Mark 6 - Yak'usda Ooghuni

Jesus Nazareth whutꞌenne hitsꞌu disnih

¹ ꞋEt Jesus usda-un whuchꞌa nasja ꞌinkꞌez dukeyoh tsꞌe whenája. Yugha hodulꞌehne cha huyulh whenadil.

² Nahulyis dzin ꞌet Lizwif bulugliz whubodulhꞌeh whe lhane dune ꞌet dilhtsꞌíne hidántsꞌo whe tube buba hooncha ꞌinkꞌez ꞌuhútni, “Ndun dune ntsꞌez de ha hónla whe ꞌutni? Whunih-i be ntsꞌez de ha hónla whe ꞌutni? Ntsꞌenꞌa ꞌutꞌen sdabe huwa ꞌítꞌen teneꞌútꞌen?

³ Yoh ꞌuwhulhꞌen-un, ꞌen iloh lakw ꞌuntꞌoh? Mary ooyeꞌ bulhutsinke James, Joses, Judas, Simon, ꞌinkꞌez bulhtuske cha iloh njan huwhutꞌi?” ꞋInkꞌez buba dzoh suliꞌ.

⁴ ꞋEt Jesus ubúlhni, “Yakꞌusda be nus hóoꞌen-un yalhduk te ndulcho whe hidílhtiꞌ, ꞌet hoontsꞌi ookeyoh whutꞌenne, oonadneke ꞌinkꞌez ooyoh whutꞌine cha, ꞌaw lhuhidílhtiꞌ.”

⁵ ꞋEt huwa nyo ꞌet Jesus ꞌaw huwa ꞌítꞌen te neꞌóotꞌen ꞌaítꞌoh, whulohne ndudáne, ꞌenne za bukꞌudílhni whe soo náꞌbalhꞌen.

⁶ ꞋEt ꞌaw be ꞌalha ꞌuhoontꞌoh-i lhahuyítꞌih, ꞌet Jesus ooba hooncha. ꞋInkꞌez whunat keyoh ꞌoh nuya ꞌinkꞌez dune hubodulhꞌeh.

Yugha hodulꞌehne whunizyane ꞌon ꞌat nane, ꞌenne Jesus whébalhꞌaꞌ

⁷ ꞋEt whunizyane ꞌon ꞌat nane, “ꞋAnih,” hubudániꞌ ꞌinkꞌez nane hinli whe lhelhtsꞌun whe balhꞌaꞌ. ꞋInkꞌez hiye úlhtus-i bugha nínꞌai ntsiꞌ-i nudúdeh-i dune yudúltsꞌine butsꞌa ha náhinooyoot ha.

⁸ ꞋInkꞌez khuni ulhtus-i butlꞌa dánꞌai, “Tihꞌus tsꞌe hoonli te toohlaꞌ junih! Tꞌalh-i cha, ꞌézdla-i cha, kꞌus sooniya te bulh tsꞌúdolhꞌoo junih! Tuz ꞌi za dutóohtan.

⁹ Be ketsꞌalhꞌa-i ꞌinkꞌez dzoot ꞌilhiz be súhke-i, ꞌi za be ꞌóohneh.”

¹⁰ ꞋUdun cha ubúlhni, “Keyoh nahꞌaz de dune duyoh dano honilhti de, yoh ꞌet oohkeꞌ ꞌutsꞌun keyoh tsꞌe tíhꞌus whutsꞌun.

¹¹ ꞋInkꞌez keyoh nenáhꞌaz-un dune nohtsꞌu hódilhꞌoh de kꞌus lhunohodústsꞌo de huwu nátóohtꞌas ꞌinkꞌez whulez chꞌa nohke naóohghat. ꞋEt dahúja-un tꞌehonoozeh. Tsꞌihꞌun nohdúsni Sodom ꞌinkꞌez Gomorrah whutꞌenne buba nus hootatsiꞌ. ꞋUdékꞌez dzin de huyé dzoh nutízut-i ba nús ꞌet lhunohdústsꞌone dzoh nahutideh.”

¹² ꞋEt whe la hándil ꞌinkꞌez dune Yakꞌusda ooghuni be bubulh yáhulhduk, “Nohlubeshi chꞌa lhtꞌananoohdilh,” hubuhútni.

