Revelation 11 - Yak'usda Ooghuni

Nane oonalh ꞌuhoojane

¹ ꞋEt doo cha tlꞌoghazilh be ꞌúndunaꞌooldzih-i duchun leꞌ ꞌuntꞌoh, ꞌi stlꞌa idantan ꞌinkꞌez lizas ꞌet usyin ꞌinkꞌez ꞌutni, “Dudinyaih ꞌinkꞌez Yakꞌusda oolugliz whucho, loodel cha ꞌohwhi bundunáꞌoolhdzih. ꞋInkꞌez lugliz whucho Yakꞌusda tsꞌu teniꞌ nilhdzunne, ꞌenne cha bubolhto.

² ꞋEt hoontsꞌi lugliz whucho whuzih tse whunalhtun-i ba nꞌaz tsꞌe, ꞌet ꞌaw whundulheꞌzolhdzih. ꞋEt ꞌudun yun kꞌut whutꞌenne bughá whuntꞌai wheꞌ hoontꞌoh. ꞋInkꞌez ndi yun kꞌut Yakꞌusda ookeyoh whuti, ꞌet dit whunizyat ꞌon ꞌat nat sanun (42) ꞌet ꞌantsꞌi bubaꞌ hoonli whe ndulcho ꞌet ꞌuhutidulh wheꞌ hoontꞌoh.

³ ꞋEt ndunne nane sba oonalh ꞌóohoojane, doso dulhkꞌus-i be húzke, ꞌenne 1,260 dzin ꞌet nus hótiꞌen-un, ꞌet butlꞌa óotisꞌalh.

⁴ Ndunne nane, ꞌenne nanki duchun, olive huyúlhni, ꞌinkꞌez nanki be hootꞌen-i, neMoodihti, ndi yun kꞌut whuYakꞌusda oobut nánuyuzꞌa-i hinli wheꞌ hintꞌoh.”

⁵ Ndunne oonalh ꞌóohoojane ubundólhdah hukwaꞌ ꞌutꞌenne, kwun buza ha dutinulh ꞌinkꞌez buchꞌaz ditnine gak hubuhutilhtselh. ꞋEt ꞌinkꞌez mbe ubundólhdah hukwaꞌ ninzun-un, whuz unꞌa hizoolghelh hubaꞌ hoontꞌoh.

⁶ Ndunne nane, ꞌenne ndo yat chan chꞌa whudánaꞌhudutaꞌalh bubaꞌ hoontꞌoh. Nus hoohooꞌen whutoh ꞌet ꞌaw nalhótilhtel ꞌinka. ꞋInkꞌez ndi too ꞌi cha ꞌuskaiꞌ hitilhtselh. ꞋInkꞌez ndi yun kꞌut hukwaꞌ huninzun totsuk hiye dzoh nutideh-i nudútizut, ꞌet nduhóotꞌen ha butlꞌa hóoltsꞌut.

Ndunne nane bunalh ꞌúhoojane ꞌubuhuzilhghi

⁷ ꞋAwet ndunne nane bunalh ꞌúhoojane dune bulh yáhalhduk-un, ꞌetsul ꞌuhudíja de, khuna-iti ntsiꞌ-i tsa kꞌet whucho whutlꞌah hooloh halget-i, bubulh lhútigan, buchꞌaꞌ tilhdoh, ꞌinkꞌez bubutuzilhghelh.

⁸ ꞋInkꞌez buzi, keyoh whuti, ꞌilhoghun ti ꞌet yun hútilhtelh. Njan keyoh whuti mbene la Ndoni buyudindane, ꞌet huwhútni, njan keyoh ꞌi keyoh Sodom ꞌinkꞌez yun kꞌut Egypt huwhutni. ꞋEt neMoodihti tulalhgus kꞌehíyilhti inleꞌ.

⁹ ꞋEt ndunne dune, lhelhdoh didowhne, lhelhtsꞌun unꞌa yalhdukne, ꞌinkꞌez lhelhdun keyoh whutꞌenne cha, ndunne buzi tat dzin ꞌon ꞌat lhoohoolcho dzin ubuhuntilhꞌelh. ꞋInkꞌez ꞌaw dune ꞌabutilhtelh-un butlꞌa hóohooꞌalh ꞌaitꞌoh.

¹⁰ ꞋInkꞌez ndi yun kꞌut whutꞌenne hoohootátꞌeꞌ ꞌinkꞌez huwhuntálhni. ꞋInkꞌez lhtsꞌeꞌ hutildulh. Ndunne nane nus hooꞌen dazsaine, ꞌenne dzoh nunéhulhde hutni ꞌet huwa.

