Matthew 16 - Yak'usda Ooghuni

Phariseene ꞌinkꞌez Sadduceene huwa ꞌítꞌen-un bubaꞌ hooleh hukwaꞌ huyoodulhkut

¹ ꞋAwet Phariseene ꞌinkꞌez Sadduceene cha, highu nindil ꞌinkꞌez huyóolhdzih whe huyoodulhkut, “Yakꞌuz whutsꞌun hooncha tuneꞌ whutꞌen-un, whunénolhtun ꞌaitꞌoh?”

² ꞋEt ꞌúbulhni, “Hulhgha tsꞌe ndo yat whunulhꞌen. Whudulkꞌun de, ꞌet dzin hoonzoo tileh dahni.

³ Bundadaꞌ yat kwꞌus bulh dulkꞌun suliꞌ whunulhꞌen de, ꞌawet ꞌazih whudutitsiꞌ dahni. Nohni duba naꞌudzooꞌne ꞌahli! ꞋEt ndo yat dawhutꞌen la tꞌeoonáhzun. ꞋEt hoontsꞌi ndoyá whudizulh dawhutꞌen la, ꞌaw tꞌeoonuzáhzun!

⁴ ꞋAndit yinka dilhtsꞌi lubeshi tsꞌu nintꞌine ꞌuhintꞌoh. ꞋAhoolhyiz dune tsꞌeke bulh nintaꞌhutitꞌelh-un, whutsꞌó nintꞌi. Hooncha huwa ꞌítꞌen-un whuntilhꞌelh hukwaꞌ hitisꞌen. ꞋEt hoontsꞌi ꞌaw hoohꞌen-un nohghá holtsꞌit ꞌaitꞌoh. Jonah bulh dáhooja inleꞌ la, ꞌet za whutihꞌelh wheꞌ hoontꞌoh!” ubúlhni, ꞌinkꞌez bughu whenája.

Huwo hooleꞌ Phariseene ꞌinkꞌez Herod bules untuldoh-i, ꞌi chꞌa ubúlhni

⁵ ꞋEt nyan hoozki whe yugha hodulꞌehne lhes nahodilhnoh.

⁶ ꞋEt Jesus ꞌubulhni, “Kahdli ndunne Phariseene ꞌinkꞌez Sadduceene cha, ꞌenne bules untuldoh-i chꞌa.”

⁷ Lhulh yawhehunilhduk, “ꞋAw lhes lhtsꞌíꞌal ꞌet huwa ꞌutni.”

⁸ Jesus tꞌeoonanzin whe ꞌet ꞌúbulhni, “Be ꞌalha nahzun-i untsool! ꞋEt huwaꞌ ꞌudahni. ꞋAw lhes whusálhahꞌal, ꞌet howu yalhduk?

⁹ ꞋAwhuz eh tꞌeoonuzahzun? ꞋAw whunalhuzulhni whe kwulaiꞌ lhes ꞌi be 5,000ne gha náhꞌai, ꞌinkꞌez daltsuk chalhyal chꞌutízkat-i nalhdzooh?

¹⁰ ꞋInkꞌez lhtakꞌantꞌi lhes ꞌi be 4,000ne ghaꞌ náhꞌai, daltsuk chalhyal chꞌutízkat-i, ꞌi nalhdzooh?

¹¹ Ntsꞌenꞌa ꞌahtꞌoh tꞌeoonuzahzun, ꞌaw lhes ghun nohbulh yalhuzusduk? ꞋUdaꞌ nohdasniꞌ, Phariseene ꞌinkꞌez Sadduceene cha, bules untuldoh-i huwohleꞌ.”

¹² ꞋEt ꞌaho tꞌehoninzun Phariseene ꞌinkꞌez Sadduceene cha, dune huhodulhꞌeh-un, ꞌet whuchꞌa buchꞌa huwahli, ꞌet ꞌuwhulhni. Lhes bulh untuldoh-i, ꞌi íloh uyúlhni.

Jesus ꞌen Christ ꞌuntꞌoh, ni Peter

¹³ Jesus Caesarea Philippi buyun kꞌuz whinya whe yugha hodulꞌehne, buboodulhkut, “Si, Yinka Dune Yeꞌ ꞌustꞌoh, dunene, mbe whe ꞌustꞌoh hutni?”

¹⁴ ꞋEt ꞌuhuyulhni, “Whulohne, nyun John dune too be ꞌulhꞌen-un ꞌintꞌoh hutni. Whulohne cha, Elijah ꞌintꞌoh hutni. ꞋOnghohne cha, Jeremiah ꞌintꞌoh hutni. ꞋInkꞌez whulohne nus hooꞌen-un ꞌilhoghun ꞌintꞌoh hutni.”