¹³ Lhane ntsiꞌ-i nudúdeh-i ooghu dilhtsꞌíne bughu whenábonanyoot ꞌinkꞌez dune lhane undudáne khe be ꞌubuhulho whe soo náꞌbuhalhꞌen.

John dune too be ꞌulhꞌen-un, hizilhghi

¹⁴ Bulerwe Herod huyúlhni-un yulh ꞌúdantsꞌo Jesus ndulcho whe búlh nukhuni uzut. ꞋInkꞌez ꞌutni, “John dune too be ꞌulhꞌen-un ꞌutꞌen. Dazsai inleꞌ ꞌinkꞌez nahítnaꞌ ꞌet huwa Yakꞌusda ye ulhtus-i ooghi dizꞌai whe ꞌútꞌen whunulꞌen teneꞌútꞌen.”

¹⁵ Whulohne cha, “Elijah ꞌutꞌen,” hutni. ꞋEt ꞌuyoonne cha ꞌuhutni, “ꞋUdaꞌ hukwꞌunꞌa Yakꞌusda be nus hóoꞌen-un ꞌutꞌen,” hutni.

¹⁶ ꞋEt bulerwe Herod whulh ꞌúdantsꞌo whe ꞌet ꞌutni, “John dune too be ꞌulhꞌen-un ꞌutꞌen. Ootsi sba kꞌuhiníntsel inleꞌ daꞌ, nakhítnaꞌ,” ni.

¹⁷ Herod dichꞌoh John dune too be ꞌulhꞌen-un ꞌahuyooꞌalh huwá bulhꞌa ínleꞌ. Huyulhghel ꞌinkꞌez ꞌahuyánꞌai. Ndun tsꞌeke Herodias huyúlhni-un, ꞌen yughusda. ꞋEn ghaꞌ yinla ínleꞌ. Dulhutsin Phillip ooꞌat yuzih usda ꞌet huwa.

¹⁸ John dune too be ꞌulhꞌen-un Herod lhkꞌuz te yulhni, “Yakꞌusda ooghuni kꞌuninyis whe ꞌintꞌoh nyulhutsin ooꞌat zih silda.”

¹⁹ ꞋEt huwa ooꞌat Herodias John dune too be ꞌulhꞌen-un yutsꞌu dutni ꞌinkꞌez yuzoolhghelh hukwaꞌ ninzun. ꞋEt hoontsꞌi duki, Herod, ꞌen gha ꞌaw yuzoolhghelh ꞌaítꞌoh.

²⁰ Herod John dune too be ꞌulhꞌen-un yé nuljut, tꞌeoonínzun John dune tsꞌihꞌun dune unli, ꞌinkꞌez Yakꞌusda ooduneꞌ ꞌuntꞌoh. ꞋEt huwa yugha ꞌóoli yoozílhtsꞌai hóontꞌiꞌ, ꞌet hóontsꞌi yoozílhtsꞌai totsuk oodzi dútultsꞌuk.

²¹ ꞋEt ꞌilhudzin Herodias ooghá whultsꞌut Herod whuzdli dzin ꞌet dune díztiꞌne, lhuganne moodih, ꞌinkꞌez Galilee whutꞌenne diztiꞌne tubulh bughu nusúya.

²² Herodias ootseꞌ danínya ꞌinkꞌez buba nidai. Herod ꞌinkꞌez ooghu nusjáne tubulh buba hoonzoo. ꞋEt Lerwe Herod tsꞌeke uyúlhni, “Ndai stsꞌo ookaꞌ dini, ꞌi ngha tísdlelh,” yúlhni.

²³ Lhat whe yutsꞌu náhizya whe uyúlhni, “Ndai stsꞌo ookaꞌ dini-i ngha tísdlelh lerwe be usdli-i lhulcho ngha tísdlelh,” yúlhni.

²⁴ ꞋInka tsꞌekeyaz ꞌaz whenája ꞌinkꞌez duloo yoodalhkut, “Di suba ootsꞌu kaꞌ doosniꞌ?” yúlhni, “John dune too be ꞌulhꞌen-un ootsi,” yúlhni, ooloo.

²⁵ Tsꞌeke ꞌahoh lerwe yutsꞌu naóosja ꞌinkꞌez uyúlhni, “John dune too be ꞌulhꞌen-un ootsi ꞌandit ꞌahoh tsetsꞌai be sgha nínꞌaih,” yúlhni.

