Matthew 12 - Yak'usda Ooghuni

Jesus ꞌen natsꞌulyis dzin huMoodihti whe ꞌuntꞌoh

¹ ꞋOya whudizulh whe lizwifne buba nahulyis dzin huhoolhꞌi. Jesus tlꞌo mai ha nuyeh toh uyalh, ꞌinkꞌez yugha hodulꞌehne, cha huyulh udulh whe buye ꞌíltsꞌul. Tlꞌo maiꞌ huyoonuyin ꞌinkꞌez huyaꞌalh.

² ꞋEt Phariseene bubotilhꞌeh Jesus huyoodulhkut, “Ngha hodulꞌehne dahútꞌen ꞌubunilhꞌen eh? ꞋAndit dzin natsꞌulyis dzin ꞌuhoontꞌoh. ꞋEt nduhóotꞌen huba lheꞌhootꞌoh!”

³ ꞋEt Jesus ubúlhni, “Lerwe David daja-un ꞌaw lakw hukwꞌu yalhuzulhduk? ꞋEt ꞌoh daꞌ David ꞌinkꞌez yulh ꞌutꞌenne buye ꞌíltsꞌul whe?

⁴ Yakꞌusda ooyoh daninya whe lhes Yakꞌusda gha tꞌaih-i, ꞌi yanꞌal ꞌinkꞌez yulh ꞌutꞌenne cha huyanꞌal. Lubretne ꞌaw ꞌenne za huyooꞌalh hubaꞌ hoontꞌoh.

⁵ Moses be ꞌudustlꞌus doꞌ, ꞌaw ookꞌu yalhuzulhduk whe eh dahni? Lubret natsꞌulyis dzin lugliz whucho dahunindil ꞌinkꞌez ꞌet ꞌuhutꞌen. Huhoolhdzun-un, ꞌet kꞌehoninyuz, ꞌet hoontsꞌi ꞌaw bukꞌelhúhooltsꞌulh.

⁶ ꞋEt hoontsꞌi nohdusni njan lugliz whucho ꞌet nohtoh ꞌilhoghun whanus diztiꞌ-un whe ꞌuntꞌoh.

⁷ ꞋEt ꞌukꞌu whusguz ndutni, ‘ꞋUyoonne gha teꞌntihzilh nohtsꞌo hukwaꞌ nuszun. Ndai loodel kꞌut hidutalhkꞌun-i, ꞌi ooka lheꞌnuszun,’ ni. ꞋEt ndi njan ndutni-un, ꞌet tꞌeoonahzun de, ꞌet de mbe la ookwꞌelhúwhulhtsꞌitne, ꞌenne ꞌaw bukꞌehohꞌalh hukwa ꞌahtꞌen iloh!

⁸ Yinka Dune Yeꞌ natsꞌulyis dzin ꞌet hoontsꞌi whumoodihti unli whe ꞌuntꞌoh.”

Natsꞌulyis dzin ꞌutꞌen unzoo-i ꞌutsꞌoolhꞌen

⁹ ꞋEt hukwꞌelhꞌaz bugho whinya whe ndunne Lizwifne bulugliz ꞌet daninya.

¹⁰ ꞋIlhoghun dune ꞌen ꞌet usda ꞌinkꞌez ꞌilho oola ye nulhéꞌustꞌen. Jesus huyoodulhkut, “Natsꞌulyis dzin dune soo naꞌuztitlelh hubaꞌ hoontꞌoh eh?” ꞋEt hoonli highu nahootáꞌalh hukwaꞌ hutꞌen.

¹¹ ꞋEt dúbulhni, “Mbe nohtoh ꞌutinelh ꞌusbaiyaz natsꞌulyis dzin tsa kꞌet ꞌáltsꞌut ha nahítilhtelh natsꞌulyis dzin hoontsꞌi?

¹² Dawhulcho-i be dune ꞌusbai anus diztiꞌ whe ꞌuntꞌoh? ꞋEt huwa netlꞌa hóoltsꞌut natsꞌulyis dzin ꞌutꞌen unzoo-i ꞌutsꞌulhꞌen huba.”

¹³ ꞋEt ndun dune ꞌúyulhni, “Nla lhtsꞌe díntsih!” ꞋEt ꞌawet lhtsꞌe naidizsi whe ookwꞌuz tsꞌe kꞌunꞌa sóo naꞌuja.

