Matthew 11 - Yak'usda Ooghuni

Nane John yugha hodulꞌehne, John Jesus tsꞌu whe balhꞌaꞌ

¹ ꞋAwet Jesus whunizyane ꞌon ꞌat nane yugha hodulꞌehne, tsꞌiyantsuk ubudániꞌ-un ꞌetsul ꞌudija, ꞌinkꞌez bughu whínya. ꞋUtsꞌun keyoh tsꞌe whinya dune hodutilhꞌeh ꞌinkꞌez bubulh yatilhduk wheni.

² John ꞌadinꞌai whe ꞌet Christ be ꞌutꞌen kꞌoh whulh ꞌudantsꞌo. Nane yugha hodulꞌehne, ꞌenne John Jesus tsꞌu whébalhꞌaꞌ.

³ Huyoodulhkut, “Nyun eh whusatíyalh-un inli, kꞌus ꞌuyoon tilah ha tsꞌitóꞌen?”

⁴ Jesus ndúbulhni, “John ooghu nanahtꞌaz de, hoohꞌen ꞌinkꞌez ndet whudáhtsꞌo-un dóhni.

⁵ Hoos̱ꞌenne cha huhooꞌen nahusdliꞌ. Dzoh nudilhne, nahudilh nahusdliꞌ. Ooka whulhjutne cha leprosy, butsun hooloh nahusdliꞌ, ꞌinkꞌez lheꞌdústsꞌone cha ꞌuhuditsꞌo nasdliꞌ. Yaidlane cha dunahudidil ꞌinkꞌez telꞌenne cha khuni unzoo-i be bubulh yainduk.

⁶ ꞋInkꞌez mbene la si sgha ꞌaw buba dzoh lhilel de, ꞌukꞌenus hoonzoo-un bughá whaltsꞌulh.”

⁷ ꞋEt ndunne whe hánꞌaz whe Jesus ꞌilhunaoosdilne, John ghun bubulh yawhenilhduk whe ndúbulhni, “Di tihꞌelh ha dune lhuhóotꞌih tsꞌe whéhdil? Tlꞌoghazilh nonulhtsꞌi, ꞌi tihꞌelh nahzun eh?

⁸ Ndet suba hukwaꞌ tse hoohli whutihꞌelh-un? Dune naih duchut-i be soo dintꞌoh-un tilah tihꞌelh nahzun eh? Soo zulhtsꞌai mbene la naih duchut-i be dune unline, lerwe yoh hudilhtsꞌi.

⁹ Ndet whutihꞌelh-un hukwaꞌ tse hóohli? Nus hooꞌen-un tilah? A, ꞌalha ꞌuhoontꞌoh. ꞋEt ꞌinkꞌez nohdusni, nus hooꞌen-un anus hoonzoo-un whunalhꞌen!

¹⁰ ꞋEn ghun ꞌukꞌu nusguz-i ꞌet ndutni, ‘Whunulhꞌen, khuni sba naꞌa-un, ꞌen ntso tisꞌalh. Ntsꞌoya la lhutányalh-un mba lhaoodutileh ha.’

¹¹ Tsꞌihꞌun unꞌa ꞌunohdusni, whuzdline toh, ꞌaw John dune too be ꞌulhꞌen-un anus díztiꞌ-un hooloh. ꞋEt hoontsꞌi yakꞌuz kꞌúneꞌ whulꞌen-un, mbe la ꞌukꞌenus diztiꞌ lhiloh-un, ꞌen yanus uncha whe ꞌuntꞌoh.

¹² ꞋEt ꞌoh daꞌ John dune too ꞌulhꞌen-un be wheꞌ whuditꞌen, ꞌandit dzin whutsꞌun, yakꞌuz kꞌúneꞌ whulꞌen-un, ꞌet yakꞌuz huhoolhdil, ꞌinkꞌez huhoolhdilne, yakꞌuz daꞌ hudolhdis hukwaꞌ hutꞌen.

¹³ ꞋEt John whusatiyalh whutsꞌun, nus hooꞌenne bubeꞌ ꞌudustlꞌus, ꞌinkꞌez Moses be ꞌudustlꞌus cha, daóotanelh ꞌet hudaniꞌ.

¹⁴ ꞋInkꞌez nohba ꞌalha whutatꞌelh de, ndun nus hooꞌen-un Elijah whusatiyalh-un, John ꞌen ꞌuntꞌoh, whe ꞌuntꞌoh.

¹⁵ Mbe la oodzo hooni-un, ꞌen hoozólhtsꞌaiꞌ ꞌinkꞌez whudotsꞌo.

¹⁶ Yukꞌedúdehne ntsꞌenꞌa suba nohba lhzih nebosdlelh? Tsꞌoodunneyaz nduhúltꞌoh ꞌinkꞌez ndet la ꞌutꞌalh-i beꞌ ooket-un ꞌet hudilhtsꞌi whe dukꞌekene butsꞌu ha huyih whe ndúbotni,

¹⁷ ‘Nohba tsꞌujun be tsꞌujun be, ꞌet hoontsꞌi neba lhnuzahdai. ꞋInkꞌez nohni nohba tsꞌodi tsinli, ꞌet hoontsꞌi ꞌaw oohtso ꞌaitꞌoh!’

¹⁸ ꞋEt John dune taninya whe ꞌaw lheꞌusꞌal ꞌinkꞌez ꞌaw talhusnaiꞌ. ꞋEt highu yalhduk whe ꞌuhutni, ‘Nududeh-i ntsiꞌ-i ooyudinda,’ hutni.

