Matthew 7 - Yak'usda Ooghuni

ꞋUyoonne ba nahoohyeh junih

¹ “ꞋUyoonne ba nahoohyeh junih. Doo ka si nohba nahoodeh.

² Ntsꞌenꞌa ꞌuyoonne ba nahahyeh, ꞌet whuz unꞌa nohba nahutideh. ꞋInkꞌez ntsꞌenꞌa ꞌuyoonne neꞌbulhꞌen de, whuz unꞌa za nohba ꞌukꞌelha whutaleh.

³ Di ha nyulhutsin lhusyaz oona kꞌet diztan, ꞌi nilhꞌen, ꞌet hoontsꞌi ꞌaw tꞌeoonuzinzun nyunchꞌoh duchun cho nyuna kꞌet diztan?

⁴ Ntsꞌenꞌa nyulhutsin ꞌudutánelh, ‘Nyuna kꞌeltsꞌut-i nyuna kꞌehanaóosꞌalh,’ ꞌinkꞌez nyunchꞌoh lhelcho-i nyuna kꞌet ꞌusꞌai-i ꞌaw lhnílhꞌen?

⁵ Duba naꞌindzooꞌ! ꞋUdechoo lhelcho-i nyuna kꞌéltsꞌut-i, ꞌi cho nyuna kꞌéhanainꞌaih. ꞋEt de la soo whunilhꞌen whe oona kꞌéltsꞌut-i oona kꞌehanáyonꞌalh.

⁶ Yakꞌusda ooghuni lubeshi ooghu hooloh-un, khun te lhike ndultꞌohne gha óohꞌalh junih. Kꞌus Yakꞌusda ye whúneodulhꞌeh-i, ꞌi kwꞌusul diztiꞌ-i, pearl huyulhni, khun gugoos butso naóolhdilh junih. Hikꞌu nutílhꞌus ꞌinkꞌez ꞌaho nohtsꞌu nálhya ꞌinkꞌez yanohodutálhchꞌulh.”

Yakꞌusda hukwa oodolhkut ꞌinkꞌez nohgha whútaꞌalh

⁷ “ꞋEt nohdusni Yakꞌusda ndai la ooka yoodulhkut-i nohgha ítaꞌalh. Ookunáhta ꞌinkꞌez nahootáhꞌalh. Dati dunulhkwꞌuz ꞌinkꞌez nohba dáhaꞌ dutikwus.

⁸ Yoodulhkutne, Yakꞌusda bugha whútaꞌalh. Hoonliyaz hukwunútane, nahahootáꞌalh. Dati dunulkwꞌuzne, Yakꞌusda buba dáhaꞌ dutitꞌelh.

⁹ Mbene nohbáke nohtoh, ooyeꞌ lhes yutsꞌu ha ꞌutni de, tse yughá ndunoꞌalh ꞌaitꞌoh.

¹⁰ Kꞌus lho yutsꞌu ha ꞌutni de, ꞌaw ꞌi kꞌet tlꞌughus yugha óotꞌelh ꞌaitꞌoh.

¹¹ Nohni lubeshi ꞌulhꞌenne ꞌahli, ꞌet hoontsꞌi tꞌeoonahzun unzoo-i nohuzke gha tíhꞌalh. Dáwhulcho-i be ꞌon nus ndo yakꞌuz nohBá yoodulhkutne, unzoo-i bugha tiꞌalh.

¹² ꞋEt huwa ntsꞌenꞌa hukwaꞌ nahzun dune danohotilhꞌelh-un, whuz unꞌa nohni cha ꞌet ndúboolhꞌen. Moses be ꞌudustlꞌus ꞌinkꞌez nus hooꞌenne bubeꞌ ꞌudustlꞌus cha, ꞌet náhooltꞌoh nduwhútni.”

Datíh hoondat-un

¹³ “Datíh hoondat-un ꞌet hukohdilh. Datíh ꞌinkꞌez ti hoontel-un, ꞌet kwuncho yo tsꞌu ti ꞌuhoontꞌoh ꞌinkꞌez lhane whuz whedilh.

¹⁴ Datí-un hoondat ꞌinkꞌez ti ꞌilhiz be tsꞌukhuna-un ꞌet howa whulnaꞌ wheꞌ hoontꞌoh ꞌet huwa. ꞋAw lhane iloh nahuhóoꞌaih.”

