Matthew 8 - Yak'usda Ooghuni

Dune ooka whulhjut-un Jesus soo naꞌyinla

¹ Jesus ndus de shus kꞌuz ha naja whe lhane dune yunantisdil,

² ꞌinkꞌez dune ooka whulhjut-un, ꞌi leprosy huyúlhni, ꞌen yududizya ꞌinkꞌez yubut nachaniti ꞌinkꞌez ꞌuyulhni, “SMoodihti hukwaꞌ ninzun de, be ilhtus-i be sunaꞌilhdeh.”

³ ꞋEt Jesus dula be yutꞌaiznai ꞌinkꞌez, “A, hukwaꞌ nuszun. Nyunaꞌide!” yúlhni. Ooka whulhjut-un, ꞌet ꞌaho soo naꞌuja.

⁴ ꞋEt Jesus ꞌuyulhni, “ꞋUyoonne doniꞌ junih! Lubret ꞌen ootsꞌinyalh ꞌinkꞌez tsꞌihꞌun unꞌa díni nyustꞌe ntsꞌenꞌa whe soo naꞌuja ꞌinkꞌez nyunoolhꞌen. Moses ooghuni ꞌutni kꞌunꞌa huwaꞌ tanꞌalh. Whuz unꞌa whubuntalhtun dainja whe soo naꞌinja-un.”

ꞋIlhoghun Rome whutꞌenne saldanne bumoodih, ooyeꞌ Jesus soo naꞌyinla

⁵ ꞋEt Jesus keyoh Capernaum tsꞌoozya whe ꞌilhoghun Rome whutꞌenne saldanne bumoodih, ꞌen yudughuninꞌa ꞌinkꞌez yutsꞌu tedudli,

⁶ “SMoodihti seꞌustle-un yoh yun sulhti delhdusni. Tube dzoh nuzut.”

⁷ ꞋEt Jesus yulhni, “Ootsꞌu tisyalh ꞌinkꞌez soo naꞌoosdleh.”

⁸ ꞋEt saldanne bumoodih ꞌuyulhni, “SMoodihti syoh tsꞌe tanyalh huba soo lheꞌuzdzooꞌ. ꞋAntsꞌi nghuni be ꞌet ndúdinja de, ꞌet la seꞌustle-un soo naꞌootneh.

⁹ ꞋAlhaꞌ sichꞌoh skꞌuneꞌ whutꞌen-un ꞌusli whe ꞌonghohne sando ꞌuhintꞌoh hukwaꞌ huninzun tuneꞌ suhulhꞌen. ꞋEt si cha whuz unꞌa za saldanne buba ndo ꞌustꞌoh. ꞋIlhoghun, ‘Whuz inyalh!’ dusni te, whuz wheyaih. ꞋUyoon ‘ꞋAnih,’ dúsni te, sghu yaih. Seꞌulhna-un, ‘Njan dineh!’ dúsni te, ꞌet ndútꞌih.”

¹⁰ Jesus whúdantsꞌo whe ooba hooncha. Yunidulhne ubúlhni, “Tsꞌihꞌun unꞌa nohdúsni, Israel ndulcho whe dune whuz unꞌa ooba ꞌalha ꞌuhoontꞌoh-un nalhizústi.

¹¹ Nohdusni ndaz de ꞌinkꞌez nooz de lhane whusatidulh yakꞌuz keyoh ꞌet Abraham cha, Isaac, ꞌinkꞌez Jacob cha, ꞌalhgoh lhla náꞌhutitꞌulh.

¹² ꞋEt hoontsꞌi mbene la yakꞌuz kꞌuneꞌ hoolꞌen huba ꞌuntꞌoh inleꞌne, tsahólhgus tsꞌe hubotilhdulh, hutso ꞌinkꞌez dughoo lhehídutikꞌus.”

¹³ ꞋEt Jesus saldanne bumoodih yulhni, “Tinya tsꞌe inyalh! ꞋEt ntsꞌe whula mba ꞌalha ꞌuhoontꞌoh, whuz unꞌa mba ꞌuwhutánelh.” ꞋOh whuya ꞌuhunitꞌoh whe beꞌ ꞌustle-un soo naꞌuja.

Peter oobiz, Jesus soo naꞌyinla

¹⁴ Jesus Peter ooyoh daninya whe oobiz yunilhꞌen. Lili kꞌut sulhti dada nulwus-i be nduda.

¹⁵ Yula tꞌaiznai. ꞋAho nulwus duda ootsꞌu ha naidide. ꞋAho dunadija ꞌinkꞌez bugha náꞌuntꞌai.

Lhane ntsiꞌ-i nududeh ooyudúltsꞌine, Jesus dughuni be butsꞌa há bunanyoot

¹⁶ Sa yo tizꞌai whe lhane ntsiꞌ-i nududeh ooyudúltsꞌine, Jesus highu bonínla. Dughuni be ntsiꞌ-i nududeh-i buyáhanainanyoot. Ndudane cha tsꞌiyawh soo naꞌbinla.

