Matthew 9 - Yak'usda Ooghuni

Jesus dune delhdusni-un, Yulubeshi yunailhde ꞌinkꞌez soo naꞌyinla

¹ Jesus ꞌet tsꞌi benya ꞌinkꞌez nyan yahúzki dukeyoh tsꞌe.

² ꞋAho ꞌawet ndun delhdusni-un, lili be whusahúyankai. Jesus tꞌeooninzun buba ꞌalha ꞌuhoontꞌoh. ꞋEt délhdusni-un ꞌuyulhni, “Yeꞌ ndzi hoteꞌ, nlubeshi mba hooloh suliꞌ!”

³ ꞋAho whulohne Moses be ꞌudustlꞌus ꞌukꞌu nunáguzne ꞌulhodutni, “Ndun dune Yakꞌusda chꞌaz yalhduk whe ꞌutni!”

⁴ Daja huninzun Jesus tsꞌiyawh tꞌeooninzun. ꞋInka ꞌubulhni, “Di ha nohdzi yo ntsiꞌ-i ghu nuni nahdeh?

⁵ Ntsꞌenꞌa suba huwa lhúhoolnaꞌ kꞌunꞌa ꞌuzdooniꞌ? ‘Nlubeshi mba hooloh suliꞌ,’ kꞌus, ‘Dudinyaih ꞌinkꞌez ninya’?

⁶ ꞋEt tꞌeoonóhzin Yinka Dune Yeꞌ, ndi yun kꞌut oobaꞌ hoontꞌoh lubeshi ꞌun toolhdilh hubaꞌ ꞌuntꞌoh,” ubúlhni. ꞋInkꞌez delhdusni-un, “Dudinyaih ꞌinkꞌez kwꞌusinti-i ilhchoot ꞌinkꞌez nyoh tsꞌe naindalh!” yulhni.

⁷ Dunadija ꞌinkꞌez duyoh tsꞌe whenája.

⁸ ꞋIlhunaoodúlhne tsꞌiyawh buba hooncha ꞌinkꞌez Yakꞌusda hudálhtiꞌ, lheꞌultus dunne butlꞌa honꞌai ꞌet huwa.

Matthew sooniya nalhdzooh-un

⁹ ꞋEt hukwꞌelhꞌaz Jesus ꞌoh whuya uyalh whe sooniya naldzooh-un, ꞌilhoghun dune Matthew huyulhni, ꞌet usda yunilhꞌen. “Sunanyalh,” yulhni. Dudinya ꞌinkꞌez yikꞌoh tsꞌe ꞌutitꞌelh ha yuntizya.

¹⁰ Jesus yeyoh tsꞌe daninya ꞌinkꞌez buzih usda bula naꞌutꞌalh whe sooniya ꞌilhunaoosꞌaihne ꞌinkꞌez lubeshi ꞌulhꞌenne, cha yoh dahunindil ꞌinkꞌez Jesus yugha hodulꞌehne bula nahutꞌalh.

¹¹ ꞋInkꞌez Phariseene hinilhꞌen yugha hodulꞌehne bubuhoodulhkut, “Nohodulhꞌeh-un, di ha sooniya ꞌilhunaoosꞌaihne ꞌinkꞌez lubeshi ꞌulhꞌenne cha bubulh naꞌutꞌalh?”

¹² ꞋEt Jesus ubudantsꞌo daja hutni, ꞌet ubúlhni, “Mbene la soo ꞌúntꞌohne ꞌaw yoo be duyun ka lheꞌhunizun. Ndudáne, za yoo be duyun kaꞌ huninzun.

¹³ ꞋEt hoontsꞌi ꞌahdulh ꞌinkꞌez hodulhꞌeh daja ni whe ꞌutni, ‘ꞋUyoonne gha teꞌntihzilh ꞌet nohtsꞌo hukwaꞌ nuszun. Loodel kꞌut hidutalhkꞌun-i, ꞌi ooka lheꞌnúszun.’ ꞋAw tsꞌihꞌun ꞌuntꞌohne, ꞌenne iloh bubeni naháhundunooleh huba whusásya. Lubeshi ꞌulhꞌenne, dulubeshi chꞌaz bubeni naháhundunooleh ubudutásnilh ha whusásya.”

