Matthew 13 - Yak'usda Ooghuni

Khuni be whutsꞌodulꞌeh-i ꞌaꞌ nule-un ghun

¹ ꞋEt dzin za Jesus yoh teninya ꞌinkꞌez tabá natlꞌa didaꞌ.

² Dune lhane higha oozdil ꞌinka tsꞌi beinya, ꞌinkꞌez tsꞌi bet natlꞌa didaꞌ. Tsꞌiyawh taba ꞌet nódilhya.

³ Khuni be whutsꞌodulꞌeh-i ꞌet lhelhdun huwa bubulh yalhduk whe ndúbulhni, “Soo zulhtsꞌai, ꞌilhoghun ꞌaꞌ nule-un ꞌaꞌ ntilelh tsꞌe whinya.

⁴ ꞋInkꞌez ꞌaꞌ nule whe ooloh ti nanánkat. ꞋI dutꞌaiyaz whusahándil ꞌinkꞌez hinildil.

⁵ Ooloh tse toh nanánkat. ꞋAho há nuski, ꞌankwꞌus yun hooloh huwa.

⁶ Ooghih hooloh huwa ha sainꞌai whe tsꞌiyawh yanúdizgi.

⁷ Ooloh cha whus toh nanánkat. ꞋI cha whus cho whutoh bulh dúduninyai ꞌinkꞌez bulh lhéwhultloh.

⁸ ꞋOnghoh-i yun unzoo-i kꞌut nanánkat whe soo ha nanyai. Oomaiꞌ whulokhi whunizyat whunizyai (100) oomaiꞌ suliꞌ, whulukhi lhkꞌu tat whunizyai (60) oomaiꞌ suliꞌ, whulokhi tat whunizyai (30) oomaiꞌ suliꞌ.

⁹ Mbe la oodzo hoonli-un, ꞌen whudotsꞌo.”

Khuni be whutsꞌodulꞌeh-i, ꞌi be za Jesus bubulh yalhduk

¹⁰ ꞋEt yugha hodulꞌehne highu nindil, ꞌinkꞌez ꞌuhuyúlhni, “Di ha ndi khuni be whutsꞌodulꞌeh-i be za bubulh yaílhduk?”

¹¹ ꞋEt ndúbulhni, “Yakꞌuz be kꞌúneꞌ whulꞌen-un be whe hoontꞌoh hooyoh-i, daja ni-un, nohni nohghá whuntꞌai. ꞋOnghohne ꞌaw bugha lhúhooltsꞌulh.

¹² Mbe la eꞌutiꞌ-un, ꞌon nus lhat oogha whútiltsꞌulh. ꞋInkꞌez mbe hoonli lhitiꞌ-un, ꞌi hoontsꞌi bughu nayitálchulh.

¹³ ꞋEt huwa khuni be whutsꞌodulꞌeh-i, ꞌi be za bubulh yasduk. Nuhiyuꞌen hoontsꞌi ꞌaw lhuhoohoosꞌen. ꞋInkꞌez ꞌuwhuditsꞌo hoontsꞌi ꞌaw lhuhodústsꞌo, ꞌaw tꞌehonoozeh ꞌaitꞌoh.

¹⁴ ꞋEt Isaiah nus honꞌen daja ni ꞌenne bughun tsꞌiyawh lhaóodulya. Njan dutni, ‘Whudahtsꞌo ꞌet hoontsꞌi ꞌaw tꞌelhonuzahze. Whunulhꞌen ꞌet hoontsꞌi ꞌaw tsꞌihꞌun nelhózahꞌai.

¹⁵ Ndunne dune budzi bubaꞌ hoontꞌoh suliꞌne ꞌet huwa, ꞌinkꞌez ꞌaw hoonli hodótsꞌo-un hooloh, duna cha hinilhtsul, doo ka si hoohooꞌen ooleꞌ whuchꞌa. ꞋInkꞌez ooka si huwu dotsꞌo ꞌet whuchꞌa. Doo ka si dudzi be tꞌehonoozeh, ꞌinkꞌez nahundunoodulh. ꞋInkꞌez daꞌ Yakꞌusda uboolhyih,’ ni Isaiah.