Dune dahútꞌen-un, ꞌi be dahintꞌoh la tꞌebuntihzeh

¹⁵ “Mbene la whutsꞌit be nus hooꞌenne naꞌdudilꞌi, ꞌenne buka huwahli! ꞋUsbai zuz be soo dintꞌohne, ꞌenne buyo tsꞌe yus ꞌukꞌenus ntsiꞌ-i, ꞌenne léꞌhintꞌoh.

¹⁶ Dahútꞌen-un, ꞌi be tꞌebuntihzeh. Duje isdloo whus chun gha huyoonuyin eh? Kꞌus ndi mai, figs huyulhni, chuntoh whudutsꞌul-un whutoh huyoonuyin eh? ꞋAwúndooh!

¹⁷ ꞋEt whuz unꞌa za duchun unzoo-i, ꞌi mai unzoo-i ooghu ha niyeh. Duchun mai untsiꞌ ootsꞌu ha núlhye.

¹⁸ Duchun dalhjut-i, ꞌaw mai unzoo-i ooghu ha nóoyeh ꞌaitꞌoh. ꞋInkꞌez duchun dalhjut-i, ꞌaw mai unzoo-i ootsꞌu ha núlhyeh ꞌaítꞌoh.

¹⁹ Duchun ꞌaw mai unzoo-i ooghu ha nooyeh ꞌaitꞌoh, nánuhidutselh ꞌinkꞌez hidilhkꞌun.

²⁰ ꞋEt huwa dune cha whuz unꞌa nduhintꞌoh. ꞋEt huwa la tꞌebunohzin.”

Yakꞌusda kꞌúnulheꞌustꞌenne, Jesus Christ oochꞌeꞌne lhuhiloh

²¹ “ꞋAw tsꞌiyanne, ‘SMoodihti, sMoodihti,’ sulhnine, ꞌaw yakꞌuz kꞌuneꞌ tsꞌuwhulꞌen-un whuz hutooyaꞌ ꞌaitꞌoh. Mbe la ꞌuBá butsꞌo hukwaꞌ ninzun tuneꞌ ꞌutꞌenne, ꞌenne za yakꞌuz tsꞌe hutidulh.

²² Mbene la njan dzin whusahooltsꞌut de, ‘SMoodihti sMoodihti, ꞌalha iloh lakw nyooziꞌ be nus tsꞌúhooꞌen? Nyooziꞌ be ntsiꞌ-i nududeh-i ꞌuyoonne bughu whe nátsꞌinanyoot! ꞋInkꞌez nyooziꞌ be huwa ꞌítꞌen tuneꞌ tsꞌutꞌen.’

²³ Nduntꞌohne dune tsꞌiyawh budutásnelh, ‘ꞋAw tꞌenohnuzúszun. Schꞌa nasahdilh! Nohni ꞌaw ꞌukꞌu nulheꞌustꞌenne ꞌahtꞌoh!’”

Jesus Christ ooghuni soo cho whulh tsꞌooyin

²⁴ “ꞋEt huwa mbene la sghuni yoozilhtsꞌaine, ꞌinkꞌez daja dusni-un hukwꞌú neꞌhutꞌen, dune whunih-un duyoh tse kꞌut neooninꞌai, ꞌen kꞌunꞌa ꞌuhintꞌoh.

²⁵ ꞋEt ꞌawet nawhúnilhtan ꞌinkꞌez ootadiltꞌo, ꞌi njan yoh whutꞌaiznai. Nilhtsi ulhtus-i cha whudilhtsꞌut. ꞋEt hoontsꞌi ꞌaw lhonotinꞌal, tse kꞌut whuzꞌai ꞌet huwa.

²⁶ ꞋEt hoontsꞌi mbe la sghuni yuditsꞌone ꞌinkꞌez ꞌaw hikꞌu nulheꞌustꞌen de, dune whusni-un sai kꞌut neooninꞌaih, leꞌ ꞌuntꞌoh.

²⁷ ꞋAwet nawhúnilhtan ꞌinkꞌez dutadiltꞌo. Nilhtsi ulhtus-i cha whudilhtsꞌut, yoh nawhúnitai, ꞌinkꞌez wheóonujut whe whuntistai.”

²⁸ Jesus ndi khuni ye bubulh yailhduk, ꞌetsul ꞌudíja whe ꞌilhunaoosdilne buba hooncha.

²⁹ Soo oobaꞌ hoontꞌoh-un kꞌunꞌa whubodalhꞌeꞌ. Moses be ꞌudustlꞌus kꞌut ꞌukꞌu nunáguzne, ꞌaw whuz unꞌa hubulhodílhꞌel.