Revelation 14 - Yak'usda Ooghuni

144,000ne neBá booziꞌ buninta bukꞌuneyusguz, ꞌenne Yakꞌusda beꞌ ꞌusbaiyaz hizih nudilhya

¹ ꞋEt soo zúlhtsꞌai, dzulh Zion huyulhni-i, ꞌi kꞌut ꞌusbaiyaz usyin tísꞌen. 144,000ne neBá booziꞌ buninta bukꞌunéyusguz, ꞌenne hizih nudilhya.

² ꞋInkꞌez ndus de ꞌuwhútni. Too najilh-i leꞌ whutni. ꞋInkꞌez ditni, tube dutni kꞌunꞌa leꞌ ꞌutni. ꞋInkꞌez nela be, be tsꞌújun-i be ꞌujunne, ꞌi cha dástsꞌo.

³ ꞋEt kwꞌutsꞌuzda cho diztiꞌ-i, ꞌinkꞌez nyoo dunghi ꞌusjiz-i, ꞌinkꞌez ꞌutso whudilhdzulhne cha, ꞌenne bubut ꞌandidi shun be hújun. Ndi shun yodoolꞌehne hooloh. Ndunne 144,000ne ndi yun kꞌut nabuhonketne, ꞌenne za ndi shun huyodutilꞌeh.

⁴ Ndunne, ꞌenne tsꞌekoo bulh nintaꞌutꞌihne lhuhíloh, ootꞌa lheꞌasnaine ꞌuhintꞌoh ꞌet huwa. ꞋEnne ꞌuhintꞌoh ꞌusbaiyaz nuya te totsuk huyununúdilh. Dune toh naooketneꞌ ꞌuhintꞌoh. Yakꞌusda ꞌinkꞌez ꞌusbaiyaz ꞌenne ꞌudechoo buchꞌeꞌne hinli.

⁵ ꞋInkꞌez buze ꞌaw whutsꞌit-i hooloh. ꞋAlhaꞌ Yakꞌusda kwꞌutsꞌuzda cho diztiꞌ-i yukꞌusda ꞌen but ꞌaw whe tankꞌus ꞌuhintꞌoh-un bughu hooloh.

Tane lizasne, ꞌenne ꞌuhudíja

⁶ ꞋEt doo cha ꞌuyoon lizas ndo yat nutꞌo whe nusꞌen. Ndi yun kꞌut whutꞌenne, lhelhdun keyoh whutꞌenne, lhelhdoh didowhne, lhelhtsꞌun unꞌa yalhdukne, ꞌinkꞌez tsꞌiyanne, ꞌenne ndi khuni unzoo-i ꞌilhiz ꞌuntꞌoh-i, ꞌi ghun budutánelh, ꞌet huba ndun lizas ndi khuni ꞌet yudilhꞌai.

⁷ ꞋUltus whe ndutni, “Yakꞌusda bé nulhjut ꞌinkꞌez dúlhtiꞌ. Dune ba nahutiyeh-un ꞌawet ꞌoh whuya háꞌ hunitꞌo ꞌet huwa. Yakꞌuz ꞌinkꞌez yun kꞌut, yatoo ꞌinkꞌez yun tsꞌu hainli-un cha, tsꞌiyawh ꞌuhoonla, ꞌet huwa ootsꞌun teniꞌ nulhdzun.”

⁸ ꞋInkꞌez ꞌuyoon lizas yunitꞌoh ꞌinkꞌez ꞌen cha njan ndutni, “Keyoh whuti Babylon ꞌawet musai whuzdliꞌ, musai whuzdliꞌ! Nyo keyoh whuti soo nintꞌi whe ꞌuyoon dune bulh nintaꞌutꞌih, tsꞌekoo tooꞌ kꞌunꞌa lhelhdun keyoh whutꞌenne bube yulhnai.”

⁹ ꞋEt bulh tane lizas bubunitꞌoh. Dultul whe njan ndutni, “Ndi khuna-iti ntsiꞌ-i ꞌinkꞌez ookꞌeyiltsi-i cha, mbene la yutsꞌun teniꞌ nilhdzunne, ꞌinkꞌez buninta kꞌus bula kꞌut bube hóodatꞌen de,

¹⁰ dichꞌoh cha Yakꞌusda ye húnilchꞌoh-i tsꞌekoo tooꞌ kꞌunꞌa ulhtus-i, ꞌi hititnelh. Ndi lubot tsꞌekoo tooꞌ kꞌunꞌa ulhtus-i dizbun-i, whuz unꞌa ndi Yakꞌusda ye húnilchꞌe-i be dizbun. ꞋEt mbene khuna-iti ntsiꞌ-i hitsꞌun teniꞌ nilhdzunne, ꞌenne Yakꞌusda oolizasne ꞌinkꞌez ꞌusbaiyaz bunalh kwun ꞌinkꞌez sulphur huyúlhni dizkꞌun, ꞌet ꞌi be dzoh notideh.

