Philippians 3 - Yak'usda Ooghuni

Christ ꞌen za ba tsꞌootꞌen

¹ Sulhutsinke ꞌudekꞌez-un nohdusni. NeMoodihti ꞌen bulh tsꞌónilhni! Nohtsꞌó kꞌesgus-i, ꞌi za ꞌuntꞌoh. ꞋEt hoontsꞌi sba ꞌantsꞌi hoonli, ꞌinkꞌez bé dóohjih sih.

² Mbene lhike ndultꞌohne buchꞌa huwahli. ꞋInkꞌez ꞌutꞌen ntsiꞌ-i ꞌulhꞌenne cha buchꞌa huwahli. ꞋInkꞌez yanéꞌdudutꞌasne cha buchꞌa huwahli.

³ ꞋEt wheni tsꞌihꞌun unꞌa tsꞌotꞌaz ꞌet huwa. ꞋInkꞌez Ndoni ꞌen be Yakꞌusda tsꞌun teniꞌ uznilhdzun. ꞋInkꞌez Christ Jesus ooba tsꞌodilhtiꞌ. ꞋInkꞌez neyustꞌe kꞌoh tsꞌe ꞌet ꞌaw whutꞌanílhtsꞌunítan.

⁴ ꞋEt hoontsꞌi si cha hukwaꞌ nuszun de, syustꞌe kꞌoh tsꞌe, ꞌet za whutꞌaninustan ꞌet hoontsꞌi hukwa lheꞌnúszun. ꞋEt ꞌuyoonne duyustꞌe kꞌoh tsꞌe ꞌuhintꞌoh, ꞌet si ꞌon nus whuz unꞌa ꞌustꞌoh.

⁵ Whuzusdli whutsꞌun lhkꞌu dit dzin ꞌet ooka dune tsinli kꞌut nehootꞌas, ꞌet ndusíhinla. Israel ootsꞌuhainzut-un usdli. Benjamin bulh didowhne, ꞌilhoghun ꞌustꞌoh, ꞌinkꞌez Hebrew bughuni kꞌoh tsꞌe yasduk-un ꞌustꞌoh. ꞋInkꞌez pharaseene, dahoontꞌoh whe Moses be ꞌudustlꞌus kꞌuneꞌ hutꞌen, ꞌet si cha bubulh didowh-un ꞌustꞌoh.

⁶ Tube hoolhtus whe ꞌustꞌen. ꞋInkꞌez Yakꞌusda ba ꞌilhunaoodulhne, ꞌenne dzoh nubusdeh inleꞌ. ꞋInkꞌez dune Moses be ꞌudustlꞌus be tsꞌihꞌun ꞌuntꞌoh-un tileh de ꞌet huwa ꞌaw whe skꞌehóotaltsꞌulh-un hootáloh whe ꞌustꞌoh.

⁷ ꞋEt hoontsꞌi ndóohoolcho whe sba hoonzoo sutilhtselh inleꞌ, ꞌet Christ ꞌen ba ꞌantsꞌet ꞌístꞌen whuzdliꞌ ꞌet nawhusꞌai.

⁸ ꞋAw ꞌet za iloh ꞌuwhudusni, Christ Jesus ꞌen sMoodihti dantꞌoh la tꞌezninzun-un, ꞌet hooncha kꞌet ꞌaw ꞌuzdooniꞌ ꞌaitꞌoh. Dáhoontꞌoh ooghu tꞌeoonúszun-un sghu hóolhchoot-un, ꞌet whunilhchoh whula disni. ꞋI tsꞌiyawh ꞌun tukat-i sba unli ꞌet huwa ꞌon nus Christ tꞌenooszeh ha.

⁹ ꞋInkꞌez ꞌen ooyudúsda. Moses be ꞌudustlꞌus, ꞌaw ꞌi gha tsꞌihꞌun dune lhúsdloh inleꞌ. ꞋEt kꞌus Christ sba ꞌalhaꞌ ꞌuntꞌoh ꞌet huwa tsꞌihꞌun dune susdliꞌ. Be tsꞌihꞌun unꞌa be dune tsinli-i, be ꞌalha ꞌuhoontꞌoh-i, ꞌi be Yakꞌusda tsꞌun ha whúltsꞌuk.