¹⁴ ꞋEt Phariseene ꞌaz whehandil ꞌinkꞌez huwu yahalhduk ntsꞌenꞌa hituzilhghelh hukwa.

Jesus mbe unli-un, ꞌaw whubuntilhtun hukwa lheꞌnínzun

¹⁵ Jesus hituzilhghelh huwu yahalhduk, tꞌewhunanzin ꞌet bugho whe naja. Lhane ndudáne hiyuntizdil, ꞌenne tsꞌiyawh soo náꞌbalhꞌen.

¹⁶ ꞋEt bugha daniꞌ, “ꞋUyoonne sghun tꞌehonoozeh junih.”

¹⁷ ꞋEt nus hooꞌen-un Isaiah, daja ni-un, ꞌoh te neꞌwhustꞌen. Khuni njan ndutni,

¹⁸ “Nulhꞌen Seꞌustle-un, ꞌutahásti-un ꞌuntꞌoh. Ookwꞌesiꞌ-un. ꞋEn ghun szul tube yóontꞌiꞌ. Syughi ookꞌé dutasdoh. ꞋEt ntsꞌenꞌa dahoontꞌoh dune ba nahisyilh, sYeꞌ whuz unꞌa za ꞌudun yun kꞌut whutꞌenne ubódutánelh.

¹⁹ ꞋAw dune budulhyoh ꞌudooniꞌ ꞌaitꞌoh. ꞋAw bubúlh ꞌaooldzul ꞌaitꞌoh. Ti nudilhne bubulh dóoltul ꞌaitꞌoh.

²⁰ ꞋAw tlꞌoghazilh nisdus-i, ꞌi kꞌidóchꞌas ꞌaitꞌoh. ꞋAw too dizkꞌun ꞌawet nanutneh-i, nainoolhneh ꞌaitꞌoh. Yakꞌusda lubeshi ba nahuyeh ꞌet whutsꞌun whuchꞌaꞌ tilhde de, whuz unꞌa za sYeꞌ ꞌutitꞌelh.

²¹ ꞋInkꞌez ꞌudun yun kꞌut whutꞌenne, ꞌen booziꞌ, be whutꞌaníhuntitan.”

Mbene la lhchꞌaz nedindilne, gak hutileh

²² ꞋEt ꞌilhoghun ntsiꞌ-i nududeh ooyudinda-un, hoos̱ꞌen ꞌinkꞌez yaoolhduk cha ꞌaitꞌoh. ꞋEn Jesus tsꞌu huyoolhti whe soo naꞌyinla. Hooꞌen ꞌinkꞌez yawhenilhduk.

²³ ꞋEt ꞌilhunaoosdilne tsꞌiyawh buba hooncha ꞌinkꞌez dichꞌoh lhulh yáhalduk, “ꞋEn toleh David ootsꞌuhainzut-un ꞌuntꞌoh.”

²⁴ ꞋEt Phariseene whulh hudantsꞌo whe ꞌuhutni, “Ndun dune, ꞌen Beelzebul, ntsiꞌ-i nududehne bumoodih, ꞌen be ntsiꞌ-i nududeh-i dune tsꞌu ha nanuyukw,” hutni.

²⁵ Daja huninzun-un Jesus tꞌeooninzun ꞌinka ꞌúbulhni, “Ntsꞌe la yakꞌuz kꞌuneꞌ whulꞌen-un, ꞌenne lhchꞌaz nehúdindil de, ꞌenne tsꞌiyawh gak hutileh. ꞋInkꞌez keyoh whuti whuduneꞌne kꞌus yoh dilhtsꞌine cha, lhchꞌaz nehúdindil de, ꞌenne cha gak hutileh.

²⁶ Satan didutchꞌoh dune tsꞌu ha nainuyukw de, didutchꞌoh lhchꞌaz ditni whe ꞌuntꞌoh. Ntsꞌenꞌa suba whulerwe unli-un, ꞌilhiz ꞌuwhutatꞌelh?

²⁷ Si Beelzebul be ꞌustꞌen de, sudahni nohni nohyeꞌke, kꞌus mbe suba ntsiꞌ-i nududeh-i dune tsꞌu ha nábonuyukw? ꞋEt huwa ꞌenne bugha tꞌewhuntihzeh tankꞌus údahni!