¹⁷ ꞋEt whuz unꞌa Isaiah nus hoꞌen-un ndutni, Lhawhdotneh ha. ꞋEt huwa njan ndutni, “Ndai la tetsun neilhꞌi-i, ꞌi tsꞌiyawh neghu nayílhchoot. ꞋInkꞌez nedadaꞌ cha ꞌet tsꞌiyawh netsꞌu ha náhonla.”

Jesus Christ ꞌuntidulhne ndi yun kꞌut hukwꞌe hintsiꞌ-un, whula hudootni

¹⁸ Jesus ndunne lhanne yunat yúdilhyawhunalhꞌen whe ꞌet ꞌubulhni, “Nyan uztookeꞌ.”

¹⁹ ꞋEt ꞌilhoghun Moses be ꞌudustlꞌus ꞌukꞌu nunáguz-un, ꞌen yughu ninya ꞌinkꞌez ꞌuyulhni, “Nehodulhꞌeh-un ntsꞌoh nutányalh, ndulcho nyunún tisyalh.”

²⁰ Jesus ꞌuyulhni, “Nanguz ꞌi cha ꞌan whutꞌi wheꞌ ꞌuntꞌoh ꞌinkꞌez dutꞌaiyaz cha tꞌo ꞌutꞌi. ꞋEt hoontsꞌi Yinka Dune Yeꞌ, ꞌaw hukwꞌut tsén talꞌalh-un hoontsꞌi lhuhóotꞌiꞌ.”

²¹ ꞋEt ꞌuyoon yugha hodulꞌeh-un, ꞌuyulhni, “SMoodihti sba silhꞌi. ꞋUdechoo ꞌubá ꞌaoostelh.”

²² ꞋEt hoontsꞌi Jesus ꞌuyulhni, “Sunanyalh. Dudulh yaidlane didutchꞌoh ꞌanalhuhoolyelh.”

Nilhtsi ꞌinkꞌez tatsi bulh Jesus yukꞌuneꞌ ꞌutꞌen

²³ ꞋEt ꞌawet tsꞌi beinya ꞌinkꞌez yugha hodulꞌehne, hiyulh ꞌúhooja.

²⁴ Nus huzki ibulh bubulh taoodiltsꞌut ꞌinkꞌez ꞌawet tsꞌi be tawhendunitih, ꞌet hoontsꞌi Jesus nanisti.

²⁵ Yugha hodulꞌehne, hitsꞌu whindil ꞌinkꞌez nahuyunilhdzut. “NeMoodihti netalhyis! ꞋAwet yatsꞌidadlah!”

²⁶ ꞋEt ꞌubulhni, “Di ha whénulhjut? Nohbé ꞌalha whutꞌen-i soo ꞌúltus-i lhahtꞌiꞌ wheꞌ dahni.” Dudinya whe khuniti be hukwaꞌ yudániꞌ too ꞌinkꞌez nilhtsi bulh yatilhduk, ꞌinkꞌez ꞌawet dinghel.

²⁷ Dune buba hooncha whe ꞌulhodutni, “Dantꞌoh-un dune suba ꞌuntꞌoh? Nilhtsi ꞌinkꞌez tatsi bulh hoontsꞌi yukꞌuneꞌ ꞌutꞌen.”

Nane dune ntsiꞌ-i nududeh-i buyudindane, ꞌenne Jesus butsꞌa ha nábunanyoot

²⁸ Nyan hoozki whe ndunne Gergesene ooyun kꞌut, whuz hoozdil. Nane dune highu ninꞌaz. Ntsiꞌ-i nududeh-i buyudinda. Nezi ꞌahule-un, whuz de ha hánꞌaz. Bube whunujut kꞌet ꞌaw dune whuzih noohooyaꞌ ꞌaitꞌoh.

²⁹ Khuntsul tube cho ꞌuhutni, “Jesus nyun Yakꞌusda ooYeꞌ inli! Ndet netsꞌu hukwaꞌ ninzun? Neba whusaóotiltsꞌulh-un whutso, dzoh nunetalhdzut ha ꞌinja whusainya?”

³⁰ Njan howu nilhdzaꞌ-un, gugoos lhai ndi butlꞌa hidantsut-i, ꞌi huyuꞌalh.

³¹ ꞋEt ntsiꞌ-i nududehne, hitsꞌu tedudlih whe ꞌuhuyulhni, “Whusanáneuntanyulh de, gugoos yúzdoodilh-un netlꞌa hóonalh.”

³² “ꞋAhdulh!” ꞌubulhni. ꞋEt ntsiꞌ-i nududeh-i dune butsꞌu haídande ꞌi gugoos dande. ꞋAho gugoos bubulh whengho lhghaz ꞌinkꞌez too yanghan.

³³ Gugoos ghunline, keyoh tsꞌe whehílghaz. ꞋInkꞌez keyoh whutꞌenne tsꞌiyawh bubodániꞌ dahooja la. Nyoonne nane mbene la ntsiꞌ-i nududeh-i ooyudande inleꞌne, ꞌet dahuja la whunilhchoh bubodániꞌ.

³⁴ ꞋEt keyoh whutꞌenne, tsꞌiyawh ꞌaz tehunindil ꞌinkꞌez Jesus hidudizdil. Hitilhꞌen whe buyun kꞌut whuchꞌa naóojaꞌ hukwa hitsꞌu tedidlih.