¹⁵ ꞋEt ꞌubulhni, “Nohni doꞌ, mbe ꞌustꞌoh dahni?”

¹⁶ ꞋEt Simon Peter yatilhduk, “Nyun Christ, Yakꞌusda khuna-un, ꞌen ooYeꞌ ꞌintꞌoh,” yúlhni.

¹⁷ Jesus ꞌuyulhni, “Simon Jonah ooyeꞌ, ꞌukꞌenus hoonzoo-un nghá whultsꞌut! ꞋAw ndi yun kꞌut dune iloh nyunalhtsꞌet ha húhonꞌai. ꞋUBá yakꞌuz usda-un, nyunalhtsꞌet ha honꞌai.

¹⁸ ꞋInkꞌez nyudúsni, nyun Peter ꞌintꞌoh. ꞋEt ndi tse ꞌi kꞌut slugliz neootasꞌalh. Njan Kwuncho ulhtus-i yo tsꞌu haindilne, ꞌenne hoontsꞌi ꞌaw whuchꞌa hoolhdeh ꞌaitꞌoh.

¹⁹ ꞋEt yakꞌuz whulerwe usda-un, whulugli ntlꞌa tisdlelh. Ndai la yun kꞌut whedinguz-i, ꞌet ꞌudaꞌ yakꞌuz cha whedintꞌi. ꞋEt ndai la ndi yun kꞌut kꞌunainꞌuk-i, ꞌet yakꞌuz cha ꞌudaꞌ whuz unꞌa kꞌunatitꞌuk.”

²⁰ ꞋInkꞌez yugha hodulꞌehne khuniti be ubúlhni, “Khun te ꞌuyoonne dóhniꞌ junih si Jesus Christ, ꞌustꞌoh.”

Dzoh nutizut-un ꞌinkꞌez datítsah-un, ꞌet Jesus huwu yalhduk

²¹ ꞋEt whutsꞌun Jesus yugha hodulꞌehne, whubunulhtun nus daootanelh la. Jerusalem tsꞌu tiyalh. Keyoh ꞌutso whudilhdzulhne, lubret bumoodihne, ꞌinkꞌez Moses be ꞌudustlꞌus ꞌukꞌu nunáguzne cha, ꞌenne bube lhat-un whe dzoh nuhítilhdzut, ꞌinkꞌez hituzilhghelh. ꞋInkꞌez whulh tát dzin dunadutádalh.

²² ꞋEt Peter Jesus ꞌudun neínilhti ꞌinkꞌez hukwaꞌ yudániꞌ, “SMoodihti nyun Yakꞌusda ngha teꞌuntazeh! ꞋAw nyulh ꞌet ndúhoneh ꞌaitꞌoh!”

²³ Peter yutsꞌu nálhꞌa ꞌinkꞌez ꞌuyulhni, “Satan stꞌa nenínyaih! Sba dzoh ꞌudini! Yakꞌusda datꞌen-un, ꞌaw howu nuni lhnuzinzut. Ndi yun kꞌut dune neꞌhutꞌen-un, huwun nuni ninzut!”

Mbe la whe khuna-un Jesus gha ninta ooninꞌai de, ꞌen whe khuna-un whuchꞌa ootalhdoh

²⁴ Jesus ꞌet yugha hodulꞌehne ndúbulhni, “Dune seꞌ ꞌutꞌen kꞌoh ootꞌen ha suntiyalh hukwaꞌ ninzun de, yun kꞌut datsꞌíntꞌoh-un, ꞌet whula dootni, ꞌinkꞌez dutulalhgus yólhchoot ꞌinkꞌez suntooyaꞌ.

²⁵ Whe khuna-un huwu hotilhyihne, ꞌenne ninta huhútaꞌalh. ꞋEt hoontsꞌi mbe la whe khuna-un si sgha ninta ooninꞌai de, whe khuna-un nahootáꞌalh.

²⁶ Dune ndi yun nduwhúlcho oochꞌeꞌ whúzdliꞌ de, ꞌinkꞌez duzul ꞌi ninta inínꞌai de, ndet whuchꞌa óotaldoh? Kꞌus duzul di kꞌelha suba nayoket?

²⁷ Yinka Dune Yeꞌ whusatiyalh, ooBá ye diztiꞌ-i ꞌinkꞌez oolizas, bubulh, whusatiyalh whe tsꞌiyanne dahitꞌen, whuz unꞌa ꞌilhone whe buba kꞌelha whutilhtselh.

²⁸ Soo tsꞌihꞌun unꞌa nohdusni, whulohne njan núdilhyane, dahutitsah whutsꞌo Yinka Dune Yeꞌ whe lerwe unli-un, whuz unꞌa whuz de uyalh de, dahútitsa whutsꞌo huyuntilhꞌelh.”