Philippians 4 - Yak'usda Ooghuni

¹ ꞋEt huwa sulhutsinke ookꞌesiꞌne nohkꞌénisli cha ꞌustꞌoh. Nohni nohgha hoonústꞌiꞌ, ꞌinkꞌez nohni sba be whuchꞌa whundeh-i ꞌahli. Ookꞌesiꞌne, neMoodihti ꞌen ba soo cho núdulhya.

² Nohni tsꞌekoo Euodia ꞌinkꞌez Syntyche, nohghu tedusdli, neMoodihti ꞌen be lhkꞌunꞌa za nuni nuhzut.

ꞋIlhoh za ꞌutsꞌootꞌeꞌ, ꞌalhgoh tsꞌuhótꞌeꞌ, ꞌinkꞌez tenazdoodli

³ ꞋInkꞌez nyun tsꞌihꞌun stsꞌú ditni-un inli, ntsꞌu tedusdli, ndunne tsꞌekoo, khuni unzoo-i be sla ꞌitꞌenne, ꞌenne bula ꞌintꞌen. Clement, ꞌen cha, ꞌinkꞌez ꞌonghohne cha sla ꞌitꞌenne, ꞌenne tsꞌiyawh ndi ꞌudustlꞌus khunane bubooziꞌ ookꞌusguz-i, ꞌi kꞌut ꞌenne cha bubooziꞌ ꞌukꞌusguz.

⁴ NeMoodihti ꞌahoolhyiz ꞌen be whunúlhni! Doo cha za ꞌudusni, whunúlhni!

⁵ Tsꞌiyanne dune soo neꞌbulhꞌen. NeMoodihti whusanátidalh-un ꞌawet whenghoh ꞌúhoontꞌoh.

⁶ Hoonli huwu ni oohleꞌ junih! ꞋEt kꞌus tsꞌiyaitsuk ooba tenadahdli. ꞋInkꞌez tedahdlih, ꞌinkꞌez musi dóhniꞌ. Be ndunihzut-i, ꞌi tsꞌiyawh Yakꞌusda tsꞌun ookaꞌ dahni.

⁷ ꞋInkꞌez Yakꞌusda be nedzi dizghel-i, hooncha kꞌet ꞌaw tꞌeznoozeh ꞌaitꞌoh. ꞋEt Christ Jesus ꞌen be nedzi dizghel-i, ꞌi nohdzi yo ꞌinkꞌez noheni cha ꞌet tsꞌiyawh yughu tileh.

Tsꞌiyawh nohba whudiztiꞌ-un, ꞌet howu nuni nuhzut

⁸ Sulhutsinke ꞌudekꞌez nohdusni. Ndai la ꞌalhaꞌ ꞌuntꞌoh-i, ndai la kꞌus hóoncha-un, ndet la tsꞌihꞌun ꞌuhoontꞌoh-un cha, di la ootsun hooloh-i, di la ꞌuzooꞌ-i, ndet la ꞌet nduhoontꞌoh-un hoonzoo whe howu yatsꞌulhduk, ndi tsꞌiyawh nohba whudiztiꞌ-un, ꞌoh za howu nuni nahdeh.

⁹ Ndet si sgha whe hodilhꞌeꞌ-un, ꞌinkꞌez ndai sghuni ulhchoot-i, ꞌinkꞌez whudáhtsꞌo-un, ꞌinkꞌez nohnalh ꞌistꞌen-un, ꞌet cha, whuz unꞌa neꞌoohtꞌen. ꞋInkꞌez Yakꞌusda be whúdizghel-un, ꞌen si nohbulh óotꞌeꞌ.

Philippi whutꞌenne bula hooni

¹⁰ ꞋEt saꞌ inleꞌ whe doo cha za sghu nuní nahzut ꞌinkꞌez ꞌahoolhyiz snalhnih ꞌet hoontsꞌi whe slaꞌ tihtꞌelh ꞌaw nohgha lhuwhulhtsit. ꞋEt huwa neMoodihti ꞌen be hoonústꞌiꞌ.

