Mark 8 - Yak'usda Ooghuni

Jesus 4,000ne gháꞌ ninꞌai

¹ ꞋOh daꞌ dzin dune lhane ꞌilhuhozdil ꞌawet ꞌutꞌalh-i gak suliꞌ whe Jesus yugha hodulꞌehne, “ꞋAnih,” ubudániꞌ ꞌinkꞌez ubúlhni,

² “Ndunne dune bughaꞌ teꞌnuszun. ꞋAwet tat dzin sulh ꞌúhitꞌen ꞌinkꞌez huyooꞌalh-i hooloh.

³ ꞋEt nduhíntꞌoh whe buyoh tsꞌe whenábisꞌaꞌ de nahidulh whe la bukaootoodeh. Whulohne tube nilhdzaz de ha hándil ꞌet huwa.”

⁴ ꞋEt yugha hodulꞌehne huyoodulhkut, “Ndo ho dune lhuhootꞌih, ntsꞌe suba ꞌutꞌalh-i natsꞌólelh lheꞌhultsukne dune gháztiꞌalh wheni.”

⁵ ꞋEt Jesus uboodulhkut, “Daltsuk lhes sutꞌe ahtꞌi?” ꞋEt huyúlhni, “Lhtakꞌantꞌi lhes sutꞌe.”

⁶ ꞋEt ꞌilhozdílne yun hudóltsꞌiꞌ bubulhni. Lhtakꞌantꞌi lhes yílhchoot ꞌinkꞌez, “Musi,” ni whe tenadidli. Tánidizyuz ꞌinkꞌez yugha hodulꞌehne butainínla whutahayólelh ha, ꞌinkꞌez dilhtsꞌíne butahinínla.

⁷ Lho ntsool-iyaz hutꞌi, ꞌi cha Jesus “Musi,” ni whe yuba tenadidli ꞌinkꞌez yugha hodulꞌehne, “Whutahayólelh,” bubulhni.

⁸ Tsꞌiyanne ꞌahanꞌal ꞌinkꞌez ꞌuhunisdai. Yugha hodulꞌehne lhtakꞌantꞌi chalhyal dizbun ꞌi highá ꞌozꞌal-i nahuyalhdzoo.

⁹ 4,000ne atꞌen ꞌahanꞌal. ꞋInkꞌez Jesus whe nábalhꞌaꞌ.

¹⁰ ꞋAhoh yugha hodulꞌehne bulh tsꞌi be náhidil ꞌinkꞌez keyoh Dalmanutha huwhútni-un whuz yanáhuski.

Phariseene huwa ꞌítꞌen-un duba hooleh hukwa huyoodulhkut

¹¹ ꞋEt whulohne Phariseene Jesus highu nindil ꞌinkꞌez hidulhyoh wheꞌ duniniꞌ huyóolhdzih whe huyóodúlhkut, “Huwa ꞌítꞌen-un ꞌuhóonleh ꞌalhaꞌ Yakꞌusda ntlꞌa hónꞌai de huwa tꞌétsꞌonoozeh ha.”

¹² Jesus tube hibadzo ꞌúdija ꞌinkꞌez ubúlhni, “Di ha ꞌandit dunene huwa ꞌítꞌen-un hukwa hitisꞌen? ꞌalhaꞌ nohdúsni ꞌaw ndi yun kꞌut whuduneꞌne ndúhoontꞌoh-un huhooꞌen ꞌaitꞌoh.”

¹³ ꞋEt buchꞌa nasja tsꞌi be nája ꞌinkꞌez bun kꞌut nyan whenáki.

Huwohleꞌ Phariseene ꞌinkꞌez Herod bulhes untuldoh-i, ꞌi chꞌa ubúlhni

¹⁴ Yugha hodulꞌehne lhes nahodilhnoh ꞌilho liba za tsꞌi be húlhꞌai.

¹⁵ ꞋEt Jesus bugha ꞌutni whe, “Huwohleꞌ, ꞌahoolhyiz khuhdli Phariseene ꞌinkꞌez Herod bules untuldoh-i chꞌa,” ubúlhni.

¹⁶ ꞋEt lhulh yáwhehunilhduk, “ꞋAw lhes lhtsꞌítꞌih ꞌinka ꞌutni.”

¹⁷ ꞋEt Jesus daja hutni la ꞌudaꞌ tꞌeoonínzun ꞌet ꞌúbulhni, “Di ha lhes lháhtꞌih-un huwa yalhduk, ꞌawhuz tꞌeoonuzúhzun kꞌus noheni tꞌalhodúlhtsꞌit nohdzi ꞌawhuz eh dutsꞌun wheꞌ dahni?

¹⁸ Nohna hoonli ꞌaw lhózihꞌen, nohdzeh hóonli whe lheꞌduzahtsꞌo. ꞋAw eh whunalhuzulhni?

¹⁹ 5,000ne dune kwulaiꞌ liba butaidísyuz whe daltsuk chalhyal dizbun ꞌi dune yugháꞌozꞌal-i nalhdzooh ínleꞌ?” “Whunizyai ꞌon ꞌat nanki,” huyúlhni.

²⁰ “ꞋInkꞌez lhtakꞌantꞌi liba 4,000ne dune butaidísyuz, daltsuk chalhyal dizbun-i highá ꞌozꞌal-i nalhdzooh ínleꞌ?” ubúlhni. “Lhtakꞌantꞌi,” huyúlhni.

²¹ ꞋInkꞌez ubúlhni, “ꞋEt ꞌawhuz eh noheni tꞌalhodúlhtsꞌit?”

