus-un inli. Nyeꞌ ꞌutꞌen ncha ꞌinkꞌez oogha ꞌítꞌen. Yakꞌusda oochꞌeꞌne bulerwe inli. Nyeꞌ ꞌutꞌen kꞌoh tsꞌihꞌun ꞌinkꞌez ꞌalha ꞌuhoontꞌoh.

⁴ O neMoodihti mbe nye lhúntilhjut ꞌinkꞌez nyooziꞌ lhedutálhtiꞌ? ꞌalhaꞌ ꞌi be nyunchꞌoh za lubeshi ooghu hooloh-un inli. ꞋUdun keyoh whutꞌenne tsꞌiyawh whusahátidulh ꞌinkꞌez mbut ntsꞌun teniꞌ huntilhdzun. Dune ba nahinyeh-un ꞌawet hooltsai ꞌet huwa.”

⁵ ꞋEt hukwꞌelhꞌaz whunusꞌen ꞌawet yakꞌuz tsꞌe Yakꞌusda oolugliz whucho whutꞌah, Yakꞌusda ooghuni chunkelh be dizdla-i ookꞌut nimbali whucho ꞌusꞌai, ꞌet dáhaꞌ dankez.

⁶ ꞋInkꞌez ndunne lhtakꞌantꞌi lizasne lhtakꞌantꞌi dune ye dzoh nudeh-i huyilelh whe lugliz whucho tehúnindil. Naih diztiꞌ-i lhyul ꞌinkꞌez be hóodatꞌen be húdilhtsꞌi. ꞋInkꞌez butsꞌi toh ꞌon do se gold unli-i be tsuhudilhꞌoo.

⁷ ꞋEt nyoonne dunghi khuna-i ꞌusjiz-i, butoh ꞌilho lhtakꞌantꞌi oosaꞌ naniztsꞌun-i gold unli-i, Yakꞌusda ꞌilhiz ꞌinkꞌez ꞌilhiz wheni khuna-un, ye húnilchꞌoh-i be dizbun, ꞌi lizas lhtakꞌantꞌine butainínla.

⁸ ꞋInkꞌez Yakꞌusda ootsꞌu ha yánduz-i ꞌinkꞌez yé ulhtus-i oolut ꞌi be lugliz whucho whudizbun. Lhtakꞌantꞌi dune ye dzoh nudeh-i lhtakꞌantꞌi lizasne nahúyule-i, lhaóodutatneh whutso lugliz whucho dune daóoyaꞌ ꞌaitꞌoh.