Philippians 2 - Yak'usda Ooghuni

Teꞌuzdudilꞌen whe ꞌalhgoh ꞌilho za tsꞌooleꞌ

¹ ꞋEt huwa Christ ꞌen nohbulh ꞌuntꞌoh nohlaꞌ tinelh ha eh? Christ ye nohkꞌensiꞌ-i, ꞌi be eh kꞌenánohniꞌah? Ndoni ꞌalhgoh eh nohbulh ꞌúntꞌoh? ꞋInkꞌez nohtsꞌun únzoo eh? ꞋInkꞌez nohgha teꞌninzun eh?

² ꞋEt whuz unꞌa ꞌuhoontꞌoh, ꞌinka be hóonustꞌiꞌ-i tsꞌiyawh lhadáhla. ꞋEt noheni tsꞌiyawh ꞌalhgoh ootꞌeꞌ. Be lhkꞌehsꞌ-i, ꞌi cha ꞌilho za ꞌutitꞌelh. Nohzul bulh ꞌilho suhliꞌ leꞌ oohtꞌeꞌ. ꞋEt whe daja nahzun, ꞌet ꞌilhoghi za tileh.

³ Nohnichꞌoh hukwaꞌ nahzun te za neꞌóohtꞌen junih. ꞋAntsꞌi yo ꞌúdudulhdzun ꞌinkꞌez ꞌuyoonne nohanus hinzoo noohzin.

⁴ Nohnichꞌoh za khun nuni noohdzut junih. ꞋEt kꞌus ꞌuyoonne cha bughu nuní nahzut bula tihtꞌelh ha.

Christ, Yakꞌusda unli, ꞌet hoontsꞌi teꞌdudilꞌen whe ndi yun kꞌut indaꞌ

⁵ ꞋEt ndet Christ Jesus ꞌen howu nuninuzut, nohni cha ꞌet za howu nuni noohdeh.

⁶ Yakꞌusda dantꞌoh, whuz unꞌa za ꞌuntꞌoh. ꞋInkꞌez Yakꞌusda yundultꞌoh whe ꞌuntꞌoh. Dichꞌoh Yakꞌusda yulh hulhgha ꞌuntꞌoh-un ꞌaw whe lhéꞌdudiltiꞌ. ꞋEt huwa ꞌaw Yakꞌusda gho tizꞌai lhnízun.

⁷ ꞋEt kꞌus tsꞌiyawh whula ditni whe be ꞌulhnane dahintꞌoh la, ꞌet hóolhchoot, ꞌinkꞌez dune dótꞌen suliꞌ.

⁸ ꞋInkꞌez dune dótꞌen whe hinilhꞌen ꞌinkꞌez dichꞌoh tsꞌiyanne anyo ꞌuntꞌoh naꞌdudulhtsi. Datítsah whutsꞌun duBá yukꞌuneꞌ ꞌutꞌen tulalhgus kꞌut datítsah ꞌet hoontsꞌi.

⁹ ꞋEt huwa Yakꞌusda tsꞌiyantsuk whando whe yudálhtiꞌ ꞌinkꞌez tsꞌiyai ooziꞌ ando ꞌuntꞌoh hukwꞌunꞌa yooziꞌ whulhtsi.

¹⁰ ꞋEt huwa Jesus booziꞌ, ꞌi gha tsꞌiyanne dugwutsi be hitsꞌun nudútalyalh wheꞌ hoontꞌoh. Yakꞌuz whutꞌenne ꞌinkꞌez ndi yun kꞌut whutꞌenne, ꞌinkꞌez yun tꞌah ꞌuntꞌohne, ꞌenne cha tsꞌiyawh.

¹¹ ꞋInkꞌez lhelhyoo khuni be yalhdukne, ꞌenne tsꞌiyawh njan duwhúdutinelh, Jesus Christ neMoodihti ꞌuntꞌoh. ꞋEt whe Yakꞌusda neBá, ꞌen hidílhtiꞌ wheꞌ hutni.

Be hootꞌen-i nulene

¹² ꞋEt huwa ookꞌesiꞌne ntsꞌenꞌa dahtꞌoh nohbulh ꞌustꞌen inleꞌ whe Yakꞌusda kꞌuneꞌ ꞌahtꞌen. ꞋAndit ꞌaho ꞌaw nohbulh lheꞌustꞌoh ꞌet hoontsꞌi ꞌon nus ꞌukꞌuneꞌ ꞌutꞌenne tihleh. ꞋEt huwa soo tsꞌihꞌun unꞌa nohdusni, ntsꞌenꞌa la dihjiz inleꞌ, ꞌet whénulhjut ꞌinkꞌez nohyustꞌe dutlut, ꞌet whuz unꞌa lhadáhleh hukwaꞌ ꞌuhtꞌen.

¹³ Yakꞌusda ꞌen ꞌunohꞌulhꞌen. Ndai yukaꞌ ninzun ꞌinkꞌez ntsꞌenꞌa hukwaꞌ ninzun, ꞌoh te néꞌnohulhꞌen.

¹⁴ Tsꞌiyantsuk whe lhdulhyoh ꞌudoohniꞌ junih. ꞋInkꞌez khun te lhchꞌa holhꞌeꞌ junih.