¹⁹ ꞋEt Yinka Dune Yeꞌ, dune taninya ꞌaꞌalh ꞌinkꞌez tatnaiꞌ, ꞌinkꞌez ꞌuhutni, ‘Nyoon oocha hooncha ꞌinkꞌez tsꞌekoo tooꞌ ꞌutnai. Sooneya nalhdzoohne ꞌinkꞌez lubeshi ꞌulhꞌenne, bukꞌeke unli,’ dáhni. ꞋEt hoontsꞌi Yakꞌusda gha whunih suliꞌne, ꞌenne tsꞌiyawh hiye whunih-i, ꞌi be tsꞌihꞌun ꞌuhintꞌoh suliꞌ.”

Dudeni nahánundunooleh hukwa lheꞌhunízun, dawhultsiꞌ-un bugha óotaltsꞌulh

²⁰ ꞋEt hukwꞌelhꞌaz keyoh whuti totsuk ꞌutꞌen ncha-i oobaꞌ yílya-i, ndutꞌenne hukwa budániꞌ. ꞋAw dudeni nahándunoolelh hukwa lheꞌhunízun.

²¹ ꞋEt ꞌubulhni, “Nohni Chorazin whutꞌenne, ꞌinkꞌez Bethsaida whutꞌenne, nohni, dawhultsiꞌ-un ꞌet nohtsꞌu hóoltsꞌulh! ꞋUdaꞌ whunilhchoh hoolhtus neꞌwhustꞌen-un, Tyre ꞌinkꞌez Sidon whutꞌenne, bunalh ndúhooja de, ꞌudaꞌ daꞌ dudeni naháhundunooleh ooleꞌ daꞌ. Doso naih be hudólhdzꞌi de ꞌinkꞌez lhez kꞌehodzih daꞌ.

²² ꞋEt hoontsꞌi nohdusni, dzin nohba whusaootiltsꞌulh nohba nahutideh ha, Tyre ꞌinkꞌez Sidon whutꞌenne bubulh dawhutanelh la, nohni ꞌon nus ꞌuwhultsiꞌ-un nohtsꞌu hooltsꞌulh.

²³ ꞋInkꞌez nohni Capernaum whutꞌenne yakꞌuz huba soo ꞌáhtꞌoh kwuncho yo tsꞌu nohotilhdulh! ꞌalha ꞌudaꞌ hoolhtus-un nohnat neꞌwhustꞌen, Sodom whutꞌenne, bunat ꞌet ndúhooja de, dudzi nahondunizdla de, ꞌawhuz daꞌ bukeyoh ꞌet whuzdla ooleꞌ daꞌ.

²⁴ ꞋEt hoontsꞌi tsꞌihꞌun nohdusnih, nohba whusaootiltsꞌulh-un, nohba nahutideh ha, Sodom whutꞌenne bubulh dawhutanelh la, ꞌet nohni ꞌon nus ꞌuwhultsiꞌ-un ꞌet nohtsꞌu hooltsꞌulh.”

Jesus ꞌubulhni, “Nohni tsꞌiyawh diz ꞌahdulh ꞌinkꞌez natilhyis-un nohgha óotasꞌalh”

²⁵ Jesus ꞌawhuz bubulh yalhduk ꞌet ndutni, “ꞋUBá nyun nyudústiꞌ. Yakꞌuz ꞌinkꞌez yun kꞌut whuMoodihti inli. Whunihne ꞌinkꞌez hodulꞌehne, ndi ꞌi tsꞌiyawh buchꞌa whuntinꞌi. ꞋEt hoontsꞌi tsꞌoodunyaz leꞌ ꞌuntꞌohne, bunalhtsꞌet ha honꞌai.

²⁶ ꞋEt hoontsꞌi ꞌuBá ndet ꞌuhóonla-un mba hoonzoo leꞌ hoontꞌoh.

²⁷ ꞋUBá tsꞌiyawh stlꞌa hónla, ꞌinkꞌez ꞌen ooYeꞌ mbe unli tsꞌiyanne tꞌehonúszun. OoBá ꞌaw ꞌen za tꞌeininzun. ꞋInkꞌez mbe ooBá unli, ooYeꞌ ꞌaw ꞌen za tꞌeininzun. ꞋInkꞌez mbe la ooYeꞌ ꞌonghohne tsꞌiyawh whubuntilhtun hukwaꞌ ninzunne, ꞌenne whubuntilhtun.

²⁸ Nohni tsꞌiyawh mbe ꞌutꞌen ulhtus-i ꞌulhꞌenne ꞌinkꞌez mbe ndaz-i nulene leꞌ ꞌahtꞌoh, diz ꞌahdulh ꞌinkꞌez natilhyis-un nohgha óotasꞌalh.

²⁹ Seꞌ ꞌutꞌen-i, ꞌi ulhchoot ꞌinkꞌez nedúhtꞌaih leꞌ ꞌahleh sgha hodulhꞌeh. ꞋAw dune dachꞌe nulheꞌzustꞌen ꞌinkꞌez teꞌduduzꞌen ꞌet huwa. Nohzul nátilyis-un ooba nahóhꞌalh.

³⁰ Seꞌutꞌen, ꞌaw nohba oogha lhúhoolnaꞌ tileh, ꞌinkꞌez hoondza whe ꞌuntꞌoh.”