Matthew 14 - Yak'usda Ooghuni

John dune too be ꞌulhꞌen-un hizilhghi

¹ ꞋEt ꞌoh whuya whudizulh whe lerwe Herod Jesus yulh ꞌúdantsꞌo,

² ꞌinkꞌez Herod de ꞌustlenne ꞌubulhni, “Ndun ꞌen John dune too be ꞌulhꞌen-un, ꞌen ꞌuntꞌoh. Yaidlane toh nahítnaꞌ. ꞋEt huwa ꞌutꞌen hoolhtus teneꞌútꞌen.”

³ ꞋOh daꞌ Herod John huyílhchoot huyulhghel ꞌinkꞌez ꞌahúyanꞌai. Bulhutsin Philip ooꞌat Herodias huyulhni, ꞌen la toh tsꞌe ꞌuyinla.

⁴ John Herod yúlhni, “ꞋAw nyun mba tsꞌihꞌun unꞌa lheꞌhootꞌoh whe ꞌuyoon ooꞌat oozih sinda.”

⁵ Herod yutuzilhghelh hukwaꞌ ninzun. ꞋEt hoontsꞌi dunene John ꞌen nus hooꞌen-un ꞌuntꞌoh huninzun, ꞌet huwa Herod bube nilhjoot.

⁶ ꞋEt ꞌilhoh dzin Herod whuzdli dzin ꞌuhoontꞌoh ꞋEt Herodia ootseꞌ ꞌen bubut nídai. Herod ooba hoonzoo.

⁷ ꞋEt ꞌaho yutsꞌu náhizya whe ꞌuyulhni, “Ndet stsꞌo hukwaꞌ ninzun-un stsꞌo hukwa dini.”

⁸ Nyoon tsꞌeke ooloo, “Herod oodilhkut John dune too be ꞌulhꞌen-un ootsi lusyet be stlꞌa inkaih dóniꞌ,” yulhni.

⁹ ꞋEt huwun lerwe oodzi únduda suliꞌ. ꞋEt yuzih dilhtsꞌine, ꞌenne tsꞌiyawh hidántsꞌo, ꞌet whe tsꞌekeyaz dughuni yutlꞌa idanꞌai. Whuz unꞌa ꞌuhuyooleh ubúlhni, ꞌinka nduhínla.

¹⁰ ꞋEt ꞌadinꞌai tsꞌe whuz whe yálhꞌaꞌ, ꞌinkꞌez ꞌadinlane ghunline, John hitsi kꞌúnintsel.

¹¹ ꞋInkꞌez lusyet be whusahúyankai, ꞌinkꞌez tsꞌekeyaz tlꞌa húyankai. ꞋInkꞌez duloo yughi nínkai.

¹² Yugha hodulꞌehne, ꞌenne whusahandil. Hizi huyilhchoot ꞌinkꞌez ꞌahúyalhti. ꞋEt hukwꞌelhꞌaz Jesus tsꞌu whehandil ꞌinkꞌez hidániꞌ.

5,000ne dunene Jesus huyooꞌalh-i bugha nínꞌai

¹³ Jesus whulh ꞌudantsꞌo whe buchꞌa násja ꞌinkꞌez tsꞌi beinya ꞌinkꞌez disoh tsꞌe whinínki. ꞋEt hoontsꞌi lhane dune tꞌehonanzin ibulh ntsꞌe nehúninki tsꞌe, whuz lhelhdun keyoh whutꞌenne hiyuwhenándil.

¹⁴ Jesus tsꞌi bé hainya whe dune huldlai kꞌet ꞌaw ꞌuzdooniꞌ ꞌaitꞌoh, ꞌenne butilhꞌen. Bugha téꞌninzin ꞌinkꞌez ndudane cha tsꞌiyawh soo naꞌbinla.

¹⁵ ꞋAwet hulhgha ꞌuhoontꞌoh. Yugha hodulꞌehne highu nindil ꞌinkꞌez huyulhni, “Njan disoh ꞌuhoontꞌoh. ꞋAwet yoo ꞌun hoozulh. Ndunne ꞌutsꞌun keyoh tsꞌe nabalhꞌalh, whuz la huyaꞌalh-i hoket.”

¹⁶ ꞋEt hoontsꞌi Jesus ndubulhni, “ꞋAw nahutoodilh huba lheꞌhóotꞌoh. Nohni bugha nanahtꞌaih.”