²⁸ ꞋEt hoontsꞌi Yakꞌusda ooyughi be ntsiꞌ-i nududeh-un dune tsꞌu ha nánusyukw de, ꞌalha ꞌuhoontꞌoh whe Yakꞌusda whe lerwe unli-un, ꞌawet nohgha whultsꞌut wheꞌ hoontꞌoh.

²⁹ Ntsꞌenꞌa ꞌutinelh ꞌilhoghun dune ꞌuyoon dune ulhtus-un ooyoh daninya ꞌinkꞌez yuchꞌeꞌ duntitih? ꞋUdechoo yulhghel de za yugha haꞌ tilyelh.

³⁰ Mbene sulh lheꞌitꞌohne, schꞌaz huditni wheꞌ hintꞌoh. ꞋInkꞌez mbene la ꞌaw dune sla ꞌilhulhósdlene, yahitákulh wheꞌ hintꞌoh.”

Mbene la Ndoni chꞌaz ditni be yalhdukne, ꞌaw buba whunaoodootnoh ꞌaitꞌoh

³¹ “ꞋEt huwa ꞌunohdusni, lubeshi tsꞌiyawh ꞌinkꞌez Yakꞌusda chꞌaz yalhdukne, tsꞌiyawh nohba whunaoowhudutilnoh. ꞋEt hoontsꞌi Ndoni chꞌaz ditni be yalhdukne, ꞌaw buba whunaoodootnoh ꞌaitꞌoh.

³² Mbe la Yinka Dune Yeꞌ chꞌaz yalhdukne, soo buba ꞌun whutilhdulh. ꞋEt hoontsꞌi mbene la Ndoni chꞌaz yalhdukne, ꞌaw buba ꞌun whutoolhdilh ꞌaitꞌoh. ꞋAndit dzin kꞌus nus de hoontsꞌi.”

Duchun oomaiꞌ gha tꞌenudzun

³³ “Mai chun unzoo-i ha nálhyai de, oomaiꞌ unzoo tileh. ꞋEt mai chun ꞌutsiꞌ-i ha nálhyai de, oomaiꞌ ntsiꞌ tileh. Dantꞌoh-i duchun ꞌuntꞌoh, oomaiꞌ gha tꞌentidzeh.

³⁴ Lubezo tlꞌughus buzkeh leꞌ ꞌahtꞌoh! Ntsꞌenꞌa ꞌahtsiꞌ ꞌinkꞌez khuni unzoo-i be yatahduk? Nohdzi ndai be dizbun ꞌi be yalhduk.

³⁵ Dune unzoo-un unzoo-i dudzi bez ꞌilhunayosdle-i, ꞌaw ꞌi za ootsꞌu ha naídukat. Dune unsiꞌ-un, ꞌen ndai untsiꞌ-i dudzi bez ꞌilhunayosdle de, yalhduk te, ꞌaw ꞌi za ootsꞌu ha naídukat.

³⁶ ꞋEt nohdusni mbene la ꞌaw khuni lheꞌitꞌoh-i be yalhdukne, dune ba nahidilh-un dzin whusahóoltsꞌut de, ntsꞌenꞌa khuni ꞌi be yahalhduk, whuz unꞌa buba nahutideh.

³⁷ Nohghuni gha Yakꞌusda nalh tsꞌihꞌun dune tihleh, kꞌus nohghuni gha kwuncho yo tsꞌu tihdulh kꞌunꞌa, nohba nahutideh ꞌet huwa.”

Jesus buba ꞌalha lheꞌítꞌohne, ꞌenne hoonliyaz hooncha tuneꞌ whutꞌen-un, ꞌet za ꞌuwhuntiꞌelh hukwaꞌ huninzun

³⁸ ꞋAwet whulohne Moses be ꞌudustlꞌus ꞌukꞌu nunáguzne ꞌinkꞌez Phariseene, cha ꞌuhuyulhni, “Dune hodulhꞌeh-un neba huwa ꞌitꞌen tuneꞌ tantꞌen ntsꞌu hukwaꞌ ꞌuzninzun.”