¹⁶ ꞋEt hoontsꞌi nohni nohna be whunulhꞌen-un, tsꞌihꞌun unꞌa whunulhꞌen. ꞋInkꞌez nohdzeh whe soo whúdahtsꞌo, ꞌet huwa ꞌukꞌenus hoonzoo-un nohghá whultsꞌut.

¹⁷ Tsꞌihꞌun ꞌunohdusni, ꞌudaꞌ lhane nus hooꞌenne ꞌinkꞌez tsꞌihꞌun ꞌuntꞌohne, ndai la nulhꞌen-i, ꞌi huyuntilhꞌelh hukwaꞌ huninzun, ꞌet hoontsꞌi ꞌaw lhuhuyíꞌel! Ndet la whudahtsꞌo-un, hodutatsꞌo hukwaꞌ huninzun, ꞌet hoontsꞌi ꞌaw lhuhodátsꞌil.”

Khuni be whutsꞌodulꞌeh-i be ꞌaꞌ nule-un, ꞌen ghun ba whe ꞌutni

¹⁸ “ꞋEt huwa ndi khuni be whutsꞌodulꞌeh-i be ꞌaꞌnulih-un, ꞌen ghun, njan ndutni ꞌet hoosúlhtsꞌai:

¹⁹ Mbe la yakꞌuz ꞌuhuhoolhdzun-un whulh ꞌúhuditsꞌo ooghuni daja ni whe ꞌutni ꞌaw tꞌehonuszun te, ntsiꞌ-un whusayaih ꞌinkꞌez budzi be ha naídaꞌaih! ꞋI ꞌuntꞌoh ti whuzih ꞌanilya-i, unli.

²⁰ Tse toh ꞌanilya-i, khuni hiditsꞌo te, ꞌinkꞌez ꞌaho huhóontꞌiꞌ whe huyilhchuk.

²¹ ꞋEt hoontsꞌi didutchꞌoh ꞌaw bughih hooloh leꞌ hintꞌoh. ꞋEt huwa ꞌatsulyaz za buba ꞌalha ꞌuhoontꞌoh ꞌinkꞌez ndi khuni ꞌi gha dzoh nuhudeh ꞌinkꞌez ꞌonghohne buchꞌaz huditni. ꞋAho whula hudutnih.

²² Whus toh ꞌanankat-i, khuni hiditsꞌo, yun kꞌut huwu ni nuzut, hoonzooꞌ hoontꞌoh be naznutaꞌ-i, whus cho be bulh lheyúllhuk ndultꞌoh. ꞋEt huwa ꞌaw lhadúlyane hooleꞌ ꞌaitꞌoh.

²³ ꞋEt hoontsꞌi yun unzoo-i kꞌéninkat-i leꞌ ꞌuntꞌohne. Yakꞌusda ooghuni hiditsꞌo-i, tꞌehinuzih te daja ni whe ꞌutni. ꞋEt bumaiꞌ lhai lhih leꞌ hintꞌoh. Whulukhun whunizyat whunizyai (100) ꞌulhih. Whulukhun lhkꞌu tat whunizyai (60) ꞌulhih. Whulukhun tat whunizyai (30) ꞌulhih.”

ꞋUyoo khuni be whutsꞌodutilꞌeh-i, ꞌi ntsꞌenꞌa la yakꞌuz lerwe ꞌuhuhoolhdzun-un

²⁴ ꞋUyoo khuni be nawhutnuk-i be whutsꞌodulꞌeh-i, be bubulh yalhduk ꞌet whe njan dúbulhni, “Yakꞌuz lerwe ꞌuhuhoolhdzun-un, ꞌet ndiz unꞌa njan dúhoontꞌoh: Dune duyun kꞌut ookwꞌut ꞌaꞌ nukat. ꞋUzooꞌ-i ꞌananla.

²⁵ Huztez whe dune yuchꞌaz ditni-un whusainya. ꞋAinanla-i ꞌuzooꞌ-i toh, ꞌutꞌantsiꞌ tsꞌutni, ꞌi yutoh ꞌananla, ꞌinkꞌez whe naja.

