Matthew 2 - Yak'usda Ooghuni

Dune whunihne, Majine hubuwhútnine, ꞌenne Jerusalem tsꞌe hoozdil

¹ ꞋEt ꞌawet yun kꞌut Judea, keyoh Bethlehem whuzꞌai-un, ꞌet Jesus whuzdli. ꞋOh daꞌ whuz unꞌa Herod lerwe unli whe ꞌuhooja. Whunulhꞌen whuzdli hukwꞌelhꞌaz ndaꞌ whutꞌenne keyoh Jerusalem tsꞌe hoozdil. ꞋEnne whunihne Majine hubuhútnine.

² ꞋInkꞌez dune hoodulhkut, “Lizwif bulerwe ꞌandit whuzdli-un, ntsꞌe whuzdli? Sum cho tsꞌanꞌen, ꞌi gha lhutsꞌúzdil. Tsꞌoodun ootsꞌun teniꞌ tsꞌuntilhdzilh ha whusatsꞌándil.”

³ Lerwe Herod whulh ꞌudantsꞌo whe ooba dzoh ꞌuhutni. Jerusalem whutꞌenne, cha buba dzoh ꞌuhutni.

⁴ ꞋInkꞌez tsꞌiyanne ba lubret bumoodihne ꞌinkꞌez Moses be ꞌudustlꞌus ꞌukꞌu nunáguzne cha, tsꞌiyawh Herod ꞌanih ubudaniꞌ. ꞋEt ꞌenne butsꞌun nahootáꞌalh Christ ndet whutileh.

⁵ ꞋEt huyulhni, “Yun kꞌut Judea, keyoh Bethlehem whuzꞌai-un, ꞌet whutileh. Nus hooꞌen-un ꞌet ꞌukꞌehónguz ndutni,

⁶ ‘Yun kꞌut Judea tsꞌe keyoh Bethlehem whutꞌenne, ꞌet nohkeyoh hoontsool hoonli, ꞌet hoontsꞌi tube whudiztiꞌ tileh. Nohkeyoh ꞌet whutsꞌun ꞌilhoghun moodih ncha-un, whusatiyalh. ꞋInkꞌez sduneꞌne, Israel ootsꞌu haindene, ꞌusbai ghunli-un kꞌunꞌa bughu tileh.’”

⁷ ꞋEt Herod whuꞌiz whe whunihne ꞌanih ubudániꞌ. ꞋEnne butsꞌun nahootáꞌalh ha ꞌet soo ndet dzin ntsꞌoya hoozulh whe ndi sum be hóodiltsai.

⁸ Keyoh Bethlehem tsꞌe whe balhꞌaꞌ ꞌinkꞌez ndúbulhni, “ꞋAhdulh ꞌinkꞌez howa óohli whe tsꞌoodun nalhtih. ꞋEt nawhahꞌai de, ntsꞌe ꞌuntꞌoh ꞌet stsꞌótlꞌa khuni oohꞌalh, whuz tisyalh ootsꞌu teniꞌ ntisdzilh ha.”

⁹ ꞋEt lerwe ndúbulhni whe whe hándil. ꞋOh whuya hidulh whe khuntsul ndai la ndi sum ndaz tsꞌe hinalhꞌen-i, butso ꞌultsꞌulh tsꞌoodun usda-un ꞌon do, ꞌet lhghá neltsꞌut.

¹⁰ Sum hinalhꞌen daꞌ tubeh huhóontꞌiꞌ kꞌet.

¹¹ ꞋEt yoh dahunindil whe tsꞌoodun hitilhꞌen. Ooloo Mary ꞌen bulh. Hibut nachánilya ꞌinkꞌez hitsꞌun teniꞌ nalhdzun. Huye ꞌúzdla-i hidah lhchꞌaz hiyilhchoot hiyé ha háyanla-i ꞌinkꞌez hitsꞌu hítilhdil. Gold, yoo sooltsun-i frankencense huyulhni, ꞌinkꞌez yoo Myrrh huyulhni ꞌi cha, ꞌi hitsꞌu hítilhdil.

