Matthew 1 - Yak'usda Ooghuni

Jesus Christ ꞌubé dinzutne

¹ Ndi ꞌudustlꞌus ꞌukꞌeguz-i ꞌet ndutni, ꞌi be Jesus Christ ꞌen ꞌubé dinzutne ꞌuhíntꞌoh, ꞌi Jesus David tsꞌu hainzut. David ꞌen Abraham tsꞌu hainzut-un ꞌuntꞌoh.

² Abraham ꞌen Isaac oobá ꞌuntꞌoh. Isaac ꞌen Jacob oobá ꞌuntꞌoh. Jacob ꞌen Judah ꞌinkꞌez bulhutsinke bubá ꞌuntꞌoh.

³ Judah ꞌen nyoon tsꞌeke Tamar ꞌen be Perez ꞌinkꞌez Zerah bubá ꞌuntꞌoh. Perez Hezron oobá ꞌinkꞌez Hezron Ram oobá ꞌuntꞌoh.

⁴ Ram ꞌen Amminadab oobá. Amminadab Nashon oobá, ꞌinkꞌez Nashon Salmon oobá ꞌuntꞌoh.

⁵ Salmon ooꞌat Rahab ꞌen be Boaz oobá. Boaz Ruth ꞌen be Obed oobá. ꞋInkꞌez Obed Jesse oobá ꞌuntꞌoh.

⁶ Jesse lerwe David oobá. ꞋEt lerwe David, mbe la Uriah ooꞌat inleꞌ-un, ꞌen be Solomon oobá ꞌuntꞌoh.

⁷ Solomon Rehoboam oobá. Rehoboam Abijah oobá, ꞌinkꞌez Abijah Asa oobá ꞌuntꞌoh.

⁸ Asa Jehoshaphat oobá. Jehoshaphat Joram oobá, ꞌinkꞌez Joram Uzziah oobá ꞌuntꞌoh.

⁹ Uzziah Jotham oobá. Jotham Ahaz oobá, ꞌinkꞌez Ahaz Hezekiah oobá ꞌuntꞌoh.

¹⁰ Hezekiah Manasseh oobá. Manasseh Amon oobá, ꞌinkꞌez Amon Josiah oobá ꞌuntꞌoh.

¹¹ ꞋOh daꞌ ꞌoh whuya whudizulh whe tsꞌiyanne dune keyoh whuti Babylon tsꞌe whebuhanla, ꞌet Josiah ꞌen Jeconiah ꞌinkꞌez bulhutsinke ꞌenne bubá ꞌuntꞌoh.

¹² Keyoh whuti Babylon whuz whebuhanla hukwꞌelhꞌaz ꞌet Jaconiah Shealtiel oobá ꞌuntꞌoh. Shealtiel Zurubbabel oobá ꞌuntꞌoh.

¹³ Zerubbabel Abiud oobá. Abiud Eliakim oobá, ꞌinkꞌez Eliakim Azor oobá ꞌuntꞌoh.

¹⁴ Azor Zadok oobá. Zadok Achim oobá, ꞌinkꞌez Achim Eliud oobá ꞌuntꞌoh.

¹⁵ Eliud Eleazor oobá. Eleazor Matthan oobá, ꞌinkꞌez Matthan Jacob oobá ꞌuntꞌoh.

¹⁶ Jacob Joseph oobá ꞌuntꞌoh. ꞋEn Mary ooki ꞌinkꞌez Mary be Jesus whuzdli. ꞋEn Christ huyulhni.

¹⁷ ꞋInka Abraham David whutsꞌun, ꞌenne tsꞌiyawh whunizyat ꞌon ꞌat dit-un bubé dindene ꞌuhintꞌoh. ꞋInkꞌez David ꞌoh daꞌ whudizulh whe tsꞌiyanne keyoh whutꞌenne Babylon tsꞌe whebuhanla whutsꞌun, ꞌenne tsꞌiyawh whunizyat ꞌon ꞌat dit-un bubé dindene hinli. ꞋInkꞌez ꞌoh daꞌ whudizulh whe tsꞌiyanne keyoh Babylon tsꞌe whebuhanla ꞌet hukwꞌelhꞌaz dichꞌoh dukeyoh yun kꞌut Judah, whuz whenáhidil, Christ ꞌet whutsꞌun, ꞌenne tsꞌiyawh whunizyat ꞌon ꞌat dit-un bubé dindene hinli whe hintꞌoh.

Jesus Christ whuzdli-un

¹⁸ ꞋEt Jesus Christ whuzdli-un, ndiz unꞌa ꞌuhooja. Ooloo Mary ꞌen Joseph yughu tidalh ha lhahódinla, yughu tidalh whutso whe ꞌet nahoonꞌai ꞌudaꞌ tsꞌoodun ba ꞌuntꞌoh. Ndoni, be ꞌuja.

¹⁹ ꞋEt ndun Joseph tsꞌihꞌun dune unli, ꞌet huwa lhgho tikelh tsꞌiyanne toh yooya yoolhtselh whuchꞌa dudeni lhaidinla. ꞋInkꞌez whuꞌiz yuchꞌa natidalh hukwaꞌ ninzun.

²⁰ ꞋEt howu nuninuzut whe huwa nusúti whe neMoodihti oolizas ꞌen yulhni, “Joseph David ootsꞌuhainzut-un inli. Wheniljut iloh whe Mary nꞌat tileh. Ndun tsꞌoodun Ndoni be yuchainya whe ꞌuntꞌoh.

²¹ Ooyaz, duneyaz tileh. Booziꞌ ooghá donꞌalh. Jesus dóniꞌ. ꞋEn ꞌutinelh tsꞌiyanne lubeshi chꞌa ꞌubutilhyih.”

²² NeMoodihti ooba nus hooꞌen-un, ꞌen be njan ꞌoh túneꞌ whustꞌen. ꞋEt nyoon nus hooꞌen-un njan ndutni,

²³ “Whunulhꞌen ndun tsꞌeke ꞌaw dune tꞌenuszun-un tsꞌoodun ba ꞌuja, ꞌinkꞌez ooyaz dune tileh, booziꞌ Emmanuel hidutánelh, Yakꞌusda nebulh ꞌúntꞌoh, ni whe ꞌutni.”

²⁴ ꞋInka Joseph tsꞌe nandzut ꞌet neMoodihti oolizas daja yulhni la, ꞌoh tuneꞌ ꞌustꞌen ꞌinkꞌez Mary yilhchoot ooꞌat yutáleh ha.

²⁵ ꞋUdechoo ooyaz whutileh tꞌeoonanzin ꞌet whutsꞌun ꞌaw yutꞌálhasnai. OoYaz whuzdli, ꞌet ꞌandit za soo yughusda. ꞋInkꞌez Tsꞌoodun booziꞌ yughá dinꞌai Jesus yulhni.