²⁶ Tsꞌiyawh ha nányai whe ꞌutꞌantsiꞌ cha bulh ha inanyai.

²⁷ ꞋEt yoh whumoodih be ꞌulhnane highu nindil ꞌinkꞌez ꞌuhuyulhni, ‘Nemoodih unzoo-i ꞌi za ha lawk ꞌainanla? Dantꞌoh ꞌutꞌantsiꞌ ootoh ha nalhya?’

²⁸ ꞋEt ꞌubulhni, ‘Schꞌaz ditni-un la ꞌuyínla.’ Be ꞌulhnane huyulhni, ‘ꞋUtꞌantsiꞌ, ꞌi ha tsꞌúntilelh hukwaꞌ ninzun eh?’

²⁹ ꞋEt ꞌubulhni, ‘ꞋAwúndooh! Whute ꞌuntꞌoh doo ka la unzoo-i cha bulh ꞌóohleh.

³⁰ Whute ꞌet ndulhdzun haꞌ úntikulh whutsꞌun. ꞋEt ꞌawet haꞌ nukat-un neooninzut de, haꞌ untilelhne, si budósniꞌ, ꞌudechoo ꞌutꞌantsiꞌ ha nálhle ꞌinkꞌez bulhghel dutákꞌun huba. Unzoo-i tsꞌiyawh ha náhle ꞌinkꞌez ha níyeh-i bayoh whuz daníhdzai.’”

Yakꞌuz lerwe ꞌuhuhoolhdzun-un, mai, mustard huyulhni, ꞌi kꞌunꞌa ꞌuntꞌoh

³¹ Doo cha ꞌuyoo khuni be nawhutnuk-i be whutsꞌodulꞌeh-i be bubulh yalhduk. Njan dúbulhni, “Yakꞌuz lerwe ꞌuhuhoolhdzun-un, ꞌet ndiz unꞌa njan duhoontꞌoh. Mai, mustard huyulhni, kꞌunꞌa ꞌuntꞌoh. Dune yílhchoot ꞌinkꞌez duhanuyeh kꞌet ꞌainanꞌai.

³² Ndi mai ꞌi ꞌukꞌenus nintꞌum-i, ꞌi ha nányih te ꞌukꞌenus dincha suliꞌ. Ndi mustard huyulhni oochun, mai chun tsꞌiyawh ba ndo idilyiz ulih. ꞋI dutꞌaiyaz dutꞌaiyaz oozischum toh tꞌo ulhꞌi.”

Yakꞌuz lerwe ꞌuhuhoolhdzun-un, lhes ntuldoh-i ndultꞌoh

³³ Doo cha ꞌuyoo khuni be nawhutnuk-i be whutsꞌodulꞌeh-i, ꞌi be bubulh yalhduk whe njan dúbulhni: “Yakꞌuz lerwe ꞌuhuhoolhdzun-un, lhes ntuldoh-i ndultꞌoh. Tsꞌeke yílhchoot ꞌinkꞌez lhes nudzaih-i, ta tsetsꞌai be úndeꞌooldzih-i dizbun. ꞋI ntuldoh-i bulh ꞌilho be yándzai, ꞌinkꞌez yunilhtlus. ꞋEt hukwꞌelhꞌaz ꞌudun neíninkai whe untílhdo.”

Khuni be nawhutnuk-i be whutsꞌodulꞌeh-i, ꞌet whuz unꞌa za Jesus ꞌilhunaoodulhne bubulh yailhduk

³⁴ Ndi tsꞌiyai khuni be nawhutnuk-i be whutsꞌodulꞌeh-i, ꞌet whuz unꞌa za Jesus ꞌilhunaoodulhne bubulh yailhduk. ꞋAw ꞌutsꞌun unꞌa lheꞌbudínel.

³⁵ Nus hooꞌen-un daja daniꞌ la, lhaóodontneh ha ndutni: “Khuni be nawhutnuk-i be whutsꞌodulꞌeh-i, be bubulh yatisduk. Yun ꞌuyinla ꞌet whutsꞌun, buchꞌa yuntizꞌi-i, ghun budutásnelh.”

