Matthew 25 - Yak'usda Ooghuni

Whunizyane tꞌedukoo dune tꞌenuszunne, kwulane, huwhunih ꞌinkꞌez kwulane, ꞌenne huwhusni

¹ “Yakꞌuz ntsꞌe la lerwe usda-un ndi yun kꞌut whusahóoltsꞌut de, ꞌet whuz unꞌa ndó tanelh: whunizyane tꞌedukoo dune tꞌenuszunne, ndi kwun be hootꞌen-i huyilhchoot ꞌinkꞌez dune ꞌat titꞌelh-un ꞌaz hiba sulhꞌi.

² Kwulane, ꞌenne huwhunih ꞌinkꞌez kwulane, huwhusni.

³ Ndunne whusnine too dizkꞌun hutꞌi ꞌet hoontsꞌi too dizkꞌun hiye náhitilhdzoh-i hiyit ꞌuja.

⁴ ꞋEt hoontsꞌi whunihne too dizkꞌun denáhitilhdzoh-i cha hutizdla.

⁵ ꞋEt ꞌat titꞌelh-un saꞌ whusalhusyaih, ꞌinkꞌez tsꞌiyawh bulh bukꞌé diltsꞌut, whe nahunistez.

⁶ Tuzniz ꞌilhoghun huyih, ‘ꞋAwet ꞌat titꞌelh-un ꞌaz de yalh. Tenahdilh ꞌinkꞌez oodudíhdilh!’

⁷ ꞋEt tꞌedukoo tsꞌiyawh dahudindil ꞌinkꞌez too dizkꞌun-i tsꞌiyawh nahidulhkꞌan.

⁸ ꞋInkꞌez whusnine hubuhutni, ‘Too dizkꞌun negha núlhdzeh, netoo dizkꞌun ꞌawet bé haꞌ dukꞌaih!’

⁹ ꞋEt whunihne, ‘ꞋAwúndooh!’ hutni ‘Nohgha uznilhdzo de, nohni cha ꞌinkꞌez wheni cha ꞌaw neba soo lhéꞌiltsuk. ꞋEt hoontsꞌi ꞌeꞌóoket tsꞌe whuz ꞌahdulh, ꞌinkꞌez nohnichꞌoh oohket.’

¹⁰ Whuz whehandil whe ꞌat titꞌelh-un bukꞌelhꞌo whusaínya. ꞋInkꞌez yuba lhadintꞌohne, naꞌhutitꞌulh tsꞌe huyúlh danindil, ꞌinkꞌez dati dánahidintan.

¹¹ ꞋEt hukwꞌelhꞌaz tꞌedukoo whusnine whusanáhidil whe, ‘NeMoodih, nemoodih, neba dáhanaꞌdintih!’ huyulhni.

¹² ꞋEt ndúbulhni, ‘ꞋAlhaꞌ ꞌaw tꞌenohnuzúszun!’

¹³ ꞋInka nohni cha soo cho huwahli! Ndet dzin ꞌinkꞌez ntsꞌoya hoozulh whe Yinka Dune Yeꞌ whusatiyalh, ꞌaw tꞌeoonuzahzun.”

Dune dude ꞌulhnane, yutꞌi-i, ꞌi butlꞌa yánla, ꞌet yakꞌuz lerwe usda-un ndultꞌoh be nawhutnuk-i

¹⁴ “Yakꞌuz lerwe usda-un, ꞌet ndó tanelh: dune dukeyoh huwu tiyalh. ꞋEt tiyalh whutso dude ꞌulhnane ꞌanih ubudaniꞌ. Ndai la yutꞌi-i butlꞌa yánla.

¹⁵ ꞋIlhoghun kwulaiꞌ sooniya diztiꞌ-i yutlꞌa inla. ꞋIlhoghun cha nanki sooniya diztiꞌ-i yutlꞌa inla. ꞋEt ꞌuyoon ꞌilho za yutlꞌa inꞌai. ꞋIlhone hinli whe hoonzoo hukwꞌunꞌa hiye whutilelh, ꞌet wheni butlꞌa yánla.

¹⁶ ꞋEt hukwꞌelhꞌaz ꞌawet whinya. ꞋEt ꞌilhoghun kwulaiꞌ yutlꞌa inla-un, ꞌon ꞌun kwulaiꞌ ꞌuniltsuk-i yeꞌ ꞌínla.

¹⁷ ꞋEt whuz unꞌa za ꞌilhoghun nanki yutlꞌa inla whe nanki ye yúba naꞌyinla.

¹⁸ ꞋEt hoontsꞌi ꞌilhoghun ꞌilho za yutlꞌainꞌai-un, yun ha hónkai ꞌinkꞌez whuz dumoodih oozooneya yuntilhꞌi.

¹⁹ ꞋEt hukwꞌelhꞌaz saꞌ inleꞌ whe ꞌulhnane bumoodih whusanaja. ꞋInkꞌez nahootáꞌalh hukwaꞌ ninzun dude ꞌulhnane dahúyinla.

