Matthew 24 - Yak'usda Ooghuni

Lizwifne bulugliz whucho gak whutáleh-un, Jesus huwu yalhduk

¹ ꞋEt ꞌawet lugliz whucho Jesus ꞌaz ꞌinkꞌez naja whe yugha hodulꞌehne highu nindil. Lugliz whucho ntsꞌenꞌa ꞌuhóolya ꞌet whuhínulhtun.

² ꞋEt Jesus ndúbulhni, “Njan tsꞌiyawh ꞌáw lhonúlhꞌen? Tsꞌihꞌun unꞌa nohdusni, ꞌaw ꞌilho tse lhkꞌulhdutásdlal, tsꞌiyawh nadúntijulh wheꞌ hoontꞌoh.”

Ndet whe hóodutaltsilh-un, ꞌet la huwa tꞌetsꞌonoozeh

³ ꞋEt ha ooditꞌai-unyaz dzulh Olive huyulhni, ꞌet hukwꞌusda. Yugha hodulꞌehne tsꞌiyawh highu nindil, ꞌinkꞌez whuꞌizyaz huyoodulhkut, “Nkede ꞌuwhutánelh? Ntsꞌowhuya hoozulh whe whusanátandalh, ꞌinkꞌez ntsꞌowhuya whudizulh whe whula toh whutaleh? Ndet whe hóodutaltsilh-un, ꞌet huwa la tꞌetsꞌonoozeh? Nedíni!”

⁴ ꞋEt Jesus ndúbulhni, “Soo cho howahli. Khun te dune nanohnooꞌah junih.

⁵ Lhane sooziꞌ gha whusahutidulh ꞌinkꞌez ꞌuhudutinelh, Christ unli-un, si ꞌustꞌoh, nduhutni whe lhane nahuntiꞌah.

⁶ Dune lhugan-un whulh ꞌúdutahtsꞌo. ꞋInkꞌez dune lhutigan-un cha howu yahutilhduk. ꞋEt cha whudutáhtsꞌo. Khun te whénoolhjut junih. Dawhutanelh la ꞌet tsꞌiyawh nduwhutanelh, ꞌet hoontsꞌi ꞌawhuz whula toh iloh ꞌuhoontꞌoh.

⁷ ꞋEt lhelhdowh didowhne lhchꞌaz nehúdutadulh. ꞋInkꞌez yinka ndulcho lerwe be ꞌustlenne cha lhehútidulh. Dai whútaleh, ꞌinkꞌez dada cha whutáleh. ꞋInkꞌez lhelhdun yun nukhutitnah.

⁸ Njan dzoh nutsꞌudeh-un ꞌandit tsꞌiya wheꞌ whuditꞌen wheꞌ whutatꞌelh.

⁹ ꞋOh de neooninzut de, dzoh nunohotilhdeh ha whutlꞌa nohotilelh. Whulohne nohotighan. ꞋInkꞌez si sooziꞌ gha yinka whutꞌenne nohtsꞌo dutitni.

¹⁰ ꞋInkꞌez ꞌet lhane buba dzoh tileh, ꞌinkꞌez nohnichꞌoh nohtoh lhgha ha whútilhyeh ꞌinkꞌez lhtsꞌu dutihtni.

¹¹ Lhane whutsꞌit be nus hooꞌen unline, lhane dune nahuntiꞌah.

¹² ꞋInkꞌez ꞌukꞌu nulheꞌustꞌenne, ꞌenne ꞌon nus ꞌuhulsiꞌ tileh. Dune ye lhkꞌesiꞌ-i, ꞌi cha kꞌoh ꞌutinelh.

¹³ ꞋEt hoontsꞌi mbene la whula toh whutsꞌun whulh úsyinne, ꞌenne za hudutijih.

¹⁴ ꞋEt yakꞌuz kꞌuneꞌ whulꞌen-un ghun khuni unzoo-i yun kꞌut ndulcho whe be yatiduk. ꞋI be ndi yun kꞌut whutꞌenne, buba whubuntilhtun tileh. ꞋEt de ꞌawet whula toh whusaóotiltsꞌulh.”

ꞋUkꞌenus whe whunujut-un

¹⁵ “ꞋEt huwa ꞌukꞌenus be whunujut-un, ꞌen musai yutilhtselh-un, ꞌi ꞌukꞌenus whudiztiꞌ tsꞌe usyin whe nulhꞌen de, Daniel nus hooꞌen-un ꞌoh daꞌ howu yalhduk inleꞌ. (Mbe la ꞌukꞌu yalhdukne, ꞌenne soo cho bubeni taóodoltsꞌit).

¹⁶ Mbe la Judea yun kꞌut dilhtsꞌine, shus kꞌuz tse hutoolhdilh.

¹⁷ Mbe la duyoh hukwusda-un khun te nanaóojaꞌ ꞌinkꞌez duyoh tsꞌe naꞌólhchoot junih.

¹⁸ Mbe la ha níyeh kꞌet ꞌutꞌen-un, khun duyoh tsꞌe dunaih kunaóodaꞌ junih.