¹² Yakꞌusda bubul be bugha dániꞌ, ꞌaw Herod ookwꞌu naoohdilh junih budániꞌ ꞋEt huwa ꞌutso whuya dukeyoh tsꞌe whenáhidilh.

Joseph, Mary te, ꞌinkꞌez Jesus bulh yun kꞌut Egypt tsꞌuwhútni, whuz whe hándil

¹³ ꞋEt whenáhidil hukwꞌelhꞌaz neMoodihti oolizas Joseph nute whe be nghun whe hóodiltsai. ꞋEt ꞌuyulhni, “Dudinyaih, tsꞌoodun ooloo bulh ubilhchoot ꞌinkꞌez yun kꞌut Egypt ꞌa cho whuz ubalhtelh! Nohdutásnelh ꞌet whutsꞌun ꞌet dólhtsꞌiꞌ! ꞋEt Herod tsꞌoodun yuka itꞌáꞌelh yutuzilhghelh ꞌet huwa!”

¹⁴ ꞋInka ꞌulhdzis dunadija ꞌinkꞌez tsꞌoodun ooloo bulh ubilhchoot ꞌinkꞌez yun kꞌut Egypt tsꞌoutni whuz whe hándil.

¹⁵ Herod datitsah whutsꞌun whuz hudutáltsꞌi. Nus hooꞌen-un, ꞌen be daja ni la ꞌet whunilhchoh ꞌoh tuneꞌ hitꞌen “Syeꞌ ꞌanih dasniꞌ yun kꞌut Egypt whuchꞌa naoojaꞌ ha.”

Lerwe Herod lhuganne ꞌubulhni, “Keyoh Bethlehem tsꞌe duneyaz nat yus kꞌut be suliꞌne, tsꞌiyawh huboohghan”

¹⁶ ꞋEt ꞌ Herod tꞌeoonanzin whunihne, Majine huyulhni, nahinanꞌa, ꞌet huwa tube hunilchꞌe. ꞋInka ntsꞌoya hoozulh Majine hidániꞌ lhuganne, Bethlehem tsꞌe whe balhꞌaꞌ. ꞋEt ꞌubulhni, keyoh whutꞌenne ꞌinkꞌez whunat whutꞌenne cha duneyaz nat yus kꞌut be suliꞌne ꞌinkꞌez whutsꞌun whudilhdzulhne cha, tsꞌiyawh hubahghan.

¹⁷ Nus hooꞌen-un Jeremiah, daja ni la tsꞌiyawh ꞌoh tuneꞌ whustꞌen ndutni,

¹⁸ “Keyoh Ramah dahtsꞌo daꞌ tso yahalhduk ꞌinkꞌez duduzke kꞌenínudleh. Rachel tsꞌoodunne bukꞌetso yahalhduk. ꞋAw budzi do naꞌotneh ꞌaitꞌoh, bubuzkehke gak huzdliꞌ ꞌet huwa.”

Joseph, Mary, Jesus cha, Nazareth hudutáltsꞌilh

¹⁹ Herod dazsai whe Egypt tsꞌe neMoodihti oolizas Joseph huwunute whe be nghun néwhultsꞌut.

²⁰ ꞋEt ndúyulhni, “Dudinyaih! Tsꞌoodun duloo bulh nabilhchoot. Israel tsꞌe nahdulh, tsꞌoodun yukúniztaine hituzilhghelh ha, yahadla.”

²¹ ꞋInka dudinya. Tsꞌoodun duloo bulh nabílhchoot ꞌinkꞌez Israel tsꞌe whenáhidil.

²² Joseph whulh ꞌudantsꞌo Herod ooyeꞌ Archelaus huyulhni, ꞌen dubá kꞌedanya ꞌandit Judea whulerwe unli. ꞋEt whuz tiyalh whe nuljut howu nusúti ꞌet Yakꞌusda yugha dániꞌ. ꞋEt huwa Galilee yun kꞌut tsꞌe whe hándil.

²³ Whuz hoozdil whe keyoh Nazareth ꞌet hudutáltsꞌilh. Nus hooꞌenne daja hutni la, ꞌoh túneꞌ whustꞌen whe njan duhútni, “ꞋEn Nazareth whutꞌen-un hidutánelh.”