Matthew 15 - Yak'usda Ooghuni

Ndai la nedzi be yatsꞌulhduk-i, ꞌi gha tsꞌintsiꞌ lhih

¹ ꞋEt Jerusalem keyoh whutsꞌun ndunne Moses be ꞌudustlꞌus ꞌukꞌu nunáguzne ꞌinkꞌez Phariseene cha Jesus highu nindil ꞌinkꞌez ꞌuhutni,

² “Di ha ngha hodulꞌehne, netsodaꞌne neꞌhustꞌen hukwꞌunꞌa hukwꞌu nulheꞌhustꞌen? Ngha hodulꞌehne, ꞌaw lanalheꞌhulhde ꞌuhutiꞌulh whutso!”

³ ꞋEt ꞌúbulhni, “Di ha nohni nohkꞌoh tsꞌe huwa Yakꞌusda ooghuni ookꞌu nulheꞌzahtꞌen?

⁴ Yakꞌusda dughuni nohtlꞌa idanꞌai whe njan ndutni, ‘Mbá ꞌinkꞌez nloo bulh hubudólhtiꞌ. Mbe la duloo ꞌinkꞌez dubá bulh dzoh tsꞌe bughu yatilhduk-un, daootsa huba ꞌuntꞌoh.’

⁵ ꞋEt nohni ꞌudahni, ‘Mbe la dubá kꞌus duloo ndai ꞌustꞌi-i, ꞌi be daꞌ nohla ꞌoostꞌen ooleꞌ, ꞌi tsꞌiyawh Yakꞌusda gha núsdla.’

⁶ ꞋEt whuz unꞌa nohꞌeꞌutꞌen kꞌoh be ꞌaw duloo ꞌinkꞌez dubá bulh lhubudílhtiꞌ. ꞋI be Yakꞌusda ooghuni nohtlꞌa idanꞌai-i, ꞌi ꞌaw hoonli lhiloh sulhtsi!

⁷ Duba naꞌudzooꞌne ꞌahli! Nus hooꞌen Isaiah, ꞌen ꞌudaꞌ honꞌen ꞌinkꞌez tsꞌihꞌun unꞌa ꞌutni nohni nohghun. Njan ndutni,

⁸ ‘Ndunne dughuni be be za sodílhtiꞌ. ꞋEt hoontsꞌi budzi, sghun nilhdzaꞌ ꞌuntꞌoh.

⁹ Ndunne ꞌantsꞌet stsꞌun teni ꞌuhunoolhzin. ꞋI Yakꞌusda ooghuni netlꞌa idanꞌai-i ꞌi kꞌunꞌa dune khuni be whubohodulhꞌeh.’”

¹⁰ ꞋEt Jesus ꞌilhunaoodulhne, “ꞋAnih! Diz áhdulh!” ꞌinkꞌez ndúbulhni, “Soo zúlhtsꞌai ꞌinkꞌez tꞌeoonahzeh!

¹¹ Dune buza yúkat-i, ꞌet whe íloh hintsiꞌ hulhih. Khuni ꞌaw lhizooꞌ-i ye yalhduk-i, ꞌi be dune hintsiꞌ lhih.”

¹² ꞋEt yugha hodulꞌehne highu nindil whe ꞌuhuyulhni, “Tꞌeoonínzun eh Phariseene nyodantsꞌo whe buba dzoh ꞌúdinja?”

¹³ ꞋEt Jesus ꞌubulhni, “ꞋUBá yakꞌuz usda, ꞌaw ꞌalhinilel-i, ꞌi ooghih tubulh ha hitilhchꞌulh.

¹⁴ Butsꞌá ha lhozahꞌai! Moodih hoos̱ꞌenne leꞌ hintꞌoh. ꞋEt ndiz unꞌa njan duhoontꞌoh, ꞌilhoghun hoos̱ꞌen-un ꞌinkꞌez ꞌilhoghun hoos̱ꞌen-un ghunli de, nahúltꞌoh tsa kꞌet ꞌá hatiltsꞌulh.”

¹⁵ Peter uyúlhni, “Ndi be nawhutnuk ꞌi be whutsꞌodulꞌeh-i be whunénilhtun.”

¹⁶ ꞋEt ꞌuyulhni, “ꞋAw eh noheni talhodulhtsꞌit whe eh dahni?

¹⁷ ꞋAwhuz eh tsꞌihꞌun nelhózahꞌai? Dune ooza yúkat-i, oobut be yukat. ꞋInkꞌez ooyustꞌe tsꞌu ha náyukat.

¹⁸ ꞋEt dune khuni be yailhduk-i, budzi tsꞌu ha yúkat ꞌi ꞌuntꞌoh, ꞌinkꞌez ꞌi dune dilhtsꞌi.

¹⁹ Dune budzi bez ha yúkat, be ne-eni untsiꞌ-i, dune hutuzilhghelh, ꞌuyoon dune ooꞌat kꞌus ꞌuyoon tsꞌeke ooki bulh nintaꞌantꞌen-un, ꞌinkꞌez ꞌaw lhghulhdiltsꞌine hoontsꞌi whuz unꞌa za neꞌhutꞌen. ꞋUndunutꞌih-un, ꞌuyoonne ba whutsꞌit-un, ꞌinkꞌez Yakꞌusda chꞌaz yalhduk-un cha.

²⁰ Ndowhi-i dune hintsiꞌ hulhih. ꞋAw lanalheꞌzulhde whe ꞌahꞌalh-un, ꞌaw ꞌet huwa iloh hintsiꞌ hulhih.”