¹⁹ ꞋOh de, mbe la tsꞌekoo buzkeh whutalehne, ꞌinkꞌez duzkeh eꞌúlhtꞌukwne, buba tube ꞌon nus hootátsiꞌ.

²⁰ Nkede whuchꞌa tsétilhdulh-un, khit kꞌus natsꞌulyis dzin, ꞌet te ꞌuhoneh junih, ꞌet huba tenadahdli.

²¹ ꞋEt ꞌalha ꞌoh de whusahooltsꞌut de, hooncha whe dune dzoh nuhutide. Ndi yun kꞌut wheꞌ whuditꞌen daꞌ, ꞌinkꞌez ꞌandit dzin whutsꞌun, ꞌaw whuz unꞌa doo cha za ndó honeh ꞌaitꞌoh, ꞌilhoh zaꞌ whutanelh.

²² ꞋOh de hoondukw nalhuhóodlel de, ꞌaw dune doojihne hooloh. ꞋEt hoontsꞌi ꞌutꞌahályane, ꞌenne bugha hoondukw whutilꞌeh.

²³ ꞋEt ꞌoh de, ndun Christ njan usda kꞌus nguz usda nohoútni de, khun nohba ꞌalha hudooniꞌ junih.

²⁴ ꞋAlhaꞌ whutsꞌit be christne ꞌinkꞌez whutsꞌit be nus hooꞌenne, lhane nohtoh whutaleh. ꞋInkꞌez nohtoh tube hooncha te neꞌhutitꞌen. ꞋInkꞌez huwa ꞌitꞌen-un cha nohtoh neꞌhutitꞌen. Njan ndó titꞌelh-un, khun tilah ꞌutꞌahályane nabonooꞌah huninzun, ꞌet hukwaꞌ hutitꞌelh.

²⁵ ꞋEt soo zulhtsꞌai, whutsodaꞌ nohdásniꞌ.

²⁶ ꞋEt huwa dune nohúlhni de, ‘Nulhꞌen ndaꞌ ꞌat dune lhuhootꞌih-un ꞌet usda!’ hutni de, whuz toohdilh junih. Kꞌus, ‘ꞋEt yoh bez tsꞌe usda,’ hutni de, khun nohba ꞌalha hudooniꞌ junih.

²⁷ ꞋEt ditni kwun ndaz de ha dánat ꞌinkꞌez nooꞌ whe dánat. ꞋEt tsꞌiyanne dune yunoolhꞌen ha, ꞌet whuz unꞌa Yinka Dune Yeꞌ whusatiyalh.

²⁸ ꞋEt ntsꞌe la nezi súlhtꞌi-un, ꞌet la tsibalyan huweꞌ ꞌilho hotadulh.”

Yinka Dune Yeꞌ whusanátidalh-un

²⁹ “ꞋEt ꞌoh de dune dzoh nahutideh-un ꞌúhooja de, hukwꞌelhꞌaz ꞌaho sa dulhgus tileh. ꞋUlhdzis oozaꞌ cha ꞌaw be lhóohoostꞌen tileh. Sum cha ndus de ha tíkulh. ꞋInkꞌez yat be hoolhtus-i ndulcho whe nuhótitnah.

³⁰ ꞋEt de la tsꞌiyanne dune yunoolhꞌen ha Yinka Dune Yeꞌ yakꞌuz tsꞌe be hóodutaltsilh. ꞋEt ꞌoh whuya hoozulh de, dune ndi yun kꞌut ndulcho whe tso yahutilhduk. ꞋEt Yinka Dune Yeꞌ whuz de uyalh whe huyuntilhꞌelh. Kwꞌus kꞌut yakꞌuz tsꞌe ha tíyalh. Ye diztiꞌ-i ꞌinkꞌez ye ulhtus-i, ꞌi be tinelh.

³¹ Be tsꞌujih-i tube cho beꞌ dutsꞌo whe oolizas whuz de ubutilhꞌalh. ꞋUtahalyane, tsꞌiyawh ꞌilhunaboohootálelh. Diwh hukwꞌunꞌa hutidulh ꞌinkꞌez yat dulcho nótidulh. ꞋEt ndulcho whe ꞌilhunaboohootálelh.”

Mai, fig huyulhni, ooduchun, ꞌi be nawhutnuk be whutsꞌodulꞌeh-i

³² “Mai, fig huyulhni, ooduchun, ꞌi be nawhutnuk be whutsꞌodulꞌeh-i, bodulhꞌeh. Ndi ꞌi ꞌuntꞌoh: oozischum ulghih te, ꞌet ꞌawet ootꞌan whulih, ꞌi gha tꞌewhunáhzun ꞌawet shin nilhdukw suliꞌ.

³³ Nohni cha ndohwhi whunulhꞌen de, ꞌawet tꞌewhunóhzin, nilhdukw suliꞌ. ꞋAntsꞌi dati zih leꞌ hoontꞌoh.

³⁴ ꞋAlhaꞌ tsꞌihꞌun unꞌa nohdusni, ꞌandit whudizulhne ꞌaw yalhihitásdla, whe tsꞌiyawh ꞌet lhawhúdutanelh, ꞌet whutsꞌun.

