Revelation 12 - Yak'usda Ooghuni

ꞋAwet ndo yatꞌah tsꞌe huwa ꞌítꞌen-un, ꞌet whe hóodiltsai

¹ ꞋAwet ndo yatꞌah tsꞌe huwa ꞌítꞌen-un, ꞌet whe hóodiltsai, tsꞌeke oonaih ꞌantsꞌi sa tsꞌu hainduz-i doútꞌen, ꞌi be dune unli. Ooketlꞌah ꞌet ꞌulhdzis oozaꞌ ꞌusꞌai. ꞋInkꞌez whunizyai ꞌon ꞌat nanki sum ꞌi ootsi náyuztꞌi.

² ꞋInkꞌez tsꞌoodun bulh ꞌuntꞌoh. Kaꞌ dutni ꞌawet tsꞌoodun whutileh.

³ ꞋInkꞌez doo cha ꞌutsꞌun unꞌa ndo yatꞌah tsꞌe huwa ꞌítꞌen-un, ꞌet whe hóodiltsai. Whunulhꞌen tlꞌughus cho khuna-i kꞌunꞌa núlget-i dulkꞌun, lhtakꞌantꞌi ootsi ꞌinkꞌez whunizyai cha oode únli. ꞋInkꞌez lhtakꞌantꞌi ootsi, ꞌi ꞌilho whe lerwe ootsi kꞌéyuzdla-i doútꞌen, ꞌi butsi kꞌéyuzdla.

⁴ Duche be ndo yatꞌah sum ⅓ ꞌohwhi ndus de ha yálhdil ꞌinkꞌez yun kꞌéyilhdil. Nyoon tsꞌeke ꞌawet ooyaz whutáleh-un, ꞌen yubut usyin, soo tsꞌoodun whuzdli ibulh yutilhnoh ꞌet hukwa.

⁵ ꞋInkꞌez tsꞌeke duneyaz sulhtsi. ꞋEn ndi yun kꞌut lhelhdoh didowhne, tsꞌiyawh lhuztih tuz be kꞌuneꞌ butilꞌen. Ooyaz ꞌen Yakꞌusda ꞌinkꞌez ookwꞌutsꞌuzda cho diztiꞌ-i whuz whe húyalhti.

⁶ ꞋInkꞌez tsꞌeke chuntoh tsꞌe whetsélhya. ꞋEt Yakꞌusda yuba lhaóodilhdzun-un, ꞌet usda. ꞋEt whe 1,260 dzin ꞌet ꞌuwhuldzoh, ꞌet yaꞌalh-i be ooghu tidleh.

Satan yakꞌuz tenahinino

⁷ ꞋInkꞌez yakꞌuz whelhónigan. Michael ꞌinkꞌez dulizas te tlꞌughus cho khuna-i kꞌunꞌa nulget-i chꞌaz nehúdindil. ꞋInkꞌez ndi tlꞌughus cho khuna-i kꞌunꞌa nulget-i, dulizas te buba nchꞌaz nehúnindil.

⁸ ꞋAw tlꞌughus khuna-i kꞌunꞌa núlget ꞌinkꞌez oolizas te, ꞌaw whuchꞌa lheꞌhílhdoh. ꞋInkꞌez yakꞌuz hudilhtsꞌi-un whuchꞌa buhunízyoot.

⁹ ꞋInkꞌez ndi tlꞌughus cho khuna-i kꞌunꞌa núlget-i ncha-un, ꞌen téhinino. Ndi ꞌudaꞌ whutlꞌughus, netsudule ꞌinkꞌez Satan huyulhni. Ndi yun kꞌut ndulcho whe dune nanaꞌah-un, ꞌen ꞌuntꞌoh. Oolizas tubulh ndi yun kꞌébuhuninyoot.

¹⁰ ꞋEt ndo yakꞌuz tsꞌe tube cho njan nduhudija, “ꞋAwet be ꞌuzdutijih-i, ꞌinkꞌez be tsꞌilhtus-i, ꞌinkꞌez Yakꞌusda lerwe unli-un, ꞌinkꞌez ooChrist moodih tileh-un whusahóoltsꞌut. Netsudule mbe la neulhutsinke bukꞌehoꞌalh-un, ꞌen ndi yun kꞌéhininyoot ꞌet huwa. Netsudule ꞌen ꞌutꞌen Yakꞌusda but uzyin whe dzin ꞌinkꞌez ꞌulhdzis ibulh neulhutsinke bukꞌu whulhꞌaih-un.

¹¹ ꞋUsbaiyaz buzkaiꞌ be, ndi khuni Yakꞌusda ghu yalhduk-i cha, ꞌi ndowhi tsꞌiyawh whe netsudule chꞌaꞌ hunilhde, ꞌinkꞌez ꞌaw hukwꞌelha yahitadlah-un whelhuhuniljut.

¹² ꞋEt huwa yakꞌuz whutꞌine ꞌinkꞌez Yakꞌusda oonimbali whucho tꞌah dilhtsꞌine, nohni tsꞌiyawh whunúlhni! ꞋEt mbene ndi yun kꞌut dilhtsꞌine yatoo kꞌut cha nohni tsꞌiyawh ꞌukꞌenus hoontsiꞌ-un nohgha whutaltsꞌulh. Netsudule ndus de nohghu ninya tube hunilchꞌe. Tꞌeooninzun ooba nilhdukw suliꞌ ꞌet huwa.”

Tsꞌeke dzoh nahuyulhdzut-un

¹³ ꞋEt nyoo tlꞌughus cho khuna-i kꞌunꞌa nulget-i ndus de ha hínanyoot tꞌewhunanzin whe, ꞌet nyoon tsꞌeke duneyaz ooyaz suliꞌ-un, ꞌen tube dzoh nuyulhdzut.

¹⁴ ꞋEt hoontsꞌi ndun tsꞌeke tsibalyan cho ootsꞌuntꞌaꞌ nanki ootlꞌa yánkat. ꞋI be keyoh dune lhuhóotꞌi tsꞌe usda-un whuz ntootꞌa ha. ꞋEt tat yus kꞌut ꞌon ꞌat lhoohoolcho ꞌet yaꞌalh-i be ooghudli whe tlꞌughus khuna-i kꞌunꞌa nulget-i, ꞌi chꞌa ꞌet usdaꞌ.

¹⁵ ꞋInkꞌez tlꞌughus khuna-i kꞌunꞌa tsꞌeke tsꞌun too lhai oozá hayangoo. ꞋI be si nyoon tsꞌeke too bulh tóoltꞌah ninzun ha.

¹⁶ ꞋEt hoontsꞌi ndi yun tsꞌeke yula ꞌuja. Yun lhchꞌaz ꞌuja ꞌinkꞌez ndi tlꞌughus cho khuna-i kꞌunꞌa nulget-i too oozá hayangoo-i, whuz ꞌajul.

¹⁷ ꞋInkꞌez ndi tlꞌughus cho khuna-i kꞌunꞌa nulget-i tube tsꞌeke bulh húnilchꞌe, ꞌinkꞌez nyoon tsꞌeke ootsꞌu hainzutne bubulh útigan ha butsꞌú whelget. Yakꞌusda ubudaniꞌ-un hikꞌuneꞌ ꞌutꞌen ꞌinkꞌez Jesus Christ ghu yalhduk-i, ꞌi cha huyoontun, ꞌenne ꞌuhintꞌoh.