Matthew 10 - Yak'usda Ooghuni

Whunizyane ꞌon ꞌat nane whelꞌaꞌne bubooziꞌ ꞌukꞌeítagus

¹ ꞋEt whunizyane ꞌon ꞌat nane Jesus yugha hodulꞌehne, ꞌanih ubudániꞌ. Ntsiꞌ-i nududeh-i tsꞌiyawh whe hílhtus-un, ꞌinkꞌez kꞌuneꞌ boolꞌen ha, ꞌet cha, ꞌinkꞌez dada lhelhdoh didoh-i cha, ꞌet tsꞌiyawh soo naꞌbotilhꞌelh-un, butlꞌa hónꞌai.

² ꞋEt whunizyane ꞌon ꞌat nane whelꞌaꞌne bubooziꞌ; ꞌudechoo Simon, Peter cha huyulhni; bulhutsin ꞌen Andrew; James cha Zebedee ooyeꞌ, ꞌinkꞌez bulhutsin John;

³ Philip ꞌinkꞌez Bartholomew; Thomas ꞌinkꞌez sooniya nalhdzooh-un Matthew; James Alphaeus ooyeꞌ ꞌuntꞌoh, ꞌinkꞌez Lebbaeus ꞌen oobooziꞌ ꞌudekꞌez-un Thaddaeus cha huyulhni;

⁴ Simon, ꞌen Canaanite yun kꞌut whutꞌen-un, ꞌinkꞌez Judas Iscariot ꞌen ꞌuja Jesus be ꞌonket-un.

Ndunne whunizyane ꞌon ꞌat nane, Jesus ubutilhꞌah

⁵ ꞋEt ꞌawet ndunne whunizyane ꞌon ꞌat nane, ntsꞌe ꞌuhutitꞌelh Jesus whuz ubutilhꞌah. Khuni butlꞌa danꞌai ndubulhni, “ꞋUdun yun kꞌut whutꞌenne buti tsꞌe ti toohdilh junih. ꞋInkꞌez Samaritan bukeyoh tsꞌu ti whuz te toohyaꞌ junih.

⁶ ꞋEt kꞌus Israel ootsꞌu haindene, ꞌusbai ninta nilhꞌaz-i léꞌhintꞌoh, ꞌenne za butsꞌun toohdilh.

⁷ ꞋAhdulh whe ꞌet budóhni, ‘Ntsꞌenꞌa la yakꞌuz kꞌúneꞌ whulꞌen-un ꞌawet nilhdukw.’

⁸ Ndudáne soo naꞌboolhꞌen, ooka whulhjutne, leprosy huyúlhni, bubunaꞌoolhdeh. Yaidlane dunabudóhlelh. Ntsiꞌ-i nududeh-i, dune butsꞌa ha nábunuhyukw. ꞋAntsꞌi nohgha únkat, ꞌet huwa tsꞌiyawh ꞌantsꞌi huwa oohlelh.

⁹ Gold, silver, kꞌus copper nohsooniya zus be óohdzaih junih!

¹⁰ Hoonli toohlaꞌ junih. Lhookꞌez be kélhꞌa-i ꞌinkꞌez nanki tsꞌooztꞌan ꞌinkꞌez nohtuz te toohlaꞌ junih. ꞋAlha ꞌutꞌen-un ntsꞌenꞌa la neꞌutꞌen, ꞌet whuz unꞌa za nohni cha oohꞌalh hubaꞌ hoontꞌoh.

¹¹ Ndet keyoh tsꞌu tihdulh ꞌet keyoh whuyaz kꞌus keyoh whuti, keyoh whutꞌenne, hukwa boodolhkut kꞌus mbe suba dune oodzi unzoo, ꞌen ooyoh dólhtsꞌi tihdulh whutsꞌun.

¹² Ndet yoh dahyaih-un hoonzoo-un nohghá holtsꞌit, búdohni.

¹³ Yoh dilhtsꞌine, hinzoo de, nohbe dizghel-i bughaídohꞌah. Lheꞌhízooꞌ de, nohbe dizghel-i nohtsꞌun dunaootneh.

¹⁴ Mbene la ꞌaw nohghu nulhúhiyal ꞌinkꞌez lhunoh huhoozilhtsꞌai de, yoh tenaoohdilh kꞌus keyoh whuti cha whuchꞌa naoohdilh. ꞋInkꞌez nohke lhez chꞌa naoohghat.