ꞋUtꞌantsiꞌ ha nányai-i ghun whubuntilhtun

³⁶ ꞋEt Jesus ꞌilhozdilne whe nábalhꞌaꞌ ꞌinkꞌez yoh danínya. ꞋEt yugha hodulꞌehne highu nindil ꞌinkꞌez huyúlhni, “Ndi khuni be nawhutnuk-i be whutsꞌodulꞌeh-i, nedini ndi ha niyeh toh ꞌutꞌantsiꞌ ha nányai-i?”

³⁷ ꞋEt dúbulhni, “Unzoo-i ha nányai oomaiꞌ ꞌi, ꞌainanla-un, ꞌen Yinka Dune Yeꞌ ꞌuntꞌoh.

³⁸ Ha niyeh kꞌet, ꞌi yun kꞌut ꞌuhoontꞌoh. Mai unzoo-i, ꞌi yakꞌuz whulerwe buzkehne, nuhíntꞌoh. ꞋEt hoontsꞌi ꞌutꞌantsiꞌ, ꞌi ntsiꞌ-un buzkeh nuhíntꞌoh.

³⁹ Yuchꞌaz ditni-un, ꞌutꞌantsiꞌ ꞌainanla-un, ꞌen netsudule. Haꞌ nukat-un ꞌandit whudizulh whula toh. Haꞌ úntilelhne, ꞌenne lizas ꞌuhutinela.

⁴⁰ ꞋEt huwa ꞌutꞌantsiꞌ nahidulhdzooh ꞌinkꞌez hidilhkꞌun, ꞌandit whudizulh-un whula toh de, ꞌet nduwhutanelh.

⁴¹ Yinka Dune Yeꞌ, dulizas whuz de ꞌubutilhꞌalh whulerwe unli-un, mbene hukwaya hoonli tuneꞌ ꞌústꞌenne, ꞌinkꞌez yukꞌunulheꞌustꞌenne, tsꞌiyawh ꞌilhubohotálelh.

⁴² ꞋInkꞌez ntsꞌe la kwun dizkꞌun hubaꞌ hoontꞌoh-un, whuz hubotilhdulh. ꞋInkꞌez tso yahutilhduk ꞌinkꞌez dughoo lhuhidutikꞌus.

⁴³ ꞋEt de la mbene la tsꞌihꞌun ꞌuntꞌohne, buBá lerwe unli-un, sa kꞌunꞌa butsꞌu haítiduz wheꞌ hoontꞌoh. Mbene la oodzo hoonline huyoozólhtsꞌai.”

Yakꞌuz kꞌuneꞌ whulꞌen-un, dáwhudiztiꞌ la, ꞌet ndiz unꞌa njan dúhoontꞌoh

⁴⁴ “Doo cha za nohdusni, yakꞌuz kꞌúneꞌ whulꞌen-un, dáwhudiztiꞌ la ꞌet diz unꞌa njan dúhoontꞌoh. Ndun dune njan yun kꞌut hoonzoo-un, ꞌet ꞌoh ho nunúta whe hoonliyaz diztiꞌ-i, ꞌi la nayinꞌai. ꞋInkꞌez ꞌon yo nayuntilhꞌi. Hoontꞌiꞌ kꞌet hoonli yutꞌi-i ꞌi tsꞌiyawh ye ꞌónket ꞌinkꞌez yun ndulcho whe yonket.”

Doo cha za yakꞌuz kꞌúneꞌ whulꞌen-un, dáwhudiztiꞌ la

⁴⁵ “Doo cha za nohdusni, yakꞌuz kꞌúneꞌ whulꞌen-un, ꞌet dune ꞌooket-un nduhultꞌoh. Tse duniztiꞌ-i, pearl huyulhni, kunuta.

⁴⁶ ꞋEn ꞌilho pearl naininꞌai. Hoonli yutꞌi-i, ꞌi tsꞌiyawh ye ꞌónket ꞌinkꞌez kwꞌusul duniztiꞌ-i, yoonanket.”