Tsꞌeke, ꞌudun yun kꞌut whutꞌen-un, ooba ꞌalha ꞌuhoontꞌoh hooncha wheꞌ hoontꞌoh

²¹ ꞋEt Jesus nyo usda-un whuchꞌa nasja whe Tyre ꞌinkꞌez Sidon whunat ꞌoh ho tsꞌu wheínya.

²² ꞋIlhoghun tsꞌeke, Canaan whutꞌen-un ꞌuntꞌoh, yughu ninya. Tso bulh yalhduk wheꞌ yulhni, “SMoodihti sgha teꞌninzeh, David ootsꞌuhainzut-un ꞌintꞌoh! Syaz tsꞌekeyaz tube hoontsiꞌ hukwꞌunꞌa ntsiꞌ-i nududeh-i ooyudinda!”

²³ ꞋEt ꞌaw daja lhidínel. ꞋEt yugha hodulꞌehne highu nindil ꞌinkꞌez ꞌuhuyulhni, “Nꞌun nailhꞌalh, ꞌet la tso bulh yalhduk-un ꞌetsul udónih.”

²⁴ ꞋEt ꞌubulhni, “Israel ooyoh whutꞌine, ꞌusbai ninta nihꞌaz-i leꞌ ꞌuntꞌohne, ꞌenne za butsꞌún tizꞌaꞌ.”

²⁵ Tsꞌeke yughu ninya whe yubut nachaniti ꞌinkꞌez, “SMoodihti, sla ꞌineh!” yulhni.

²⁶ ꞋEt Jesus ꞌutni, “Tsꞌoodunne yuꞌalh-i lhikeyaz gha óohꞌalh junih.”

²⁷ ꞋEt tsꞌeke ꞌuyulhni, “SMoodihti ꞌalha dini. ꞋEt hoontsꞌi moodihti ludab kꞌut tukat-i, ꞌi lhikeyaz huyuldil.”

²⁸ ꞋEt Jesus ꞌuyulhni, “ꞋOoh tsꞌeke hooncha whe mba ꞌalha ꞌuhoontꞌoh-un, ꞌet hooncha wheꞌ hoontꞌoh. ꞋEt huwa hukwaꞌ ninzun kꞌunꞌa ꞌuhoneh.” ꞋOh whuya hoozulh-un, ooyatsꞌe soo naꞌuja.

Lhane undudane, Jesus usda-un highu nindil ꞌinkꞌez tsꞌiyawh soo náꞌbalhꞌen

²⁹ ꞋEt Jesus bughu natisja whe Galilee bun taba lhusuya ꞌinkꞌez ndo dzulh kꞌuz whinya, ꞌet natlꞌa didaꞌ.

³⁰ ꞋEt lhane dune, highu nindil. Mbene la nulhúsdilne, hoos̱ꞌenne, yalhulhdukne, ooyustꞌe bodinlane, ꞌuyoonne cha, tsꞌiyawh hitsꞌu botule. Hibut neboninla ꞌinkꞌez tsꞌiyawh soo náꞌbalhꞌen.

³¹ Yalhulhdukne cha yawhehunilhduk, ooyustꞌe bodinꞌaine, cha soo naꞌhuja. Nulhúsdilne cha nahúdilh nahusdliꞌ, hoos̱ꞌenne cha hoohooꞌen nahusdliꞌ. Tsꞌiyanne bunalhꞌen whe tube buba hooncha ꞌinkꞌez Israel whudune buYakꞌusda ꞌen hidálhtiꞌ.

Jesus 4,000ne gháꞌ ninꞌai

³² Jesus yugha hodulꞌehne, ꞌanih ubudániꞌ ꞌinkꞌez ꞌúbulhni, “Ndunne dunene bugha téꞌnuszun. Tat dzin whutsꞌun njan szih hudilhtsꞌi ꞌinkꞌez ꞌaw huyaꞌalh-i lhuhítꞌiꞌ. ꞋAw lheꞌhusꞌal whe bukeyoh tsꞌe nabutoosꞌaꞌ ꞌaitꞌoh. Doo ka si, nahidulh tsꞌe bukaootoozit.”

³³ Yugha hodulꞌehne huyulhni, “Njan dune hooloh-un ꞌuhoontꞌoh. Ntsꞌez de suba soo ꞌúltsuk-i ꞌutꞌalh-i natsꞌólelh lheꞌultsukne dune gháztiꞌalh-i?”

³⁴ ꞋEt Jesus ubúlhni, “Daltsuk lhes sutꞌe ahtꞌi?” “Lhtakꞌantꞌi lhes sutꞌe ꞌinkꞌez lho ntsꞌoolyaz bulh,” huyulhni.

³⁵ ꞋEt ꞌilhozdilne natlꞌa dulhtsꞌi ꞌubulhni.

³⁶ ꞋInkꞌez lhes lhtakꞌantꞌi lho bulh yílhchoot ꞌinkꞌez musi ni whe tenadidli. Taidanyuz ꞌinkꞌez yugha hodulꞌehne butlꞌa yánkai. ꞋI natlꞌa diltsꞌine butahinínla.

³⁷ Tsꞌiyawh naꞌhitꞌal ꞌinkꞌez ꞌuhunisdai. Yugha hodulꞌehne lhtakꞌantꞌi chalhyal dizbun ꞌi highá ꞌozꞌal-i nahuyalhdzoo.

³⁸ 4,000ne atꞌen ꞌuhanꞌal. Tsꞌoodunne ꞌinkꞌez tsꞌekoo bubulh ꞌalhgoh.

³⁹ ꞋEt ꞌawet Jesus ꞌilhunaoosdilne bukeyoh tsꞌe whe nábalhꞌaꞌ, tsꞌi be naja ꞌinkꞌez yun Magdala huwhutni tsꞌe whehánki.