Bethsaida ꞌet Jesus dune hoos̱ꞌén-un hooꞌen nayulhtsi

²² ꞋEt Jesus yugha hodulꞌehne bulh keyoh Bethsaida huwhútni-un whuz hoozdil whe ꞌilhoghun dune hoos̱ꞌén-un, ꞌen Jesus highu hinílhya ꞌinkꞌez highu tedudlih yutꞌaoonalh ha.

²³ Jesus hoos̱ꞌén-un yula ilhchoot ꞌinkꞌez keyoh whuchꞌa yúlhya whe lhchꞌaz dune yuna kꞌénzo ꞌinkꞌez yuna kꞌúdilhni ꞌinkꞌez yoodulhkut, “Hadih honꞌen eh?” yúlhni.

²⁴ Dune yutánꞌen ꞌinkꞌez ꞌutni, “A, dune ꞌantsꞌi duchun léꞌhintꞌoh whe ꞌoh nuhúdilh.”

²⁵ Jesus doo cha za lhchꞌaz dune yuna kꞌúdalni ꞌinkꞌez ndo yutanꞌen yulhtsꞌi. ꞋEt ꞌahoh hooꞌen nasdliꞌ ꞌinkꞌez tsꞌiyaitsuk ooba hooltsai.

²⁶ ꞋEt Jesus yuyoh tsꞌe whenáyalhꞌaꞌ ꞌinkꞌez khuni ulhtus-i be uyúlhni, “Bethsaida tsꞌe nátonjaꞌ junih ꞌinkꞌez ꞌet whutꞌenne budóniꞌ junih!”

Jesus mbe unli ꞌet Peter huwu yalhduk

²⁷ ꞋInkꞌez yugha hodulꞌehne bulh Caesarea Philippi keyoh whuz whe hándil. Hidulh whe uboodulhkut, “Nꞌawh dune sghu yahulhduk te, mbe usdli hutni?”

²⁸ ꞋEt yugha hodulꞌehne huyúlhni, “Whulohne ꞌuhutni John dune too beꞌ ꞌulhꞌen-un ꞌintꞌoh. ꞋUyoonne ꞌuhutni Elijah ꞌen Yakꞌusda whusaítilhꞌalh-un ꞌintꞌoh. ꞋUyoonne cha Yakꞌusda be nus hóoꞌenne ꞌilhoghun ꞌintꞌoh hutni.”

²⁹ ꞋInkꞌez yugha hodulꞌehne ubúlhni, “Nohni doꞌ mbe ꞌustꞌoh dahniꞌ?” ꞋEt Peter ꞌuyulhni, “Nyun Christ ꞌintꞌoh.”

³⁰ Jesus khuni ulhtus ꞌi be ubúlhni, “Si sghun dune dóhniꞌ junih!”

Dzoh nutizut-un, ꞌinkꞌez datítsah-un, ꞌet Jesus huwu yalhduk

³¹ ꞋEt ꞌawet Jesus yugha hodulꞌehne whubodulhꞌeh ꞌinkꞌez ubúlhni, “Yinka Dune Yeꞌ lhat-un whe dzoh nuhítilhdzut. ꞋUtso whudilhdzúlhne, lubret moodihne ꞌinkꞌez Moses be ꞌudustlꞌus ꞌukꞌu nunáguzne cha tsꞌiyawh hika lheꞌuntszilh. Hituzilhghelh ꞌinkꞌez whulh tát dzin dunádutádalh.”

³² Soo tsꞌet cho ubúlhni, ꞌet Peter ꞌudun neinlhti ꞌinkꞌez huwaꞌ yudániꞌ.

³³ Jesus yugha hodulꞌehne butsꞌun nálhꞌa ꞌinkꞌez Jesus Peter hukwaꞌ yúlhni, “Satan stꞌa nenínyaih! Ndi yun kꞌut hoonli za ghu nuní ninizut. ꞋAw Yakꞌusda oochꞌeꞌ ooghu nuní lhnuzinzut.”

³⁴ ꞋEt Jesus ꞌilhozdilne ꞌinkꞌez yugha hodulꞌehne tubulh, “ꞋAnih,” ubúlhni, “Mbe suntiyalh hukwaꞌ ninzun-un dichꞌoh duba moodih naoodleꞌ ꞌaitꞌoh. Dutulalhgus yudutootan ꞌinkꞌez suntooyaꞌ.

³⁵ ꞋEt mbene la si sanus dukꞌunꞌa za hukwaꞌ ninzunne, ꞌenne ꞌaw ꞌilhiz wheni hukhoonaꞌ ꞌaitꞌoh. ꞋEt hoontsꞌi mbe si ꞌinkꞌez sughuni unzoo-i gha cha ye khuna-i nintaininꞌai de, yutilhyih whe ꞌuntꞌoh.

³⁶ Di suba dunne oogha ooltsꞌit, ndi yun kꞌut nduhoolcho whe oogha whultsꞌut de, ꞌinkꞌez duzul nintainilhte de?

³⁷ Kꞌus di suba duzul yukꞌelha yolhchoot?

³⁸ ꞋAndit yukꞌedinzutne lubeshi ꞌuhutꞌen ꞌinkꞌez dune tsꞌeke bulh nintaꞌhutꞌih hinli, ꞌet hoontsꞌi mbe la si ꞌinkꞌez sughuni cha yukaya unli de, Yinka Dune Yeꞌ, ꞌen cha yukaya tileh, lizas bulh ooBá ootsꞌu ha yánduz-i toh whusanája de.”