Matthew 4 - Yak'usda Ooghuni

Netsudule Jesus tankꞌus yúnoolhtꞌi hukwaꞌ yulhꞌen

¹ ꞋAwet Jesus dune lhuhootꞌih tsꞌe Ndoni whuz whe yálhꞌaꞌ netsudule yootálhdzih ha.

² Dit whunizyat dzin sóo honih, ꞌet hukwꞌelhꞌaz ooyeꞌíltsꞌul.

³ ꞋEt yóolhdzih-un, yughu ninya ꞌinkꞌez uyúlhni, “ꞋAlhaꞌ Yakꞌusda ooYeꞌ inli de, ndi tse lhes ooleꞌ dini.”

⁴ ꞋEt Jesus yulhni, “Yakꞌusda ooghuni kꞌut ꞌukꞌusgus, ‘ꞋAw lhes be za iloh dune hikꞌu khuna, Yakꞌusda ooghuni, daja ni, ꞌet tsꞌiyawh ꞌi be hikꞌu khuna.’”

⁵ ꞋEt netsudule keyoh whudiztiꞌ tsꞌe yulh whinꞌaz, ꞌinkꞌez lugliz whucho ꞌudedo hukwꞌut, ꞌet whuban nenilhya.

⁶ ꞋInkꞌez ꞌuyulhni, “ꞋAlhaꞌ Yakꞌusda ooYeꞌ inli de, njan whengheꞌ dudintneh! ꞋUkꞌehooguz whe njan ndutni, ‘Yakꞌusda oolizas butlꞌa honꞌai whe ꞌenne nghi hinli, ꞌinkꞌez dula be ndo nyuhóotatun, ꞌaw nke tse tꞌaoonalh ꞌaitꞌoh ꞌet whucha.’”

⁷ ꞋEt Jesus nduyulhni, “Doo cha za njan ꞌukꞌehooguz whe ndutni, ‘Khun te Moodihti nYakꞌusda ꞌen nantanꞌah hukwa ólhdzih junih!’”

⁸ Doo cha za netsudule dzulh yoo do ha dítꞌai tsꞌe whuz yulh whinꞌaz. Yun kꞌut ndulcho whe wheinilhtan lerwene huyé diztiꞌ-i, ꞌi cha.

⁹ ꞋInkꞌez ꞌuyulhni, “Ngwutsi be neninya ꞌinkꞌez stsꞌu téniꞌ nilhdzun de, ꞌet de ndi tsꞌiyawh, nchꞌeꞌ tileh!”

¹⁰ ꞋInkꞌez Jesus yulhni, “Satan naindalh! ꞋUkꞌehooguz whe njan ndutni, ‘Moodihti nYakꞌusda, ꞌen za Oobut negwutsi be netsꞌiyaih, ꞌinkꞌez Ootsꞌu téniꞌ uznilhdzun, ꞌinkꞌez ꞌen za Ooba néꞌtsꞌutꞌen.’”

¹¹ ꞋEt netsudule whe naja ꞌinkꞌez khuntsul lizasne whusahándil ꞌinkꞌez hiba neꞌutꞌen.

Jesus dune bubulh yawhénilhduk

¹² Jesus whulh ꞌúdantsꞌo John ꞌahuyanꞌai. Galilee yun kꞌut tsꞌu whinya.

¹³ Nazareth whuchꞌa séya ꞌinkꞌez keyoh Capernaum whuz oozya ꞌet tidalh ha keyoh ꞌet yatoo taba whuzꞌai. ꞋEt lhelhdun Zebulun ꞌinkꞌez Naphtali lhodinꞌai.

¹⁴ Isaiah nus hooꞌen-un, howu yailhduk-un lhaóodotneh ndutni,

¹⁵ “Yun kꞌut Zebulun ꞌinkꞌez Naphtali, yatooꞌ kꞌuz wheti Jordon ꞌon ꞌun. Galilee yun kꞌut, ꞌudun yun kꞌut whutꞌenne buchꞌeꞌ.