John yugha hodulꞌehne, Jesus soo hunooni-un hukwa huyoodulhkut

¹⁴ ꞋEt ꞌawet John yugha hodulꞌehne, Jesus tsꞌu hoozdil ꞌinkꞌez huyoodulhkut, “Dáhoontꞌoh huwa wheni ꞌinkꞌez Phariseene, cha lhat soo tsꞌoohooni, ꞌinkꞌez ngha hoodulhꞌehne, ꞌenne gak?”

¹⁵ ꞋEt Jesus ꞌubulhni, “Mbe la ooꞌat whutaleh-un, ookꞌekene, ꞌawhuz huyulh ꞌuntꞌoh, ꞌenne cha eh soo húhootanih? ꞋAwundooh! ꞋEt hoontsꞌi ꞌoh de de ookꞌekene buchꞌa nahuyitálhtelh, ꞌet de za soo hóohootanih.

¹⁶ ꞋAw dzoot jut ꞌandidi-i naih be naoolhkut ꞌaitꞌoh. ꞋAndidi-i naih naootáltsulh ꞌinkꞌez ootsꞌu ha naitichꞌulh. ꞋOn nus tichꞌulh.

¹⁷ ꞋAw tsꞌekoo tooꞌ ꞌandidi-i ꞌaw ꞌujut-i ꞌuzus be huyóolhdzeh ꞌaitꞌoh. ꞋEt nduhuyinla de, ꞌaho bulh hóokꞌuholtalh. ꞋEt ꞌandidi-i tsꞌekoo tooꞌ nadutijulh, ꞌinkꞌez ꞌuzus ꞌi cha nintaꞌtitꞌelh. ꞋAndidi-i tsꞌekoo tooꞌ, ꞌandidi-i ꞌuzus be húyalhdzo de, ꞌaw nintaꞌootꞌen-un hooloh.”

Jesus tsꞌoodun yula ilhchoot whe dunadija ꞌinkꞌez ꞌilhoghun tsꞌeke cha soo naꞌyinla

¹⁸ ꞋAwhuz howu yalhduk whe ꞌilhoghun moodih yughu ninya ꞌinkꞌez yubut nachániti ꞌinkꞌez uyúlhni, “Stseꞌ ꞌandit dazsai. ꞋEt hoontsꞌi syoh tsꞌe tónyaꞌ, ꞌinkꞌez nla be ookwꞌédilni, ꞌet la nahótnah!”

¹⁹ Jesus dudinya ꞌinkꞌez yuntizya. Yugha hodulꞌehne cha huyulh whéndil.

²⁰ ꞋOh whuya hidulh whe khuntsul ꞌilhoghun tsꞌeke, ꞌen whunizyat ꞌon ꞌat nat yus kꞌut ꞌuskaiꞌ ꞌuyulhꞌen. Jesus yutꞌa tsꞌe gha ninya ꞌinkꞌez nayitsꞌuz-i nyus tsꞌe yuban yutꞌaiznai.

²¹ Naꞌdudútni, “ꞋAntsꞌi oonaih ootꞌa izasnai de, ꞌet de la soo náꞌooneh.”

²² Jesus yutsꞌu nálhꞌa yunalhꞌen ꞌinkꞌez ꞌuyulhni, “Stseꞌ ndzi hótꞌe! Be ꞌalha ꞌuhoontꞌoh-i mba ꞌalha ꞌuntꞌoh huwa soo naꞌinja.” ꞋEt whutsꞌun tsꞌeke soo naꞌuja.

²³ Jesus moodih ooyoh daninya whe be tsꞌujun-i, flute huyulhni, ꞌi hiye ujun whe bunilhꞌen. ꞋOnghohne cha tahúditni whe tso yahulhduk.

²⁴ ꞋEt ꞌubulhni, “ꞋAz náhdulh! Ndun tsꞌekeyaz ꞌaw dálhitsal, nanisti whe ꞌuntꞌoh.” ꞋEt highudloh.