¹⁷ ꞋEt ꞌuhuyulhni, “Lhes kwulaiꞌ ꞌinkꞌez lho nanki, ꞌaw ꞌi za tsꞌutꞌi.”

¹⁸ ꞋEt ꞌubulhni, “Diz stsꞌóhlelh!”

¹⁹ ꞋIlhunaoosdilne, tlꞌoyaz kꞌut natlꞌa hudooltsꞌih ubúlhni. Kwulaiꞌ lhes ꞌinkꞌez nanki lho cha, ꞌi hitlꞌa húyanla whe ndo whúnalhꞌen, musi ni whe tenadidli. Lhes taidanyuz ꞌinkꞌez lho cha ꞌet ndiyinla ꞌinkꞌez yugha hodulꞌehne butlꞌa yánla, ꞌilhozdilne bugha húyoꞌalh ha.

²⁰ Tsꞌiyawh ꞌuhanꞌal ꞌinkꞌez ꞌuhunisdai. Chꞌutízkat-i tsꞌiyawh nahuyalhdzoo whe whunizyai ꞌon ꞌat nanki chalhyal dizbun.

²¹ ꞋEt dunene, ꞌankwꞌus 5,000ne ꞌuhanꞌal, tsꞌoodunne ꞌinkꞌez tsꞌekoo tubulh.

Jesus too kꞌut nuya

²² ꞋAho Jesus yugha hodulꞌehne tsꞌi bez whe nábalhꞌaꞌ whe, “Stso nyan ꞌahkelh,” ꞌubulhni. ꞋInkꞌez ꞌilhunaoosdilne, dukeyoh tsꞌe whe nábalhꞌaꞌ.

²³ Ndunne whe nábalhꞌaꞌ whe didutchꞌoh ndo dzulh kꞌuz whinya tenadutidli ha. Dichꞌoh ꞌet bé nadalhghel.

²⁴ ꞋEt ꞌawet tsꞌi bun kꞌut taniz ꞌoh whuya ukwus nilhtsꞌi tube búdudiztsꞌi, ꞌantsꞌi lhelhtsꞌú hudildus.

²⁵ ꞋAwet bundadaꞌ yutilhkai whe Jesus too kꞌut butsꞌu tizya.

²⁶ Khuntsul yugha hodulꞌehne hitilhꞌen whe hunílhjoot, “Dune tsin ꞌutꞌen!” hutni ꞌinkꞌez tsoya whe húnilhjoot.

²⁷ ꞋAho Jesus butsꞌu yatilhduk, “Nohdzi hóte! Si ꞌustꞌen! Whenulhjut íloh!”

²⁸ Peter yoodulhkut, “SMoodihti ꞌalha nyun ꞌintꞌen de, too kꞌut ntsꞌu toosyaꞌ-un stlꞌa hóonꞌaih.”

²⁹ ꞋEt ꞌuyulhni, “ꞋAnih!” Peter tsꞌi be hainya ꞌinkꞌez Jesus too kꞌut yutsꞌu tizya.

³⁰ ꞋEt nyo whunilhꞌen whe nilhtsi tube ulhtus ꞌinkꞌez whenilhjoot ꞌinkꞌez yo útizdlat whe, “SMoodihti, sla ꞌineh!” dija.

³¹ ꞋAho Jesus yula súgooh whe ꞌuyulhni, “ꞋAw soo ꞌultsuk-i be ꞌalha ꞌuhoontꞌoh-i lhintꞌih. Di ha mba nawh ꞌuhoontꞌoh?”

³² Tsꞌi be náhitꞌaz whe ꞌaho nilhtsꞌi kꞌoh ꞌúja.

³³ Tsꞌi bet dilhtsꞌine, tsꞌiyawh hibut nachánilya ꞌinkꞌez ꞌuhuyulhni, “ꞋAlhaꞌ nyun Yakꞌusda ooYeꞌ ꞌintꞌoh!”

Gennesaret whutꞌenne undudáne Jesus soo naꞌbulhꞌen

³⁴ Nyan Gennesaret tsꞌe yahuzki.

³⁵ ꞋEt keyoh whutꞌenne Jesus nahuyóolhtsꞌit whe lhtunuhúnihustꞌai. Tsꞌiyawh ndudane hitsꞌú boohoozdla.

³⁶ “Nyunaih naintsꞌuz-i ꞌantsꞌi yus tsꞌe ootꞌá tsꞌonalh,” huyulhni. Mbene yutꞌaiznaine, tsꞌiyawh soo náꞌhuja.