Revelation 13 - Yak'usda Ooghuni

Khuna-iti ntsiꞌ-i tooz haki

¹ ꞋEt yatoo kꞌut taba susyin whe khuna-iti ntsiꞌ-i tooz haki whe tísꞌen. Lhtakꞌantꞌi ootsi únli ꞌinkꞌez whunizyai oode únli. ꞋInkꞌez ndi oode whunizyai lerwe butsi kꞌéyuzdlai-i doútꞌen, ꞌi ookꞌeyuzdla. ꞋInkꞌez ꞌilho whe ootsi khuni Yakꞌusda chꞌa yalhduk-i ookꞌu néyusguz.

² Ndi khuna-iti ntsiꞌ-i tísꞌen-i ꞌantsꞌi chuntoh boos cho, leopard huyúlhni, ꞌi doútꞌen. Ooke ꞌi cha sus ke doútꞌen. ꞋInkꞌez ooze ꞌantsꞌi khuna-i cho lion, ꞌi ooze ꞌet ndó hotꞌen. ꞋInkꞌez nyoo tlꞌughus cho khuna-i kꞌunꞌa nulget-i whe úlhtus-un cha, kwꞌutsꞌuzda cho diztiꞌ-i, ꞌinkꞌez tsꞌiyantsuk kꞌuneꞌ ootꞌen ha, ꞌet tsꞌiyawh yutlꞌa hónla.

³ Ootsi ꞌilho ꞌi tube ka suliꞌ léꞌuntꞌoh. ꞋI gha dazsai sba léꞌuntꞌoh. ꞋEt ooka whuzdliꞌ-un nahoojeꞌ. ꞋEt ndi yun kꞌut ndulcho whe huwaꞌ hiꞌen ꞌinkꞌez ndi khuna-iti ntsiꞌ-i hiyuntizdil.

⁴ Ndi tlꞌughus cho khuna-i kꞌunꞌa nulget-i, khuna-íti ntsiꞌ-i kꞌuneꞌ ootꞌen ha yugha óoninꞌai-un, ꞌen hitsꞌun teniꞌ nalhdzin. Ndi khuna-iti ntsiꞌ-i, ꞌi cha hitsꞌun teniꞌ nalhdzin ꞌinkꞌez ꞌuhutni, “Ndi khuna-iti ntsiꞌ-i ꞌaw yundultꞌoh-i hooloh. ꞋAw yulhóoganne hooloh.”

⁵ Ndi khuna-iti ntsiꞌ-i tooz haki-i, ꞌi hooncha-un cha howu yalhduk ꞌinkꞌez Yakꞌusda chꞌaz yalhduk, ꞌet wheni ooze ooghá whultsꞌut. Dit whunizyat ꞌon ꞌat nat sanun (42) ꞌet ndúwhuldzoh whe kꞌuneꞌ ootꞌen ha ooghá whultsꞌut.

⁶ Yakꞌusda chꞌaz yawhénilhduk. Oonimbali whucho cha whuchꞌaz yawhénilhduk, ꞌinkꞌez ndunne yakꞌuz dilhtsꞌine, ꞌenne cha, ꞌet tsꞌiyawh buchꞌaz yawhénilhduk.

⁷ Mbene Yakꞌusda oochꞌeꞌne, ꞌenne bubulh lhútigan ꞌinkꞌez buchꞌaꞌ tilhdoh, ꞌet ooghá whultsꞌut. Lhelhdoh didowhne, lhelhtsꞌun unꞌa yalhdukne, ꞌinkꞌez lhelhdun keyoh whutꞌenne, ꞌenne kꞌúneꞌ butilꞌen ha ooghá whuntꞌai.

⁸ ꞋInkꞌez ndi yun kꞌut dilhtsꞌine, ꞌenne tsꞌiyawh ndi khuna-iti ntsiꞌ-i hitsꞌun teniꞌ huntilhdzilh. Ndun ꞌusbaiyaz ꞌudechoo ndi yun ꞌuhóolya whutsꞌun ꞌudaꞌ lháoodintꞌoh hizilhghi, ꞌenne ndi ꞌilhiz ꞌinkꞌez ꞌilhiz wheni tsꞌukhuna-un be ꞌudustlꞌus kꞌut bubooziꞌ ꞌukꞌu lhíguzne, ꞌenne ꞌuhintꞌoh.