¹¹ ꞋAw be ndunusdzit-i, ꞌi ooghu yalhuzusduk. Ntsꞌenꞌa la dastꞌoh, ꞌet hoontsꞌi hoonústꞌiꞌ. ꞋEt whuz unꞌa hodizꞌeꞌ.

¹² Tꞌeoonuszun hoonliyaz ꞌendunidzit, ꞌinkꞌez lhai ꞌustꞌi-un, ꞌet cha tꞌeoonuszun. ꞋEt huwa ntsꞌoh dahoontꞌoh hoontsꞌi syeꞌúltsꞌilh-un, ꞌinkꞌez unusdai-un cha, ꞌinkꞌez ꞌuzdlai-un cha, ꞌinkꞌez ꞌendunisdzit-un, tsꞌiyawh tꞌeoonuszun.

¹³ Christ ꞌen ꞌuja be stus-i sgha nínꞌai. ꞋEn be tsꞌiyantsuk ꞌuwhusꞌen.

¹⁴ ꞋEt hoontsꞌi dzoh nusúszut-un huwa, ꞌet hoonzoo whe ꞌahja sla ꞌihtꞌen.

¹⁵ Philippi whutꞌenne, nohni za sla ꞌáhja. ꞋUdechoo khuni unzoo-i be yawhenusduk whe, ꞌinkꞌez hukwꞌelhꞌaz yun kꞌut Macedonia howu natísja whe, ndunne Yakꞌusda ba ꞌilhunaoodulhne tsꞌiyawh, ꞌaw ꞌilhoghun hoontsꞌi hoonliyaz sgha lhiꞌal. Nohni za ꞌet ndúsahla.

¹⁶ Keyoh Thessalonica ꞌet susda whe, ndai lhústꞌi inleꞌ, nat lhkꞌelhꞌaz stso tlꞌaꞌihꞌai.

¹⁷ ꞋAw hoonliyaz sghaꞌ tihꞌalh-un, ꞌet hukwꞌúlhnuzustꞌoh. Nus de nohba ꞌukꞌelha tileh-i, ꞌi za nohba ookaꞌ nuszun.

¹⁸ ꞋAlhaꞌ tsꞌiyai lhai ꞌustꞌi. Epaphroditus ꞌen be ndi stso tlꞌahla-i, ꞌi tsꞌiyawh úschoot, ꞌinkꞌez ꞌunísdai. Sooltsun-i, ꞌi ndulcho whe oonawhultsun leꞌ ꞌúntꞌoh. ꞋI huwa tꞌaih-i ꞌuntꞌoh. ꞋEt huwa Yakꞌusda tube cho hoontꞌiꞌ.

¹⁹ ꞋInkꞌez Christ Jesus ye diztiꞌ-i, ꞌi gha sYakꞌusda be ndunihdzit-i, tsꞌiyawh nohgha ítalelh.

²⁰ ꞋEt neYakꞌusda ꞌinkꞌez neBá, ꞌen tsꞌun ꞌilhiz wheni tube cho uzdílhtiꞌ. ꞋEt ndo honeh.

Tsꞌiyanne Yakꞌusda oochꞌeꞌne, tsꞌiyawh hadih budohni

²¹ Mbene la Christ Jesus ꞌen be Yakꞌusda oochꞌeꞌne, tsꞌiyawh hadih sba budohni. ꞋEt sulhutsinke szih dilhtsꞌine, ꞌenne cha hadih nohuhútni.

²² ꞋInkꞌez Yakꞌusda oochꞌeꞌne njan dilhtsꞌine, ꞌenne tsꞌiyawh hadih nohuwhutni. Mbene Ceasar ooyoh dilhtsꞌine, ꞌenne soo hadih hutni.

²³ NeMoodihti Jesus Christ ye unzoo-i, nohni tsꞌiyawh nohbulh ootꞌeꞌ. ꞋEt ndo honeh.