¹⁵ Nohkꞌehóotaltsꞌulh-un, ꞌet whuyit ꞌuhtꞌoh ꞌinkꞌez ootsun hoolohne oohleꞌ, ꞌet whuz unꞌa Yakꞌusda buzkeh tihleh ꞌet whe ꞌaw nohkꞌeꞌ holtsꞌit ꞌaitꞌoh. Ndunne tankꞌus ꞌúntꞌohne ꞌinkꞌez lubeshi ꞌukꞌenus ntsiꞌ-i ooleh hukwaꞌ ꞌutꞌenne, ꞌenne butoh ꞌulhdzis be hootꞌen-i kꞌunꞌa oohtꞌeꞌ.

¹⁶ Ndi khuni be tsꞌukhuna-i, ꞌi za soo cho oohtun. ꞋEt whuz unꞌa Christ oodzin de, dalcho-i be hootástꞌeꞌ. ꞋOh de de, whusúntilhtun niz de ndet la hukwa ꞌistꞌen-un ꞌinkꞌez ndai ꞌisꞌen-i, ꞌi tsꞌiyawh ꞌaw ꞌantsꞌet lheꞌústꞌel.

¹⁷ ꞋEt hoontsꞌi be nohba ꞌalha ꞌuhoontꞌoh-i, ꞌinkꞌez Yakꞌusda ba ꞌahtꞌen-un, ꞌohwhi ꞌantsꞌi Yakꞌusda gha tꞌaih-i leꞌ ꞌuntꞌoh. ꞋI kꞌut be khusna-i ꞌantsꞌi nadísjul le ꞌustꞌoh, ꞌet huwa hoonústꞌiꞌ, ꞌinkꞌez tsꞌiyawh nohbulh whúnusni.

¹⁸ ꞋEt huwun za nohni cha hoonáhtꞌiꞌ ꞌinkꞌez sulh whunulhni.

Paul Timothy ghu yalhduk

¹⁹ ꞋEt Jesus neMoodihti ꞌen ootꞌa ninustan whe Timothy ꞌaho nohtsꞌun tisꞌalh. ꞋEt whusanája de, dahtꞌoh la sudániꞌ de, ꞌet la hóstꞌeꞌ.

²⁰ ꞋAw dune yundultꞌohne hooloh. ꞋEn la soo cho nohgholeꞌ.

²¹ ꞋUyoonne tsꞌiyawh didutchꞌoh dude ꞌutꞌen kꞌoh za hukwa hunuta, ꞌaw Jesus Christ be ꞌutꞌen kꞌoh iloh.

²² ꞋEt hoontsꞌi Timothy ntsꞌenꞌa dune unli, nohni tsꞌiyawh tꞌeoonúhzun. Dune ooyeꞌ ntsꞌenꞌa dubá yula ꞌutꞌen, ꞌet whuz unꞌa za ꞌulhna kꞌunꞌa ndi khuni unzoo-i, ꞌi be lhla ꞌítꞌen.

²³ ꞋEt huwa ꞌet njan ntsꞌenꞌa sulh daootanelh-un, ꞌet nawhusꞌai de, ꞌaho la nohtsꞌún tóosꞌaꞌ.

²⁴ ꞋEt hoontsꞌi neMoodihti ꞌen ootꞌa nínustan si cha ꞌaho nohtsꞌun tisyalh nuszun.

Paul Epaphroditus yudálhtiꞌ

²⁵ ꞋEt howu nuni nuszut, Epaphroditus ꞌen nohtsꞌun tóosꞌaꞌ hubaꞌ hoontꞌoh. ꞋEn neulhutsin ꞌuntꞌoh. Sulh ꞌutꞌen-un cha ꞌuntꞌoh ꞌinkꞌez ꞌilhoh salda ídli. ꞋEt nohni nohba khuni naꞌá-un cha unli. ꞋEn ꞌuntꞌoh ndet hukwaꞌ nuszun-un, ꞌet whunilhchoh whe sla ꞌutꞌen.

²⁶ ꞋOh daꞌ ndun bulh ꞌúdahtsꞌo nduda inleꞌ. ꞋEt huwun oodzi únduda ꞌinkꞌez nohni nohkꞌéninli.

²⁷ ꞋInkꞌez ꞌalhaꞌ tube ndidaꞌ. ꞋAnkwꞌus dazsai, ꞌet hoontsꞌi Yakꞌusda yugha téꞌninzin. ꞋAw ꞌen za iloh, si cha sgha téꞌninzun. ꞋEt huwa ꞌon ꞌun lhanꞌun te tsꞌodi lhúsdloh.

²⁸ ꞋEt huwa ꞌaoodunih be nohtsꞌun whesꞌaꞌ. Ahꞌen de, ꞌet de la hóhtꞌeꞌ. ꞋInkꞌez la ꞌaw tube sdzi lhundoosdoh.

²⁹ ꞋInka neMoodihti ꞌen gha hoonáhtꞌiꞌ whe yoh danúlhtih. ꞋEt nduntꞌohne, ubudúlhtiꞌ.

³⁰ ꞋEt Christ ꞌen be ꞌutꞌen kꞌoh huwa, ꞌutꞌen ooba lhai kꞌet, ꞌankwꞌus dazsai. Dichꞌoh ye khuna-i, ꞌi hoontsꞌi ooba ꞌantsꞌi yintꞌoh. ꞋEt huwa ndet whe sla tihnelh inleꞌ, ndai la be sla lheꞌáhnel-i, ꞌi tsꞌiyawh dichꞌoh ye sla ꞌuja.