Matthew 19 - Yak'usda Ooghuni

Jesus Galilee yun kꞌut whuchꞌa nasja

¹ ꞋAwet ndi khuni Jesus ꞌi be bubulh yalhduk-un ꞌetsul ꞌudija whe Galilee yun kꞌut whuchꞌa nasja. Judea yun kꞌut Jordan koh ꞌon chꞌaz whuz oozya.

² Lhane dune whuz huyoonizdil, ꞌinkꞌez soo naꞌbalhꞌen.

³ ꞋEt Phariseene cha highu nindil hiyootálhdzih ha, ꞌinkꞌez huyoodulhkut, “ꞋEt ndet huwa neꞌatke ꞌantsꞌi ꞌoh huwun buchꞌa naztidalh, Moses khuni netlꞌa idanꞌai-i, ꞌi ookꞌunꞌa eh ꞌuhoontꞌoh?”

⁴ ꞋEt Jesus ꞌubulhni, “ꞋEt ndi ꞌudustlꞌus kꞌut ꞌukꞌeguz-i, ꞌi ꞌaw lakw ookꞌu yalhuzulhduk? Mbe dune ꞌinla-un, ꞌen dune ꞌinkꞌez tsꞌeke bulh ꞌubínla daꞌ.

⁵ ꞋInkꞌez ꞌet ndutni, ‘Njan huwa dune dubá ꞌinkꞌez duloo bulh buchꞌa ooyaꞌ hubaꞌ hoontꞌoh, ꞌinkꞌez duꞌat bulh lhulh ꞌuhootꞌeꞌ hubaꞌ hoontꞌoh. Whuz unꞌa nahúltꞌo ꞌilho hutileh.’

⁶ ꞋEt ꞌinka ꞌaw ꞌon ꞌun nane lhihiloh, ꞌilho za hinli suliꞌ. ꞋEt huwa mbene la Yakꞌusda lhgha bunilhtine, ꞌaw dune lhchꞌa nabólhtelh junih.”

⁷ ꞋEt huyulhni, “ꞋEt di ha Moses whuz unꞌa netlꞌa hónꞌai ꞌinkꞌez ꞌudustlꞌus cha neba ꞌinla inleꞌ whe dune, ꞌi duꞌat tlꞌa yóolhchoos ꞌinkꞌez naitoolhꞌaꞌ.”

⁸ ꞋEt ꞌúbulhni, “Nohni nohdzi dulhtsꞌun, ꞌet huwa Moses nohꞌat buchꞌa naoohja-un nohtlꞌa hónꞌai. ꞋEt hoontsꞌi wheꞌ whuditꞌen whutsꞌun, ꞌaw ꞌet ndulhúhootꞌoh.

⁹ ꞋInka ꞌunohdusni, dune ooꞌat ꞌuyoon dune bulh nintaꞌantꞌen tꞌeoonanzin de, ꞌet de za ꞌudustlꞌus ye ꞌetsul itilelh-i, ꞌi duꞌat yutlꞌa yóolhchoos. ꞋEt ooꞌat ꞌaw edúlhinel ꞌet hoontsꞌi ndi ꞌudustlꞌus yutlꞌa yálhchooz ꞌinkꞌez ꞌuyoon tsꞌeke ghu nasda de, dune tsꞌeke bulh nintaꞌantꞌen-un suliꞌ. ꞋInkꞌez dune ooꞌat ꞌetsul ꞌuyinla-un ꞌinkꞌez ꞌuyoon dune ghu nasda de, ndun dune ꞌen cha tsꞌeke bulh nintaꞌantꞌen-un tileh.”

¹⁰ ꞋEt Jesus yugha hodulꞌehne ꞌuhuyulhni, “Dune duꞌat bulh whuz unꞌa ꞌuhutitꞌelh de, ꞌaw lhghu lhuhíkoh de, ꞌon nus sooꞌ hoontꞌoh.”

¹¹ ꞋEt ndúbulhni, “Ndi khuni, ꞌaw tsꞌiyanne yólhchoot ꞌaitꞌoh. Mbe la ooghá whuntꞌaine, ꞌaw ꞌenne za bubaꞌ hoontꞌoh.

¹² ꞋEt whulohne dune ꞌaw bughez hoonuloh whe huwhuzdli. ꞋOnghohne whuz unꞌa dune ꞌubinla. ꞋInkꞌez whulohne yakꞌuz whulerwe-un, ꞌen ba whuz unꞌa soo whulh ꞌutitꞌelhne, ꞌenne whuz unꞌa la whulh ꞌúhootꞌeꞌ.”

Jesus tsꞌoodunneyaz dula be bukꞌudalni

¹³ ꞋEt tsꞌoodunneyaz highu buhunínla. Khun tilah bukꞌé dolnih ꞌinkꞌez buba tenadoodli ha. ꞋEt hoontsꞌi yugha hodulꞌehne, dah hubuhútni.

¹⁴ ꞋEt Jesus ꞌúbulhni, “Whute tsꞌoodunneyaz stsꞌó toodilh. Dah budóhniꞌ junih! Yakꞌusda whe lerwe unli-un whuz dilhtsꞌine, ndunne tsꞌoodunneyaz ubunduhúltꞌoh wheꞌ hintꞌoh.”

¹⁵ Dula be bukꞌudalni, ꞌinkꞌez whe naja.

Dune hoonzooꞌ ꞌuntꞌoh-un

¹⁶ ꞋEt ꞌawet ꞌilhoghun dune Jesus yughu ninya ꞌinkꞌez yoodulhkut, “Dune hodulhꞌeh-un unzoo-un, ntsꞌenꞌa hoonzoo kꞌunꞌa ꞌutistꞌelh whe ꞌilhiz khutisnalh-un whuchꞌa ootásdoh?”