²⁵ Tsꞌiyawh ꞌaz whenábahalhꞌaꞌ. Jesus yoh tsꞌe daninya tsꞌoodun yula ilhchoot ibulh dunadija.

²⁶ Dahooja la, yun kꞌut ndulcho hukwꞌu nahuwhutnuk.

Nane dune hoos̱ꞌenne, ꞌenne Jesus soo naꞌbinla

²⁷ Jesus natisja whe nane dune hoos̱ꞌenne hiyuntizꞌaz ꞌinkꞌez hikazulh, “NeMoodihti David ootsꞌuhainzut-un negha teꞌninzeh!”

²⁸ Jesus yoh daninya whe hoos̱ꞌenne huyudáninꞌaz. ꞋEt Jesus ubúlhni, “Nohba ꞌalha ꞌuhoontꞌoh eh ꞌet dutísnelh?” ꞋEt ꞌuhuyulhni, “A, neMoodihti!”

²⁹ Buna yutꞌaíznai ꞌinkꞌez ubúlhni, “Nohba ꞌalha ꞌuhoontꞌoh, whuz unꞌa ꞌuhóneh.”

³⁰ ꞋAho nahitátꞌen ꞌinkꞌez honilhꞌen. Jesus khuni ulhtus-i be ꞌúbulhni, “ꞋUyoonne dóhniꞌ junih!”

³¹ ꞋEt hoontsꞌi tenáhuntꞌaz ꞌinkꞌez ndi ꞌoh keyoh ndulcho whe tsꞌiyanne hudániꞌ.

Ooba ꞌalha lheꞌhootꞌohne, ꞌenne hutni, “Jesus ꞌen netsudule ye ulhtus-i be ꞌutꞌen”

³² Tenáhundil whe ꞌilhoghun dune yalhulhduk-un, ꞌinkꞌez ntsiꞌ-i nududeh-i ooyudinda. ꞋEn Jesus highu hinílhti.

³³ Ntsiꞌ-i nududeh-i ye yáhanainanyoot. Dune yawhénilhduk. ꞋInkꞌez lhunaoosdilne ꞌulhodutni, “Israel yun kꞌut ꞌaw lhoohoostꞌen-un ꞌuhóoja!”

³⁴ ꞋEt Phariseene ꞌuhútni, “Ntsiꞌ-i nududeh-i bumoodih ye ulhtus-i be ntsiꞌ-i dunne tsꞌu ha hainuyukw!”

Jesus dune bugha teꞌninzun

³⁵ ꞋEt Jesus keyoh whuti ꞌinkꞌez keyoh whuyaz cha whunilhchoh nusiya. Lizwifne bulugliz khuni unzoo-i be yakꞌuz kꞌúneꞌ whulꞌen-un ghun whubodulhꞌeh. ꞋEt dunene mbene la ooyustꞌe ndudane ꞌinkꞌez tetsunne, ꞌenne tsꞌiyawh soo naꞌbulhꞌen.

³⁶ ꞋEt hoontsꞌi ꞌilhunaoosdilne ꞌubunilhꞌen. Tsꞌiyawh nehunintsai dóhotꞌen, ꞌaw ꞌuhooneh ꞌaitꞌoh. ꞋInkꞌez tsꞌiyaitsuk laditnine dohotꞌen. ꞋAntsꞌi ꞌusbai ꞌaw bughunli-un hooloh leꞌ hintꞌoh.

³⁷ ꞋInkꞌez yugha hodulꞌehne ꞌubulhni, “ꞋAlhaꞌ ꞌawet haꞌ nukat-un newhúninzut ꞌinkꞌez tlꞌo maiꞌ lhai suliꞌ, ꞌet hoontsꞌi ꞌutꞌenne soo lheꞌhuniltsuk.

³⁸ ꞋInka Yakꞌusda haꞌ nukat-un whumoodih, ꞌuyoonne ꞌutꞌenne cha whusáboolhꞌaꞌ, ꞌet huba tenadoohdli,” ubúlhni.