Yakꞌuz kꞌuneꞌ whulꞌen-un, ꞌet lhembilh tahúyalhdil

⁴⁷ “Doo cha za, yakꞌuz kꞌúneꞌ whulꞌen-un, ꞌet ndiz unꞌa njan dúhoontꞌoh: Lhembilh tahúyalhdil ꞌinkꞌez toot huyigus lhawh didowh-i huzdlooh.

⁴⁸ ꞋEt nohúyigus whe tsꞌiyawh lhtahaháyule. Ndai la lho ꞌutsiꞌ-i, ꞌi tsꞌiyawh tanáhuyulhdilh. ꞋInkꞌez ndai la unzoo-i tsꞌiyawh ntsꞌe ꞌuhitilhꞌelh tsꞌú whehuyulhdilh.

⁴⁹ ꞋEt ꞌawet ntsꞌoya hoozulh whe buba neóoninꞌai-un, ꞌet buba whusahóoltsꞌut de, ꞌet hukwꞌunꞌa za ꞌuwhutánelh. Lizas whusahutidulh, unzoone dune ꞌinkꞌez ntsiꞌne dune lhtahábotilelh.

⁵⁰ Ntsiꞌne, kwun dizkꞌun tsꞌe tsꞌubotutilhlelh. Tso yahutilhduk ꞌinkꞌez dughoo lhuhidutikꞌus.”

⁵¹ ꞋEt Jesus ubúlhni, “Njan ndunóhdusni-un, tsꞌiyawh eh tꞌeoonihzin?” ꞋEt ꞌuhuyulhni, “A, neMoodihti.”

⁵² ꞋEt ꞌubulhni, “ꞋEt huwa Yakꞌusda ooghuni ꞌukꞌeguz-i ꞌinkꞌez yakꞌuz kꞌuneꞌ whulꞌen-un ꞌet huwun wheyodalhꞌeꞌ, dune yoh whumoodih-un ndultꞌoh. Yutꞌi-i toh tsꞌiyawh tsꞌet ha yúle, ꞌandidi-i ꞌinkꞌez ꞌujut-i cha. ꞋEt whuz unꞌa dune hodulhꞌeh.”

Keyoh Nazareth tsꞌe Jesus ooba ꞌalha lheꞌhootꞌohne, ꞌenne tsꞌiyawh hitsꞌu disnih

⁵³ ꞋEt ndi khuni be nawhutnuk-i be whutsꞌodulꞌeh-i, Jesus tsꞌiyantsuk lhaoodinla whe nyo usda-un whuchꞌa nasja.

⁵⁴ ꞋInkꞌez dichꞌoh dukeyoh tsꞌe naoosja whe Lizwif bulugliz ꞌet whe whúbondunilhꞌeꞌ. Tsꞌiyanne buba hooncha ꞌinkꞌez ꞌet ꞌulhodutni, “Ndun dune ntsꞌez de ha hónꞌai ndi khuni whunih-i be yalhduk? ꞋInkꞌez hooncha tuneꞌ ꞌutꞌen cha ꞌutꞌen?

⁵⁵ ꞋAlhaꞌ iloh lakw yoh ꞌuwhulhꞌen-un, ooyeꞌ ꞌuntꞌoh? ꞋInkꞌez ooloo Mary? Bulhutsinke iloh lakw James, Joses, Simon, ꞌinkꞌez Judas?

⁵⁶ Bulhtuske ꞌaw lakw tsꞌiyawh nebulh lheꞌhitꞌoh? Ntsꞌez de ha hónla whe ꞌutni?”

⁵⁷ ꞋInka tsꞌiyawh buba dzoh suliꞌ. ꞋEt Jesus ndúbulhni, “Nus hooꞌen unli-un, tsꞌiyanne yudilhtiꞌ. ꞋEt hoontsꞌi ookeyoh whutꞌenne ꞌinkꞌez dichꞌoh ooyoh, ꞌenne cha ꞌaw lhuhidílhtiꞌ.”

⁵⁸ ꞋEt Jesus ꞌaw buba ꞌalha lheꞌyitꞌoh. ꞋEt huwa dukeyoh ꞌaw lhat-un hooncha tunulhéꞌitꞌel.