¹⁷ ꞋEt Jesus ndúyulhni, “Di haꞌ sudini, unzoo-un sudini? ꞋIlhoghun unzoo-un hooloh. Yakꞌusda ꞌaw ꞌen za unzoo whe ꞌuntꞌoh. ꞋEt hoontsꞌi ꞌilhiz be tsꞌotinalh-un hukwaꞌ ninzun de, Yakꞌusda khuni dune tlꞌa idanꞌai-i, ookꞌuneꞌ ꞌintꞌen da.”

¹⁸ ꞋEt ꞌuyulhni, “Kꞌus ndai wheꞌ dini?” Jesus ndúyulhni, “Dune sólhghelh junih! Tsꞌekoo bulh nintaꞌontꞌen junih! ꞋUndunontꞌih junih! ꞋUyoonne ba hontsꞌit junih!

¹⁹ Mbá ꞌinkꞌez nloo bulh ubudólhtiꞌ! Ntsꞌenꞌa la nyunchꞌoh kꞌenainsiꞌ, whuz unꞌa za nyulh dune bukꞌeontsiꞌ!”

²⁰ ꞋEt chilh ndúyulhni, “Usool daꞌ whutsꞌun, ndi tsꞌiyawh ookꞌuneꞌ zustꞌen. Ndet whuyit ꞌustꞌen?”

²¹ Jesus ndúyulhni, “Lhadulya-un tanlelh hukwaꞌ ninzun de, ndai la ꞌintꞌi-i, ꞌi tsꞌiyawh beꞌ oonket, ꞌinkꞌez telꞌenne butainínle. ꞋEt de la ndo yakꞌuz ndai ꞌilhoozanla-i, ꞌet mba tilalh. ꞋInkꞌez ꞌanih seꞌ ꞌutꞌen kꞌoh tuneꞌ óntꞌen ha sunanyalh.”

²² ꞋEt ndun chilh ndi khuni yudántsꞌo whe tube oodzi unduda whe yuchꞌanasja. Tube hoonzooꞌ ꞌuntꞌoh-un ꞌuntꞌoh ꞌet huwa.

Dune ꞌuhuhooleh ꞌaitꞌoh-un, ꞌet hoontsꞌi Yakꞌusda ba huwa lhúhoolnaꞌ wheꞌ hoontꞌoh

²³ ꞋEt Jesus yugha hodulꞌehne ubúlhni, “Soo tsꞌihꞌun unꞌa nohdusni, yakꞌuz ntsꞌe lerwe unli-un, tube howa whulnaꞌ whe hoonzooꞌ ꞌuntꞌoh-un whuz tiyalh.

²⁴ Doo cha za ꞌunohdúsni, khuna ncha-i, camel huyulhni, ꞌi ooba howa whulnaꞌ whe ꞌughabátsulh oolatoh ookonínꞌa-un hukwa tílgwulh. ꞋEt hoontsꞌi whanus howa whulnaꞌ whe hoonzooꞌ ꞌuntꞌoh-un, ꞌen Yakꞌusda whe lerwe unli-un whuz datíyalh.”

²⁵ ꞋEt yugha hodulꞌehne, hidantsꞌo whe buba hooncha ꞌinkꞌez ꞌet ꞌuhutni, “Mbe za dutijih haꞌ dini?”

²⁶ Jesus ꞌubunilhꞌen ꞌinkꞌez ndúbulhni, “Dunene, ꞌaw ꞌuhuhooleh ꞌaitꞌoh-un, ꞌet hoontsꞌi Yakꞌusda ba huwa lhúhoolnaꞌ wheꞌ hoontꞌoh.”

²⁷ ꞋEt Peter yatilhduk whe Jesus njan ndúyulhni, “Whunilhꞌen, ndai la tsꞌutꞌi-i, ꞌi tsꞌiyawh oolazditni, ꞌinkꞌez nye ꞌutꞌen kꞌoh tsꞌe tsꞌootꞌen ha nyutsꞌun tizdil. ꞋEt huwa di negha tíkulh?”

²⁸ Jesus ndúbulhni, “Tsꞌihꞌun unꞌa nohdusni, ntsꞌoya hoozulh whe tsꞌiyaitsuk ꞌandidi-i natidleh, ꞌoh whuya hoozulh whe Yinka Dune Yeꞌ, yukwꞌutsꞌuzda cho diztiꞌ-i, ꞌi yukꞌetlꞌa dutadalh. ꞋEt nohni suntizdil inleꞌne, nohni cha whunizyai ꞌon ꞌat nanki kwꞌutsꞌuzda-i dune buba nahutiyeh ha, ꞌet dutálhtsꞌilh. ꞋEt Israel ootsꞌu haindene, whunizyat ꞌon ꞌat nane lhelhdoh didowhne, ꞌenne buba nahutihyeh.

²⁹ ꞋInkꞌez mbe la si sooziꞌ gha duyoh huwu tizya de, kꞌus dulhutsinke te, kꞌus dulhtuske te, kꞌus dubá cha ꞌinkꞌez duloo cha te, kꞌus duꞌat te, kꞌus duzkehke te, kꞌus dukeyoh cha, si sooziꞌ gha huwu tizya de, ꞌen whunizyat whunizyai (100) ꞌet ꞌuwhultsuk-un ootlꞌa naóotikulh. ꞋInkꞌez ꞌilhiz whe tsꞌukhuna-un, ꞌet cha oogha óotaltsꞌulh.

³⁰ ꞋEt hoontsꞌi lhane ꞌudechoo ꞌuntꞌohne ꞌudekꞌezne nahutidleh. ꞋInkꞌez lhane ꞌudekꞌez unline, ꞌenne ꞌudetsone nahutidleh.”