³⁵ Yat ꞌinkꞌez ndi yun kꞌut cha gak whutaleh. ꞋEt hoontsꞌi sghuni ꞌaw gak lhtisdleh.

³⁶ Ndet dzin ꞌinkꞌez ntsꞌoya hoozulh whe ꞌuwhutanelh, ꞌaw tꞌeoonínzunne hooloh. Lizas yakꞌuz dilhtsꞌine, ꞌenne hoontsꞌi ꞌaw tꞌehonúszun. ꞋUBá yakꞌuz usda-un, ꞌaw ꞌen za tꞌeooninzun.

³⁷ ꞋOh daꞌ Noah khuna daꞌ, dune dahíntꞌoh la, ꞌet whuz unꞌa za ꞌuwhutátꞌelh whe Yinka Dune Yeꞌ whusanátidalh.

³⁸ Soo cho whunulhꞌen, yun ka too beꞌ whutanelh, whutsodaꞌ tsꞌiyanne ꞌaꞌalh ꞌinkꞌez ꞌuhutnai. Dune ꞌinkꞌez tsꞌekoo bulh lhgho dilhtsꞌi, Noah tsꞌi cho be tiyalh ꞌet whutsꞌun.

³⁹ Dunene ꞌaw tꞌehonuszun nkede too dudutáltꞌo. ꞋEt ꞌawet dutadiltꞌo whe tsꞌiyawh too ꞌubanghan. ꞋEt whuz unꞌa za Yinka Dune Yeꞌ whusainya de, ꞌet ndó tanelh.

⁴⁰ ꞋEt dzin nane, ha niyeh kꞌet ꞌuhutꞌen. Lizasne, ꞌilhoghun hitalhchulh ꞌinkꞌez ꞌilhoghun ꞌawet tidalh.

⁴¹ Nane hitiꞌulh-i hundunulhdus. ꞋIlhoghun hitalhchulh ꞌinkꞌez ꞌilhoghun ꞌawet tidalh.

⁴² ꞋEt huwa huwahli! Ntsꞌoya hoozulh whe nohMoodihti whusatiyalh ꞌaw tꞌeoonuzahzun.

⁴³ ꞋEt ndi noheni taoonahle, yoh moodih-un, ntsꞌowhuya whudizulh-un ꞌundunutꞌih-un whusatiyalh, ꞌet tꞌewhuninzun de, ꞌet soo tsꞌihꞌun daꞌ huwoleꞌ, ꞌinkꞌez ꞌaw hiyoh daꞌ óoyis ꞌaitꞌoh.

⁴⁴ ꞋEt huwa nohni cha lhadóohtꞌeꞌ. Ntsꞌowhuya whudizulh-un, ꞌet ookwa tse lhúwhahlih-un, ꞌet Yinka Dune Yeꞌ ꞌet whusatiyalh.”

ꞋUlhna-un tsꞌihꞌun ꞌuntꞌoh-un

⁴⁵ “Kꞌus mbe ꞌulhna-un tsꞌihꞌun ꞌuntꞌoh ꞌinkꞌez whunih-un ꞌuntꞌoh? Oomoodih dichꞌoh de ꞌulhna-un, ꞌonghohne de ꞌulhnane duyoh humoodih yutilhtselh. ꞋAwet ꞌet neooninzut de, ꞌonghohne hitiꞌulh-i bugha itaꞌalh.

⁴⁶ ꞋEt oomoodih whusanaja de ꞌinkꞌez de ꞌulhna-un whuz unꞌa nduja-un ꞌet whunilhꞌen de, ꞌen ꞌukꞌenus hoonzoo-un ootsꞌu hóoltsꞌulh.

⁴⁷ ꞋAlhaꞌ nohdusni ndai la yutꞌi-i, tsꞌiyawh kꞌuneꞌ yulꞌen yutilhtselh.

⁴⁸ ꞋEt hoontsꞌi be ꞌulhna-un ntsiꞌ-un dichꞌoh dudzi yo whe ꞌet nduninzun, ‘SMoodih saꞌ ꞌustla whusanádaih.’

⁴⁹ ꞋInkꞌez ꞌonghohne dudulh ꞌulhnane bube whe ninyaih, ꞌinkꞌez tatnaine bula wheꞌ ninꞌal ꞌinkꞌez bula tawhénitnaiꞌ.

⁵⁰ Ndet dzin oomoodih whusanátidalh ꞌinkꞌez ntsꞌoya ꞌuhunitꞌoh-un ꞌutinelh ꞌaw tꞌewhunúszun, ꞌet ꞌoh whuya ꞌuhunitꞌoh whe whusanátidalh.

⁵¹ ꞋEt kꞌubeꞌ yutálhtꞌoh ꞌinkꞌez ootsꞌitikulh-i, ꞌi tsꞌiyawh mbe duba naꞌudzooꞌne butsꞌitikulh-i, bukꞌunꞌa ꞌi za ootsꞌitikulh. ꞋEt whe la tso bulh dughoo lhidutikꞌus.”