²⁶ ꞋEt lerwe ꞌahoh ni suliꞌ ꞌet hoontsꞌi ꞌaw yuchꞌa tsédootni ꞌaitꞌoh, ooghu nusjáne bunalh yutsꞌu náhizya ꞌet huwa.

²⁷ ꞋInka ꞌahoh ꞌilhoghun huwunli-un, ꞌadinlane dilhtsꞌi tsꞌe whe yálhꞌaꞌ John dune too be ꞌulhꞌen-un ootsi whusaínooꞌalh wheni. Huwunlí-un, ꞌadinlane dilhtsꞌi tsꞌe whénya ꞌinkꞌez John dune too be ꞌulhꞌen-un yutsi kꞌúnintsel.

²⁸ Tsetsꞌai bé nanꞌai ꞌinkꞌez tsꞌeke yutlꞌa yánkai. ꞋOn ꞌun tsꞌeke duloo tlꞌa yánkai.

²⁹ ꞋEt John dune too be ꞌulhꞌen-un yugha hodulꞌehne huyulh ꞌúdantsꞌo oozi hikunásdil ꞌinkꞌez ꞌahayalhti.

5,000ne dunene Jesus huyooꞌalh-i bugha nínla

³⁰ ꞋEt whelꞌaꞌne whusanáhidil ꞌinkꞌez Jesus te ꞌilhuhozdil ꞌet hidániꞌ ntsꞌoh te néꞌhustꞌen ꞌinkꞌez ndet dune whubuhodalhꞌeꞌ.

³¹ Lhane dune whusahúdulh ꞌinkꞌez whenáhudilh ꞌet huwa Jesus ꞌinkꞌez yugha hodulꞌehne tubulh ꞌuhútíꞌulh ꞌet hoontsꞌi búgha lhúwhulhtsꞌit ꞌinka ndúbulhni, “ꞋUtsꞌun uztoodilh ntsꞌe whenichꞌoh ꞌúztitꞌelh-un, ꞌet la ꞌatsul naoolhyis.”

³² ꞋEt nus tsꞌi be hutizki disoh tsꞌe whuz nehúninki.

³³ ꞋEt hoontsꞌi lhane dune hubanꞌen hutizki whe ꞌinkꞌez ꞌahoh tꞌehonínzun mbe ꞌuntꞌoh ꞌet huwa keyoh totsuk whutꞌenne lhane hilwus whe Jesus ꞌinkꞌez yugha hodulꞌehne tubulh butso ꞌet whuz hoolhghaz.

³⁴ ꞋEt Jesus tsꞌi be hainya whe lhane ꞌilhozdil ꞌet ꞌubunilhꞌen tube bugha téꞌninzun ꞌantsꞌi ꞌusbaiyaz ooghulhídloh-i léꞌhintꞌoh ꞌinka lhat-un ꞌet whubuwhéoodunilhꞌeꞌ.

³⁵ ꞋAwet yoo ꞌún hoozulh whe yugha hodulꞌehne highu nindil ꞌinkꞌez ꞌuhuyúlhni, “ꞋAwet tube yoo ꞌún hoozulh ꞌinkꞌez njan disoh cha ꞌuhoontꞌoh.

³⁶ Nyoonne dune nabalhꞌalh nꞌaho keyoh whutoh ꞌoho tꞌalh-i náhoodoket huyooꞌalh-i hooloh ꞌet huwa.”

³⁷ ꞋEt Jesus ubúlhni, “Nohni hitiꞌulh-i bugha náhꞌaih dah.” ꞋEt huyoodulhkut, “Whuz uztidulh hukwaꞌ ninzun ꞌinkꞌez $200.00 kꞌoh tꞌalh-i tsꞌonket ꞌinkꞌez eh bugha ꞌúztiꞌalh?”

³⁸ ꞋEt hoontsꞌi Jesus uboodulhkut, “Lhes dáltsuk ahtꞌi whunulhꞌen.” ꞋEt nahuhoonꞌai whe ꞌet ꞌuhuyúlhni, “Kwulaiꞌ liba ꞌinkꞌez nanki lho cha.”

³⁹ Jesus ꞌet yugha hodulꞌehne ubúlhni, “Tsꞌiyawh dune lhelhdun nébunulhle ꞌinkꞌez tlꞌoyaz kꞌut hudóltsꞌiꞌ.”

