Matthew 28 - Yak'usda Ooghuni

Jesus dunadija

¹ Natsꞌulyis dzin hukwꞌelhꞌaz lisman ꞌudechoo dzin, soo yutilhkai whe, ꞌet Mary Magdala whutꞌen-un ꞌinkꞌez ꞌuyoon Mary bulh tsꞌun kꞌuz hoozꞌaz adilhti-un huwhuntihya.

² Khuntsul ꞌilhoghun neMoodihti oolizas yakꞌuz hainya. Yun cha núhisnai. Whusainya ꞌinkꞌez tse whudahaidunalhgai, ꞌinkꞌez yukꞌétlꞌa didaꞌ.

³ Oonin ꞌantsꞌi ditni kwun leꞌ ꞌúntꞌoh. Oonaih yus kꞌunꞌa ꞌulhyul.

⁴ ꞋInkꞌez huwunline nujut kꞌet hudutlut, ꞌinkꞌez ꞌantsꞌi dune yaidla lheꞌhuja.

⁵ Lizas tsꞌekoo ubúlhni, “Nulhjut íloh. Tꞌeoonuszun Jesus tulalhgus kꞌut dazai-un, ꞌen ookwunáhta whé ꞌahtꞌen.

⁶ ꞋAw njan hooloh! Dunadija whe ꞌuntꞌoh. Ntsꞌenꞌa la datínelh ni, whuz unꞌa dunadija whé ꞌuntꞌoh. ꞋAnih, njan whunulhꞌen, ndet la neMoodihti ilhteꞌ-un!

⁷ ꞋA cho whuz ahꞌus ꞌinkꞌez yugha hodulꞌehne ubudáhni yaidlane toh dunadija whé ꞌuntꞌoh. Soo zulhtsꞌai nohtso úyalh Galilee tsꞌoyalh. ꞋEt tihꞌelh. Soo cho soo zulhtsꞌai ꞌawet nohdásniꞌ.”

⁸ ꞋA cho tse be tsa kꞌet whuchꞌa nahustꞌaz. Whe hunuljut ꞌet hoontsꞌi ꞌon nus huhóontꞌiꞌ cha ꞌuhintꞌoh. ꞋInkꞌez yugha hodulꞌehne butsꞌu whe hilgaih buba hutanelh.

Jesus hitsꞌu teniꞌ nilhdzun

⁹ ꞋEt ꞌugha hodulꞌehne tsꞌu híꞌus whe khuntsul Jesus butsꞌu dizya ꞌinkꞌez, “Whunúlhnih,” ꞌubulhni. Hizih neninꞌaz ꞌinkꞌez hike óontun ꞌinkꞌez hitsꞌun téniꞌ nalhdzin.

¹⁰ ꞋEt Jesus ndúbulhni, “ꞋAw whénulhjut iloh. Sulhutsinke butsꞌohꞌus ꞌinkꞌez budúhni, Galilee tsꞌu toohdilh. ꞋEt la soohꞌen.”

Saldanne sooniya bugha hinindzai

¹¹ ꞋEt hutizdil whe ꞌet huwunline oolune Jerusalem tsꞌú hoozdil. ꞋEt whuz hoozdil whe lubret bumoodihne, tsꞌiyantsuk bubodániꞌ dahooja-un huwun.

¹² ꞋEt lubret bumoodihne ꞌinkꞌez dune ꞌutso whudilhdzulhne, tsꞌiyawh ꞌilhunahozdil ꞌinkꞌez howu yahalhduk. Lhai sooniya ꞌi saldanne bugha hinindzai ꞌinkꞌez ꞌubuhútni,

¹³ “Nohni njan dudooniꞌ, ‘ꞋUlhdzis tsꞌuztez whe yugha hodulꞌehne whusahánilꞌi ꞌinkꞌez oozi neghu hitilhti.’

¹⁴ ꞋEt yun moodih whulh ꞌúdantsꞌo de, soo kháznintꞌa whe si bulh yatsꞌoolhduk si. ꞋEt de la ꞌaw hoonli nohtsꞌu lheꞌhosne.”

¹⁵ ꞋEt saldanne sooniya huyilhchoot, ꞌinkꞌez ntsꞌenꞌa la ꞌubodániꞌ, whuz unꞌa neꞌhustꞌen. ꞋEt ꞌandit dzin whutsꞌun, whuz unꞌa lizwifne dutoh howu yahalhduk.

Jesus yakꞌuz whe naja whutso khuni netlꞌa ídanꞌai hikꞌuneꞌ tsꞌootꞌen ha

¹⁶ ꞋEt ndunne whunizyane ꞌon ꞌat ꞌilhoghun ꞌenne yugha hodulꞌehne, Galilee tsꞌe whehandil. Ndi dzulh kꞌuz Jesus ubudaniꞌ, whuz whehandil.

¹⁷ Hiyanꞌen whe hitsꞌu teniꞌ nalhdzin. ꞋEt hoontsꞌi whulohne buba nawh ꞌuhoontꞌoh.

¹⁸ ꞋEt Jesus butsꞌo whusainya whe bubulh yalhduk ꞌinkꞌez njan dúbulhni, “Yakꞌuz ꞌinkꞌez ndi yun kꞌut tsꞌiyawh whando ꞌustꞌoh-un, ꞌet stlꞌa hóoltsꞌut.

¹⁹ ꞋEt huwa lhelhtsꞌun keyoh whutꞌenne, tsꞌiyawh butsꞌóhdulh ꞌinkꞌez si sgha hodulꞌehne ubutilhꞌelh. ꞋUBá ꞌinkꞌez ꞌuYeꞌ ꞌinkꞌez Ndoni, booziꞌ be ꞌi be too beꞌ butilhꞌen.

²⁰ Khuni nohtlꞌa dísꞌai-i, tsꞌiyawh hikꞌuneꞌ ootꞌen-un hubodoolhꞌeh. ꞋInkꞌez soo zulhtsꞌai, dzin whula toh lhaooduja de, ꞌet whutsꞌun ꞌahoolhyiz nohbulh ꞌútistꞌelh wheꞌ hoontꞌoh.” ꞋEt ndo honeh.