¹⁵ ꞋAlha nohdusni ndet dune ba nahidilh-un whusahooltsꞌut de, Sodom ꞌinkꞌez Gomorrah whutꞌenne cha, njan keyoh whutꞌenne nohghu núlhiyalne, ꞌon nus ꞌuwhultsiꞌ-un bugha óotaltsꞌulh.”

Jesus ꞌutni, “Si sooziꞌ gha tsꞌiyanne nohtsꞌu dutitni”

¹⁶ “Whunulhꞌen, ꞌantsꞌi ꞌusbai yus yugha óolhꞌaz leꞌ hoontꞌoh tsꞌe whuz nohtisꞌaꞌ. ꞋEt huwa tlꞌughus kꞌunꞌa whunih oohleꞌ ꞌinkꞌez dutꞌai, dove huyulhni, ꞌi kꞌunꞌa nohbulh dune ndólhdaꞌ junih.

¹⁷ Whulohne dune buchꞌa khohleꞌ. Lizwif nahiyilhne bubut nenóhotalelh. ꞋInkꞌez Lizwif lugliz whambez tsꞌe ꞌet nohohóotalhtsus.

¹⁸ Yun kꞌut whumoodihne ꞌinkꞌez lerwene cha si sgha bubut nenóhotalelh. ꞋInkꞌez si sghun whubuntilhtun. ꞋUdun yun kꞌut whutꞌenne cha si sghun whubuntilhtun.

¹⁹ ꞋAwet whutlꞌa nohuhanla de, daja dutihnelh, huwu ni oohleꞌ junih. Ntsꞌoya hoozulh whe be yátilhduk-i, ꞌet la tꞌewhunoohzeh.

²⁰ ꞋAw nohnichꞌoh iloh yatilhduk. NohBá ooyughi ꞌi ꞌudutinelh.

²¹ Dune dulhutsin datítsah ha whutlꞌa ítilhtelh. Bubá duduzke whuz ubutilelh. Bubuzkeh dudusneke buchꞌaz nehúdutadulh dahutitsah-un huwá botalelh.

²² ꞋInkꞌez si sooziꞌ gha tsꞌiyanne nohtsꞌo dutitni. ꞋEt hoontsꞌi mbene la ꞌudekꞌez whutsꞌun ꞌet whulh núdalyaꞌne, ꞌenne hudutijih.

²³ Njan keyoh dzoh nanóhahulhdzut de, ꞌet ꞌudun keyoh tsꞌe buchꞌa tóohdilh. Keyoh whuti ꞌet cha dzoh nunohohulhdeh de, doo cha ꞌon ꞌun keyoh buchꞌa tóohdilh. ꞋAlhaꞌ ndusni ꞌet Yinka Dune Yeꞌ whusatiyalh whutso, ꞌaw Israel ootsꞌu haindene, ꞌenne bukeyoh tsꞌiyawh whutulhóhdilh ꞌaitꞌoh.

²⁴ Hodulꞌeh-un, dune whuyodulhꞌeh-un ando lheꞌitꞌoh. ꞋInkꞌez ꞌulhna-un, cha dumoodih ando lheꞌitꞌoh.

²⁵ Dune yugha hodulꞌeh-un, whuyodulhꞌeh-un kꞌunꞌa ootꞌeꞌ hubaꞌ hoontꞌoh, ꞌinkꞌez be ꞌulhna-un, dumoodih kꞌunꞌa ootꞌeꞌ hubaꞌ hoontꞌoh. ꞋEt si Beelzebul suhútni de nohni sgha hodulꞌehne, nohni cha whuz unꞌa za ndunohodutánelh!

²⁶ ꞋEt huwa ꞌenne bube noolhjut junih! Tsꞌiyaitsuk lubeshi whuꞌiz ꞌuntꞌoh ntilhꞌi-i, tsꞌiyawh tsꞌet ha óotikulh ꞌinkꞌez tꞌewhuntizeh.”

Yakꞌusda ꞌen za be noolhjut

²⁷ “Tsalhgus nohdusni-un tsꞌet howu yaoolhduk. Whuꞌiz whudahtsꞌo-un, bun kꞌut whutsꞌun khuniti be howu yaoolhduk.

²⁸ Neyustꞌe ughanne bube noolhjut junih. ꞋAw nezul ꞌi hizoolhghelh ꞌaitꞌoh, ꞌet nduntꞌohne, bube noolhjut junih. ꞋEt hoontsꞌi Yakꞌusda nohzul nohyustꞌe bulh kwuncho yo tsꞌe nohtinoh, ꞌen bé noolhjut.