²⁰ ꞋEt kwulaiꞌ yutlꞌa inla-un, kwulaiꞌ be ꞌon ꞌun ꞌuniltsuk-i, ꞌi yuba whusanáyanla. ꞋEt ndúyulhni, ‘Smoodih kwulaiꞌ sooniya diztiꞌ-i stlꞌa inla. Nah! Nilhꞌen kwulaiꞌ be ꞌon nus mba be naꞌusdla.’

²¹ ꞋEt oomoodih ndúyulhni, ‘Tube soo ꞌinja! Nyun tube ꞌinzoo. Whunilhchoh whe kꞌuneꞌ nyutisꞌen. Tube ꞌulhna-un unzoo-un inli. Hoontsool-unyaz whe kꞌuneꞌ nyutisꞌen inleꞌ. ꞋAndit nꞌun whe lhai ghu tanleh. ꞋAnih, nyumoodih ye hoontꞌiꞌ-i, nyun cha be hóotantꞌeꞌ.’

²² ꞋEt ꞌilhoghun nanki sooniya diztiꞌ-i yutlꞌa inla-un, ꞌen cha whusainya. ꞋEt ꞌúyulhni, ‘Smoodih nanki sooniya diztiꞌ-i stlꞌa inla. Nah! Nilhꞌen nanki be ꞌon nus mba naꞌusdla.’

²³ Oomoodih ndúyulhni, ‘Tube soo ꞌinja! Nyun tube ꞌinzoo. Whunilhchoh whe kꞌuneꞌ nyutisꞌen. Tube ꞌulhna-un unzoo-un inli. Hoontsool-unyaz whe kꞌuneꞌ nyutisꞌen inleꞌ. ꞋAndit nꞌun whe lhai ghu tanleh. ꞋAnih, nyumoodih ye hoontꞌiꞌ-i, nyun cha be hóotantꞌeꞌ.’

²⁴ ꞋEt ꞌilhoghun ꞌilho sooniya diztiꞌ yutlꞌainꞌai-un whusainya ꞌinkꞌez uyúlhni, ‘Smoodih tꞌeoonuszun nyun ꞌaw tꞌelheꞌnínzun-un ꞌintꞌoh. Ntsꞌe la ꞌalheꞌ nuzinloh-un ꞌet hoontsꞌi ꞌet naꞌilhdzooh. Ndet la ha níyeh ꞌulheꞌnínlel-un ꞌet hoontsꞌi haꞌ ninlih.

²⁵ Whenuzjut ꞌet huwa ndi sooniya diztiꞌ yun yo tsꞌe ntísꞌiꞌ. Nah! Nilhꞌen ndi stlꞌainꞌai-i ntlꞌa násꞌaih.’

²⁶ ꞋEt oomoodih yulhni, ‘Nyun intsiꞌ ꞌinkꞌez tsedutni-un ꞌulhna ꞌintꞌoh. Tꞌeooninzun ntsꞌe la ꞌalheꞌ nuzusdloh-un, ꞌet hoontsꞌi ꞌet cha naꞌusdzooh. ꞋInkꞌez ntsꞌe la ha níyeh ꞌulhnúsdlel-un, ꞌet hoontsꞌi ꞌet cha haꞌ nusdle.

²⁷ ꞋEt huwa ndi uszooneya ntlꞌasꞌai-i, sooniya lhkꞌenadaꞌaihne, ꞌenne butlꞌa lhizinꞌai. ꞋEt daꞌ szooneya ꞌon nus ꞌuniltsuk-i be náꞌoozneh ooleꞌ daꞌ.’

²⁸ ꞋEt huwa ꞌubulhni, ‘Ndun ndi uszooneya diztiꞌ-i, ooghu nayulhchoot. Whunizyai sooniya diztiꞌ-i yutꞌi-un, ꞌen oogha ínahꞌaih.

²⁹ ꞋEt mbe la yuloh za ꞌutꞌi-un, ꞌen ꞌon nus lhai oogha tíltsꞌulh ꞌinkꞌez ꞌonus lhai titꞌelh. ꞋEt hoontsꞌi mbe la ntsool-iyaz ꞌutꞌi-un, ꞌi hoontsꞌi ooghu nayitálchulh.

³⁰ ꞋEt ndun ꞌulhna-un ntsiꞌ-un, ulhchoot ꞌinkꞌez ꞌaz tsaholhgus yo tsꞌe táhneh.’ ꞋEt whe la tso bulh dughoo lhudookꞌus si.”

Yinka Dune Yeꞌ whusanátidalh de, yinka duneꞌne, tsꞌiyawh buba nahutiyeh

³¹ “ꞋEt Yinka Dune Yeꞌ nkede ootsꞌu haꞌ ꞌánduz whe whusanátidalh, lizas lubeshi ooghu hoolohne, tsꞌiyawh huyulh whusanátidulh. ꞋOh de de, ookwꞌutsꞌuzda cho diztiꞌ-i, ꞌi kꞌut nanátlꞌa dutidalh.

