Matthew 20 - Yak'usda Ooghuni

Yakꞌuz whulerwe tsꞌiyawh kꞌuneꞌ whulꞌen-un

¹ “Ndiz unꞌa yakꞌuz whulerwe tsꞌiyawh kꞌuneꞌ whulꞌen: ꞋIlhoghun dune ꞌen yun kꞌut yun ꞌutꞌi-un. ꞋEt tsꞌekoo tooꞌ mai chun ha niyeh kꞌet, ꞌet huba ꞌutitꞌelhne haꞌ ninzun. Bundada ꞌudaꞌ ꞌet dune tilhꞌalh ha whuz whinya.

² ꞋEt ubalhꞌaꞌne ꞌilho sooniya tsꞌuditiꞌ ꞌi dzin ndulyiz whe hikꞌelha ꞌutitꞌelh-un, huhóostꞌet. ꞋEt huwa tsꞌekoo tooꞌ mai chun ha niyeh kꞌez whe balhꞌaꞌ.

³ ꞋEt hukwꞌelhꞌaz 9:00 atꞌen tꞌalh-i be ꞌóoket-un daninya whe dune bunilhꞌen ꞌantsꞌi ꞌoh nodilhya.

⁴ ꞋEt njan dúbulhni, ‘Nohni cha nghuz tsꞌekoo tooꞌ mai chun ha niyeh tsꞌe ꞌahdulh. Ntsꞌenꞌa la sooniya tsꞌihꞌun ꞌuntꞌoh-i, ꞌi nohba ꞌukꞌelha tiselh.’ ꞋInkꞌez whuz whehandil.

⁵ ꞋEt doo cha hukwꞌelhꞌaz tsꞌetniz atꞌen kꞌus 3:00 atꞌen cha whuz whinya. ꞋEt whuz unꞌa za doo cha za ꞌuja.

⁶ Doo cha za hulhgha tsꞌe atꞌen whuz whinya ꞌinkꞌez ꞌuyoonne cha ꞌantsꞌi ꞌoh nodilhya whe bunilhꞌen. ꞋEnne cha ndúbulhni, ‘ꞋEt di ha dzin dúwhulyiz whe ꞌantsꞌi ꞌóh nudulhya?’

⁷ ‘ꞋEt ꞌaw dune lhuneulhꞌoh ꞌet huwa tsꞌintꞌoh,’ huyulhni. ꞋEt ꞌúbulhni, ‘Nohni cha nghuz tsꞌekoo tooꞌ mai chun ha niyeh tsꞌe ꞌahdulh. ꞋInkꞌez sooniya tsꞌihꞌun ꞌuntꞌoh-i, ꞌi nohba kꞌelha tiselh.’

⁸ ꞋEt ꞌawet hulhgha tsꞌe dune ꞌetsul ꞌutꞌih-un whe tsꞌekoo tooꞌ mai chun ꞌutꞌi-un, ꞌen bughunli-un ꞌanih yudaniꞌ ꞌinkꞌez ꞌuyulhni, ‘ꞋItꞌenne tsꞌiyawh whusábinle, ꞌinkꞌez buba ꞌukꞌelha hoolhtsi. ꞋUdekꞌez wheꞌ ditꞌen-un, ꞌen cho ooba ꞌukꞌelha hoolhtsi.’

⁹ Mbene la hulhgha tsꞌe atꞌen ulꞌaꞌne whusahandil whe ꞌilhoghun hinli ꞌilho sooniya tsꞌuditiꞌ-i buba ꞌukꞌelha yulhtsi.

¹⁰ ꞋEt ndunne ꞌudechoo ulꞌaꞌne, ꞌenne cha whusahandil. ꞋOn nus lhai duba kꞌelha tileh huninzun. ꞋEt hoontsꞌi whuz unꞌa za ꞌilhoghun hinli ꞌilho sooniya tsꞌuditiꞌ-i buba ꞌukꞌelha yulhtsi.

