Matthew 3 - Yak'usda Ooghuni

John dune too be ꞌulhꞌen-un tsꞌiyanne ꞌubulhni, “Yakꞌuz kꞌuneꞌ whulꞌen-un, nilhdukw netoh ꞌutitꞌelh”

¹ ꞋOh whuya hoozulh whe John dune too be ꞌulhꞌen-un Judea yun kꞌut dune lhuhootꞌi tsꞌe, whuz whinya ꞌinkꞌez dune bulh yalhduk.

² ꞋEt ꞌubulhni, “Noheni náhandunoohleh. Yakꞌuz kꞌuneꞌ whulꞌen-un nohtoh ꞌutitꞌelh-un, ꞌawet nilhdukw.”

³ Nus hooꞌen-un Isaiah ꞌen yughu yalhduk whe njan ndutni, “Dune lhuhootꞌih tsꞌe dune yiz dustsꞌai whe ꞌultus-un huyih whe njan ndutni, ‘NeMoodihti ooti lhaoodahleh! Ooti lhtsꞌe oodizꞌa ooba whulhtsi.’”

⁴ ꞋInkꞌez John dichꞌoh khuna-i gha, camel huyulhni, ꞌi ye dune unli ꞌinkꞌez ꞌuzus se be tsꞌudilhꞌoo. Tulkꞌus cho ꞌinkꞌez tsꞌihnatlꞌuz ꞌohwhi yaꞌalh.

⁵ ꞋOh daꞌ dunene tsꞌiyawh ndunne Jerusalem whutꞌenne, Judea whutꞌenne cha, ꞌinkꞌez dune ꞌukoh Jordan whutꞌenne, tsꞌiyawh John gho nindil.

⁶ ꞋInkꞌez dulubeshi kꞌunꞌa huhoolnuk whe ꞌukoh Jordan John ꞌen too beꞌ balhꞌen.

⁷ ꞋEt hoontsꞌi lhane Phariseene ꞌinkꞌez Sadduceene cha, too beꞌ hutilnelh ha highu nindil. Hubunilhꞌen ꞌinkꞌez ndúbulhni, “Nohni lubezo tlꞌughus buzkehke leꞌ ꞌáhtꞌoh! Yakꞌusda lubeshi ꞌulhꞌenne bubulh huntalchꞌoh-un, ꞌet whuz de hóoltsꞌulh, mbe ꞌunohulhni whuchꞌa úlhwus?

⁸ Whute lubeshi chꞌa noheni nahandunoohleh de, ndahtꞌen-un tsꞌiyanne tꞌehonózin ndahtꞌoh la,

⁹ ꞌinkꞌez khun njan dudohniꞌ junih, wheni Abraham ootsꞌu haindene tsinli. Nohdusni Yakꞌusda soo ꞌultus whe ꞌuntꞌoh, ndi tse hoontsꞌi ꞌi be Abraham ootsꞌu haindene ubutilhtselh whe ꞌuntꞌoh.

¹⁰ Nohni duchun léꞌahtꞌoh. ꞋAwet tsetselh lhadíntꞌoh. Duchun oomaiꞌ hooloh-i, ooghih tubulh tsuhídantsel ꞌinkꞌez hidutálhkꞌun.

¹¹ Noheni nahunduníhla ꞌet huwa too be za too beꞌ nohúsdla. ꞋEt hoontsꞌi skꞌelhꞌaz whusatiyalh-un, ꞌen sanus diztiꞌ whe ꞌuntꞌoh. ꞋAw ookegon ooba nétisdlelh huba soo lheꞌusdzooꞌ. ꞋEn Ndoni ꞌinkꞌez kwun bulh be too beꞌ nohtilhꞌelh.

¹² Lufoos tlꞌo maiꞌ be tahawhúltsꞌih-i, ꞌi nuyútun. ꞋInkꞌez tlꞌo maiꞌ yutahawhúlhtsꞌih-i, ꞌinkꞌez yukꞌut ꞌutꞌen-i cha yukꞌut lhadútꞌih de, ꞌinkꞌez yunaꞌulhdoh. ꞋInkꞌez mai lhaduja-i, ꞌi tsꞌiyawh deínudzih ꞌinkꞌez mai bayoh tsꞌe wheyúli. ꞋEt hoontsꞌi ndi kwun ꞌaw nalhnusne, ootꞌooz, ꞌi be dutákꞌun,” ꞌubulhni.

John, Jesus too be ꞌulya

¹³ ꞋEt Jesus Galilee tsꞌe hainya. Jordan ꞌukoh tsꞌoozya John too beꞌ yutilelh ha.

¹⁴ ꞋEt hoontsꞌi John dah yúlhni. “Nyun too beꞌ sonleh hubaꞌ hoontꞌoh. ꞋInkꞌez di ha si stsꞌú tinya too beꞌ nyoosdleh ha?”

¹⁵ ꞋEt hoontsꞌi Jesus ꞌuyulhni, “Whute soo cho nilhꞌen, be tsꞌihꞌun ꞌuhoontꞌoh-i, ꞌet tsꞌiyawh lhaoodutanelh wheꞌ hoontꞌoh.” ꞋEt yutlꞌa honꞌai.

¹⁶ Jesus too beꞌ yinla whe tooz ha nája ibulh ꞌet ꞌaho ꞌen ba ꞌaho yakꞌuz dahaꞌ dankez ꞌinkꞌez Yakꞌusda Ooyughi yunilhꞌen whe ndus de dutꞌai, dove huyúlhni, ꞌi kꞌunꞌa Jesus ookꞌé dinde.

¹⁷ Khuntsul ndus de ꞌuwhutni, “Ndun ꞌ sYeꞌ ookꞌesiꞌ whé ꞌuntꞌoh, ꞌinkꞌez tube ꞌen bulh hoonústꞌiꞌ,” ni.