³⁹ ꞋEt ꞌubulhni, “ꞋAndit whudizulhne dune hintsiꞌ, ꞌinkꞌez ꞌahoolhyiz dune tsꞌeke bulh nintaꞌhutꞌih. Hoonli hooncha tuneꞌ whutꞌen-un, ꞌet za hukwaꞌ hitisꞌen. ꞋEt hoontsꞌi huhooꞌen-un bughá holtsꞌit ꞌaitꞌoh. Nus hooꞌen-un Jonah bulh dahooja-un, ꞌet za huwhutiꞌelh.

⁴⁰ Tat dzin ꞌinkꞌez tat ꞌulhdzis Jonah lho cho chandandaꞌ. Whuz unꞌa za Yinka Dune Yeꞌ ꞌen tat dzin ꞌinkꞌez tat ꞌulhdzis yun yo tsꞌe ꞌutitelh.

⁴¹ ꞋInkꞌez ꞌoh whuya hoozulh-un dzin dune ba nahutideh de, Nineveh whutꞌenne ꞌenne dahutádulh ꞌinkꞌez ꞌanditne ꞌinkꞌez buba nahotiyeh. ꞋOh daꞌ Jonah bubulh yailhduk daꞌ, dudeni nahondunizdla. ꞋInkꞌez ꞌilhoghun Jonah anus diztiꞌ-un nohtoh usyin.

⁴² ꞋOh whuya hoozulh dzin dune ba nahutideh de, ꞌet whe nyaz de whulerwe tsꞌeke ꞌen nohtoh dudutáyalh ꞌinkꞌez nohkꞌehóotaltsꞌulh. Ndi yun kꞌut nilhdzaz de hainya Solomon ye whunih-i yudutátsꞌo ha ꞌet huwa. ꞋAlha ꞌilhoghun Solomon anus whunih-un ꞌandit nohtoh usyin.”

Dawhutatelh whe ntsiꞌ-i nududeh-i doo cha dune buyunaidide de

⁴³ “ꞋEt ntsiꞌ-i nududeh-un dune tsꞌu ha nádide whe yun whudizgih-un, ꞌet whuz nududeh natilyis hukwunúta. ꞋAw ndoohóontꞌoh-un nalhuwhusꞌai.

⁴⁴ ꞋInka dichꞌoh naꞌdudútni, ‘Mbe la ooyudísdaꞌ-un, ootsꞌun za nátoosjaꞌ,’ ni. ꞋEt whuz naoosja whe ꞌaw hoonli hooloh. ꞋEt tenawhultsus ꞌinkꞌez tsꞌihꞌun naꞌuja, ꞌet ꞌuwhulhni.

⁴⁵ ꞋEt ꞌutsꞌun whedande ꞌinkꞌez lhtakꞌantꞌine ntsiꞌ-i nududeh-i, ꞌenne yanus ꞌultsiꞌne, dune hiyéndil ꞌinkꞌez ꞌet nehunina. ꞋEt ndun dune hiyudaltsꞌiꞌ-un, whutsodaꞌ whanus ꞌultsiꞌ suliꞌ. Nohni ꞌandit ndo whuya whudizulhne, tube untsiꞌne ꞌahtꞌoh. ꞋEt whuz unꞌa nohba ꞌuwhutánelh!”

Jesus ooloo ꞌinkꞌez bulhutsinke te hiyulh yatilhduk hukwaꞌ huninzun

⁴⁶ Jesus ꞌawhuz ꞌilhunaoosdilne bubulh yalhduk whe ooloo ꞌinkꞌez bulhutsinke te, ꞌaz nódilhya hiyulh yatilhduk hukwaꞌ huninzun.

⁴⁷ ꞋEt ꞌilhoghun dune yulhni, “Nilhꞌen! Nloo ꞌinkꞌez nyulhutsinke ꞌaz nódilhya nyulh yahutilhduk hukwaꞌ huninzun!”

⁴⁸ Mbe la ꞌet nduyulhni-un, ꞌet Jesus ꞌuyulhni, “Mbe la sloo? ꞋInkꞌez mbe la sulhutsinke?”

⁴⁹ Jesus mbene la yugha hodulꞌehne butuneꞌúlhga, “Ndunne, ꞌenne sloo ꞌinkꞌez sulhutsinke ꞌuhintꞌoh.

⁵⁰ ꞋEt huwa sBá ꞌen yakꞌuz usda, yukꞌuneꞌ ꞌutꞌen-un, ꞌen sulhutsin, sulhtus, ꞌinkꞌez sloo ꞌuhintꞌoh!”