Philemon 1 - Yak'usda Ooghuni

Paul, Philemon hadih yúlhni

¹ Si Paul ꞌustꞌoh. Jesus Christ ba ꞌadusꞌai. Timothy neulhutsin, sulh ꞌuntꞌoh. Philemon nyun ntsꞌo kꞌetisgus. Neulhutsin, nkꞌetsꞌinsiꞌ. Nekꞌeke ꞌinkꞌez nebulh ꞌutꞌen-un inli.

² ꞋEt Apphia ꞌen cha ookꞌetsꞌinsiꞌ. ꞋInkꞌez Archippus neBá ba nebulh lhugan-un unli. ꞋInkꞌez nyoh Yakꞌusda ba ꞌilhunaoodulhne, ꞌenne tsꞌiyawh hadih butsꞌutni.

³ Yakꞌusda neBá ꞌinkꞌez Jesus Christ neMoodihti, ꞌen ye unzoo-i ꞌinkꞌez nohdzi doghel-i nohbulh óotꞌeꞌ.

Jesus Christ mba ꞌalhaꞌ ꞌuntꞌoh ꞌinkꞌez ookꞌensiꞌ

⁴ SYakꞌusda musi dusni. Tenadusdli totsuk nghu nuní nuszut.

⁵ Whulh ꞌúdustsꞌo Jesus Christ mba ꞌalhaꞌ ꞌuntꞌoh ꞌinkꞌez ookꞌensiꞌ. ꞋInkꞌez Yakꞌusda oochꞌeꞌne, ꞌenne cha whuz unꞌa za bukꞌentsiꞌ.

⁶ ꞋEt be mba ꞌalha ꞌuhoontꞌoh-i, ꞌi be óodutnih sih. ꞋEt whe Christ Jesus ꞌen gha ꞌutꞌen unzoo-i ooghá izanaꞌ-i, ꞌet la tꞌeoonoodzeh.

⁷ Sulhutsin nyun ngha Yakꞌusda oochꞌeꞌne budzi donáꞌuja. ꞋEt be nékꞌetsꞌinsiꞌ-i ꞌintꞌi-i, ꞌi gha tube tsꞌuhóontꞌiꞌ ꞌinkꞌez sóo kꞌunuznutꞌah chaꞌ ꞌi gha tsꞌutꞌi.

Paul Onesimus ba tedidli

⁸ ꞋEt huwa Christ ꞌen be lhoostoh whe ntsꞌo hukwaꞌ dusni-un ꞌoh tuneꞌ ꞌontꞌen. ꞋEt whuz unꞌa tsꞌihꞌun ꞌuhoontꞌoh.

⁹ ꞋEt hoontsꞌi be nekꞌétsꞌinsiꞌ-i, ꞌi gha ntsꞌu tédusdli. Sunilhꞌen ntsꞌenꞌa dastꞌoh yoo ꞌun uzulh-un usdli. ꞋInkꞌez ꞌandit Jesus Christ ꞌen ba ꞌadusꞌai.

¹⁰ Syeꞌ Onesimus ꞌen ba ntsꞌun tedusdli. ꞋEn ꞌuntꞌoh lhuztih tlꞌool be suzghel whe ooba ꞌalha ꞌuhoontꞌoh susi.

¹¹ Whutsꞌo daꞌ nyun ntsꞌun ꞌaw hoonli huba unzoo-un hooloh inleꞌ. ꞋEt ꞌandit nyun ꞌinkꞌez si sba cha unzoo suliꞌ.

¹² ꞋAndit ꞌen ntsꞌu whenasꞌaꞌ ꞌinkꞌez naóolhchoot. ꞋEt ꞌantsꞌi sichꞌoh sdzi ilhchoot leꞌ tanelh.

¹³ Njan szih tidalh hukwaꞌ nuszun inleꞌ, njan khuni unzoo-i gha suzghel. ꞋEt daꞌ nyun ngha snat neꞌóotꞌen ooleꞌ daꞌ.

¹⁴ ꞋEt hoontsꞌi nyun, “Aꞌa,” lhduzinih de za, ꞌaw hoonli ꞌuwhutislelh-un hukwa lheꞌnuszun. ꞋEt whuz unꞌa nyunchꞌoh hooníntꞌiꞌ de za.

¹⁵ ꞋEt huwa tilah ꞌatsulyaz nghu whinya inleꞌ. ꞋEt de ꞌilhiz wheni naóolhchoot de, ꞌilhiz la nzih oodaꞌ,

¹⁶ ꞌaw ꞌon ꞌun nye ꞌulhna lhtisdle. ꞋEt ꞌandit ꞌulhna unli-un whanus ꞌuntꞌoh. Neulhutsin ookwꞌetsꞌinsiꞌ-un unli. Si tube sba díztiꞌ ꞌet hoontsꞌi dalcho-i be suba nyun ꞌon nus mba díztiꞌ. ꞋEt náwhultꞌoh, ndi yun kꞌut huba cha ꞌinkꞌez neMoodihti ba cha.

Si skꞌunꞌa nailhchoot

¹⁷ Si nyulh ꞌústꞌen suninzun de, si nasilhchoot hukwꞌunꞌa nailhchoot.

¹⁸ ꞋEt ndun hoonliyaz whe ntsꞌu níntaꞌ ꞌantꞌen de, kꞌus ntsꞌu whulhꞌai de, si sba ꞌukꞌehoonges.

¹⁹ Si, Paul, sichꞌoh sla be ntsꞌo kꞌeꞌusges. Si la ookꞌelha hooselh. ꞋEt hoontsꞌi hoonliyaz mba whunatizni, nyunchꞌoh be khina-i, ꞌi be hoontsꞌi ntsꞌún whuzusꞌai leꞌ hoontꞌoh.

²⁰ A, sulhutsin neMoodihti be nyun ngha ꞌon nus hoonzoo-un ntsꞌun hukwaꞌ nuszun. Ntsꞌenꞌa la syo tsꞌe whedúsni, ꞌet neMoodihti be sdzi donaꞌ ꞌinleh.

²¹ Ntsꞌó kꞌesges-i, ookꞌunꞌa ꞌutanelh-un sba ꞌalha ꞌuhoontꞌoh. Daja dusni-un, ꞌi be ꞌon nus ꞌutantꞌelh nuszun.

²² ꞋEt hoontsꞌi tisdálh-un sba lhaóodonleh. Nohtenadudli gha la ꞌet ndó honeh. ꞋInkꞌez la ntsꞌun sla nahudootnih.

Ye unzoo-i nyulh óotꞌeꞌ

²³ Epaphras, Jesus Christ gha sulh ꞌadinꞌai-un, ꞌen cha hadih nyulhni.

²⁴ Mark, Aristarchus, Demas, ꞌinkꞌez Luke cha, sulh ꞌutꞌenne, ꞌenne tsꞌiyawh hadih nyuhutni.

²⁵ NeMoodihti Jesus Christ ꞌen ye unzoo-i nyughi bulh óotꞌeꞌ. ꞋEt ndo honeh.