¹¹ ꞋInkꞌez tsꞌiyawh buba ꞌukꞌelha whuzdliꞌ hukwꞌelhꞌaz, ꞌet yun ꞌutꞌi-un hichꞌaz yawhenilhduk.

¹² ꞋEt ꞌuhuyúlhni, ‘Ndunne ꞌudekꞌoh ubalhꞌaꞌne, ꞌenne ꞌilhoh sadzi hukwꞌu hoonistꞌoh-un za ꞌuhitꞌen. ꞋInkꞌez wheni dzin ndúwhulyiz whe sa ulhtus-i niz ꞌutsꞌitꞌen. ꞋEt hoontsꞌi nebulh húlhgha buba ꞌukꞌelha whuzílhtsi.’

¹³ ꞋEt yun ꞌutꞌi-un ꞌet ubúlhni, ‘Skꞌekene ꞌaw hoonliyaz whe ꞌaw tankꞌus unꞌa lhenohúsdlel. Tsꞌiyawh nohba sooꞌ hoontꞌoh ꞌilho sooniya tsꞌuditiꞌ-i kꞌelha nohisꞌaꞌ.

¹⁴ ꞋEt ꞌawet ndai la nohchꞌeꞌ ulhchoot ꞌinkꞌez nahdulh. Ndunne ꞌudekꞌoh ꞌubisꞌaꞌne, ꞌenne nohni nohkꞌunꞌa za ꞌet ꞌultsuk ꞌi za buba kꞌelha tiselh ꞌet hukwaꞌ nuszun.

¹⁵ ꞋAlhaꞌ iloh lakw ndai la ꞌustꞌi-i ntsꞌenꞌa hukwaꞌ nuszun tuneꞌ ꞌúsꞌen? ꞋUszooꞌ ꞌet huwa eh sghe oolhnih?’ ubúlhni.”

¹⁶ ꞋEt huwa Jesus njan howu yalhduk whe ubúlhni, “Mbene la ꞌudekꞌoh unline, ꞌenne ꞌudechoo nahutidleh. ꞋInkꞌez ꞌudechoo unline, ꞌenne ꞌudekꞌoh nahutidleh. ꞋEt huwa Yakꞌusda lhane ꞌanih dániꞌ, ꞌet hoontsꞌi ntsoolneyaz za ꞌutahaínla.”

Jesus datitsah-un whulh tat huwu yatilhduk

¹⁷ ꞋEt Jesus Jerusalem tsꞌu tizya. ꞋInkꞌez whunizyane ꞌon ꞌat nane mbene la yugha hodulꞌehne, ꞌudun nebuninla ꞌinkꞌez ndúbulhni,

¹⁸ “Soo zúlhtsꞌai, Jerusalem tsꞌuztidulh ꞌinkꞌez Yinka Dune Yeꞌ, lubret moodihne, ꞌinkꞌez Moses be ꞌudustlꞌus ꞌukꞌu nunáguzne cha, butlꞌa hitilhtelh, datitsah ha hiba nahutiyeh.

¹⁹ ꞋInkꞌez ꞌudun yun kꞌut whutꞌenne butlꞌa hitilhtelh. Butlꞌa húyalhti de, highu tidloh, huyootalhtsus, ꞌinkꞌez tulalhgus kꞌehuyitalhtelh. ꞋInkꞌez hukwꞌelhꞌaz whulh tat dzin dunadutádalh.”

James ꞌinkꞌez John bulh buloo, ꞌen Jesus yoodulhkut-un

²⁰ ꞋEt Zebedee buzkeh duloo te, Jesus tsꞌo tizdil huyoodutalhkut ha. Buloo yubut nachaniti.

²¹ ꞋEt Jesus yulhni, “Ndet stsꞌo hukwaꞌ ninzun?” Tsꞌeke ꞌutni, “Ntsꞌe whulerwe inli-un, ndunne nane suzkeh, ꞌilhoghun nailhni tsꞌunkꞌus tidalh ꞌinkꞌez ꞌilhoghun ꞌintlꞌus tsꞌunkꞌus tidalh, sgha óoninꞌai.”