⁹ Mbe la ꞌuditsꞌone hoohoozólhtsꞌaiꞌ.

¹⁰ Mbe ꞌuyoonne ꞌulhna ꞌubulhtsi-un, didutchꞌoh cha whuz unꞌa za ꞌulhna tileh. Mbe saluzti be dune ughan de, didutchꞌoh cha saluzti be datitsah wheꞌ hoontꞌoh. ꞋEt huwa Yakꞌusda oochꞌeꞌne, ndi ꞌet mbene hiye ꞌalhaꞌ ninzun-i ꞌinkꞌez hoonli talhohodini, ꞌet ꞌuwhúlhni.

ꞋUyoo khuna-iti ntsiꞌ-i yun tsꞌu hálget

¹¹ ꞋEt doo cha ꞌuyoo khuna-iti ntsiꞌ-i ꞌet yun kꞌut nyus de úlgwulh whe tisꞌen. ꞋUsbaiyaz kꞌunꞌa nanki oode unli ꞌinkꞌez tlꞌughus cho khuna-i kꞌunꞌa núlget-i kꞌunꞌa yalhduk.

¹² Ndun ꞌudechoo khuna-iti ntsiꞌ-i, ye kꞌuneꞌ ꞌutꞌen-i whuz unꞌa tsꞌiyawh yubut ꞌet ndutꞌen. ꞋInkꞌez ndi yun ꞌinkꞌez yukꞌut whutꞌine cha ndun khuna-iti ntsiꞌ-i dazsai inleꞌ ꞌinkꞌez najeꞌ-i, ꞌi hitsꞌun teniꞌ nilhdzun ꞌubulhtsi.

¹³ ꞋInkꞌez ndi bulh nanki khuna-iti ntsiꞌ-i hooncha whe hóodatꞌen teneꞌútꞌen. Dune nalh ndus de kwun yun kꞌéyilhkuk ꞌet cha ndutꞌen.

¹⁴ Ndi bulh nanki khuna-iti ntsiꞌ-i, ꞌi ꞌudechoo-i khuna-iti ntsiꞌ-i nalh lhat te huwa ꞌitꞌen teneꞌ ꞌútꞌen ooghá whuntꞌai, ꞌet whe ndi yun kꞌut whutꞌenne nabunaꞌah. Nyoo khuna-iti ntsiꞌ-i saluzti be ka suliꞌ inleꞌ ꞌinkꞌez hanaꞌ ndi yun kꞌut whutꞌenne ꞌi ookꞌeyíltsi-i ꞌuhooleh ꞌubulhni.

¹⁵ ꞋInkꞌez ndi ꞌukꞌeltsi-i ꞌusjiz yutilhtselh, ꞌet ooghá whultsꞌut. ꞋEt de khuna-iti ntsiꞌ-i ookꞌeyíltsi yalhduk cha yulhtsi. ꞋInkꞌez mbene ndi ꞌukꞌeltsi ꞌaw hitsꞌun teniꞌ noolhdzin ꞌaitꞌohne, ꞌenne tsꞌiyawh bubuhooghan, ni.

¹⁶ Ntsoolne ꞌinkꞌez nchane cha, hoonzoo ꞌuntꞌohne ꞌinkꞌez telꞌenne cha, ꞌinkꞌez ꞌulhnane ꞌinkꞌez oola naditnine cha, ꞌenne tsꞌiyawh nailhnih bula kꞌus buninta te whe hóodatꞌen ꞌubulhtsi.

¹⁷ Mbene bube hóodatꞌen, kꞌus khuna-iti ntsiꞌ-i booziꞌ, kꞌus ndi be oolto-i booziꞌ be ꞌi buninta kꞌus nailhni tsꞌunkꞌus bula ꞌaw ꞌukꞌu lhuhooguz de, ꞌaw ꞌuhoket ꞌinkꞌez ꞌeꞌ hoket ꞌaitꞌoh.

¹⁸ Ndi ꞌi be tsꞌúwhunih-i, mbe la beni hooni-un, ꞌen ndi khuna-iti ntsiꞌ-i booziꞌ yolhto hubaꞌ hoontꞌoh. Dune ooziꞌ ꞌuntꞌoh. Ndi ꞌi lhkꞌuta lhkꞌuta lhkꞌuta (666) ꞌuyulhni.