²⁹ ꞋAlhaꞌ iloh lakw nanki ꞌuchas, ꞌilho sooniya tsꞌuditiꞌ-i, ꞌet ꞌultsuk ꞌi be oohket? A, ꞌalha ꞌuhoontꞌoh. NeBá ꞌaw hukwa lheꞌnizun de, ꞌilhoghun ndi yun kꞌut naooltsꞌit ꞌaitꞌoh.

³⁰ Nohtsighaꞌ, tsꞌiyawh ꞌilho whe tꞌeininzun.

³¹ ꞋEt huwa khun whenoolhjut junih. Nohni ꞌuchas anus dáhtiꞌ whe ꞌahtꞌoh.”

Dune nalh Jesus ꞌen schꞌeꞌ ꞌuzdooniꞌ

³² “ꞋEt huwa mbe la dune nalh ndutni-un, Jesus, ꞌen schꞌeꞌ ꞌuntꞌoh. Mbe ndutnine, ꞌuBá yakꞌuz usda-un, ꞌen dutasnelh, nyoon ꞌen schꞌeꞌ ꞌuntꞌoh.

³³ ꞋEt hoontsꞌi mbene la dune nalh stsꞌooditdlaine, si cha ꞌuBá yakꞌuz usda-un ndunne, ꞌenne ꞌaw schꞌeꞌ lhuhiloh dósniꞌ la.”

Mbe la si sgha dichꞌoh ye khuna-i ninta inínꞌai, ꞌen ndai la ye khuna-i nayitáꞌalh

³⁴ “Tsꞌiyanne lhtsꞌun tsꞌihꞌun ꞌuhootꞌeꞌ, hukwa ndi yun kꞌut whusásya noohzin junih! ꞋAw lhtsꞌun tsꞌihꞌun ꞌuhootꞌeꞌ bugha ootasꞌalh hukwa iloh whusásya. Saluzti, ꞌi bugha itastꞌelh ꞌet huba whusásya.

³⁵ Dune dubá chꞌaz nedútadalh ꞌinkꞌez ootseꞌ ꞌen duloo chꞌaz nedútadalh. ꞋInkꞌez ꞌen ooyasꞌat ꞌen dubiz chꞌaz nedútadalh, ꞌet huba whusásya.

³⁶ Mbene la dune hiyoh whutꞌine, ꞌenne hichꞌazne dutadulh.

³⁷ Mbe la dubá kꞌus duloo, si sanus bukꞌensiꞌ de, ꞌaw sba soo lheꞌhildzooꞌ! ꞋInkꞌez mbe la duyeꞌ ꞌinkꞌez dutseꞌ bulh, si sanus bukꞌensiꞌ de, ꞌaw sba soo lheꞌildzooꞌ.

³⁸ ꞋInkꞌez mbene la dutulalhgus lhudistel de, ꞌinkꞌez sulhonisdulh de, sba soo lheꞌhildzooꞌ.

³⁹ Mbe la whe khuna-un, ꞌet hoolhyih hukwa ꞌutꞌen, ꞌen whe khuna-un ninta ootáꞌalh whe ꞌuntꞌoh. ꞋEt mbe la si sgha ye khuna-i ninta inínꞌai, ye khuna-i nayitáꞌalh.”

Mbe la hoontꞌiꞌ whe danyunilhti-un, ꞌen si cha hoontꞌiꞌ whe dasúnilhti whe ꞌuntꞌoh

⁴⁰ “Mbe la hoontꞌiꞌ whe danyunilhti-un, ꞌen si cha hoontꞌiꞌ whe dasúnilhti leꞌ hoontꞌoh. Mbe la whusalhꞌaꞌ-un cha hoontꞌiꞌ whe daínilhti wheꞌ hoontꞌoh.

⁴¹ Mbe la nus hooꞌen-un, dune hoontꞌiꞌ whe daínilhti de, nus hooꞌen kꞌunꞌa ooba ꞌukꞌelha whutaleh. ꞋInkꞌez mbe la tsꞌihꞌun dune hoontꞌiꞌ whe daínilhti, ꞌen tsꞌihꞌun dune kꞌunꞌa ooba ꞌukꞌelha whutaleh.

⁴² ꞋInkꞌez mbene la si sgha hodulꞌehne, bubooziꞌ gha kꞌus hukwꞌeꞌih ꞌuntꞌoh-un, too sukꞌuz yubainkai de, ꞌalha ꞌunohdusni, ꞌen hoontsꞌi ooba ꞌukꞌelha whutaleh wheꞌ hoontꞌoh.”