¹⁶ Mbene la tsalhgus yo dilhtsꞌine, ꞌenne kwun uncha-i hitilhꞌen. Ntsꞌe la yun kꞌut sa whusꞌih whuzꞌai-un, ndi sa whusꞌih, ꞌi be daztitsah-i, ꞌi ꞌuntꞌoh. Mbene la ꞌet whutꞌenne, ꞌenne be hóotꞌen unli-i, ꞌi be buba yulhkai ꞌuhooja.”

¹⁷ ꞋEt whutsꞌun Jesus dune bubulh yawhénilhduk whe ndubúlhni, “Noheni náhandunoohleh! Yakꞌuz kꞌuneꞌ whulꞌen-un ꞌawet nilhdukw suliꞌ.”

Dine lho ha ꞌutꞌenne Jesus, “ꞋAnih,” ubúlhni

¹⁸ Bunghun Galilee taba Jesus ꞌoh whuya uyalh ꞌet nane dune lhulhutsinke ꞌubutilhꞌen. ꞋIlhoghun ꞌen Simon huyulhni Peter cha huyulhni, ꞌet ꞌilhoghun bulhutsin ꞌen Andrew huyulhni. ꞋEnne lhembilh tahúyalhdil lho ha ꞌutꞌenne hinli.

¹⁹ ꞋInkꞌez ꞌubulhni, “Sunihꞌus, dune ha ꞌutꞌenne nohtiselh.”

²⁰ ꞋAho dulembil hila ditni ꞌinkꞌez hikꞌoh tsꞌe ootꞌen ha huyuntizꞌaz.

²¹ ꞋOn ꞌun hidulh ꞌet doo cha za nane dune tilhꞌen. ꞋEnne cha lhulhutsinke Zebedee ooyeꞌke. ꞋIlhoghun James huyulhni ꞌinkꞌez ꞌilhoghun John huyulhni. Dubá te tsꞌi be húdilhtsꞌi ꞌinkꞌez dulembil nahuyutlꞌoo. Jesus bukahizya.

²² ꞋAho dubá highu déhainꞌaz ꞌawet ye usda whe ꞌinkꞌez Jesus hikꞌoh tsꞌe ootꞌen ha hiyuntizꞌaz.

Jesus lhane dune undudáne soo náꞌbulhꞌen

²³ Galilee yun kꞌut Jesus ndulcho nuya whe Lizwifne bulugliz ꞌet bubulh yálhduk. Yakꞌuz kꞌuneꞌ whulꞌen-un, ꞌen ghun khuni unzoo-i be bubulh yálhduk. Dune toh mbe la ndudane ꞌinkꞌez ooyustꞌe tétsunne, tsꞌiyanne soo naꞌbulhꞌen.

²⁴ ꞋEt Syria whutꞌenne, tsꞌiyawh hiyulh ꞌúditsꞌo. Mbene la lhelhyoo dada bé undudane, ꞌinkꞌez ꞌon nus bulh ꞌúltsꞌulhne cha, ntsiꞌ-i nudúdeh ooyudindane cha, whusnine cha ꞌinkꞌez ookaootuzukne ꞌinkꞌez delh dusnine cha, tsꞌiyawh Jesus tsꞌu buhoozdla whe soo náꞌbinla.

²⁵ ꞋInkꞌez Galilee whutꞌenne, Decapolis whutꞌenne, ꞌinkꞌez Jerusalem whutꞌenne, Judea yun kꞌut whutꞌenne cha, ꞌinkꞌez Jordan koh ꞌon yan whéya whutꞌenne cha, tsꞌiyawh ꞌet huldlai kꞌet ꞌaw ꞌuzdooniꞌ ꞌaitꞌoh. ꞋEt ꞌultsukne ꞌilhunaoosdil ꞌenne tsꞌiyawh hiyuntizdil.