Ndunne oonalh ꞌuhoojane dune hubanghane dunahudidil

¹¹ Tat ꞌon ꞌat lhoohoolcho dzin inleꞌ whe Yakꞌusda ooyiz be tsꞌukhuna-i buye ídiltsꞌut ꞌinkꞌez dunahuditꞌaz. Mbene ubunalhꞌenne tube hunílhjoot.

¹² ꞋInkꞌez ndus de yakꞌuz tsꞌe ꞌultus whe ꞌuwhudija, “Ndiz áhꞌus!” ni. ꞋInkꞌez buchꞌaz ditnine bunalh kwꞌus kꞌut yakꞌuz tsꞌe whe hánꞌaz.

¹³ ꞋEt ꞌoh whuya ꞌuhunitꞌoh whe za tube yun núkhisnai. ꞋInkꞌez keyoh whuti 1/10 ꞌet nawhúnitꞌai. ꞋEt yun núkhisnai whe 7,000ne dune higan. ꞋEt ꞌonghohne tube whéhunuljut ꞌinkꞌez yakꞌuz whuYakꞌusda, ꞌen hidálhtiꞌ.

¹⁴ ꞋEt whúlh nat-un ꞌukꞌenus hoontsiꞌ-un whe hóoltsꞌut. Soo zilhtsꞌai whulh tat-un ꞌon nus ꞌukꞌenus hoontsiꞌ-un ꞌa whe whuz de hóoltsꞌulh.

Bulh lhtakꞌantꞌi be tsꞌujih-i yéꞌ dija

¹⁵ ꞋEt ꞌawet whúlh lhtakꞌantꞌit-un lizas be tsꞌújih-i be ꞌudíja. ꞋEt yakꞌuz tsꞌe lhane tube njan duhutni, “Ndi yun kꞌut lerwene bukeyoh neMoodihti ꞌinkꞌez ooChrist, buchꞌeꞌ whuzdliꞌ. ꞋInkꞌez ꞌilhiz ꞌinkꞌez ꞌilhiz wheni lerwe tileh.”

¹⁶ ꞋEt nat whunizyat ꞌon ꞌat dine ꞌutso whudilhdzulhne Yakꞌusda but dukwꞌutsꞌuzda cho diztiꞌ-i kꞌudilhtsꞌine, ꞌenne Yakꞌusda but nachahunildil ꞌinkꞌez hitsꞌun teniꞌ hunalhdzin.

¹⁷ ꞋInkꞌez ꞌuhutni, “O Yakꞌusda neMoodihti ꞌukꞌenus ulhtus-un inli. Mbe inli, ꞌinkꞌez mbe ꞌantꞌeꞌ, ꞌinkꞌez mbe whuz de tíyalh-un inli. Ndai be ílhtus-i cho ílhchoot ꞌinkꞌez lerwe inleꞌ ꞌet huwa. Musi ntsꞌuyútni.

¹⁸ ꞋUdun yun kꞌut whutꞌenne huhunílchꞌe ꞌinkꞌez be húnilchꞌe-i ꞌawet whusahóoltsꞌut. ꞋInkꞌez yaidlane buba nahutideh-un whusahóoltsꞌut. ꞋInkꞌez nye ꞌulhnane nus hooꞌenne ꞌinkꞌez nchꞌeꞌne, ꞌinkꞌez mbene la nyooziꞌ enuljutne, ntsoolne ꞌinkꞌez nchane cha, ꞌenne tsꞌiyawh buba ꞌukꞌelha whutaleh. ꞋInkꞌez mbene ndi yun kꞌut dune nintaꞌantꞌenne, ꞌenne cha gak ubutilhtselh.”

¹⁹ ꞋEt Yakꞌusda oolugliz whucho yakꞌuz whuzꞌai-un whudáhaꞌ dankez. Nyoo chunkelh diztiꞌ-i, ꞌi bet khuni neba lhaídinla-i, ndi nanki tse kꞌut ꞌukꞌu néyuzguz-i, ꞌi bé dizdla, ꞌi cha nyo oolugliz whucho nulꞌen. ꞋInkꞌez ditni oolhges cha, tube tawhúditni, ditni dutni chaꞌ whutni. Yun nukhútna, ꞌinkꞌez ꞌindloo tsan nincha-i cha nanánkat.