²² ꞋEt Jesus njan ndutni, “Ndet hukwa oodilhkut-un ꞌaw tꞌeoonuzinzun. Ndi lubot ꞌawet beꞌ tisnelh-i, nohni cha beꞌ tihnelh nahzun eh? ꞋInkꞌez dune be too be ꞌulꞌen-i, ꞌi be ꞌusotilelh. Nohni cha whuz unꞌa za eh too beꞌ tilhnelh?” ꞋEt ꞌuhúyulhni, “A, ꞌet la ndutsꞌóoneh!”

²³ ꞋEt ndúbulhni, “ꞋAlhaꞌ slubot beꞌ tihtnelh, ꞌinkꞌez be too be úzya-i, ꞌi be too beꞌ tilhnelh. ꞋEt ꞌaw doosniꞌ ꞌaitꞌoh mbe nailhni tsꞌe stsꞌunkꞌus tidalh ꞌinkꞌez mbe ꞌintlꞌus tsꞌe stsꞌunkꞌus tidalh. ꞋUBá buba lhaóodinlane, ꞌaw ꞌenne za bubaꞌ hoontꞌoh.”

²⁴ ꞋEt ꞌonghohne whunizyane hidantsꞌo whe, ꞌawet nane lhulhutsinke buba dzoh ꞌuhudija.

²⁵ ꞋEt Jesus ndunne tsꞌiyawh ꞌanih ubudaniꞌ ꞌinkꞌez ꞌubulhni, “Nohni tꞌeoonahzun ndunne ꞌudun yun kꞌut whutꞌenne bumoodihne, ꞌenne dunene kꞌuneꞌ buhulꞌen. ꞋInkꞌez nchane, ꞌenne ndunne bumoodihne buba ando ꞌuhintꞌoh. ꞋEt whuz unꞌa bube ꞌutꞌen kꞌoh hoonli.

²⁶ ꞋEt hoontsꞌi nohni nohtoh whuz unꞌa ꞌutihtꞌelh noohzin junih. Mbe la nohtoh ncha tileh hukwaꞌ ninzun-un, ꞌen nohba neꞌútꞌen-un ooleꞌ.

²⁷ Mbe la nohtoh ꞌudechoo tileh hukwaꞌ ninzun-un, ꞌen noheꞌulhna-un ooleꞌ.

²⁸ Whuz unꞌa za Yinka Dune Yeꞌ, ꞌaw ooba neꞌwhutitꞌen hukwa whusálhiyal. ꞋEt kꞌus dune buba neꞌutꞌen-un tileh ꞌinkꞌez buba datitsah, ꞌet whuz unꞌa lhane naootakulh. ꞋEt hukwa whusainya.”

Nane hoos̱ꞌenne huhooꞌen nahusdliꞌ

²⁹ ꞋEt hukwꞌelhꞌaz Jericho keyoh whuchꞌa náhusdil whe lhane dune hiyuntizdil.

³⁰ Nane hoos̱ꞌenne ti whuzih huzkeh. ꞋEt Jesus ꞌoh whuya uyalh whe hiduztsꞌai. ꞋUltus-un hika huyih, “Moodihti, David ootsꞌu haínzut-un, negha teꞌninzeh!”

³¹ ꞋEt ꞌilhunaoodilhne, “Tꞌeduzahnih!” hubuhútni. ꞋEt hoontsꞌi ꞌon nus ꞌuhutni, “Moodihti, David ootsꞌu haínzut-un, negha teꞌninzeh!”

³² ꞋEt Jesus lhgha neninya ꞌinkꞌez ꞌubulhni, “Diz áhꞌus. Ndet nohba ꞌuwhutisdlelh hukwaꞌ nahzun?”

³³ “NeMoodihti nena be tsꞌontilhꞌelh hukwa ꞌuzninzun,” huyúlhni.

³⁴ ꞋEt Jesus bugha teꞌnanzin whe dula be buna yutꞌaíznai. ꞋEt ꞌaho huhooꞌen suliꞌ, ꞌinkꞌez huyuntizꞌaz.