⁴⁰ ꞋEt dune nétlꞌa hudiltsꞌiꞌ tlꞌoyaz kꞌut whunizyat whunizyai ꞌinkꞌez kwulat whúnizyai whe lhaniwh te lhuhúsguz.

⁴¹ ꞋEt Jesus liba ꞌinkꞌez lho bulh yílhchoot ndo yakꞌuz tsꞌe yutánꞌen ꞌinkꞌez, “Musi,” ni whe tenadidli. Lhes taidanyuz ꞌinkꞌez yugha hodulꞌehne whutahayólelh ha butlꞌa yánla. Nanki lho cha ꞌet ndúyinla whe butainínla.

⁴² Tsꞌiyawh ꞌuhanꞌal ꞌinkꞌez ꞌuhunisdai.

⁴³ ꞋEt yugha hodulꞌehne whunizyat ꞌon ꞌat nanki chalhyal dizbun-i lho ꞌinkꞌez lhes bulh ꞌet nenínkat-i nahúyalhdzoo.

⁴⁴ 5,000ne dunene butsꞌekooꞌ ꞌinkꞌez bubuzkeh cha lhes huyanꞌal.

Jesus too kꞌut nuya

⁴⁵ ꞋAhoh Jesus yugha hodulꞌehne tsꞌi be nábalhꞌaꞌ ꞌinkꞌez Bethsaida huwhútni keyoh whuz dutso whe balhꞌaꞌ nyan tadatus tsꞌe whuzꞌai. ꞋEt didut nyoonne ꞌilhozdílne whe nábalhꞌaꞌ.

⁴⁶ Whenáhidil whe tenadutidli ha ꞌawet buchꞌa násja ꞌinkꞌez dzulh kꞌuz tsꞌe whénya.

⁴⁷ ꞋAwet húlhgha suliꞌ, ꞌet tsꞌi be taniz hikelh ꞌinkꞌez Jesus dichꞌoh yun kꞌut ꞌuntꞌoh.

⁴⁸ Yugha hodulꞌehne ꞌubunilhꞌen nilhtsꞌi dulhyo hikelh tube hunintꞌi whe hutꞌo. ꞋEt bundadaꞌ yutilhkaí-un, ꞌet Jesus too kꞌut uyalh whe nus whuz bughu ninya ꞌankwꞌus bube nghoozya.

⁴⁹ Hitilhꞌen too kꞌut uyalh whe, “Dune tsin ꞌutꞌen,” huninzun. Tube whé hunilhjoot ꞌinkꞌez ꞌuhúlhdzul.

⁵⁰ ꞋEt Jesus ꞌahoh bubulh yátilhduk, “Nohdzi ulhtus úlhtsi! Si ꞌustꞌen. Whenulhjut íloh,” ubúlhni.

⁵¹ ꞋEt tsꞌi bet bughu dénya. ꞋEt ꞌawet ooztsꞌi ꞌinkꞌez yugha hodulꞌehne tube buba hooncha.

⁵² Whutsodaꞌ liba dáyinla la ꞌet ꞌaw tsꞌihꞌun nelhúhohooꞌal, ꞌet huwa njan lhes ghun dahóoja-un budzi dutsꞌun ꞌet huwa.

Gennesaret whutꞌenne undudáne Jesus soo náꞌbulhꞌen

⁵³ ꞋEt bun kꞌut yahúninki ꞌinkꞌez keyoh Gennesaret huwhútni-un, ꞌet tsꞌi whehídinguz.

⁵⁴ Tsꞌi be ha hándil whe ꞌahoh Jesus nahuyóolhtsꞌit.

⁵⁵ Ndulcho nahúlhghaz ꞌinkꞌez ntsꞌoh la Jesus usda huyulh ꞌúditsꞌo ꞌoh ndudáne hikꞌustez bulh hitsꞌú butule.

⁵⁶ ꞋInkꞌez ntsꞌoh la Jesus nuya keyoh whuyaz kꞌus keyoh whuti kꞌus nꞌaho keyoh ꞌeꞌóoket-un whutoh dune ꞌilhodúlh-un whuz ndudáne nébuhunle ꞌinkꞌez Jesus híghu tédudlih, “Nyunaih ꞌantsꞌi ooban ꞌet ndudáne hitꞌa óonalh,” huyúlhni. ꞋEt mbene yutꞌaíznaine tsꞌiyawh soo náꞌhuja.