¹⁰ ꞋEt Jesus Christ ꞌen tꞌentiszeh hukwaꞌ nuszun. Ye ulhtus-i, ꞌi be dunaidilhti, ꞌinkꞌez dahoontꞌoh whe dzoh nusuzut, ꞌet cha tꞌewhuntiszeh. ꞋEt dazsai, si cha whuz unꞌa za ꞌutisnelh.

¹¹ ꞋEt ꞌalha ꞌuhoontꞌoh, si cha yaidlane toh ye dunadija-i, si cha uncha ndúsja.

Ndo whuz za hukwaꞌ tsꞌootꞌen

¹² ꞋAwhuz ꞌaw whunilhchoh huba soo lheꞌustꞌoh. ꞋInkꞌez soo ꞌet lhadúlya-un susdliꞌ. ꞋEt hoontsꞌi nustꞌi za ꞌustꞌoh. Di ha Christ Jesus ꞌen silhchoot, ꞌet whuz unꞌa si cha itáschulh.

¹³ Sulhutsinke sichꞌoh ꞌawhuz whuschoot lhnúszun, ꞌet hoontsꞌi ꞌilhoghun huba za ꞌet ndustꞌen. Ndet la senghu hooskat-un, ꞌet ꞌaw howu nuní lhnuzuszut whe whunaoodíznoh. ꞋInkꞌez stso tsꞌe hoonli-i, ꞌi za óschoot hukwaꞌ ꞌustꞌen.

¹⁴ Yakꞌusda Christ Jesus ndo negha whútaꞌalh-un, ꞌet whutsꞌun za hukwaꞌ ꞌustꞌen.

¹⁵ ꞋEt huwa lhadulyane, ꞌenne cha whuz unꞌa za nuni hunoodeh, ꞌinkꞌez nohni ꞌutsꞌun unꞌa ꞌunahzun de, ꞌet hoontsꞌi tsꞌiyawh Yakꞌusda tꞌenohwhuntilhdzeh.

¹⁶ ꞋEt hoontsꞌi ndet la ꞌudaꞌ neghá whultsꞌut-un, whuz unꞌa za nutsꞌóodilh ꞌinkꞌez lhkꞌunꞌa za nuni uznoodeh.

ꞋAwet yun kꞌut uzdilhtsꞌi ꞌet hoontsꞌi yakꞌuz nekeyoh wheꞌ hoontꞌoh

¹⁷ Sulhutsinke skꞌunꞌa ꞌahtꞌen. ꞋInkꞌez ꞌuyoonne si skꞌunꞌa neMoodihti ba yinka dilhtsꞌine, ꞌenne cha bunulhꞌen. Wheni nekꞌoh tsꞌe oohtꞌeꞌ ha ꞌutsꞌintꞌoh.

¹⁸ ꞋEt lhane ꞌaw whuz unꞌa yinka hudíltsꞌih. Lhat nohdásniꞌ. Doo cha za snatsul tooꞌ hoonli whe nohdúsni, ꞌenne Christ ootulalhgus chꞌaz ditnine ꞌuhintꞌoh.

¹⁹ Ooba ꞌalhaꞌ lheꞌhootꞌohne nintaꞌhutitꞌelh. Bubut ꞌi buba Yakꞌusda unli. Ndi yun kꞌut yooya tsꞌiyawh hiyulh ꞌuntꞌoh ꞌinkꞌez ꞌi za hiba whudílhtiꞌ. Ndi yun kꞌut hoonli-i, ꞌi za ghu nuni hunudeh.

²⁰ Wheni ꞌet yakꞌuz nekeyoh wheꞌ hoontꞌoh ꞌet huwa. ꞋEt whutsꞌun neulhyis-un netsꞌu tiyalh, ꞌet huba néznisdil. Jesus Christ neMoodihti, ꞌen ꞌuntꞌoh.

²¹ ꞋInkꞌez neyustꞌe telꞌen-i, ꞌi duyustꞌe diztiꞌ-i kꞌunꞌa ꞌuntꞌoh yutilhtselh. Ye ulhtus-i, ꞌi be tsꞌiyantsuk ookꞌuneꞌ whutꞌen, ꞌi be ꞌuyoo yustꞌe neba itilhtselh.