¹¹ Ndi huye dzoh nudeh-i whulut, ꞌilhiz wheni ndo whedújoot. Mbene ndi khuna-iti ntsiꞌ-i ꞌinkꞌez ookꞌeyíltsi-i hitsꞌun teniꞌ nilhdzunne ꞌinkꞌez buninta kꞌus bula kꞌut bube hóodatꞌenne, mbene ꞌet ndutꞌenne, ꞌenne dzenis ꞌinkꞌez ꞌulhdzis ibulh nalhotilhyiz.”

¹² ꞋEt hoontsꞌi Yakꞌusda oochꞌeꞌne, Yakꞌusda dughuni netlꞌa idanꞌai howa whulnaꞌ hoontsꞌi whulh huzyin whe Jesus Christ ooba ꞌalhaꞌ yintꞌohne, ꞌenne ꞌuhintꞌoh.

¹³ ꞋEt ndo yakꞌuz tsꞌe ꞌusuhútni, “Ndi ꞌukꞌinges, ꞌandit whutsꞌun mbene neMoodihti tꞌeinínzun whe yahadlane, ꞌenne ꞌukꞌenus hoonzoo-un bubulh ꞌúhooja.” Ndoni, “A,” ni. “ꞋUtꞌen ꞌuhalhꞌen-un, ꞌinka nahutilyis. ꞋInkꞌez dahítꞌen-un bube ꞌutꞌen unzoo-i bubulh yutikulh.”

Ndi yun kꞌut haꞌ nukat-un ꞌawet whusahónzut

¹⁴ ꞋEt whunusꞌen whe kwꞌus ꞌulhyul-i tísꞌen. ꞋIlhoghun dune yeꞌ doútꞌen-un, ꞌen ndi kwꞌus yukꞌusda. Ootsi kꞌéyuztan-i gold ꞌuntꞌoh, ꞌinkꞌez tlꞌo be ꞌútꞌas-i khundiyin-i nutun.

¹⁵ ꞋEt ꞌuyoon lizas lugliz whucho tenínya ꞌinkꞌez soo ꞌultus whe kwꞌus kusda-un dúyulhni, “Nyoo be ꞌútꞌas-i, ꞌi be ꞌintꞌas. ꞋAwet ꞌutantꞌus-un whusahóoltsꞌut. Ndi yun kꞌut haꞌ nukat-un ꞌawet whusahónzut ꞌet huwa.”

¹⁶ ꞋInka kwꞌus kusda-un nyoo be ꞌútꞌas-i yun kꞌut ye whe whunintꞌaz. ꞋEt ndi yun ndulcho whe ꞌadaꞌ hontꞌaz.

Yakꞌusda ye húnilchꞌoh-i

¹⁷ ꞋEt yakꞌuz whulugliz whucho, ꞌet ꞌuyoon lizas tenínya. ꞋEn cha be ꞌútꞌas-i khundiyin-i nutun.

¹⁸ ꞋEt doo cha ꞌuyoon lizas ꞌen loodel tsꞌu haínya. ꞋEn kwun kꞌuneꞌ ꞌulꞌen-un unli. Nyoon be whútꞌas-i khundiyin-i nutún-un, ꞌen soo ꞌultus whe njan ndúyulhni, “Nyoo be ꞌútꞌas khundiyin-i, ꞌi be ꞌintꞌas ꞌinkꞌez ndi yun kꞌut mai oochun bulh oonujin-i nischꞌiz-i ooninyin. ꞋAwet niztꞌai ꞌet huwa.”

¹⁹ ꞋEt ꞌawet ndun lizas dube whútꞌas-i be ndi yun kꞌut hontꞌaz ꞌinkꞌez mai oochun bulh oonujin-i nayalhdzoo. ꞋInkꞌez njan tse cho ookꞌut ha hóokai-un, ꞌet ndi mai ꞌayalhkat, ꞌinkꞌez ke yit ndi mai yukꞌunuya whe ootooꞌ ootsꞌu ha yútsus ꞌet hukwa. ꞋEt ndi Yakꞌusda ye húnilchꞌoh-i ꞌuntꞌoh.

²⁰ ꞋEt keyoh whuti whan ꞌaz, ꞌet njan tsꞌekoo tooꞌ ꞌulꞌen-un whuzꞌai, ꞌet mai hikꞌu núdilh ꞌinkꞌez ꞌuskaiꞌ ootsꞌu ha yíjul. Yeztli ooze yuzdla-i ꞌet ꞌuskaiꞌ taꞌdikhulh suliꞌ. ꞋI 200 miles atꞌen, ꞌet ꞌuwhulyiz.