Revelation 10 - Yak'usda Ooghuni

ꞋUyoon lizas ncha-un ꞌudustlꞌusyaz ꞌi nuyúlhchoos

¹ ꞋInkꞌez ꞌuyoon lizas ncha-un ndus de yakꞌuz tsꞌe hainya-un tisꞌen. Kwꞌus toh ꞌuntꞌoh ꞌinkꞌez ditni naꞌúlhgus-i ootsi kꞌut naꞌánguz. Oonin dzenis oozaꞌ doútꞌen ꞌinkꞌez ooke ꞌantsꞌi kwun doútꞌen.

² ꞋInkꞌez ꞌudustlꞌusyaz ꞌi nulhchoos. Nailhni tsꞌe duke be yatoo kꞌeditꞌez, ꞌinkꞌez ꞌintlꞌus tsꞌe duke be yun kꞌeditꞌez.

³ ꞋEn lizas ncha-un soo khuna-iti lion dulgho, whuz unꞌa ꞌudija. Soo hanyih ibulh lhtakꞌantꞌi ditni ꞌudija.

⁴ Lhtakꞌantꞌi ditni ꞌudija whe, ꞌawet ꞌukꞌuneꞌ tisguz. ꞋEt ndus de yakꞌuz tsꞌe sulh yáztisduk. ꞋEt ꞌusúlhni, “Lhtakꞌantꞌi ditni daja dija-un, nyunchꞌoh za tꞌeoonónzin, ꞌaw ꞌukꞌehonges junih!”

⁵ ꞋInkꞌez ndun lizas ncha-un yatoo ꞌinkꞌez yun kꞌut usyin-un, ꞌen yakꞌuz tsꞌe dudilni nusꞌen.

⁶ ꞋEt yakꞌuz ꞌinkꞌez ndai la ꞌet hoonli-i, yun ꞌinkꞌez ndai la ookꞌut wheyoonli-i, yatoo ꞌinkꞌez ndai la ootoh wheyoonli-i, mbe la ꞌilhiz ꞌinkꞌez ꞌilhiz wheni khuna-un tsꞌiyawh ꞌuhoonla-un, ꞌen booziꞌ be lizas ncha-un njan ndutni ꞌawet neóodinzut! ꞋAw ꞌon ꞌun huba oolhꞌeꞌ ꞌaitꞌoh.

⁷ ꞋEt hoontsꞌi ndun bulh lhtakꞌantꞌit lizas ꞌawet ndet dzin be tsꞌujih-i be ꞌudutinelh whe Yakꞌusda wheꞌ hoontꞌoh hooyoh-un lhaóodutatnelh. ꞋEt whuz unꞌa Yakꞌusda dude ꞌulhna nus hooꞌenne, ꞌenne ꞌet huwun ubudániꞌ inleꞌ.

Ndi ꞌudustlꞌusyaz ꞌi John yanꞌal

⁸ ꞋEt whutsodaꞌ yakꞌuz tsꞌe sulh yalhduk-un whudástsꞌo doo cha za sulh yatilhduk ꞌinkꞌez ꞌutni, “Ndun lizas yatoo ꞌinkꞌez yun kꞌut usyin-un ootsꞌinyalh ꞌinkꞌez ꞌudustlꞌus nuyulhchoos-i, ꞌi ilhchoot.”

⁹ ꞋInkꞌez lizas ooghu nusya ꞌinkꞌez ꞌudusni, “Deꞌ ꞌudustlꞌus stlꞌa ilhchoos.” ꞋEt ꞌusulhni, “Nah! Ilhchoot ꞌinkꞌez ꞌinꞌalh! Mbut ba tsꞌulkiꞌ tileh, ꞌet hoontsꞌi nze ꞌet tsꞌihnatlꞌuz kꞌunꞌa mba tilki.”

¹⁰ Lizas ꞌudustlꞌus oola kꞌehayischooz ꞌinkꞌez usꞌal. Tsástꞌai whe tsꞌihnatlꞌuz kꞌunꞌa sba lhki. ꞋEt whésno whe sbut bet tsꞌuwhulkiꞌ suliꞌ.

¹¹ ꞋInkꞌez ꞌusulhni, “Lhane dune, lhawh didowhne, lhelhtsꞌun unꞌa yalhdukne, ꞌinkꞌez lerwene cha, doo cha za ꞌenne bughun nus honꞌen-un bubudóniꞌ hubaꞌ hoontꞌoh.”