³² Yinka duneꞌne, tsꞌiyawh hibut ꞌilhunabuhootálelh. ꞋUsbai ghunli-un kꞌunꞌa ꞌusbai, dube tahanaítilelh, ꞌet whuz unꞌa ndó tanelh.

³³ ꞋUsbaiyaz nailhni tsꞌunkꞌus nebutalelh. ꞋEt dube ꞌintlꞌus tsꞌunkꞌus nebutalelh.

³⁴ ꞋEt lerwe nailhni tsꞌunkꞌus ꞌuntꞌohne ndubudutanelh, ‘Nohni ꞌuBá ꞌukꞌenus hoonzoo-un nohghá whultsꞌutne ꞌahli. ꞋEt huwa ꞌanih! Yun ꞌutilnelh whutso, lerwe yakꞌuz úsda-un, ꞌet nohba lhaoodinla, nohgha óotaltsꞌulh.

³⁵ Syeꞌíltsꞌul whe tisꞌulh-i sgha náhꞌai. Taꞌoosda whe tisnelh-i sgha náhkai. ꞋUtsꞌun whútꞌen-un usdli ꞌinkꞌez nohyoh tsꞌe dásunulhti.

³⁶ Naih lhústꞌi whe ꞌenásalhti. Ndusda whe stsꞌun nusahdil. ꞋAdusꞌai whe stsꞌun nusahdil.’

³⁷ ꞋInkꞌez tsꞌihꞌun ꞌuntꞌohne huyoodutalhkut, ‘NeMoodihti nkedaꞌ nye ꞌíltsꞌul whe ntsꞌu yanꞌen ꞌinkꞌez tanꞌulh-i ngházninꞌaih? ꞋInkꞌez taꞌóonda whe tantnelh-i nghá uzninkai?

³⁸ Nkedaꞌ ꞌutsꞌun whútꞌen-un inli whe dántsꞌinilhti inleꞌ? Kꞌus naih lhintꞌiꞌ whe naih ngházninla inleꞌ?

³⁹ Nkedaꞌ ndinda whe ntsꞌinálhꞌen kꞌus ꞌadinꞌai whe ntsꞌun nutsꞌuzdil inleꞌ?’

⁴⁰ ꞋEt lerwe njan ndúbudutanelh, ‘Ꞌalha ꞌi be nohdusni, ndunne sulhutsinke, ꞌaw nchane lhiloh, ꞌenne ꞌilhoghun hoontsꞌi whuz unꞌa ꞌet ndúbahla de, si ꞌusáhla wheꞌ hoontꞌoh.’

⁴¹ ꞋEt ꞌawet ꞌintlꞌus tsꞌunkꞌus ꞌuntꞌohne njan ndubudutánelh, ‘Ndai la Yakꞌusda ye hunilchꞌe-i nohbulh ꞌuntꞌohne suhliꞌ! Schꞌa nasahdilh! Ndi kwun ꞌaw nalhnusne-i netsudule dulizasne te buba ꞌuhóolya-un, whuz ꞌahdulh!

⁴² Syeꞌíltsꞌul inleꞌ ꞌet hoontsꞌi ꞌaw tisꞌulh-i sgha lhahꞌal. Taꞌóosda ꞌet hoontsꞌi ꞌaw tisnelh-i sgha lhahkal.

⁴³ ꞋUtsꞌun whutꞌen-un usdli, ꞌaw dasúlhulhtel. Be oosdaꞌ-i hooloh whe naih sgha lhahlel. Ndusda whe ꞌinkꞌez ꞌadusꞌai-i whe ꞌaw stsꞌun nulhahdulh.’

⁴⁴ ꞋEt njan ꞌuhidutanelh, ‘NeMoodihti nkeda daꞌ ntsꞌu yanꞌen whe nye ꞌiltsꞌul ꞌinkꞌez taꞌoonda? Kꞌus ꞌutsꞌun whutꞌen-un inleꞌ, kꞌus be dune ꞌonleꞌ-i lhíntꞌiꞌ? Kꞌus ndinda ꞌinkꞌez ꞌadanꞌaꞌ? ꞋEt whuz unꞌa ntsꞌu yanꞌen ꞌet hoontsꞌi ꞌaw hoonli whe nlalheꞌtsꞌínel dini?’

⁴⁵ ꞋEt budutanelh, ‘Ꞌalha ꞌi be ꞌunohdusni, sulhutsinke ꞌaw ncha lhilohne, ꞌaw ꞌilhoghun hoontsꞌi whuz unꞌa lhebáhlel. ꞋEt huwa si cha ꞌaw ndusúlhahlel leꞌ hoontꞌoh.’

⁴⁶ ꞋEt nduntꞌohne, ꞌilhiz wheni dzoh nuhutideh tsꞌe hutidulh. ꞋEt hoontsꞌi tsꞌihꞌun ꞌuntꞌohne, ꞌilhiz whe tsꞌukhuna-un bugha óotakulh.”